🌿🌿🌿🌿🌿🌿🌿🌿🌿🌿🌿🌿🌿🌿🌿
🍃إنّ في عَينَيها بُكاءً لا تستطيع أَن تُزيلَه مَع الدَمعِ، وسَيَقتُلها هذا البُكاءُ الذي لا يُبكَى🍃
________________________________________
الحادي عشر من شهر صفر..
18سبتمبر..سنة 2021..
🍀يوم السبت
الساعه6:15مساءا..
في جنان حوش طوبى الخلفي...
كانت طوبى واقفه ع المنشر تنشر في حوايج بنتها وصغار اختها وهي تردد في أذكار المساء وتسمع في اصوات العصافير اللي كانت تسبح بحمد ربها قبل الغروب..
بعد ماكملت شغلها قعمزت ع بلوكه "طوبة" كبيرة
وبدت تردد في تسبيح..غمضت عيونها وغاصت بخيالها مع اصوات العصافير وكانها تسمع فيهم يرددوا معاها..
"سبحان الله وبحمده..سبحان الله وبحمده"
وكل ماتردد هالذكر من وسط قلبها تغوص في عمق الخيال اللي وصلها للجنة...
في خيالها هي توا مقعمزة فيها تردد في التسبيح وعصافير الجنة تردد معاها..يمتزج مع اصواتهم صوت مية تخيلت انها لنهر من انهار الجنة قاعد يجري تحتها..
حولت الشبشب من رجليها وحطت ع الارض..مسحت بيهم التراب..تخيلاته تراب الجنة اللي من مسك كل ماتمسح عليه ريحته تزيد تفوح..هالريحة الحلوة المميزة اللي يستحيل وجود مايشبهها في الدنيا..
"طوبى"
فتحت عيونها لما سمعت صوت هاديه وهي تنادي فيها..
رجعت للواقع الدنيوي بكل تفاصيله..لكن..
الريحة مازال موجوده..خدت نفس عميق وهي تشم تبي تتأكد..الريحة هي هي اللي شمتها قبل شهر..
"طوبى"
وجهت نظرها لهاديه وهي تقرب منها..
وكل ماتقرب الريحه تتبدد لعند مااختفت تماما..
طوبى :نعم؟
هاديه:صاحبتك عبير جت..
ناضت وهي تقول بإبتسامه فرح..
/عبورة..
***********
عبير وهي حاضنتها وتقول بعيون مدمعه..
/وينك وينك وين اختفيتي!
طوبى وهي ضامتها قالت بضحكه..
/هاني قاعده ماعندي وين نختفي..
تباعدت عنها عبير وقعدت شادتها وهي تقول..
/وين قاعده! حساباتك ع الفيس اختفت..رقمك غير مستعمل مشيتلك في شقتك مالقيت حد..خوفتيني عليك هلبه..
ابتسمت بحزن وعيونها مليانات دموع وقالت..
/قعمزي تو نحكيلك..
🍃🍃🍃🍃
"وانتي من قالك هالخبر!"
رقيه:ناس معرفه مش لازم نقول من هما..قالوا شدوها بالثابت في صفقة مشبوهه ولا أبصر شنو..
نجمة بإنزعاج: ياودي ماعندنا مانديروا بأخبارها ربي يستر عليها وعلينا..
رقية بإمتعاض..
/هو هدا..
مررت نظرها ع المكان بعدين رداته لنجمة وقالت..
/كنتك بنت فايزة معاش تجيك؟
نجمه:كل خميس عندي هي وسلفاتها..
رقية:قلت بالك بعد ماسكنت حداها امها معاش دوراتك..
نجمة:المراة بنية اصول يارقيه وكنايني كلهم بنات اصول..
رقيه بمسايرة:ايه صدقتي صدقتي..ايه حقه سمعتي بولد فطيطمة..
نجمه بإزدراء:شن دار تاني هالمنجوه!؟
قالت:ياحنة مش مرته كانت حامل وجابت بنت الاسبوع اللي فات..لزها لحوش ماليها وقالت مراة ماتجيب كان في البناويت ماعندي ماندير بيها..
نجمة بقرف:قوله يعطك جدري يرفعك مفروض هي اللي تلزك ياعافن التريس انت اللي ماتجيب كان في البنات مش هي..
ضحكت رقيه وقالت..
/يعطيك الهني يانجيمه ضحكتيني من وسط خاطري..
🍃🍃🍃🍃
"عطيه ماينزعه هالحقير!"
طوبى وهي تمسح في دموعها كملت كلامها لصاحبتها..
