هاقد وصلنا إلى مشارف النهايات..
بين ايديكم الاحداث الاخيره لقصة طوبى اللي حتكشف تفاصيل كتيرة مبهمة وغامضه..
بعضكم ممكن مايصدقهاش او يقتنع بيها واني وظيفتي هني ننقلها وكل قارئ حيتلقاها حسب تفكيره وسعة ادراكه..
🍂ويااما فيك يادنيا مدسوس حكايات لو تطلع تشيب شعر الرضيع..
🍂وياما فيك ياواقعنا من مآسي صادمة تدمي القلب والعيون...
وفي هالحياة ياما نعيشوا وياما نشوفوا وياما نسمعوا..
..كل شي ممكن يصير حتى اللي ينقال عليه غير متوقع ومستحيل..
وزي ماقال دوستويفسكي مرة..
🍃" لا داعي للدهشة كل شيء يمكن أن يقع للإنسان
حتى الأمور التي كان لا يتصورها في الحلم "🍃
///////////////////////////////////////////////////////////
#طوبى "جنة طوبى"
#جمان_فريد
#الجزء_الأخير"إمتحان/نهائي4"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الجنة
ألا إن سلعة الله غاليه..إلا إن سلعة الله الجنة..
..رسول الله صلى الله عليه وسلم.. 🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 - يخيّل إليّ أن الإنسان، حين يداهمه هلاكٌ لا سبيل إلى تحاشيه، يشعر عندئذ برغبة لا تقاوم في أن يقعد مغمضاً عينيه وليحدث ما يحدث.
- دوستويفسكي 🍃
_______________________________________
"باهي ياحلو قولي لشن وصلت بعد تفكير السنين هذين كلهم.."
ضحكت ضحكه تخفي بيها غصتها بعدين بلعت ريقها وقالت..
/كان تبي نوليلك عندي شرط نبيك تنفده..
عقد حواجبه بإبتسامه وقال..
/وشنو شرطك؟
تنهدت بإبتسامه تخفي بيها وجع كبير بعدين قالت..
/تتزوج..
قعد محتفظ بإبتسامته وعقدة حواجبه وهو يشوفلها لكنه التزم الصمت..
وهي تشوفله وتحاول تخفي التوتر اللي يبينوا فيه عيونها معاش تحملت طول صمته وسألاته تقول..
/سمعتني!؟
مسح بيده ع لحيته وهو يهز في راسه بإيجاب بعدين قال..
/ونفكر...هو شرطك سمح وماعنديش فيه مشكله لكن بنزيد عليه حاجه..
وهي شاده دموعها بقوة ابتسمت بتصنع وقالت..
/شن هي؟
قاللها:نبي ناخد تلاته مع بعضهن في نفس الليله..
غمضت عيونها بعدين فتحتهم وقالت بإبتسامه..
/نحكي جد راهو..
حرك راسه بالنفي وقال..
/لاتبصري..
قالت:والله نحكي جد..
شد يدها اللي كانت حاطتها ع الطاوله وقال بحزم..
/نا قلت تبصري واخر مرة تبصري البصارة البايخة هذي..
كيف جت بتتكلم قاطعها وهو شاد ع يدها بقوة وقال..
/خلينا نحكوا في الجد..بكرا حفلة التكريم وكيف ماتعرفي بيكرموك ع اللوحة اللي شاركتي بيها في اخر معرض قلت في بالي اكيد مش حتحضري ونا ناخدها عنك وبعد نطلع من غادي نجيك للحوش وانتي تكوني مجهزة نفسك معليش قلبي جنة خليها مع اختك سدرة الفترة هذي لأني ناوي نطلع بيك برا البلاد ومش حنقولك وين توا خليها بعدين..تمام روحي؟
نزلوا دموعها وهي تشوفله بإبتسامه الم..
وهو زاد شد ع يدها وعيونه اللي كانت باينه فيهم لمعة الدموع يشوفوا لعيونها بعشق وشوق واصرار..
تنهدت من قلبها بعدين رشفت وقالت..
/باهي..باهي..لكن نبيك تعطيني وعد..نهار تحس روحك راغب الصغار وتبي تتزوج قولي طول وانا والله ماحنطلب منك الطلاق المهم مادير شي يخليني نحس اني وليت عبء عليك ومخليني معاك غصب عنك..
هز راسه وقال:ياودي حاضر..باهي..اللي تبيه..المهم معاش تحرميني منك..لو شن يصير ياطوبى ردي بالك تظلميني معاك مرة تانيه..
