#طوبى "جنة طوبى"
#جمان_فريد
#النهايه1
(تحوي النهايه نسبه عاليه من الدراما في بعض المشاهد اللي يعطي فيها الكاتب مساحة لخياله لتخيل بعد ماتفكر به الشخصيات وماكانت تشعر به...النهايه بأحداثها بشكل عام حزينه جدا لذلك نتمنى من اي قارئ قلبه مايتحملش يأجل قرائتها او يعرف شن صار فيها من خلال التعليقات...)
●●●●●●●●●●●●●●●●●●●●
🍂 يا حبذا الجنَّة، وحِلوُ رِياضها؛ فكلُّ ما هنا مُتعِبُ، وكلُّ من هنا مُتعَبُ🍂
___________________________________________
في احدى الحدائق العامه اللي غطتها الخضرة في المانيا
كانت مقعمزة بروحها وهي تشوف لظرف الرساله اللي عطهالها الصابر..الصابر جاب معاه الرساله بعد ماشاف ان انسب وقت تقراها فيه هو هالوقت توقع تنهار بعد تطلع النتيجة،توقع تكره الناس اللي ربوها وتنقم عليهم بالذات لطفي اللي تعاطف جدا معاه بعد المعاناة اللي عاشها..
كان الصابر هو وعبد القيوم مقعمزين بعيد عليها شويه وهما يشوفولها نظرات الصابر ليها كانت نظرات حزن لكن عبد القيوم كان يشوفلها بألم وقلق وخوف..
بلع ريقه لما شافها فتحت الظرف..وهي لما كانت تفتح فيه كانت حاسه بقلبها وكأنه ينعصر عصر..
طلعت الرساله بيدها اللي ترجف وهي تبكي بصمت بعدين فتحتها وبدت تقرا فيها..
(طوبى..بنتي..
ان شاء الله وانتي تقري في كلامي توا ماتكونيش كارهتيني ان شاء الله..صدقيني مادرت اللي درته الا غصب عني يابنتي في البدايه كنت رافض مانبيش لانغلط في حق الله ولافي حقك ولافي حق نفسي لكن وين ريتك وشفت وجهك السمح خشيتي قلبي طول وحبيتك..حبيتك وكأنك بنتي اني من صلبي اني ومن يومها واني هدا اللي نحس بيه ماقدرتش نفرط فيك ولانخليك لحد ماقدرتش)
هني طوبى ذاكرتها جابتلها اللحظه الاخيرة اللي جمعتها بلطفي قبل وفاته لما قاللها..
"سامحيني..ماقدرتش"
غمضت عيونها بشده وشهقت بعبرتها وهي تبكي وعبد القيوم والصابر قلوبهم مفطورة من الآسى ع حالها..
هدت شويه وهي تقول بأنفاس متسارعه..
"لاإله إله إلا الله..لاإله إلا الله"
بعدين رجعت كملت باقي الرساله..
(ماكنتش نحساب روحي حتى اني بنظلمك هكي ظلمتك هلبه يابنتي سامحيني..نسألك بالله سامحيني..سادني الذنب اللي قاعد حامله ع ظهري ومش عارف كيف بنقابل بيه ربي سامحيني نسألك بالله سامحيني يابنتي ارجوك..)
ولهني تم كلامه اللي بعده طوبى انهارت بالبكاء وقعدت تقول وهي تبكي بالعبره..
"ياريتك ماحبيتني ياريتك ماحبيتني"
ناض عبد القيوم ومشالها طول..وصل فيها قعمز جنبها وضمها لحضنه وهي تبكي وتقول..
"ربي يسامحك ربي يسامحك ع اللي درته في روحك وفيا ربي يسامحك ربي يسامحك"
الصابر قعد يمرر في نظره ع المكان وهو يمسح في دموعه وعبد القيوم وهو يضم فيها كان متمني لو ياخد عنها الوجع اللي تحس بيه ويريحها منه عاش قرابة السنه ومعاها وهو خايف من هاليوم وحاول يهرب بيها منه لكن لامفر من القدر..