/واني من بعد المكالمه هادي خلاص شديت في الطلاق..
عبير ودموعها ينزلوا قالت..
/طلقك؟
حركت طوبى راسها بالنفي وقالت..
/مسكر راسه مايبيش يطلق..
قالتلها؛حاول معاك؟
قالت:هلبه وفي كل مرة كنت نوجع فيه بالقصد بش يطلقني..بعد ماغيرت رقمي هداكا حصل رقمي الجديد من حسين ولد عمي..اتصل بيا رديت عليه ودرت روحي مانعرفاش وسكرت عليه وحظرته..سكتت عن الكلام وبدت تبكي..
وعبير من كثر ماتأثرت ضمتها وقعدت تبكي معاها وهي تدعي..
/الله ينتقم من هداكا المجرم المريض..
وطوبى امنت ورا دعائها بصوتها الباكي المرتجف..
🍃وقعدت عندها عبير ساعة تانيه وجاها راجلها ودعت طوبى وهي تقوللها في كلام يقوى عزمتها..وترجتها ديرلها زيارة في حوشها وطوبى وافقت وقبل لتطلع خدت رقمها الجديد..
🍃هاديه:الله يبارك صاحبتك هادي صاحبة حقانية..
طوبى بإبتسامه:قلبها طيب هلبه وجدعه..
ابتسمت هاديه وقالت..
/ربي يحفظها..بندير قهيوه تانيه بعد المغرب تشربي معاي؟
طوبى:نشربوها مع بعض لما تروح غرفه..
هاديه:ياحنة كلمتني مطيره وقالت بعد مايروحوا من السوق بيتعشوا عندها هي وسدرة وبعدين يروح بيهم محمد المهدي..
هزت طوبى راسها وقالت..
/خلاص نشربوها بعد المغرب..
🍃🍃🍃🍃
الساعه 8:45مساءا..
في المطار..
ماشيين مع بعض وايديهم معانقة بعضها..
هو يجر في الشناطي بيده التانيه ويسمع فيها تقول..
اميمه:كذب عليك بلادك بلادك..
اسامه:لان فيها اهلك والناس اللي تحبيها..
اميمه:لامش هكي بس..من اول ماطلعنا من الطيارة حسيت بشعور حنين رهيب..
رد عليها اسامة وهو يغني..
/كان ماجيناك لمن بنجوا لمن بنجو..
قعدت تضحك..
هو ابتسم وقال..
/اهي اختي ابتهال وراجلها..
اشرلهم اسامه يحي فيهم..هما رودله التحيه وابتهال واميمه تبادلوا الابتسامات..
☘ويروحوا بطريقهم لحوش اهل اسامه اللي كانت ملتمه فيه العيله خوته وخواته..
اول ماخشوا عليهم استقبلوهم اب اسامه وامه وسيله اللي كانت ترحب بيهم بفرحه وهي تقول...
"مرحبتين بحبيب قلبي وحبيبة قلبه"
☘وكان استقبال باقي افراد العيله حلو لأميمه سواء من حمواتها ولاسلفاتها..وبعد سلامها عليهم استأذنت من عزوزتها وطلعت من حداهم بش تكلم امها..
☘☘☘☘
صفيه بفرحة:قالت نبيك تمشي لحوش طوبى نبي نشوفكم كلكم غادي..
"سلمها قطوستي..امتى بتجي؟"
صفيه:خاطرها في الجية من الصبح..
"بنراجيها من الفجر"
صفيه بضحكه:سلم بنية عمها..
"سلمك خالتي"
صفيه بإبتسامه:طلعت غريفة للسوق اليوم؟
"ايه طلعت مع عمتي مطيره وسدرة"
صفيه:باهي باهي..هي مانعطلش عليك سلمي ع هاديه..
☘طوبى:يوصل..تصبحي ع خير..
"قدامك كل خير"
نهت طوبى المكالمه وهي تقول بنبرة حماس لهاديه اللي كانت مقعمزة قدامها..
/غدوة اميمه بتجي من الصبح..
هاديه بضحكه:حمد لله ع سلامتها..
طوبى بإبتسامه:الله يسلمك..خل نكلم غرفه تقول لعمتي تجي غدوة ونخبر اريج..
هاديه:غدوة ماعندكش مدرسه؟
طوبى وهي تتصل بغرفة قالت..
/بنمشي نراقب ع الامتحان الاول ساعة وحدة ونروح...ايوه روفي...
🍃وبعد مارقدوا الصغار وصلوا العشاء بدوا بالتجهيزات لجية اميمه..
