🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "أحببتُ اللّٰه حبًّا هوَّن عليَّ كلَّ مصيبةٍ، ورضَّاني بكلِّ بليّةٍ، فلا أُبالي مع حبِّي إيَّاه على ما أصبحت ولا على ما أمسيت".
- عامر بن قيس🍃
_______________________________________
⏳
في أحد ممرات مشفى لدولة ما..
طبيب ومجموعة ممرضين يجروا بباريلا تحمل عليها مريض فاقد للوعي..
وراهم ناس تعني المريض هدا وهما في حالة خوف وقلق بالغين..
وقفوا مجرد مادخلوا المريض لحجرة الفحص..
واحد فيهم قال..
🍃الأقجم بقلق:متأكدة ياامينه ماخدي شي من وراك؟
امينه ودموعها في عيونها قالت..
/والله العظيم لا..هو نفسه واخد باله من صحته كويس ودايما بينبه عليا ماعملش الحاجات اللي بضروا في الأكل حتى المليسا سابها خالص..
حط الاقجم ايديه ورا ظهره وهو يمرر في نظراته القلقة ع المكان..
ع جية طبيب ليبي مقيم في الدولة اللي هما فيها ويخدم في نفس المشفى..
وقف عليهم وقال..
/شن صارله؟
فك الأقجم ايديه وقال..
/مش عارف يادكتور..كنت واقف معاه نهدرزوا عادي فجأه غم عليه النفس قعد يشهق تقول يطلع في الروح بعدين طاح من طوله..
عقد الطبيب حواجبه وهو يفكر للحظات بعدين قال..
/نفسها الحاله اللي صارتله قبل اكثر من مرة..
الاقجم:ايه.
قاله:ياخد في دواه في وقته ماشي ع النظام اللي داروهوله؟
امينه بقلق:والله يادكتور احنا وهو واخدين بالنا من صحته كويس
الاقجم:ونظام العلاج ماشي عليه يادكتور..
قاله:بالك وصله خبر فجعه؟
الاقجم:والله لليوم مايستعمل في الهاتف،واي خبر يخص شغله ولاعيلته يسمعه مني واني مانوصلاش في الاخبار اللي تخليه ينفعل..
مسح الطبيب ع نص وجهه لذقنه وقال..
/تمام تمام..ومشي وخلاهم وهما في حالة خوف وترقب..
🍃حالة الخوف والترقب اللي عايشين فيها احباب طوبى عليها..
سدرة كانت واقفه في الممر اللي فيه حجرة الفحص اللي قاعده فيها طوبى..
رافعه ايديها لأعلى صدرها وهي ضامتهم لبعض من التوتر والخوف..
وكل شويه تبلع في ريقها وقلبها يكاد يطلع من حلقها من قوة الدق..
وجنبها صفيه مقعمزة وهي تفرك في ايديها ببعض وتقول..
"يارب الطف بيها يارب"
...بعيد عنهم في اخر الممر كانوا موجودين المهدي وعبد المطلب..
عبد المطلب كان مقعمز وهو يشوف للفراغ قاعد عايش في نفس الموقف مش قادر يطلع منه حالة طوبى وقتها كانت مرعبه وتقطع القلب..صراخها قاعد في وذانه حالة الألم الفضيع اللي كانت عايشتها قاعده بين عيونه..وضعها اللي كان اشبه بالجنون..مش قادر يتجاوز شي من هدا كله..
اما المهدي..
كان في قمة الخوف عليها وع مرته..مش بس خايف كان مرعوب..
🍃الرعب اللي دب في قلوب صفيه وسدرة لما شافوا الطبيبه ووراها ممرضه طالعين يجروا..
الطبيبه كانت تتكلم بالهاتف وهي تقول..
/العمليات يادكتور العمليات..ايه استئصال..
الجمله الأخيره خشت في وذن سدرة زي السيف ..
اندفعت ناحيتهم تجري وهي تقول بذعر..