🍃🍃🍃🍃🍃
"جونا الصبح سميرة ونسرين ومعاهم مغليه بش سلموا علينا والله يابنتي حسيت روحي تقول ودعت والديا"
نجاح وهي ترشف ودموعها ينزلوا قالت..
/وراما شن صار فيها؟
عواطف وهي تمسح في دموعها قالت..
/قريب ماتت بالبكي مسكينه من لما طلعوا حبست روحها في دارها حتى الغدي مابتش تتغدا..
نجاح:لاإله إلا الله لاإله إلا الله..مأساة مأساة والله وين يجي الليل تجي بين عيوني طوبى نبدا خاطري نعرف شن صاير فيها شن دايرة مسكينه..وقعدت تبكي..
نجمه وهي تمسح في دموعها قالت..
/الفجي فيها وفي عيلة الواعر كلهم...
فجأه عيطت بنت نجاح الرضيعه ناضتلها عواطف خدتها بش تسكتها وعيون نجاح علي بنتها ومازال بين عيونها طوبى اللي مش قادرة تنسى الخير اللي داراته معاها يوم من الأيام وغير حياتها كليا للاحسن..
🍃اهل الشارع بعد ماسيبوه عيلة شنيبه وعيلة الواعر كانت ردود افعالهم متضاربه بين اللي مش مهتم وبين اللي حس ان الشارع خسر اكبر واقدم عايلتين فيه ومن بعد رحيلهم وكأنه ولى فاضي..لاعاد في مطاحن ولاقهوة..يعني حتى الشارع ولى زي طوبى من غير هوية...
🍃🍃🍃
وفي هاليوم قررت مطيره بعد روحت من تونس هي وراجلها من رحلة علاج تمشي لحوش ولد خوها،الفترة الاخيره من وجودها غادي كانت صفيه بس اللي تواصل فيها وين تسأل فيها عن باقي العيله كانت صفيه ترد في ردود مش مقنعه شغلت قلب مطيرة هلبه..
الوحيده اللي مازال ماتعرفش لأن وضعها الصحي مايسمحش مطيره بعد مات بوها كبرت سنين وصحتها بدت تتراجع وحتى الكورونا ساهمت في هالتعب واللي كمل عليها مسح الاثر الوحيد اللي قعد من بوها وامها حوشهم..
وهالشي خلاهم كلهم يدرقوا عليها ويتمنوا لو يقدروا مايخلوهاش تعرف شي نهائي..
🍃"حمد لله ع سلامتك "
مطيره:الله يسلمك ياصفيه..وين غرفه والصغويرة؟
صفيه؛مطلعهم حسين يغير جوهم..
مطيره:وعلاش ماطلعوك معاهم؟
صفيه وهي تقول بشي من التوتر..
/ماعنديش خلوق..خشي خشي قعمزي..
خشوا لدار المعيشه وقعمزوا فيها ومطيره تقول..
/ماتقوليليش علاش سدرة مسكرة تليفونها غيرت شفرتها ولاشنو؟
صفيه بشي من الربكه:ايه تليفونها فسد..
مطيره شافتلها بشك بعدين قالت..
/باهي مافيش كيف توصلي فيها وتقوليلها تجي بش نشوفها..
صفيه:ماظنيش تجي لاهيه بالمحوال..
وهي متفاجئة قالت...
/محوال!؟
فهاللحظه انفتح باب الحوش وخشوا الصغار يجروا ووراهم حسين وغرفه..
غرفه انصدمت لما سمعت صوت عمتها وهي ترحب بالصغار شافت لحسين بخوف لقاته يسمع في صوت عمته وع وجهه باديه ملامح القلق..
🍃🍃🍃🍃
"امس لما اتصلت بيا فتحت معاي موضوع الفاتحه"
مروة بشي من الانفعال ودموعها في عيونها..
/فاتحة شني هادي!!؟ مش وقته بكل..
صفاء بملامح وجه حزينه قالت..
/هو ماقالك شي عنها؟
مروة بضيق:قالي عليها واني قتله يأجلها لعطلة السنه وبعدين صار اللي صار..
نزلوا دموع فايزة وهي تقول..