دارت هاديه فطيره وجهزت نوعين موالح..وطوبى دارت نوعين حلو تحبهم اميمه بسبوسه ولويزة وناويه دير فطاير جبنة ولحم مع الفجر للفطور..
روحت غرفه منهكه من جولة السوق اللي تهد الحيل يدوب ورتهم شن خدت بعدين خشت رقدت حدا صغارها..
🍃طوبى:خلاص غدوة الغدي رز بالبصله وبنزيدوا ع الموالح اللي درتيهم نوع واحد..
هاديه بنعس قالت:هو هدا..اني خلاص النوم كبس عليا بنمشي نرقد..تصبحي ع خير..
طوبى:قدامك كل خير..
طلعت هاديه من حداها وخلتها تكمل في شغلها بعد ماكملت شطبت الكوجينه ومشت طول للدار تشوف جنه..
ارتاحت لما لقت فراشها نظيف ومع هذا فيقتها ودخلتها الحمام وبعد ماولت بيها للدار ورقدتها دارت نفس الشي مع ولاد اختها...
واخر شي توضت وصلت الوتر..وقعدت في مصلاها تقرا في وردها من القرآن لعند ماغشاها النعاس ومشت للدار رقدت جنب بنتها..
🍃🍃
وبعد فجر تاني يوم..
الأحد..
بدت طوبى في الفطاير..عجنتهم واستنت لين خمرت العجينه وبدت شغلها عليها..تشكيل وحشو..
بعد ماحطتها في الكوشه..فيقت بنتها وحممتها وكذلك غرفه فيقت صغارها وحممتهم وفطرتهم هما وجنة..
في الوقت اللي فيه هاديه تحوس ع الحوش..
🍃طوبى:اني طالعة ماتبوا شي؟
هاديه:اللي نبيه وصيت عليه عمك..
هزت طوبى راسها وقالت..
/السلام عليكم..
هاديه:وعليكم السلام..في أمان الله..
🍃🍃🍃🍃
الساعه 10:30صباحا..
وصل اسامه بزوجته لحوش طوبى..
لقوا في استقبالهم عبد المطلب وصفيه وحسين..
كان اللقاء مؤثر ذرفوا فيه صفيه واميمه ليترات من الدموع..
لكن اول ماخشت ع باقي العيله مطيره وسدرة غيروا الجو بتعليقاتهم اللي خلت اميمه تضحك من قلبها..
سدرة:واخيرا شفت القطوسه سمينه
مطيرة:لكن قاعده طويله..
سدرة:لاهدا مافيش كيف يتغير ياعمتي
واميمه تسمع فيهم وتضحك..
بعدين سلمت ع هاديه واخر من سلمت عليها غرفه..
اميمه بضحكه:مرت خوي!
غرفه بضحكه:حماتي.!
وحضنوا بعض وهما يضحكوا واللي حواليهم يشوفولهم بإبتسامه..
☘☘☘☘
والتموا كلهم في الصاله اللي تعبت بحكاويهم وضحكاتهم واصوات لعب الصغار..
وتروح طوبى للحوش وتخش عليهم وهي متشوقة وملهوفه
اول مابانت عليها اميمه وهي مقعمزة في الصاله قالت بنبرة بهجه..
/ميمو!
اميمة وقتها مش عارفه علاش شافتها بصوت هديكا البنت الصغيره اللي عمرها ماتعداش 11 سنة..
ملامح وجهها كانوا حلوات بزياده وبان عليها الوجه مضوي بشكل غريب..
نزلوا دموعها وجت بتوقف لكن طوبى قدمتلها بسرعه وحلفت عليها تقعمز ولما وصلت فيها طبست عليها وسلموا ع بعض بشوق والزوز دموعهم كانت تنزل..
🍃🍃🍃🍃
في الكوجينه..
اميمه كانت مقعمزة وغرفه وسدرة حواليها يجهزوا في الفطور وهما يسمعوا فيها..
اميمه؛خفت لما نشوفها نلقاها في حالة توجع القلب لكن اللي شفته توا فاجئني هلبه..تبان محلوة بزياده ووجهها منور!
التفتت سدرة وشافت لأميمه بإستغراب..
اما غرفه قالت وهي متأثره..
/اللي صار فيها هالمرة زاد قواها وماهدهاش زي قبل ديما وهي تقول الحمد لله وشاده المصحف والاذكار تصلي في النوافل وقيام الليل..اكثر من مرة نوض في الليل نلقى فيها في الصاله ياتصلي ياتدعي هدا كله خلا اللي يشوفها مايصدقش انها مرت بهدا كله
اميمه وهي تمسح في دموعها قالت..