/عملية شني!؟ قولي قولي..طوبى خيرها!؟
الدكتورة كانت جدا مستعجله كل اللي قالاته..
"حالتها خطيرة"
ومشت تجري..
سدرة اللي كادت تفقد عقلها بأعلى صوتها قالت..
/خيرها باهي خيرها !!
من بعيد عبد المطلب والمهدي يشوفولهم بخوف كبير..
والممرضة جاوبت سدرة وهي تقول..
/المريضه عندها ورم ليفي كبير هلبه في الرحم لازم يستأصلوه فورا..
قدمتلها صفيه وهي تقول بصدمه ودموعها ينزلوا..
/شن هو؟
الممرضه بملامح اسف قالت..
"الرحم"
ومشت بسرعه وهي تقول بألم..
/لاحول ولاقوة الا بالله..
قالتها وهي تسمع في عياط سدرة اللي كادت تنجن..
كانت تخبط ع وجهها وع رجليها وهي تقول..
"حي عليا حي..حي ياربي حي.."
ومعاش قالت بعد هكي غير..
"ياربي"
وهي تصرخ بقهر وفجع..
المهدي قدملها يجري وصل فيها وهو يقول بألم..
/سدرة مش هكي ياسدرة!
سكتت وهي تشوفله للحظات بعدين تبدلت ملامح وجهها للحقد والغل..قدمتله وقعدت تضرب في صدره وتدفع فيه وهي تقول..
"كله منكم..كله منكم..ياحقراء..يامجرمين..كله منكم"
المهدي انصدم وبقوة..
اما صفيه فكانت وهي تبكي تحاول تشد سدرة وتهديها..
لعند ماطلعوا من الحجرة طبيبه تانيه وممرضات وطلبوا منهم يغادروا المكان..
وسدرة كانت في حالة هستيريا من الفجعه ع بنت روحها..
نستها كل شي حتى حملها اللي خلاها قواها تخور وتفقد وعيها...
🍃🍃🍃
وهاديه اللي قعدت في الحوش مع الصغار..
كانت ترقد فيهم وهي تبكي..
رقدتهم كلهم ع فراشاتهم ماعدا جنة اللي كانت واخدتها في حضنها..
البنت شافت امها بهديكا الحاله وقعدت مفجوعه وترجف وهي تنادي ببكاء..
"ماما ماما"
حتى بعد خداها النوم قاعدة تطلع منها العبرات وهاديه تسمع فيها وتشوف لملامح وجهها وقلبها متقطع وهي تبكي بألم..
🥀🥀🥀
بعد ماداروا كل الفحوصات والاجراءات اللازمه دخلوا طوبى بسرعة للعمليات..وضعها كان خطير مايستناش..
🍃هي توا تحت ايدين الاطباء وبين ايدين رفيقها الأعلى اللي قدر عليها تعيش ابتلاء جديد وعظيم..
صعب جدا على أي مراة مهما كان عمرها تفقد اهم جزء في جسمها..الركن الأساسي لأنوثتها..من غيره حتولي ناقصة هلبه..
ممكن لو فقداته في عمر كبير يكون اثر هالفقد هين بعض شيء بس لما تفقده في ربيع عمرها في بدايه هالربيع وهي مازال ماتعدتش الخمسه وعشرين سنه حيكون اثر هالفقد مؤلم وعميق جدا...
وطوبى عاشت عمرها من لما جت ع الدنيا في الفقد وكل فقد تعيشه يكون اقوى من اللي قبله..
اي حد يشوف ويعرف اللي عاشاته مايقدرش يتخيل انه ممكن يتحمل يعيش ربعه..بل ممكن مايقدرش يتخيل ان في انسان عاش كل هالابتلاءات بالذات لما يكون في عمرها هي عاشت ماممكن يعيشه غيرها في خمسين ولاستين سنة..!