ابتسمت من قلبها ودموعها تنزل..
هو ناض وقربلها كرسيه قعمز جنبها وقعد يمسح في دموعها بعدين شد وجهها بإيديه وطبع قبله عميقة ع جبينها...
🍁وكملوا باقي لقائهم والحب محاوطهم من كل جانب تبادلوا احاديث مختلفه وكلها كانت حلوة يخش فيها الحب والغزل احيانا وطوبى طول ماهي معاه كانت تضحك وتبتسم من قلبها..
🍃وفي حوشها كانت قاعدة سدرة بولدها مع هاديه وجنة جاية بش تقعد لين يروح المهدي من سفرته وفي الحقيقه هي كانت تبي تقعد مع طوبى اطول فترة ممكنه والسبب احساس غريب..مخيف مروادها من فترة مش قادرة تخلص منه..
🍃وهالاحساس كان متمكن من سميتها..خوفها من انها تخسر امها تانيه بسبب الاحداث اللي قاعدة تصير حواليها الخوف من انها ترجع تعيش شعور الفقد مجددا..
🍃🍃🍃
في الكوجينه مقعمزة هي وبنت عمتها وبنت عمها يسمعولهة بحزن وهي تحكي عن الافكار السوداء المسيطرة ع عقلها..
🍃"ماصدقت حياتنا ولت عاديه وهاديه زي حياة الناس مانبيش نرجعوا نتشردوا مرة تانيه"
جوري وهي تسمع فيها كانت حاسه بحزن شديد..
اما سدرة حامد قالت..
/حولي من راسك الحاجه هادي مستحيله تصير،مرت خالي عندها ولد من بوك وحامل تاني وراهو تحب خالو هلبه مستحيل تسيبه
سدرة المهدي وهي تبكي..
/حتى اني مرات نقول لروحي هكي لكن نخاف هلبه لو تصير حاجه تانيه بعدين..
قالتلها:شن مازال بيصير اكثر من هكي!؟
دق باب الكوجينه الخارجي..
سدرة حامد قالت..
/منو..
"افتحوا هيا"
رفعت سدرة المهدي وشاحها ع راسها ولفت اطرافه حوالين رقبتها..
وسدرة حامد ناضت وفتحت الباب..
ويخش خوها ومعاه ولد خالته والمطر بالتهم..
سدرة:شن طلعكم انتم؟
خوها رد عليها وهو ينزل في برنوسه وجنبه ولد خالته نزل برنوسه وعيونه ع سدرة اللي كانت منزله راسها وهي تمسح في دموعها
محمد حامد:سكرتوا علينا البيبان كلهم جينا من هني..
قالتله اخته:خيركم ماجيتوش من القدام؟
شاف لسدرة وقال..
/سمعت بيكم دايرين ..سكت وقدملها وهو يقول..تبكي!؟
ولد الصيد شافله بنظرة حاده..
هي ناضت طول ومشت طلعت من الكوجينه وجوري ناضت وراها ولحقتها..
سدرة حامد:اسمع محمد ريح روحك البنت مش ناقصاتك..
قاللها:باهي خيرها تبكي!؟
طلع ولد الصيد عن صمته وقاله..
/وانت شن دخلك؟
التفتله وهو يشوفله بإبتسامة تهكم..
سدرة حامد قالت بإنزعاج..
/اسمعوا فكونا من دوشتكم مش ناقصينكم خودوا عشاكم من الكوشه واطلعوا..
ومشت طلعت من الكوجينه بسرعه..
محمد الصيد شاف لولد خالته بنظرة حاده بعدين مشي للكوشه فتحها وخدي منها حصته بعدين توجه للباب الدخلاني وطلع منه..
ضحك محمد حامد ضحكه خفيفه ساخرة ومشي خدي حصته وطلع وراه..
وتوجهوا مع بعض للمربوعه وين خشولها تفاجئوا بيزن راقد فيها وهو غارق في النوم..
مط محمد الصيد شفايفه للأسفل بتهكم..
ومحمد حامد ضحك وهو يحرك في راسه يمين ويسار..
☘هو اللي عزمهم ع البيتزا ولما جوا للحوش اتصلوا بيه مرارا بش يفتحلهم ماردش عليهم لأنه كان واصل لسابع حلم☘
🍃🍃🍃
وحط عبد القيوم طوبى في حوشها وهو مجبر مش قادر يتحمل فراقها اكثر من هكي ومش عارف كيف بيصبر لتاني يوم..