/لاازكيها ع الله لكن شكلهاقوة ايمانها بانت في وجهها
وسدرة تسمع في كلامهم وهي متاثرة ع الاخر بعد ماسمعت اخر جملة قالتها اميمه طلعت هاربه بدموعها للجنان..
ع خشة طوبى للكوجينه وهي تقول..
/انستي قطوستنا..
وضمتها وهي محاوطة اكتافها..
اميمه وهي تحاول تتمالك نفسها قالت..
/الله يأنسك ياعسل..
تباعدت طوبى وهي تضحك بعدين قعمزت قريبه عليها وهي تقول..
/شن جو الحمل؟
اميمه بإبتسامه تخفي بيها حزنها قالت..
/اهو ماشي الحال الحمد لله..
التفتت عليها غرفه بعد مامسحت دموعها كويس وهي تقول..
/ماعرفتيش جنسه؟
بضحكه قالت:وليد وفرحت قريب طرت لما عرفته وليد..
طوبى بإبتسامه:اكيده بش تسميه علي؟
هزت راسها بإيجاب وهي تضحك..
غرفه؛قلتي لراجلك؟
اميمه: من اول ماعرفت روحي حامل قتله العيل هدا كان جي ولد سامحني فيه بنسميه اني ع جدي الله يرحمه وهو طول قال باهي..
طوبى بإبتسامه:تحلي عويناتك ع خير ان شاء الله..
اميمه وهي مبتسمه قالت..
/اللهم آمين..
🍃🍃🍃🍃
"تفضل..هدا مكتب استاذة سلافة"
بإبتسامه قال..
/مشكورة..
مشت الموظفة اللي تخدم في المعهد وخلت ضيف مديرتها يستعد للدخول عليها في المكتب .
وقف في الباب لقاها واقفه جنب مكتبها تتكلم بالهاتف قعد واقف يتفرج عليها وابتسامته ع وجهه..
وهي اللي كانت لاهية مع المتصل انتبهت لوجوده اشرتله بيدها ع الكرسي وكأنها تقوله..
"تفضل قعمز".
هو ضحك ومشي قعمز وين ماقالتله..
سلافة لما شافت ضحكته استغربت وارتابت وحاولت تنهي المكالمه بسرعه..
نهتها..ومشت قعمزت ورا مكتبها وهي تقول..
/تفضل..بشو بقدر اخدمك..
حك حاجبه وقال بضحكه..
/اول شي خل نعرفك بنفسي..سعد***** عمري 37 عام نخدم في الجمارك وعندي اعمال حره..
ابتسمت وهي عاقده حواجبها بإستغراب.
هو رفع حاجبه اليسار وقال..
/اعزب..
سلافه:معليش هات من الاخر بدت تسجل بالمعهد؟
قال:لو بتقريني انتي ماعنديش مشكله..
ضمت شفايفها داخل وهي مبتسمه بعدين رختهم وقالت..
/ماعندي وقت ضيعو معك..تفضل من هون..
ضحك وقال..
/والله قصدي شريف..
قالت:لوسمحت اطلع بهدوء واحترام احسن ماتطلع بشرشحة..
قعد يضحك بعدين قال بشي من الانفعال..
/والله ماني فايتك بالله..
ناضت ومشت للباب واشرتله عليه بدون ماتتكلم
هو ناض وقال بإبتسامه..
/والله نيتي صافيه بعلامة مابعتت من يفتح معاك موضوع الخطوبه وانتي سكرتيه..
نزلت يدها وهي تشوفله بتفكير..بدت ع وجهها ملامح المفاجاة وقالت بتلقائيه..
/انت اختك بتكون سلفة اخت رفيقتي؟!
ضحك من قلبه وقال..
/ايه اني اخو سلفة اخت رفيقتك..
حست بشي من الارتباك مع احراج وخجل وهو يتأمل فيها بإبتسامة..
قالتله:طيب شوبدك؟
قال:واضح شوبدي نبي نحكي معاك شويه كان عندك وقت..
غيرت نظرها للباب لحظات وهي تفكر بعدين ردت نظرها ليه وهزت راسها بالموافقه..
🍃🍃🍃
في باحة المعهد كانوا واقفين..
هو يتكلم وهي تسمعله..