لكن الابتلاء للبني آدم في الدنيا ع قدر محبة الله ليه لوكان صالح وقلبه نظيف وقريب جدا منه يبتليه باللي يخليه يزهد في الدنيا ومايشوف فيها شي يستاهل الزعل عليه🍃
🍃🍃🍃🍃
"ياجالي قتلك الموضوع طلع من ايديا"
الجالي وهو يتكلم هاتفيا قال بصدمه ممزوجه بالغضب..
/ماقدرتش تعرف من وراه!؟
"اللي نعرفه ان وراه ناس مانبيش نخش معاهم في مشاكل"
هز راسه بعصبيه حاول يكتمها وهو يقول..
/باهي باهي..ع العموم مشكور وبارك الله فيك..ونهي المكالمه وهو يرجف من الغضب..
رمي هاتفه ع طاوله قدامه بعدين ناض..
وهو ينوض حس بدوخه خلاته يرجع يقعمز مرة تانيه..غمض عيونه للحظات بعدين فتحهم..خدي نفس..ورجع ناض مرة تانيه ومشي توجه للحمام...
🍁بعيد عنه بمسافة بعيده في نفس المدينه اللي قاعد فيها..
تحديدا احد البنايات السكنيه..
في صالة احدى الشقق لهالبنايه كانوا مقعمزين واحد يحكي والتاني يسمع..
🍃ايمن الفاندي:كل من ليه معاه شغل هني نهي التعامل معاه حتى الليبين لأنهم مشاركين رجال اعمال هني واوروبيين تهمهم هلبه سمعة الجهة اللي يتعاملوا سواء كان فرد ولامؤسسة..
عبد القيوم:بعدين شن بيصير!؟
ايمن؛بعدين نعطوا اللي عندنا لجماعتنا هني تسلمه لجهة امنيه وهالجهة يرحلوه للبلاد وغادي يتلقوه جماعتنا ويديروله اللازم..
عبد القيوم:نبيله اعدام ياايمن..
ايمن:من غير كلام هادي..شروع في القتل ياعبد القيوم هدا الجماعه اللي اجرهم اعترفوا عليه وع انفسهم ولما يوصل غادي جماعتنا يخلوه هو نفسه يعترف بجرايمه...
خدي عبد القيوم نفس وطلعه بعدين قال..
/يعني نروح بكرا وانا مطمن!؟
ابتسم ايمن وهو يقول..
/عيب عاد..ضرب بيده ع صدره..رانا تريس نهنوا..
ابتسم عبد القيوم وقال..
/لأخر عمري حنقعد مذكرلك هالمعروف ياولد الفاندي..
هز ايمن راسه وهو مبتسم بصمت..
🍃🍃🍃🍃
بعد ماخدت العملية وقتها وتمت بنجاح..
طلعوها لحجرة العناية الفائقة بيخلوها لفترة محددة وبعدين بيرفعوها لحجرة خاصة بيها..
وهي في العناية الفائقه كانت الطبيب اللي اجرى عمليه استئصال الرحم واقف وهو طبيبة تانيه حضرت العمليه ع المهدي وعبد المطلب وصفيه يشرحلهم عن وضع طوبى بإختصار..
🍃"الورم كان حجمه كبير جدا الحل الدائم والوحيد لعلاجه هو اسئتصال الرحم وهي وصلت هني في حالة خطيرة جدا كادت ديرلها كارثه معقوله ماطلعتش عليها اعراض تنبه لحدوث مشكله في الرحم!؟"
صفيه وهي تبكي قالت..
/قبل كانوا عندها اكياس عالجت عليهم وحملت يادكتور لكن ربي مارادش لحملها يتم رمت في الشهر الرابع..
الطبيب قال..
/امتى صارت حالة الاجهاض؟
قالتله؛بقولي ليها فوق الشهرين..
قال:ماقالوش الطبيب ولا الطبيبه اللي كانوا مسؤولين عن حالتها ان عندها ورم في الرحم وغالبا يكون هو سبب مشكلة الاجهاض!؟
حركت راسها بالنفي وهي تقول..
/لايادكتور حكايه الورم هادي سمعناها منكم توا..
الطبيبه قالت بأسف..
/لاحول ولاقوة الا بالله..