اما هي ماكانتش قادرة تحس بشعور الفرح من القرار اللي خداته في شي في داخلها حال بينها وبين فرحة رجوعها لزوجها اللي تحبه حب شديد وعاشت معاه احلى ايام عمرها..
🍃"حاسه روحي وليتله زي المستسلمه وخلاص مش بإرادتي"
سدرة؛مستسلمه لشنو؟
طوبى بضيق:لهلبه حاجات أولهم اني نحبه ونبي نكون معاه..
سدرة:وكيف حاجه زي هادي مش مفرحاتك؟
ابتسمت بأسف وقالت..
/في شن تفرح ياسدرة! سدرة اني نشوف لبعدين ونفكر فيه هو وبس..
سدرة سكتت شويه وهي شاده دموعها وقالت..
/باهي شن شرطي عليه؟
بنفس الابتسامه:شرطت عليه يتزوج وهو قال لا..
ابتسمت سدرة من بين دموعها وجي بين عيونها حديث دار بينها وبين عبد القيوم في حضور المحجوب لما كانت طوبى راقدة في المصحة..
🔺️🔺️🔺️في وقت سابق🔺️🔺️🔺️
سدرة بإبتسامة حزن قالت..
/حتى بعد اللي صار فيها توا مازال تبيها؟
قاللها والدموع في عيونه..
/واكثر من قبل..
المحجوب:واهلك ياعبد القيوم تبي تقطعهم مرة وحده!؟
قاله:مش قاطعهم حنخليهم يتقبلوا ويرضوا...
سدرة بألم..
/بشني بيرضوا ولاشني ياعبدالقيوم!؟ هي لانها مطلقه وعندها بنت مارضوش بيها وزياده عليها اللي داره فيكم هداكا الحقير..تي هي لما كانت حامل مافي حد منهم عبرها ولادورها كيف وتوا معاش تقدر دير الصغار بكل..كيف لو عرفوا...حطت ايديها ع وجهها وقعدت تبكي..
المحجوب طبطب ع ذراعها وهو يقول لعبد القيوم..
/ماتجريش ورا مشاعرك ياولدي وحكم عقلك واختار الاصلح ليك وليها..
قاله:الاصلح ليا وليها انها تكون معاي ونكون معاها واللي مش عاجبه سلامته سوا انتم ولاهلي..
سدرة نزلت ايديها عن عيونها وهي تشوفله بإمتنان..
وهو بعد ماشافلها للحظات وغير عيونه عنها قال..
/ونعطيكم علم من توا لو شفت ان قعادها هنا بيزيدها على مافيها حناخدها ونطلع بيها من البلاد مرة وحده...
🔺️🔺️🔺️الوقت الحاضر🔺️🔺️🔺️
ابتسمت سدرة من بين دموعها وهي تقول..
/افرحي ياعيوني افرحي بالنعمه اللي عطهالك ربي راجل زي هدا مفروض تسجدي لربي شكر كل يوم اللي خلاه من نصيبك اللي زي عبد القيوم معاش في منهم يابنتي حافظي ع نعمة ربك وماتسكثريش ع روحك الفرح ياعيوني..
تنهدت طوبى من قلبها وهي مبتسمة ودموعها تنزل..
مسحتهم سدرة وقالت..
/قالك بتسافروا ولا؟ سافروا وعيشوا جوكم وماتخمميش في جنة كلنا معاها..
قربت منها طوبى باستها من خدها وخشت في حضنها وسدرة ضمتها ودموعها ينزلوا بحزن وخوف وفي نفسها تدعي..
"يارب سترك وعفوك يارب"
🍃🍃🍃🍃
تاني يوم..
كان الجمعه..
فهاليوم كانت عزومه ولد خالة مختار ليه ع الغدي..
والعزومه هادي اللي كانت في حوش ولد الخاله حضرته خالته حتى هي كان خاطرها تشوف مختار وتهدرز عليه..
🍃ويحل مختار ضيف عليهم بعد صلاة الجمعة مباشرة..
استقبلوه ولدخالته وولاده احلى استقبال وهو كان معاهم ودود بعض الشي لكن الكبر غالب ع اسلوبه في التعامل معاهم..
داروله مايشبه الوليمه فيها كل مالذ وطاب لكن هو ماكلاش منهم الا القليل بسب وضعه الصحي...