سعد:اني كنت خاطب من سنتين خطوبة تقليديه..عيلتي تعرفها وتعرف عيلتها شكرولي فيها وقلت ع بركة الله..قعدت خاطبها عام ماتفاهمناش فيه بكل حاولنا نعطوا بعض فرصه لكن مافيهاش كيف دماغي مش راكب ع دماغها وهي في وادي واني في وادي في الاخير كل حد مشي ع حاله واني سكرت موضوع الزواج بكل وهمت في الخدمه..وعاد..ضحك وكمل يقول..امي وخواتي ماخلونيش في حالي بكل وين يشوفوا وجهي قبل ليقولوا صباح الخير ولاكيف حالك امتى تخطب..
ضحكت ضحكه خفيفه..
ابتسم وقال:واني يا نمشي فيهم ونقول مازال يانطنش بكل..ضحك وقال..تصدقي لليوم اللي مشيت فيه لحوش اختي في شارع القهوة وهما يكلموا فيا في نفس الموضوع واني نفوت فيهم وشوفي ربك سبحان الله طلعت من عندها جيتي في وجهي طول وكأن النصيب يقولي مش انت اللي تقرر الحاجه هادي ياسيد التريس..
حطت يدها ع فمها وقلبت وجهها عنه وهي تضحك..
ضحك معاها وقال..
/جديات لما شفتك تفكرست الحكايه عندي ماقدرتش نحولك من راسي سألت عليك والكلام اللي سمعته خلاك تخشي راسي اكثر واكثر وقلت ياسعد مدامك اقتنعت بيها برالها من الباب طول ودرنا الاصول وحضرتها سكرتيها في وجهي..
ربعت ايديها وهي تشوفله بإبتسامه..
وهو كمل يقول..
/تعرفي طارتلي منك وخلتيني نقول لماليا معاش نبي حد يجبد معاي الموضوع هدا بكل خلاص..وخديت وجهي وسافرت فترة برا البلاد سفرة خدمه هي..المهم انتي لحقتيني لغادي..
ضحكت وهو قال بضحكه..
/والله العظيم..وقلت في عقلي ياسعد انت ماتعرفش تستسلم وتسلم في حاجه تبيها برا حاول معاها بروحك..واهو جيتك وقعدت نهدرز ساعة ونفختلك راسك وانتي ساكته ولاكلمة..
هي بإبتسامة قالت..
/انا بموضوع الزواج في عندي شروط صعب توافق عليها..
سعد:قوليهم شروطك مرات ساهل نوافق عليهم..
قالتله:طيب..انا بشتغل اداريه بالمعهد وعضوة بجمعيه خيرية للخطاطين والرسامين وبهديك الجمعيه عم بعمل دورات بفن الخط..هالشغلات ماممكن اتنازل عنهن ابدا..
ضيق عيونه ووزع نظره ع المكان بعدين شافلها وقال..
/خدمتك هني مافيهاش مشكله..لكن حكايه الجمعيه هادي..نشوف صعب مراة متزوجه تقدر توفق بين هدا كله غير هكي الوضع حيكون فيه اختلاط زياده عن اللزوم..
قالت:قلتلك من البدايه صعب توافق عليها..
هو بهدوء قال..
/غير اسمعي مني..المراة شن تبي في حياتها غير انها تستقر وتاخد راجل باهي يدللها ويحطها في عيونه وتجيب منه صغار شعرهم ناري وخدودهم منمشه..
ضحكت غصب عنها..
قاللها بضحكه:ندوي جديات..اني والله ماعندي مشكله تخدمي هني نص دوام واني نساعدك لكن الجمعيه بالله عليك فكينا منها.. هي قالت بضحكه تعجب..
/عم تحكي وكأني وافقت عليك!..
عض ع شفه السفلي بعدين قال بإبتسامه..
/معليشي..في حد في حياتك؟
قالت:لو كان في ماكنت عم بحكي معك هلأ..
ضحك وقال..
/خلاص سيبي العناد واسمعي الكلام اللي فيه مصلحتك والله اللي زيك انتي مايمشي معاها كان الراحه و الدلال
قالتله بإبتسامه ريبه مصطنعه..
/ياخوفي هدا اللي بتقولوا عنه العسل في الرواني..
ضحك سعد من وسط قلبه وهي تشوفله بتعجب وشاده ضحكتها..
بضحكه قال:وربي ماني فايتك..
قعدت تضحك..
هدا ضحك وقال بإبتسامه..
/جديات حسيت روحي في الوقفه هادي تعلقت بيك..
قالت:على مهلك على مهلك لسا في عندي شرط تاني..
سعد:اشرطي ياستي ع حسابك..
سلافه:انا عايشه مع امي مافي غيرنا هون بالبلد غير اختي وهي مجوزة..فلو تزوجت انا كمان امي رح ضل لحالها!
هو قال..