عبد المطلب بضيق وألم قال..
/باهي بعد العمليه هادي مايصيرلها شي تاني!؟
الطبيب قال..
/بإذن الله لا..بس معليشي عندي سؤال تاني الاخت قالت كانت حامل يعني هي متزوجه..وينه زوجها؟!
نزلت صفيه عيونها اللي كانت الدموع تسيل منهم..
وعبد المطلب مرر نظره حواليه وقعد ملتزم الصمت..
هني رد المهدي اللي كان في حالة نفسيه يرثى لها..
/مسافر..
🍁🍁🍁🍁
مسافر..
ولو كان يعرف اللي بيصير في غيابه ماكانش سيب المكان اللي هي فيه لحظه وحده..
لو كان يعرف..احتمال كبير يطلع روح الجالي بإيديه ومايراجيش فيه حكم محكمه..
عبد القيوم وهو يجهز حاليا في شنطته للسفر في ساعات الصباح الأولى كان في داخله شوق كبير ولهفه كبيرة للقائها وكان ناوي يقعد وراها لين يرجعها لقلبه وحياته بعد مازال اكبر عقبه حالت بينه وبينها وماكانش عارف ان في عقبة تانيه اكبر من الجالي ولت بينه وبين حبيبة روحه..
🍃🍃🍃
طوبى اللي كانت ليها مكانة كبيره في قلوب هلبه ناس في محيطها..
وان ماكانتش موجوده معاهم في نفس المكان يلحقهم قلبها اللي ديما يسأل ويعطف ويحن..
🍃زي كاريمان اللي تعودت بيها يوميا تكلمها فيديو ع الصبح تسأل عليها ويوروا بعض شن داروا من فطور وكيف نسقوه ووين حطوه..
اليوم فقدتها..فقدت اتصالها..اتصلت هي بيها ماجاهاش منها رد وبدي القلق يتسلل لقلبها..
"كاريمان"
التفتت شافت للباب وهي مفجوعه..
الصابر بإستغراب..
/كنك؟
بلعت ريقها وقالت..
/غريبه اليوم طوبى ماكلمتنيش ونتصل بيها ماتردش..
عقد حواجبه وبان في وجهه الخوف وهو يقول..
/مرات مشغوله بشي ولامازالت ماوعت..
كاريمان بقلق قالت..
/شن مازالت ما وعت!؟ يوميا تكلم فيا الساعه سبعه الصبح وتوا الساعه قريب عشرة..
نزل نظره الفطور اللي كان محطوط ع الطاوله وهو يفكر بعدين رد نظره لمرته وقال..
/كلمي حد من هلها..
هزت راسها وقالت..
/ايه..تو نكلم مرت عمها..
🍃وهاديه في هالوقت بعد ماحممت الصغار وفطرتهم حطتلهم ع قناة رسوم متحركه وقعمزت حداهم وهي في قمة الحزن ودموعها مابطلوش نزول..
رن هاتفها اللي كان في حجرها بلهفة خوف رفعاته وشافت المتصل قلبها زاد وجعها وقالت..
/فقدت اتصالها الصبح مسكينه..شن بنقوللها بس!
مررت نظرها ع الصغار بعدين ناضت ومشت طلعت من الدار بش ترد ع كاريمان..
🍃وتلقى اريج رقم هاديه مشغول وقلبها يزيد ينشغل ع طوبى اللي تعودت تصبح عليهم كلهم ع قروب الماسنجر واللي زايد حالة الخوف عندها هو تاريخ ليلة الأمس..
/غير من تكلم بس!..
خشت ع القروب وكتبت رساله وبعتتها..
(اتصلت بهادية توا لقيته مشغول).
غرفه..
(حتى سدرة مختفيه قلبي مش مطمن يااريج)
اريج بخوف:ياربي سترك يارب..
ع خشة راجلها عليها وهو يقول بنبرة زادت خوفتها..
/السلام عليكم..
رفعت عيونها وشافت ملامحه اللي ماتبشرش بالخير وقلبها طاح في جوفها من الخوف...
