هاقد وصلنا إلى مشارف النهايات..
بين ايديكم الاحداث الاخيره لقصة طوبى اللي حتكشف تفاصيل كتيرة مبهمة وغامضه..
بعضكم ممكن مايصدقهاش او يقتنع بيها واني وظيفتي هني ننقلها وكل قارئ حيتلقاها حسب تفكيره وسعة ادراكه..
🍂ويااما فيك يادنيا مدسوس حكايات لو تطلع تشيب شعر الرضيع..
🍂وياما فيك ياواقعنا من مآسي صادمة تدمي القلب والعيون...
وفي هالحياة ياما نعيشوا وياما نشوفوا وياما نسمعوا..
..كل شي ممكن يصير حتى اللي ينقال عليه غير متوقع ومستحيل..
وزي ماقال دوستويفسكي مرة..
🍃" لا داعي للدهشة كل شيء يمكن أن يقع للإنسان
حتى الأمور التي كان لا يتصورها في الحلم "🍃
///////////////////////////////////////////////////////////
#طوبى "جنة طوبى"
#جمان_فريد
#الجزء_الأخير"إمتحان/نهائي 7"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الجنة
ألا إن سلعة الله غاليه..إلا إن سلعة الله الجنة..
..رسول الله صلى الله عليه وسلم..●●●●●●●●●●●●●●●●●●●●
🍂"لم يخب ظني فقط ، بل خاب قلبي."🍂
_________________________________________
خش عليها الحجرة وسكر الباب..
قرب من سريرها لقاها تشوف في الفراغ والدموع ينزلوا من عيونها..
بحزن قال..
/حمد لله ع السلامه..
وجهت نظرها ليه وقالت بشي من التعب..
/طوبى..
هو قاللها:حالها باهي ماتخافيش عليها..
قالت:نبي نشوفها..
قاللها:لما يولي حالك باهي نرفعك تشوفيها..
قالتله بنبرة ألم ؛مافيا شي اني مافيا شي هي اللي فيها يامهدي..
حطت يده ع راسها وقال..
/توا ماتقدريش تتحركي ياسدرة..
غيرت نظرها عنه ومازال دموعها ينزلوا..
المهدي:تبي تشوفي بنتك؟..
بنبرة مخنوقه قالت..
/وردة..هي قالت سميها ورده يامهدي..
هو قال:حاضر حاضر اللي تبوه يصير..
تنهدت بحرقه وقالت..
/قلتها قبل قلتها لجدي عمره ماحيحسها بعد اللي داره فيها مستحيل يحسها ولاقلبه يحن عليها مختار عمره مااعترف بولا غلط داره عمره ماتحمل مسؤولية غلطه دارها...
🍃كلام سدرة هدا قالاته لجدها في اليوم اللي اجتمعت بيه هو والمحجوب في حوش طوبى..طوبى اللي كانت وقتها قاعده معاه تعاني فيه في فترة مرضه بالكورونا...
🔺️🔺️🔺️قبل حوالي عامين🔺️🔺️🔺️
خشت هي وياهم صالة الحوش خلت جدها يقعمز ع الكرسي بعدين ربعت ايديها وقالت..
/احكولي اللي داسينه عليا..
علي الواعر وهو شاد عكازة بإيديه الزوز ومتكي عليه قاللها بإبتسامه..
/شن هو اللي بندسوه عليك؟
هي قالت بنبرة فيها شي من الانفعال..
/انت عارف جدي ع شن نحكي عارف كويس..بالله عليكم قولولي شن داير مختار لطوبى هداكا الجالي لمح بحاجه وماباش يقولها وواضح كلكم عارفين وماتبوش تحكولي..
المحجوب خدي نفس وقال..
/الجالي بش يرد طوبى غصب عنها خطف جنه ومختار ساعده بش يختفي بعدين وماحد يعرفله طريق..
سدرة وهي تسمع فيه كانت فوق صدمها غضبانه جدا قالت بإنفعال..
/ كيف خليتوه يعالجني ويخليني عنده!!؟ وكيف مازال تخلوا فيه يخش للحوش!!!؟
علي الواعر بكل هدوء قال..
/هي خلاته يخش للحوش ع خاطرك انتي..خافت عليك من الصدمه هي هكي قالتلي..قالت سدرة مازال تاعبه وتبي علاج خل نسايروها لين تشد صحتها وتوليلها الذاكرة..
المحجوب:ضغطت ع نفسها وتحملت ع خاطرك انتي وكان عندها حق في اللي داراته..بشهادة الجميع موقفك من مختار تغير بالمرة معاملتك ليه تغيرت ع حسب ماحكولي كنتي مش طايقه تسمعي اسمه لكن وين روح بيك شفت علاقتك بيه كيف كانت لين كذبت اللي سمعته..
نزلوا دموعها وهي تسمع في كلام خالها ماقدرتش ترد عليه..
علي الواعر تنهد وقال..
/مانيش عارف كيف بنادمه زي هادي طالعه من صلب شيطان زيه..
هي شافت لجدها بصدمه بعدين ردت نظرها لخالها..
المحجوب اللي تعبوا عيونه دموع هز راسه وقال..
/عارف عارف..بوك الله يرحمه حكالي كل شي وأمني عليها وع سرها وعليكم حتى انتم..