/تبي امك تقعد معانا؟.
بضحكه قالت..
/كرمال الله اهدا شوي..
هو قال:غير قولي..
قالت:اكيد مارح اترك امي لحالها..
قاللها:تعرفي..اني باني حوش ع دورين كملت الدور الاول والتاني يبي شويه خدمه ويكمل..لعيونك اللي زي اللوز هادم نكمله ونعطيه لمرت عمي..
سلافه قعدت تضحك لين دمعوا عيونها وهو قال بضحكه..
/ندوي جديات..غير انتي قولي باهي بس..
هدت ضحك وقالت..
/يعني انت مافي عندك شروط؟
حمحم وقال..
/عندي..الاول قتلك عليه..والتاني مش متنازل عنه..نبيك تلبسي حجاب وطريقة لبسك تتغير شويه..
*********
سلافه بإبتسامه:لذيذ ومهضوم وهيك مجنون شوي بس عقليته متعصبه..
لبانة:شوفي معه حق بقصة الجمعيه اذا تزوجتي منه ولامن غيره مارح تلاقيلا وقت خصوصا بعد ماتخلفي..وبالنسبة للحجاب ليكني لابسته وعين الله عليي..وبصراحه ارتحت كتير بعد مالبسته..
تنهدت سلافه وقعدت تفكر وهي ملتزمه الصمت..
ولبانه بعد ماسكتت لحظات قالت..
/انتي شو حسيتي ناحيته..قلبك انفتحلوا ولاماحسيتي شي بالمرة؟
جاوبتها بإبتسامة حلوة..
/بصراحه..هلأ حاسة حالي بدي شوفوا مرة تانيه..
ضحكت لبانه..
وكملت سلافة تقول..
/والاغرب..مشاعري اتجاه عبد القيوم ماعدت حسيت فيها ابدا..
لبانة:من فترة طويله صاير معك هالشي..
سلافه:مزبوط..حبه لطوبى خلا مشاعري اتجاهه تبرد شوي شوي وتختفي..بضيق قالت..بس انا هلأ حاسة بالذنب تجاه طوبى..حاسه اني ظلمتها وقت اقتنعت بكلام ميار عنها بالذات بعد ماراح عبد القيوم ع الكفرة ومعاد رجع يعني فقد الامل منها..
لبانه:من البداية قلتلك ان عقلية ميار مثل عقلية بنات عيلتها بس انتي ماسمعتي مني..
وخرت سلافه خصله من شعرها ورا وذنها وقالت..
/بكرا إن شاء الله بشوفا وبحكي معها...
🍃🍃🍃🍃
الساعه 6:30مساءا..
في جنان حوش طوبى جهة الكوجينه..
كانوا دايرين جلستهم المميزة واصوات هدرزتهم ممزوجه مع اصوات حركه السيارات اللي جاية من برا مع اصوات الشجر اللي تحرك في اوراقهم ريح خفيفه..
☘اميمه بدهشه:انحبست!؟
سدرة:وفي قضية كبيره هلبه..
اميمه:يمهل ولايهمل..
غرفه:هداكا الجايف هو اللي دبرهالها..
اميمه بدهشة اكبر..
/الله!
صفية:ردلها اللي داراته فيه..
مطيرة:ان شاء الله يصير فيه مكبر..
كلهم أمنوا ورا دعائها..
..وفي هاللحظه دق الباب..
سدرة:خالي ونبيله..
☘ومن الجنان لدار البنات..
كانت طوبى مقعمزه ع سرير غرفه تحت الشباك تسمع في حزب جديد حفظاته من سورة النساء ع سلوى .
واريج متكيه ع سريرها هي وتسمع فيها..
🌼"احسنتي وجزاك الله خيرا ياطوبى"
طوبى:وإياك..تعرفي معلمتي اكثر حاجه نفكر فيها بعد مانختم هي قصة افلات القرآن خايفه ننساه ويفلت مني..
"نفس الخوف اللي حسيت بيه بعد ماختمت ومالقيتش طريقة احسن من المراجعه الدائمه الا حفظه بروايات تانية"
قعدت ساكته وهي تفكر في كلامها..
"وفي حاجه تانيه مهمه واجد تساعدك..حاولي ع قد ماتقدري ماديري شي يخلي القرآن يطلع من قلبك..افعالك اقوالك ياطوبى ردي بالك منهن..فكرة انك تولي من اهل الله وخاصته مش بس بأنك تحفظي القرآن العمل بيه اهم بواجد ياطوبى.."
طوبى:صح..