🍃🍃🍃🍃
مقعمزه هي وامها واختها ع طاوله فطور..
امها واختها كانوا يهدرزوا وهي سرحانه بتفكيرها..
"سوفي"
التفتت لأختها اللي كانت تكلم فيها وهي تقول..
/شو؟
شاديه:انتي وينك مو معنا ابدا..
سلافه:عن شنو كنتوا عم تحكوا؟
لبانه بضحكه:عن عرسك انت وسعدو باشا..
ضحكت امها..
ضحكت سلافه وقالت..
/امبارح قلي شورايك تقدمي لموعد لتشرين الاول..
ضحكوا وامها قالت..
/شو خفيف دم وحكياتو ظراف..
لبانه:ومعز ماما؟
شاديه بضحكه:وهو كمان بيطير العقل..
ضحكوا بناتها بعدين سلافه تنهدت وقالت..
/تعرفوا..قلبي مع طوبى بالايام الاخيره وضعها مو منيح وامبارح..وسكتت..
شاديه:ايه كملي..
سلافه غيرت اللي كانت بتقوله وهي ترد ع امها..
/مبارح سألوا عليها كتير بالمعرض والاستاذة نفيسه طلبت مني اقنعها تجي بكرا..بكرا اخر يوم بالمعرض..
شافت لهاتفها اللي كان محطوط ع الطاوله خداته وقالت..
/رح اتصل فيها..
امها واختها رجعوا يفطروا وهما يشوفولها..
فجأة سمعوا صوت ولد لبانه يبكي قالت بتذمر..
/يييه علينا..
وناضت ومشت طلعت لولدها وامها وهي تشوفلها حركت راسها يمين ويسار بعدم رضا بعدين حركت نظرها لبنتها الكبيره لما سمعتها تقول بنبرة قلق..
/ماعم بترد..
شاديه:اليوم جمعه بنتي يمكن لستا نايمه او مشغوله بشي..
سلافه بقلق..
/رح احكي مع مرت عمها..
امها قعدت تشوفلها بإستغراب..
وهي اتصلت بهاديه..نادي الخط مرتين بعدين انفتح..
سلافه:الو صباح الخير هاديه.....بدت ع وجهها ملامح الخوف وهي تقول..شوبو صوتك؟!!
تبدلت ملامح وجه شاديه للقلق ومنها للخوف لما شافت ملامح الصدمه باديه ع وجه بنتها اللي قالت بشي من الفجعه..
"شو!!؟"
نزلوا دموع سلافه حطت يدها ع جبهتها وهي تقول بنبرة صدمه..
/ياالله دخيلك!
شاديه بخوف:شوفي!؟
وبنتها قالت بنبرة مخنوقة بعض الشيء..
/طيب وينها هي!؟
هزت راسها بإيجاب بعدين قالت بنفس النبره..
/الله يشفيها..
نزلت الهاتف وحطاته ع الطاوله وهي في حالة استيعاب بسبب اللي سمعاته..
شاديه بتوتر مع الخوف قالت...
/شوفي بنتي!؟
ردت ع امها وهي تقول بنبرة باكيه وملامح الصدمه ع وجهها..
/طوبى...شالولها الرحم..
حطت شاديه يدها ع صدرها وهي مفجوعه..
وبنتها حطت ايديها ع فمها وانهارت بالبكاء..
🍃🍃🍃🍃
"هدا وين تأكدت ان هديكا الشيطانة هي اللي سحرتها دارت فيها زي ماصارلها بالزبط"
هادي نسرين كانت تتكلم وهي في حالة صدمه ودموعها مابطلوش نزول..
ردت عليها سميرة تقول وهي تبكي..
/جعن ربي يسلط عليها شياطين الانس والجن..وانتم مش عارفه ربي كيف بيدير فيكم انتم السبب يانسرين..
نسرين حطت ايديها ع وجهها وهي تبكي وتقول..
/والله ماكنت نبي والله العظيم...