وبعد الغدي..
طلبت خالته من ولدها تخلي مختار يخشلها الصالة بش تشوفه ومختار مارفضش هالطلب ومشي مع ولد خالته للصاله وخش عليها..
لما جو عيونه عليها ملوهم الدموع خالته هادي كانت اكثر خالاته شبها بأمه واقربهم ليها..
سلم عليها بالأحضان وكب ع راسها وقعمز معاها..
🍃مختار:ماتغيرتيش هلبه قاعده زي ماانتي..
قالتله:لكن انت تغيرت هلبه..
ابتسم وقال..
/مافي شي يقعد ع حاله ياخالتي..مش حنقعد ديمامختار اللي كنتوا هازيين عليه وتعايروا في امه بيه وقاطعتوها ع خاطره..
لون وجه ولد خالته تغير..
وخالته قالت..
/اني عمري ماهزيت عليك ولاعايرت امك ولاقاطعتها..اني الوحيده اللي ماقاطعتش امك لين توفت يامختار..واني الوحيده من بين خالاتك واسيتها بعد اللي درته ونعرف قداش عانت شي حتى خواتك مايندروش عليه..
ابتسم بتهكم وقال..
/هدا علاش معاش يندروا عليك بعد ماتوفت الله يرحمها..
بلعت ريقها وعيونها تعبوا دموع وهي تقول..
/اني انجبرت..وسامحني ياولدي اللي درته لحق عيلتك وخلا راجلي الله يرحمه يغصب عليا نقطعهم بالمرة..
وجه مختار نظره لمدخل الصاله وع وجهه باديه ملامح الكبر ممزوجه بالحزن وولد خالته اللي كان يشوفله بتوتر قال..
/يام خيرنا عاد ماعزمتاش بش نلوموا ونعاتبوا..!
قالت لولدها..
/هو اللي بدي باللوم والمعاتبه..ردت نظرها لمختار وهي تقول..وهو مايعرف شي..مايعرفش شن صار في امه بعد ماغاب عليها وقداش تعذبت مسكينه..نزلوا دموعها وقالت..قداش دارت ع الدكاترة بش تعالج وتجيب عيل تقول بالك ربي يعوضنا يانجوى عمري ماننسى شن صار فيها لما قاللها الدكتور المصري معاش تقدري تجيبي صغار..
مختار كان يسمع فيها بدون مايشوفلها ودموعه ينزلوا لكن بعد سمع اخر جملة قالتها شافلها طول وهو مستغرب..
وخالته مكملة تقول..
/بكت بكت لين قريب روحها طلعت الله يرحمها..مسحت دموعها وقالت..وبعدين سلمت امرها لله وخلاص..و سبحانك ياربي حتى بعد كلام الدكتور هدا رزقها وحملت لكن ماجاهاش اللي تمناته وقعدت لاخر عمرها متحسرة عليك..
حطت يدها ع يد مختار وشدتها بقوة وهي تقول..اللي خلاني نجي اليوم ونقعمز معاك ياولدي هو شي في نفسي نبي نديره لأختي بش نريحها في قبرها ونريح ضميري من ناحيتها..خلي خواتك في حالهم ياولدي بالذات الصغيره سادها ماشافت وعانت ياولدي..
بكبر قال:علاش اني شن دايرلهم بش تقولي هكي!؟
قالتله:ياولدي راهو نعرف كل شي ونقولهالك لأخر مرة ريح اميمتك في قبرها ياولدي تربح..
🍃حاول مختار يحافظ ع هدوئه قدام خالته وولدها لشي في نفسه يبي يقضيه وهالشي يتعلق بالورث اللي خلاته امه..
نهي الزياره وطلع من عندهم وهو مبتسم بود مصطنع واول ماركب سيارته قعد يراجع في الكلام اللي سمعه من خالته
من كلامها كله جمله وحده بس هي اللي قعد واقف عندها..
" عمري ماننسى شن صار فيها لما قاللها الدكتور المصري معاش تقدري تجيبي صغار.."
امه من بعد ماجابت غرفه قعدت سته سنين من غير حمل وقبل غرفه بعد ماجابت سدرة قعدت 11سنة من غير حمل..واساسا لما جابت سدرة تعبت لدرجة انها ماقدرتش ترضعها..هدا يعني انها فعلا كانت تعاني من مشاكل في الانجاب..وتوا خالته قالت ان اخر طبيب عاينت عنده قاللها ان فرصها في الحمل انعدمت..باهي شن اللي صار وخلاها تحمل بطوبى!!؟
وسرعان ماجاته الاجابه ع هالسؤال..ممكن يصير غلط في التشخيص ياما ناس صار معاهم هكي..