"وحاجه اخرى..خلي عندك خبيئة بينك وبين الله كثري منها الخبايا من الاعمال الصالحة هن اللي يثبتنك ويزيدن يحفظن القرآن في قلبك"
طوبى:باهي جبتي سيرة الخبيئة..اني عندي مشكله في الحاجه هادي..في امور نديرها نبيها تقعد بيني وبين ربي للأسف لازم نلقى حد يندري بيها..الحق اني خفت هلبه..خفت لو ربي مش متقبل مني شي..
"لا حبيبتي طوبى انتي غلطانة واجد اللي فكرتي هك واسأتي الظن بربك..اي عمل صالح نويتيه يكون خبيئة بينك وبين الله وعلم به حد هذى مايعنيش ان الله ماقبلها..بالعكس يقبلها وفوق هك يخليها معروفه بيش يشهر بيها عبده ويعلي ذكره.."
تأثرث طوبى جدا باللي سمعاته ودموعها نزلوا دون اراده منها..
"واللي ربك يحبه حق ينسيه اعماله الصالحه يخليه لاعاد يذكرهن ولايحكي بيهن..كيف ماقال ابن القيم رحمه الله..
" إذا أراد اللهَ عز وجل بعبدٍ خيراً سَلبَ رؤيةَ أعمالِه الحسنة من قلبه والإخبارَ بها من لسانه وشَغَله برؤية ذنبه فلا يزال نصبَ عينيه حتى يدخل الجنة، فإن ما تُقُبِّل من الأعمال رفع من القلب رؤيتُه ومن اللسان ذكرُه".
ويدق باب الدار وينفتح وتخش غرفه وهي تقول..
/خالي ونبيله جو..
طوبى:شويه وجايه..معلمتي جزاك الله عني خير الجزاء..
"واياك ياطوبى نخليك مع ضيوفك..سلمي ع هلك.."
طوبى:يوصل وحتى انتي سلمي ع العيلة السلام عليكم..
"وعليكم السلام"
نهت المكالمه وهي تسمع في غرفه تقول..
/وجه نبيلة ماعجبنيش..
اريج ناضت قعمزت وهي تقول..
/خيرها؟
طوبى قعدت تشوف لغرفه بقلق وترقب لإجابتها..
غرفه:مش عارفه هي تضحك وتهدرز عادي لكن نعرفها كويس وين يكون فيها..
🍃وفعلا غرفه تعرف نبيله كويس عاشرتها سنين وعاشوا مع بعض في حوش واحد حتما حتكون حفظتها حفظ..
🍃في الصاله كانوا مقعمزات نبيله وطوبى ع انفراد..
نبيله تحكي وطوبى تسمع بخوف..
/جاني للمكتب من اربعه ايام وقالي نوصلك ان بعد عرس حسين حيدير اللي يريحك ويريح الجميع..
نزلوا دموعها وهي تقول..
/بيطلق..
نبيله التزمت الصمت وع وجهها باديه ملامح الضيق
مسحت طوبى دموعها وكابرت ع وجعها كالعادة وقالت..
/زي ماقال هكي اريح للجميع..
🍃🍃🍃🍃
"ان شاء الله غير تريحتن توا بس"
سليمه:ايه والله هذى وين تريحت..
صفيه قالت بألم..
/معقوله تريحك قهرة وحسرة ولد خوك!؟
سليمه:مع الوقت ينساها وياخد اللي يستاهلها..
سكتت صفيه عن نقاش امها اللي بدون جدوى وهي حزينه للغايه..
🍃وبعد ماروحت من حوش اهلها..امها اتصلت بوحده من خواتها ووصلتلها الخبر..
"اسمعي ياسليمه مرات غير جو يدير فيه بيش يحسسنا بالذنب ويخلينا نندموا وبعدين يشيلنا لها عشان نطلبوا منها السماح ونردوها"
سليمه بصدمة:حيه! والله مافكرت فيها..
"انا في عقلي شي كان ديريه تقطعي عليه الطريق بالمرة"
سليمه:شنو في عقلك؟
"لازم يوصلها الكلام هذى وزيدي عليه انه يبي يخطب قبل ليطلقها بيش يكون فال خير..معليشي كذبه لمصلحه.."
سليمه وهي تفكر قالت..
/باه مع من بنوصلوها!؟
"سالمين الشرقاويه"
ابتسمت وقالت..
/ايه والله جبتيها...
🍃🍃🍃🍃
"وهدا وين تقولي!؟"
نبيله:المحجوب قالي استني نتلاقى اني وياه ونفهم منه وللأسف من بعدها معاش حصله هاتفه مسكر وفي شقته مش موجود وواخد اجازة من عمله..