وقعدت تبكي بالعبرة وسميرة تبكي معاها..
وصوت بكاهم يسمعوا فيه جوري وسدرة المنتهى اللي كانوا مقعمزات في دار المعيشه وهما يبكوا..
جوري ببكاء:قصدهم ع ماما ولا هي اللي دارت هكي في خالتي طوبى..
سدرة ماقدرتش ترد عليها..
قالت جوري بنفس النبرة:
/عارفتهم قصدهم عليها..قتلك ياسدرة امي مراة شريرة وماعندهاش قلب..نكرهها نكرهها ان شاء الله تموت..
ودفنت راسها في ركابها اللي حضنتهم بقوة وهي تبكي بألم وسدرة تشوفلها بألم وهي تبكي وفي داخلها خوف كبير..خوف من عواقب اللي صار يولي عليهم حتى هما..
🍃ومن دار المعيشه لدار مغليه اللي كانت تكلم فيها بنتها الكبيره هاتفيا..
"حولولها الرحم!"
مغليه بألم:ايه يابنتي ايه حولولها الرحم..الحق وجعتني هلبه..ياريته ماكان هداكا اليوم اللي في جرته شوفي شن صار..
"قولي ياريت نهار جانا طاهر لزتيه ومعاش خلتيه يخشلنا حوش راهو ماعشناش هالايام السود"
مغليه وهي تمسح في دموعها قالت بألم..
/صدقتي يابنتي صدقتي..
🍃🍃🍃🍃
خبر هالفاجعه وصل للمحجوب اللي كاد يطير عقله لما سمع بيه ومرته انهارت وقعدت تبكي بحرقه..
بدون تأجيل مشوا للمصحة واول ماوصلوا فيها وخشولها لقوا نضال والمهدي في الباحة متاعها..
المحجوب عقله ماكانش عليه اندفع بغضب ناحية ولاد عيلة شنيبه ونزل عليهم غضبه بكلام شديد اللهجة وجارح وهما ماقدروش يردوا بحرف..
وماسكتش المحجوب اللي لما خداه عبد المطلب ودخله المصحه..
🍃اما نبيله مشت وين ماكانوا موجودات صفيه واريج..
لقتهم في حالة يرثى لها وعرفت منهم ان سدرة رقدت في نفس المصحه بسبب الانفعال الشديد اللي اثر ع حملها وكاد يفقدها جنينها..
🍃لكن الى الآن كل اللي قاعدين برا البلاد ماوصلهمش شي.. وغرفه اللي كانت ع نار لما اتصلت بهاديه هاديه اضطرت تكذب عليها وتقول ان صار لطوبى نفس الحاله المعتاده..اغماء وهبوط في الضغط..
🍃🍃🍃
وتمر الساعات..
وتنقل طوبى من غرفة العنايه لغرفتها في المصحة..
سدرة في هالأثناء فاقت والحت واصرت ع الطبيبه متاعها بسماح ليها تمشي تشوف طوبى والطبيبه طلبت من ممرضة ترفعها لحجرة طوبى..
وين وصلت غادي وخشت للحجره شافتها اريج اللي كانت مقعمزة جنب سرير طوبى وهي تبكي ودات في البكاء لما قالت سدرة بقهرة وحسرة..
/ياروحي عليها بنيتي..ياروحي عليك ياماما..ياروحي عليك..ياعيوني انتي ياعيوني..
وقفت سدرة حداها وشدت يدها بلطف وهي تقول..
/ربي ينتقم منهم شر انتقام..ربي ينتقم من كل حد قهرك ووجعك ووصل فيك وكان سبب اللي تعاني فيه توا يابنتي..
طبست ع يدها باستها بشفايفها اللي يرجفوا بعدين غمضت عيونها بشده من الالم وهي تقول..
/ياريتني مكانك ياريت اللي فيك فيا..ياريت ربي دارها فيا ولاداره فيك يابنية قلبي وروحي..
🌠وطوبى بين اليقظه والمنام..شافت شي بين الحلم والرؤيه..