ضيق عيونه وهو يسأل في نفسه..
"اني علاش وقفت عند الحاجه هادي هلبه!؟ حاجه عاديه ماتستاهلش نضيع وقت واني نفكر فيها"
ومع هذا قعد باقي يومه كله وهو يفكر فيها كل مايحاول يشغل نفسه بشي تاني يرجع يفكر فيها..
وكثرة التفكير في كلام خالته خلا عقله يجيبله من الذاكرة مواقف وقف عندها قبل لكن تجاوزها بسرعة..
منها حديث صار بينه وبين صفيه في فترة علاج سدرة..
هالحديث صار بينهم لما سمعت سدرة المكالمه اللي صارت بين صفيه واميمه وعرفت بكل شي صار مع طوبى..
🔺️🔺️🔺️في وقت سابق🔺️🔺️🔺️
صفية بدموع:سدرة تشوف في طوبى بنتها مش اختها امك الله يرحمها وصتها عليها هي بالذات وسدرة ع خاطرها وقفت حياتها..
مختار رفع حاجبه وقال:حتى اني تهمني طوبى زيي زيها اختي زيي زيها اختي اللي لا حضرت ولادتها وماعشتش معاها ولامرحله من مراحل حياتها..
صفيه:حتى حني زيك ياولدي ماحضرناش جيابها جتنا وعمرها قريب عامين لكن خشت قلوبنا كلنا من اول مرة ريناها فيها تقول ربك حط في قلوبنا الحب والحن عليها بش يعوضها بينا لان كاتبلها تكبر من غير امها وياريت هدا حد ماصار فيها..
عقد حواجبه وقال..
/حتى انتي ترمي في الكلام ياخالتي..
قالت:لاياولدي لا..اني الوحيده اللي مش قادرة نصدق فيك اللي قالوه عنك لأني ربيتك مع امك ونعرفك زين يامختار واللي دير فيه مع سدرة توا اكبر امارة..
🔺️🔺️🔺️الوقت الحاضر🔺️🔺️🔺️
حط الكتاب اللي كان يقرا فيه ع طاولة المكتب وهو يقول في نفسه..
"جابتها في بنغازي وروحوا بيها وهي في عمر العامين.."
تأفف وقال..
/لشن تبي توصل ياعقلي لشني!
وجه نظره لباب المكتب وقعد يفرك في جبهته وهو يفكر ومازال عقله يفكر فيه بمواقف يربط فيها ببعض..
جي بين عيونه اول مرة زار فيها حوش اهله لما روح لليبيا حالة سدرة والكلام اللي قالتهوله لما روحت طوبى كان غريب بعض الشيء بالذات لما طلب يشوفها سدرة قالت..
"طوبى بالذات لا"
وزع نظره ع المكان ومازال مستمر بالتفكير وعقله وقفه عند الحوش..اكثر شي مسيطر ع تفكيره واعلى واهم طموحاته..
الحوش هدا علاش بوه باعه لطوبى دونا عن باقي خواته!؟
جاته الاجابه اللي تقول ان ظروفها مش زي ظروفهم باعه ليها هي بش يخليلها شي تنسند عليه..باهي علاش ماباعاش وقسم حقه عليهم وخدت بحقها هي ع الاقل شقة!!؟
وتجيه اجابة السؤال هدا حتى هو يبي حوش العيله يقعد بش يلم بناته وباقي اهله..باهي علاش يبيعه لطوبى تحديدا علاش مش فردوس ولاغرفه الحياش اللي عندهم مش ليهم برواحهم لصغارهم حق معاهم فيها!!؟
وهالاسئله برغم ان ليها اجابه واضحة بس هو حس ان في حلقة مفقوده في شي توا بس حسه غامض ومالاش تفسير مقنع..
مسح بيده ع وجهه بعدين ناض وطلع من ورا المكتب التفت ناحية باب اللي يفتح ع الجنان لما سمع صوت المطر قدمله وقف عليه وقعد يتفرج ع المطر وعقله مابطلش تفكير...🍁🍁🍁🍁
"ااه ياربي مش عارف كيف نشكرك اللي جبرت بخاطري وخليتني نعيش معاها اللحظه هذي"
الكلام هدا قاله عبد القيوم وهو حاضن طوبى قدام باب الفيرندا المسكر وهما يتفرجوا من ورا مرشها "زجاجها" ع خيوط المطر وهي تنزل..