/حتى اني قلتلها في الوقت الحالي مانقدر ندير شي..مسحت دموعها وقالت..حاطه يدها ع صدرها وقالت طول قلبي مغموم حتى خدمه مش قادرة نخدم..
دمعوا عيون صفاء وهي تقول..
/بكري كلمتني راما وهي تبكي قالت عيلة شنيبه طلعوا من حوشهم..
انهارت فايزة بالبكي وبناتها قعدوا يبكوا معاها..
🍃وتاله في دارها تكلم في صاحبتها سدرة وهي تبكي..
/اخي ع الدنيا اخي..
"خي عليها وبس ياتاله! تعرفي كل مانشوف جنة قلبي يتقطع من كثر ماتصخف فيا ولا لما تسمع عليوه ولايحيى ينادوا ماما تقعد تبكي وتقول نبي مامي ودور عليها.."
تاله بنبرة الم قالت..
/ياروحي عليها ياروحي...
🍃🍃🍃
يقولوا قدر البنت زي قدر امها..البنت تاخد من حظ ونصيب امها والله اعلم بمدى صحة هالكلام من عدمه..
لكن طوبى تشابهت في قدرها مع قدر امها عزيزة..وجنة ورثت منهم هالقدر المؤلم...
وهدا الذنب الوحيد اللي مش قادرة طوبى تسامح نفسها عليه لو انها رفضت الزواج وقعدت لهالوقت من دون زواج وعرفت هالحقيقة القاتله كان اهون..اهون من ان يكون في ضحية تانيه تعاني ماعانت..
طوبى توا حاسه روحها ماتستحقش تكون ام لجنة لأن امومتها لجنة حتخليها تتلوث بالذنب اللي جاب لمهل ع الدنيا هي هكي شافت وحست شافت ان الأسلم لجنة تقعد مع اهلها وتتربى وسطهم وتعيش حياة خير من اللي هي عاشتها حياة حقيقيه بعيد عن الكذب والاستغفال..واكيد هدا مش بالأمر الهين عليها بس يقعد اهون من وجود بنتها مع ام من دون نسب ولااصل...
🍃🍃🍃🍃🍃
"قريب خشت في عقلها وطلعت بعدين اغمى عليها"
سدرة وهي تكلم في غرفه هاتفيا مسحت بيدها ع نص وجهها بعدين رشفت وقالت..
/حسبي الله ونعم الوكيل..باهي شن صار فيها بعدين؟
"رفعوها حسين وعمتي للمصحة وروح بيها راجلها من غادي"
سدرة تنهدت بحرقه وقالت..
/كان نقولك المهدي شن قالي ياغرفه..
"شني!؟"
سدرة بنبرة باكيه قالت..
/مش هو اتصل بعبد القيوم بش يسأل عن طوبى قاله ليهم ايام مسافرين ألمانيا بش يديروا DNA..
"ياربي!!"
سدرة بنبرة مخنوقه قالت..
/قال هداكا شد فيه وخلاهم يديروه ولما طلعت النتيجة طوبى تعبت هلبه وهداكا الحقير قال خش في حالة صدمه..
جاها صوت غرفه وهي تبكي..
طلعت آه قهر وألم بنبرة مرتعشه من سدرة وقعدت تبكي حتى هي..
🍃زي ماكانت مطيره منهارة وهي تقول لراجلها..
/بنهبل ياشكري بنهبل..عقلي بيطلع من راسي..ااه ياوبيي وياوخيي من يومكم وانتم هكي دسوا في من اللي مايندس ولما يطلع تخرب الدنيا كلها..ياروحي عليك ياطويبه ياروحي عليك يابنتي من يومك في الهم،البلي اللي نزل عليك لو ينزل ع جبل يهده..البنيه هادي زي النسيمه ياشكري والله غير شوفة وجهها ترد الروح والله احسن وحده فيهم كلهم اكثر وحده مربيه وتخاف ربي تحفظ في القران وتقرا في الدين وتلبس في الخمار..تي دخلت بنادم للإسلام ياشكري..كيف هادي تطلع..غمت وجهها بإيديها وقالت..لاياربي مش قادرة نقولها..خبطت بإيديها ع رجليها وقالت..علاش حني يصير فينا هكي ياربي علاش حني هكي علاش..