شافت الكعبه المشرفة كانت شكل جميل جدا وستارها جديد يلمع..وخيوطه الذهبيه تبرق..
والريحة الحلوة..ايه هي نفس الريحه كانت اقوى واحلى من قبل..
...فتحت عيونها شويه شويه...
"طوبى"
سمعت اسمها باصوات متداخله..رجعت غمضت عيونها بعدين فتحتهم...
يدوب حركت عيونها يمينها شافت اريج..بدت ع وجهها ابتسامه تعب حلوة خلت اريج تبتسم تلقائيا..
"طوبى عيوني"
حركت نظرها يسارها شافت سدرة توسعت ابتسامتها شويه وقالت بصوت يدوب طالع..
"سدرة"
باست سدرة يدها وقالت..
/حبيبتي..
ع خشة الطبيبه ومعاها زوز ممرضات طلبوا منهم يطلعوا بش يديروا لطوبى فحوصات معينه..
طلعوا اريج وسدرة بالغصب..
والطبيبه وهي تشوف لطوبى قالت..
/شن حالك توا ياطوبى؟
طوبى بنبرة متعبه..
/شن صارلي؟
الطبيبه:انتي وصلتي هني وحالتك كانت حرجه لكن رب العالمين لطف بيك وساعدنا ننقدوك ياطوبى..طوبى حبيبتي كان عندك ورم ليفي حجمه كبير ع الرحم خلانا نديروا عملية لإستئصال الرحم..
الممرضات وهما يشوفولها كانوا مترقبين لردة فعلها..
والطبيبه زيهم وهي تقول..
/قولي الحمد لله ياطوبى كان ممكن يصيرلك شي يخليك تفقدي حياتك..
غيرت طوبى نظرها ع الطبيبه لسقف الحجره ..
جت بين عيونها الكعبه اللي شافتها في الحلم او الرؤيا وتلقائيا بدت تقرا..
¤ولنبلونكم بشيء من الخوف والجوع ونقص في الأموال والأنفس والثمرات وبشر الصابرين○وبشر الصابرين الذين إذا اصابتهم مصيبة قالوا إنا لله وإنا إليه راجعون○اولئك عليهم صلوات من ربهم وأولئك هم المهتدون¤
وقالت بعد كملت قراية الآية..
"إنا لله..وإنا إليه..راجعون"
وطاحوا دموعها زي مانزلوا دموع الطبيبه والممرضات معاها..
🍃🍃🍃🍃
ومع مغرب نفس اليوم كانوا عرب الشرق واصلين لطرابلس..
كاريمان وسالمين دموعهم ماجفوش وقلوبهم كانت مفطورة من الالم وازواجهم ماكانوش خير منهم الا ان دموعهم قعدت محبوسه في محجر العين..بالذات الصابر اللي كان فوق فجعته وحزن متملكه غضب شديد..
🍁🍁🍁
في نفس الوقت..
عبد القيوم بعد ماوصل لليبيا عصرا روح لشقته رقد فيها ساعه بعدين ناض وجهز نفسه وطلع ووجهته كانت حوش المحجوب..
لما وصل للحوش اتصل بيه مرارا وتكرارا ماحصلش رد حط في باله انه واخد منه موقف..
نزل من السيارة للباب..ضرب ع جرس الانترفون مارد حد..دق الباب ماطلع حد..
رجع للسيارة وهو يقول..
/اكيد في حوشها..ابتسم وشغل سيارته وتوجه لشارع القهوة..
🍃🍃🍃
لما وصل وخش للشارع..
من قدام القهوة شاف محمد المهدي سيارته وهي درس قدام حوش طوبى..
نزل منها..ومشي لجرس الانترفون ضرب عليه وهو متمني طوبى ترد عليه وكان يدعي ربي يتحقق اللي تمناه..
لكن ع ماقد ضرب عليه مارد حد..دق ع الباب كذلك ماطلع حد..
اجتاح قلبه خوف..خلاه ياخد نفس ويطلعه..