هي ضحكت وقالت..
/تتفكر اول مرة صبت فيها المطر وحني مع بعض؟
قاللها:مافش حاجه عشتها معاك نسيتها كله منقوش نقش في ذاكرة قلبي ياقلبي..
ضحكت بعدين تنهدت وقالت..
/ايامي معاك كلها حلوة بس احلاها اللي كانت في الخمس..
باس راسها وقال..
/وحنعيشوا غيرها احلى منها وفي الخمس وفي مزرعتنا نفسها..
بعدت عنه شويه ورفعت عيونها فيه وهي مضيقه عيونها بتساؤل..
شافها وقال بضحكه..
/تو بعد نروحوا من السفر تفهمي كل شي..
ابتسمت وقالت..
/امم..باهي ماقتليش وين بترفعني؟
بإبتسامه قال..
/لأحلى مكان تشوفي فيه الشتا ع حقيقته السمحة..
ضحكت وقالت..
/تبيني نحبه حتى هو..
بنظرات كلها حب قاللها..
/امم..اللي نحبه لازم تحبيه معاي..
وهي تبادل نفس النظرات قالت..
/من غير ماتقول باهي انت حبيت اللي نحبه؟
قاللها: اللي تحبيه انتي نعشقه عشق..
وتبرق وترعد في هاللحظه وهي من الفجعه خشت في حضنه وضحكت وهو ضمها وقال بضحكه..
/بنسافروا لسويسرا احلى بلاد في الشتا..
هي قالت بإبتسامة..
/حلو..
ابتسم وقال..
/وبإذن الله اول مايفتحوا رحلات العمرة نسافروا للسعوديه..
طوبى:الله لو تجي في رمضان خاطري ندير عمرة في رمضان..
باس راسها بعدين قال..
/إن شاء الله...
🍃🍃🍃🍃
"جوني زوز خطابه لطوبى..تعرفهم الزوز..المحامي عدي..وولد الفاندي ايمن كلموني عليها في عرس يوسف..
=طوبى معاش بنعطيها بكل...
والله هدا شي يرجعلها هي..
=لطفي الله يرحمه وصى كان اطلقت معاش نخليها تتزوج مرة تانيه..
علاش!؟
=مادخلكش.."
وهو مقعمز قدام المدفئة ويسمع في اصوات المطر والرعد تفكر هالحديث اللي دار بينه وبين جده وحده من المواقف اللي استغربلها وقعدت في عقله واليوم خطر ع باله الحديث هدا ورفعه التفكير فيه لرفضهم لعبد القيوم لما خطب طوبى كذا مرة وبعد وقت يتفاجئ انهم زوجوها لعبد القيوم الزواج اللي كان غامض جدا وحواليه هلبه علامات استفهام..اول من يعلم بيه المهدي وعمه وولاده كانوا اخر من يعلم!..
شد ذقنه بيده وزاد ضيق عيونه وعقله مازال قاعد يتعمق بالتفكير وترجع تمر قدامه كل المواقف والاحداث اللي تتعلق بطوبى خصوصا بعد ماروح بسدرة من الخارج بعد ماتعالجت هلبه مواقف صارت كانت غريبه بس يقعد الاكثر غرابه وغموض هو طريقة زواج طوبى من عبد القيوم...
ضم قبضة يده اليمين وحطها ع فمه وفتح عيونه ع وسعهم وهو يقول بصوت مكتوم..
/اللي تفكر فيه يامختار قاعد يرفع لحاجه وحده..نزل يده وقال..والله من البدايه واني حاس بشي مش مريح اتجاهها..ماقدرتش نتقبلها ماحسيتش جيهتها باللي حسيته ناحيه غيرها حتى سدرة ع حقدها وسمها في عيونها في شوية حن لكن هادي لا..ولاكأن في شي يربط بيني وبينها..
🍃ونسي كل موقف عاشه معاها غرقاته فيه بحنها وعطفها وتحدت ع خاطره اغلى الناس ع قلبها وكسرت كلمة المراة اللي عندها بمثابة امها..هو هدا مختار لما ينقم ينسى كل خير شافه من الشخص اللي ناقم عليه قلبه الأسود المريض بالحقد والكبر والأنانيه مايقدرش يحمل فيه ذرة حب صافيه لأي حد احيانا حتى لنفسه🍃..
