⏳
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 خير للإنسان أن يكون تعيساً وعارفاً،من أن يكون سعيداً ومخدوعاً..
دوستويفسكي🍃
_________________________________________
وصلتهم سيارة اجرة للحوش..
نزلوا منها النساوين وقعد الصابر ينزل في الشناطي..
خشوا للحوش بعد مافتحه الصابر وكاريمان تلاعب في جنة وتغنيلها وجنة تضحك ببهجة وتغني معاها وطوبى تتفرج عليهم وهي مبتسمه..
خش الصابر بالشناطي وسكر الباب وهو يشوف لكاريمان وجنة وابتسامته ع وجهه..
فجأة جاه اتصال..طلع هاتفه من جاكيته وشاف المتصل استغرب وقال..
/خوك فرج..
التفتت كاريمان وقالت وهي متفاجئة..
/فرج!
وطوبى تمرر في نظرها بيناتهم بعدين قامت خمارها..
رد الصابر ع الاتصال وهو يقول..
/ابونسب امتى روحت!؟
"غير سلم وقول حمد لله ع السلامه"
الصابر بضحكه؛السلام عليكم وحمد لله ع السلامه تريحت!
ضحكوا كاريمان وطوبى..
"مافيكش امل انت..المهم قول لأختي ديريلي عشا سمح و توتيلي دار الضيوف"
شاف الصابر لطوبى وقال..
/تمام تمام..هي عدي طير..
كاريمان قالت لطوبى وهي تضحك..
/من زمان صحاب لكن كيف الفار والقطوس
ضحكت طوبى..
نهي الصابر المكالمه وقال..
/جاي بيتعشى هنا ويبات..
كاريمان هزت راسها وقالت لطوبى..
/انتي لعند توا ماتعرفتي ع خوالك وانا ناويه نعرفك عليهم كلهم والاستفتاحية بفرج..
الصابر:عليك استفتاحية..
ضحكوا وكاريمان قالت..
/هي تعالي نخشوا..ومشوا خشوا مع بعض وهما يهدرزوا ووراهم الصابر رافع الشناطي ويسمع في احاديثهم بإستمتاع..
🍁وفي حوش بنت خالة كاريمان..
كان عبد القيوم واقف في الجنان بعد ماجاته مكالمة هاتفيه من ايمن الفاندي وجنبه جبريل يسمع فيه ويشوف لملامح وجهه اللي تعبر عن ردة فعله من اللي يسمع فيه..
عبد القيوم بإندهاش..
/انت ماكانش عندك علم بالحاجه هذي!؟
"لالا والله لا اني دورت وراه كويس مالاش في الاعمال المشبوهة نهائي"
عبد القيوم؛تبي تقول انها مكيدة..
"والله تسعين في المية هكي"
قاله:باهي من كادهاله؟
"مش عارف..حطيت في بالي طليقته هديكا هي محبوسة صح لكن تقدر دير حاجه زي هادي وهي في الحبس لكن لما زدت فكرت فيها وسألت عن وضعها غادي استبعدت الحاجه هادي"
عبد القيوم بحقد..
/شن وضعها!؟
"قالوا وضعها النفسي مش مزبوط واكتر من مرة جاية بدير جريمة قتل في المهجع اللي هي فيه وحبسوها في الانفرادي اكثر من مرة"
عبد الله بنبرة شماتة..
/الله لايغيب عليها بلا وان شاء الله الوسخ هذكي يكون مصيره اسود من مصيرها..
"لاهو حيكون مصيره اسود بكل معنى الكلمة..تعرف نتمنى يقعد محبوس هني ع الاقل دوله فيها قانون وضامن ان مافي حد ممكن يدخل ويطلعه"
عبد القيوم:ان شاء الله يصير كيف ماقلت والا بعدين نا نتصرف تصرف تاني..
وجبريل اللي كان يسمع فيه عقد حواجبه بقلق وهو يشوفله..
🍁ونهي عبد القيوم مكالمته مع ايمن ونقل الاخبار اللي سمعها منه لجبريل..جبريل برغم فرحته باللي سمعه لكن عقله قعد يفكر في اللي دار هالشي للجالي وفي النهايه قاده لشخص واحد..
🍃🍃🍃🍃
بعد ماارتاحوا ساعتين من تعب السفر خلوا جنة راقده وخشوا للكوجينه بش يبدوا في تجهيز العشي..
طوبى لحد الآن ماتقدرش تبذل مجهود كبير لهذا كاريمان خلتها دير معاها حاجات بسيطة وهي مقعمزة..
ومشي وقتهم مع بعض وهما يهدرزوا في مواضيع مختلفه وكلها عاديه ومنها الحلو ونفسية طوبى كانت في احسن حالاتها..
🍃لكن نفسية سدرة كانت تاعبه اللي صار مش ساهل بش تقدر تتخطاه بسرعه..وين يخطر عليها حال طوبى لما دخلوها المصحة وكأنها ميته تبكي بألم..
وراجلها وصغاره كان واجعهم جدا حالها بالذات سميتها اللي كانت حتى هي متأثرة بقوة باللي صار لطوبى..
🍃وفي قلب تاني يحب طوبى واغلب وقته مشغول عليها لدرجة ان صاحبته ماقدرتش تعيش فرحتها بشهر العسل..
غرفه..
روحت هي وراجلها بعد ماانقضي الشهر ومرواحهم كان ع فيلا راجلها وين ماكانوا قاعدين صغارها مع عزوزتها..
لقائها بصغارها كان مؤثر جدا..غرقوا بعض بالقبل والاحضان وكلمات الشوق اللي كانت تطلع من مهاب واواب بأسلوب لذيذ ومضحك اما اختهم قعدت ضامه امها وماتبيش تخليها..
🍃"مشت لبنغازي"
غرفه بإستغراب:علاش؟
صفيه وهي تحاول تخفي ارتباكها..
/قالت خاطري نمشي غادي ونقعد شهر..
غرفه:من اللي رفعها؟
صفيه:عرب الشرق جو هني قعدوا فتره وروحوا بيها معاهم..
غرفه شافت لحسين اللي كان مستغرب حتى هو بعدين قال..
/جياتهم قريبة من بعضها!..
غرفه بقلق ودموعها عبوا عيونها وهي تقول..
/بالله عليك ياعمتي قولي شن اللي صار لطوبى..
صفيه بضيق:شن بيصيرلها يابنتي زي قبل..
نزلوا دموعها وهي تقول...
/حاولت تنتحر مرة تانيه!؟
صفيه:لالالا والله ماصارت..
مسحت غرفه دموعها وشافت لراجلها وهي تقول..
/حسين عطيني تليفونك نكلم سدرة..
صفيه تنهدت بضيق..
وحسين وهو يشوف لأمه مد هاتفه لمرته وهي خداته وقعدت تكتب في رقم سدرة وهي ترشف ودموعها تنزل..
اشر حسين لأمه بملامح وجهه وهو يسأل..
"شن في"
امه حطت يدها ع خدها والحزن والضيق باديات ع ملامح وجهها..