"تارقي"
التفت لمحمد اللي ناداه لقاه جاي ناحيته..
وصل فيه وسلم عليه بالأحضان بعدين قاله..
/حمد لله ع سلامتك..
عبد القيوم وهو عاقد حواجبه بخوف قال..
/ماتعرفش وينهم؟
تنهد محمد المهدي بتوتر وع وجهه كانت باديه ملامح الألم بعدين بدي يحكي..
🍃والعيله في هالوقت كانوا في فيلا حسين..
والسبب..الحالة اللي صابت طوبى شهدوا عليها الصغار وخلتهم في حالة رعب كل مايجوا يطلعوا من الدار يتخيلوا اللي صار ويخشوا في نوبة بكاء وهما ينادوا في امهاتهم ولأن هاديه عجزت عن انها تهديهم كلمت راجلها وهو فكر يطلعهم لحوش حسين وخبر صفيه باللي صار وبإقتراحه وهي وافقت فورا..
اساسا كلهم بعد اللي عاشوه هديكا الليله مش حيقدروا يقعدوا في الحوش..
🍁🍁🍁🍁
درست اللاند كروزر قدام مصحة القدس وصوت حرق عجلها انسمع في الشارع كله..
فتح الباب ونزل يجري وخلاها مفتوحه والمفتاح فيها..
اخر همه..بل مش همه نهائي..مافي شي يعني عنده حاجه قدامها اللي كان يبي يوصل فيها وبس..
وهو خاش لداخل المصحه تقابل مع الدكتور اياد اللي شافه في حالة تخوف لما جي بيفوت من جنبه اياد شده وقاله..
/عبد القيوم..
عبد القيوم وهو مفجوع ولون وجهه شاحب قاله..
/طوبى وين!؟
اياد وع وجهه باديه ملامح الألم قاله..
/تعالى معاي..
🍃🍃🍃
وين مافي الحجرة الخاصه اللي قاعده فيها طوبى..
كانوا كاريمان وسالمين مقعمزين مع سدرة قدام الحجره وهما يراجوا الممرضات والطبيبه يطلعوا منها..
بعد العمليه كان في بعد الامور لازم يديروها لطوبى وهي ضمن المتابعه لحالتها بعد العمليه خصوصا وان وضعها كان حرج..
الثلاثه وهما يستنوا كانت عقولهم معاها هي وفي عالمها هي ودموعهم مابطلتش نزول..
رشفت سالمين حركت نظرها ع طول ممر شافت عبد القيوم جاي من اخره ومعاه الدكتور اياد اندهشت وهي تقول..
/عبد القيوم!
شافولها كاريمان وسدرة بعدين شافوا وين تشوف..
سدرة بدون تفكير ناضت ومشتله لما قربت توصل فيه قالت ببكاء وعتب وبألم شديد..
/ريت شن صار فيها من غيرك ريت..شن صار فيها لما قالوا بطلقها..شفت شن صار فيها ياعبد القيوم!
عبد القيوم ماكانتش عنده قابليه ولاجهد يسأل ولاياخد ولايعطي هو يبي يشوفها بس..
بنبرة مرتجفه قال لسدرة..
/شفتوها!؟
سدرة وهي تبكي قالت..
/ايه..تقول ميتة بعيد وبر عليها..
اشر بيده اللي كانت ترجف ع باب حجرتها وهي تقول..
/هنا!؟
كاريمان قالتله بنبره باكيه..
/الدكتورة عندها..
هو بدون مايتسنى ثانيه زياده مشي فتح الباب وخش عليهم..
🥀طوبى كانت تشوف للممرضه كيف تساويلها في جهاز راكب فيها يخص البول..
بعد ماكملت قالت..
/تمام دكتورة..
وفي هاللحظه يخش عليهم عبد القيوم..
كلهم وجهوا انظارهم ليه بما فيهم هي اللي اول ماجوا عيونها في عيونه نزلوا دموعها...
#امتحان
#طوبى
...يتبع...