🍃🍃🍃🍃
مقعمزة ع سريرها في جنبها صحن فواكه تاكل منه وهي لاهيه بالهاتف..
كانت تشوف ع الفيس بوك في صور لحفل التكريم اللي داراته الجمعيه المنظمة ليها طوبى..ابتسمت وهي تشوف لصور فيها عبد القيوم مستلم درع تكريم زوجته وفرحته بيها باينه في عيونه..نسخت رابط المنشور وحطاته في قروبهم ع المانسجر..
شافاته خالتها غرفه وبعتت..
(ربي يخليهم لبعض ومايحرمها منه العمر كله)
ردت اريج..
(آمين)
وتخش عليهم اميمة لما بعتت .
(الله يبارك اللوحة قمة في الابداع ومؤثرة هلبه)
اريج..
(ايه فكرتها حلوة وعميقه)
اميمه..
(روحت معاه؟)
غرفه..
(ايه قالت سدرة بعد المغرب جاها روح بيها)
اميمه..
(اني حاسة ان في شي تاني صار مدرقينه عليا لما سألت امي عن طوبى خنقتها العبرة)
اريج وهي تشوف لرساله اميمه تنهدت بألم ودموعها عبوا عيونها..
شافت غرفه ردت عليها..
(اللي صار مش شويه يااميمه)
اميمه..
(باهي باهي المهم ولت لراجلها وافتكت من هداكا وشره)
غرفه..
(ايه والله الحمد لله)
تفاعلت اريج مع رساله اميمه بقلب احمر ع خشة راجلها عليها وجهت نظره ليه لاحظت ع وجهه ملامح الحزن وعيونه مدمعات..
بضيق قالت..
/نضال..
قعمز ع الكرسي وقال بألم..
/امي عرفت..
قالتله:من قاللها؟
بحزن قال..
/نسرين قالت سمعت وحده من البنات الصغار تدوي عليه قريب هبلت ..
اريج بحزن قالت..
/شن صار فيها؟
نضال خنقاته العبرة وهو يقول..
/بكت لين تعبت ورقدت..حط ايديه ع وجهه وقعد يبكي..
هي نزلت من السرير بشي من الصعوبه ومشتله وصلت فيها ضماته وهي تمسح ع شعره..
🍃زي ماقاعدة دير سميرة مع مغليه وهي راقدة جنبها تمسح ع شعرها وهي تقرا عليها والدموع ينزلوا من عيونها..سميرة وجعها حال مغليه ام وانفجعت ع ضناها لكن اتجاه الجالي ماحستش بأي نوع من المشاعر لكن رايها زي رأي كل من شهد ع اللي داره في طوبى يستحق ماجاه..
🍃وبعيد عن دار مغليه كانت نسرين ضامه جوري اللي كانت تبكي من الشعور بالذنب لان مغلية سمعت منها هي بدون قصد..
وهالحال الذي يرثى له خلا جو الكئابة يسيطر ع الحوش باللي فيه لدرجة ان سدرة حامد واختها فرح معاش ولت عندهم رغبه في زيارته...
🍃"الوضع من سيء لأسوأ ياصاحبي والله مانبي نروح بكل"
مؤيد بأسف:لاحول ولاقوة الا بالله..
تنهد محمد المهدي وقال..
/المهم توا..انت شن كنت تقولي تبي تقولي بكري؟!
مؤيد ابتسم وقال..
/الصيف الجاي ان شاء الله بنخش عز الزوجيه..
تفاجئ محمد وقال..
/منك جد!؟
بضحكه قال..
/والله..
قاله محمد بعدم استيعاب..
/مؤيد!
ضحك بعدين قال..
/تشكيلي هلبه من الوضع غادي مش مرتاحه وحتى اني مش عاجبني وانت عارف..
محمد:لكن هدا زواج مش لعب يامؤيد..
قاله:عارفه مسؤوليه ومسؤوليه ثقيله لكن مانقدرش نخليها في الوضع هدا يامحمد..
محمد:ماليك شن رايهم؟
قاله:مافي حد عند مانع وحتى خوي الكبير اللي قريب يسكن حوشه عطاني الشقه باللي فيها..
رفع محمد حواجبه ونزلهم وهو يقول..
/ع خير ان شاء الله..
ابتسم مؤيد وقال..