سدرة بضيق وحزن..
/كان راجى لبعد عرس حسين وطلق بالمرة تو هكي بتزيد تتنكد وتنهم...
نبيله:حني لتوا مش فاهمين القصد من كلامه راهو ليه اكثر من معنى ياسدرة..
كيف جت سدرة بترد خشت عليها هاديه بالهاتف اللي كان يرن وهي تقول..
/سالمين..
🍃🍃🍃🍃
تاني يوم..
الإثنين..
الثالث عشر من شهر محرم..
20 سبتمبر..سنة2021
بعد العصر..
مشت طوبى لمكان الدورة اللي تعطي فيها سلافه..
بعد ماعدا وقت الحصة لما جت طوبى بتروح وقفتها سلافه..
🍃🍃🍃
"ارتحتيله"
قالت:كثير..واستخرت وان شاء الله خير..
طوبى بإبتسامه..
/الحق حتى عيلته ناس كويسه وبشهاده جارتنا وصاحبتنا سميره قريبتهم واني نعرف سميره ماتقول الا الحق..
سلافه بإبتسامه:مابدو ياني كمل بالجمعيه وبدوا البس الحجاب..
طوبى:الصراحه مراة بجمالك لازم تندس..
ضحكت سلافه بخجل..
ابتسمت طوبى وقالت..
/الحجاب البسيه بش تحصلي اجر بالدبل..طاعة الله ثم طاعة الزوج..
اكتفت سلافه بإبتسامه ود..
طوبى وهي مبتسمة قالت..
/عموما زيدوا اسألوا عليه بعدين احسمي امرك..
سلافه:وهو هيك رح خلي زوج اختي يسأل عنه كتير منيح بعدين بقرر..
طوبى؛ربي يقدم اللي فيه الخير..
سلافه:آمين..سكتت شويه بعدين قالت..في جديد؟.
قالت بإبتسامه حزن..
/اقتنع بالطلاق..
بدت ع وجه سلافه ملامح الصدمه..
وطوبى تشوف لردة فعلها بنفس الابتسامه وعيونها مليانات دموع..
🍃🍃🍃🍃
"بيدير جو المهدي شنيبه حتى هو"
هاديه بأسف:خسارة الحق..
غرفه:الرجاله كلهم زي بعض ياهاديه..
هاديه:باهي انتي خبري حسين بالك يعرف شي!؟
غرفه:قال ليه فترة مختفي معاش حصله..
هاديه بضيق..
/لاحول ولاقوة الا بالله..
نزلوا دموع غرفه وهي تقول..
/مش عارفه كيف بنفرح واختي هدا حالها..
هاديه بحزن:صلي ع النبي ياغرفه..
غرفه رشفت وقالت..
/عليه الصلاة والسلام..لا والكلبه عمته حاشاك تقول كانهي بنت اصل ماخلاتاش! مني اللي خلاها تشد في الطلاق ياحقيرة..!
هاديه بكره:عماته مش عارفه شن طينتهم..
غرفه:هو مش عارفه كيف رضالها اللقطه السافله هادي ياخد عليها بعدين يطلقها..تي هدا فات الجالي غادي...
سمعوا صوت الباب الخارجي انفتح قالت هاديه..
/خلاص سكري ع الموضوع..
مسحت غرفه دموعها وهي تدعي..
/جعنهم يلقوه كلهم مع بعضهم..
🍃لحظات وتخش عليهم طوبى وهي رافعه جنة في حضنهاوالصغار وراها وكلهم ياكلوا في شكلاطة الدحيه"بيضة"
نزلت بنتها وقالت..
/السلام عليكم..
ردوا عليها السلام..
طوبى بحماس..
/جايتكم بأخبار عن سلافه وسعد...
هاديه بضحكه:مش قلتلكم..
غرفه بفضول مصطنع..
/احكي احكي..
طوبى بضحكه..
/راجي نبدل ونجيكم..
غرفه:بسرعه..
ضحكت طوبى وكيف جت بتمشي شافت للتلفزيون لقت فيه برنامج يحكي عن الفلك والكواكب..جابوا لقطه للقمر وهو يدور حول الارض والكواكب التانيه دور في افلاكها حواليها..
حست بشعور مش مفهوم وهي تشوفلهم..
"بتقعدي تتفرجي!؟"
شافت لغرفه وقالت..
/شويه بس..
ولفت بتطلع ومجرد ماوصلت في الباب فقدت الوعي...
#امتحان
#طوبى
...يتبع...