شكري شد ايديها الزوز وقال بحزن..
/ماتقوليش هكي يامطيره استغفري ربك..اللي صار صار توا العياط والتخبيط مايغيروا شي..ادعيلها ربي يديرلها طريق وادعي لخوك ربي يغفرله ويسامحه..
هي ببكي قالت..
/اه ياريتني لحقت بوي وامي ولطفي وورده ياريتني لحقتهم..ضمها راجلها وقال...قولي استغفر الله قولي لاإله الا الله..
وهي تبكي بألم قالت..
/لاإله الاالله..ااه ياوريده ياريتك ماريتيه عمل السو هدا ياريتك ماريتيه...
🍃وعمل السوء هدا قاعد غارق في ظلام دامس ظلام الصدمة الكبيره اللي مش قادر يطلع منها..
مش قادر يطلع من غريق الذكريات اللي مايشوفش فيهم الا في عزيزة وطوبى وكأنه نسي كل البشر ومعاش يذكر غيرهم..
مقعمز ع مقعد طويل قدام البحر وذراعه اليمين واقف بعيد عليه شويه وهو يشوفله بحزن وقلق لعند ماجاه اتصال رد عليه وبعدين نهي المكالمه والتفت وقعد يشوف لجهة معينه للحظات لعند مابانت عليه وحده لابسه جلابيه واسعه وشاربه كبيرة وحاطه ع كتافها شال شتوي كانت تمشي بسرعة لعند ماوصلت فيه وقفت جنبه وعيونها اللي كانت تنزل منهم الدموع ع مختار..
الاقجم بألم..
/ليه اكثر من اربعه ساعات ع هالحاله..
رشفت ومسحت دموعها وقدمتله..
قعمزت ع طرف الكرسي وهي تشوف لملامحه نزلوا دموعها وهي تقول..
"مختار"
هو لأول مرة من اربعه ساعات يستجيب لحد يكلمه وجه نظره يمين شافها..دام النظر ليها للحظات بعدين بدت ع وجهه ملامح الألم وهو يقول..
/فاتن..اني قتلت مارييت يافاتن..قالك الاقجم يافاتن..قالك شن درت فيها..اني مش قادر نصدق لتوا كيف درت في مارييت هكي اني مش حكيتلك كل شي عن الماضي متاعي مش قتلك في شي صار مش قادر نتفكره..شفتي شن هو الشي هدا يافاتن!! رد نظره للبحر وقال بضحكه وهو يبكي..طلعت عندي بنت تصدقي نسخة تانيه منها..فاتن..شافلها وقال وهو مصدوم..
"طوبى طلعت بنتي"
ضحك مرة تانيه ودموعه ينزلوا زي السيل وهو يقول..
/هديكا البنت اللئيمه والطيبه الواعرة والحنينه هديكا الثعلبه..القطوسه هديكا بنتي اني..وقعد يضحك ويضحك ودموعه ينزلوا وفاتن تشوفله وهي تبكي حتى الاقجم تأثر هلبه لكن دموعه نزلوا لما شافه كيف ضحكه انقلب لبكي بكي كله ألم..وندم..وقهرة وحسرة..وفجأه بغضب شديد رفع راسه فوق وصاح بصوت عالي وعاود صاح مرة تانيه ورجع انهار بالبكي وفاتن تشوفله وهي تبكي بعدين طلعت من شنطتها شيشة ميه فتحتها ومدتهاله وقالت..
/اشرب مية مرقيه..
سكت فجأة عن البكاء ووجه نظره للشيشه وتجي قدامه ذكرى لأيام مرضه بالكورونا..
"خود اشرب هادي ميه مرقيه
قصدك تنفستي ودفلتي فيها وتبيني نشربها!؟
إنا لله وإنا اليه راجعون..
ضحك وقال..تي نبصر عليك يابلهاء هاتي هاتي"
خدي الشيشه من فاتن بقوة وقعد يشرب منها وهو يرجف والميه تنزل ع لحيته وحوايجه وفاتن تشوفله بنظرات ألم تشبه نظرات الأقجم ليه...
🍀🍀🍀🍀🍀🍀🍀