/يفرجها ربك إن شاء الله وتلحقني..
ضحك محمد ضحكه خفيفه هونت عليه شويه من الهم المحبوس في صدره..
🍀🍀🍀🍀🍀
بعد مرور يومين..
🍃"خليك عاقله جنوني باهي"
جنة هزت راسها بإيجاب وقالت..
/حاضر..نبي هدايا..
ضمتها بقوة وهي تضحك بعدين قالت..
/حاضر ياعمري حاضر..
بعدت عنها بالغصب ووقفت ع حيلها وهي تقول والدمعة في عينها..
/مانوصيكمش عليها..
هاديه بضحكه:بنيتي هادي في عيوني من داخل..
طوبى بإبتسامة امتنان..
/تسلمي ياهدهد..
سدرة حطت يدها ع كتفها وقالت..
/زي ماقالت هاديه بنيتنا هادي ماتخافيش عليها بري عيشي حياتك وهيجي وماتفكري في شي..
ضمت طوبى بقوة وهالحضن خلا سدرة تحش بشعور خوف وقبضة قلب حضنتها وهي تقول..
/في امان الله ياعيوني..
تباعدت طوبى وهي تمسح في دموعها بعدين سلمت ع الهاديه اللي كانوا دموعها ينزلوا..
ولما جت بتمشي شافت لجنة بإبتسامه بانت ع اللي شافها ابتسامة حزن ولفت ومشت بسرعه وهي تقول..
/السلام عليكم..
حطت هاديه يدها ع قلبها وهي تشوفلها بقلق والحركة هادي شافتها سدرة وقالت بشي من الخوف..
/خيرك هاديه؟
شافتلها هاديه وكيف جت بترد عليها قطع عليها صوت بكي جنة..
هاديه:خيرك جنو؟
حطت جنة ايديها ع عيونها وقالت..
/مامي..
طبست عليها سدرة وضمتها ورفعتها لحضنها وهي تقول..
/تو تروح مامي ومعاها هلبه حاجات حلوة لجنيوه..
وخشت سدرة بجنة وهي تسمح في دموعها وتقول..خل نمشوا نوضوا عليوة ونلعبوا معاه..
تنهدت هاديه بقلق وهي تقول..
/يارب خير يارب..
وخشت للحوش وسكرت الباب وراها..
🍃🍃🍃🍃
حط الكتاب اللي كان يقرا فيه ع طاولة المكتب بعدين حول نظاراته وحطهم فوقه وناض..
مشي بإتجاه الباب وصل فيه وفتح وطلع من المكتب قاصد الكوجينه..
🍃وفي الكوجينه..
كان ذراعه اليمين مقعمز يشرب في القهوة وهو يسمع في مدبرة المنزل تقول..
امينه:بقالوا يومين مش بيخرج من قوظة المكتب ويدوبك بياكل عشان الدوا..
الاقجم:من نهار عزومة ولد خالته اللي جاه جاه في امور مهمه لازم يديرها وكلنب اني نقضيها عنه وفي اللي اجله..اشبح شن صار في هديكا العزومه..
امينه وهي تفكر..
/ربنا يستر..
"اقجم انت هني"
كاد فنجان القهوة يطيح من يد الاقجم من الفجعه..
ناض بيه وهو يقول بشي من التوتر..
/نعم..
مختار بملامح تجهم خالطتها الحيره قال..
/تعال وراي..ومشي..
حط الاقجم الفنجان ولحقه بسرعه وامينه معاه بعيونها وهي تدعي بقلق..
/خير اللهم اجعله خير..
🍃خشوا لحجرة المكتب اللي سكر الأقجم بابها عيونه ع طاولو المكتب شاف عليها كتاب ديني غير نظره عنه بسرعه لمختار لما سمع يقول..
"تقدر تجيبلي اسم مستشفى انولد فيها شخص ما من قبل اكثر من عشرين عام..في 97تحديدا"
الأقجم قال..
/ممكن لكن معلومه زي هادي تاخد وقت..
هز راسه وقال..
/متوقع..تمام نبي منك حاجتين يكونوا عندي في اقرب وقت حاول تخليهم يكونوا عندي في اقرب وقت ياالأقجم..نبي منك تعرفلي..
"اسم المستشفى اللي انولدت فيها طوبى في بنغازي ونبيك تجيبلي نسخة من عقد زواج طوبى وعبد القيوم"
....وللحديث بقية......