بدت انفاسها تتسارع..حطت يدها ع صدرها وقعدت تمرر في نظرها حواليها وهي مش مستوعبه شي..ثبتت نظرها ع جدها وقالت..
/كيف خليتها تمشيله تقعد عنده كيف قولي ياجدي !
قاللها بحزن واضح في عيونه..
/الدم اللي حن..دمها حنله مشتله من غير ماتفكر ولاتشاور حتى بنتها مافكرتش فيها معاه..شوفي ربك يابنتي شوفي..تنهد بألم وقال..الله يسامحنا ويغفرلنا الله يسامحنا ويغفرلنا..
مسحت دموعها بعنف وقالت بإنفعال وألم..
/ماتقولش هكي ياجدي ماتقولش هكي بعد اللي عرفت فهمت ان المخلوق هدا مافيشي رجا ومقطوع منه الأمل لعب بيا وبعقلي خلاني نحس بالذنب تي خلاني نفكر مرات نقوله كل شي بش نكفر عن ذنبي معاه..طلعت غبيه ودرويشه ومش فاهمه انه كان يستغل فيا بش يوصل للي يبيه واحد زيها عمره ماحيحسها عمره ماحيحن عليها ولايعرف شن هو الحن..الله يلعنه الله ياخده..توا..توا تروح والله مانعرفها تروح توا...رفعت هاتفها وهي تقول بنفس الانفعال وهي تبكي..هدا مش حيرتاح لين يقتلها زي ماقتل امي وبوي وامها هي..
🍃واتصلت سدرة بطوبى وهددتها ياتروح ياتقطع علاقتها بيها نهائيا وطوبى لأول مرة في حياتها تكسر كلمة سدرة وتفضل عليها حد تاني لا ومني هالشخص..مختار!
واللي داراته طوبى صدم سدرة صدمه كبيره وخلاها في هداكا الوقت تفكر في التخلي عن طوبى وتركها تواجه مصيرها بنفسها وهدا اللي صارحت بيه المهدي والمهدي وقتها ماكان في شي هامه غير راحة بال سدرة بس..
سدرة اللي لما صارحاته بحقيقة طوبى وين مشوا للخمس اول مرة بعد زواجهم بفترة وجيزة،شافها في حاله برغم صدمته القويه خلت قلبه يتقطع عليها ويندم اشد الندم اللي فوق هالجرح الكبير زادها جروح ع جروحها وحملها فوق طاقتها ماقدرش يفهمها ولاحاول يكونلها السند الحقيقي هداكا الوقت ومن يومها عاهد نفسه يصلح غلطه معاها ويعوضها ع قد مايقدر..لكن في نفس الوقت وجعاته طوبى هلبه اللي كانت من اول ما جت ع الدنيا ضحيه لأخطاء غيرها وجعاته جدا لدرجة ماقدرش يحمل لطفي ولاسدرة ذنب غشهم ليهم لما عطوها للجالي..
🍃🍃🍃🍃🍃
ومن غرب البلاد لشرقها..
تحديدا في حوش سالمين اللي كان سابقا لأم سالمين..
كانوا مجتمعين في الصاله مع الصابر وكاريمان..
حالة سالمين كان يرثى لها تبكي بألم شديد ومش قادرة تتكلم و كاريمان وهي تشوفلها دمعوا عيونها وقلبها زاد انقبض وراجلها جنبها ماكانش حاله خير من حالها وهو يمرر في نظره بين جبريل وسالمين قال..
/فهمني ياجبريل شن قصده التارقي لما قال عدي لجبريل في شي مهم يخص طوبى لازم تعرفه منه..قالي ماتطلعش من عنده الا وهو حاكيلك!؟
حطت كاريمان يدها ع صدرها وقالت بخوف..
/تكلموا بالله عليكم قولوا قلبي بيوقف..
سالمين مازال ع حالها لكن جبريل مسح بإيديه ع وجهه بعدين ضمهم لبعض وقال بألم..
/لاإله إلا الله..بلع ريقه وقال للصابر..اللي بنحكيه توا مانبش يطلع منكم مهما صار يالصابر..
بلع الصابر ريقه وهو يهز في راسه بعدين قاله..
/احكي..
غمض عيونه وخدي نفس عميق بعدين فتحهم وقال..
/طوبى..حمحم وكمل يقول..طوبى مش بنت لطفي ووردة الله يرحمهم..
بدت ع وجه كاريمان ملامح عدم الاستيعاب وهي تشوف لبنت خالتها كيف تبكي..
اما الصابر قال بصدمه..
/كيف!!!!؟
تنهد جبريل وقال ودموعه في عيونه..
/تو نقولك كيف..تعرفوا بقصة السرقه اللي كان وراها مختار اللي صارت هنا مع وحيده ومعايا حتى نا..
الصابر وهو مصدوم ومترقب قال..
/ايه..
جبريل بألم قال..
/هذيك الليله دار ماألعن من السرقه..اعتدى ع عزيزة المصريه الله يرحمها..
شهقت كاريمان شهقه وكأنها طلع في روحها وخبطت بيدها ع صدرها خبطه قويه..
وراجلها فتح عيونه ع وسعهم من الفجعه فوق صدمته..
هني تكلمت سالمين بنبرة باكيه وهي تقول..
/وماعرفناش الا بعدين..بعدين عرفنا بعد ماعزيزة طلعت حامل..
الصابر بعدم تصديق واستيعاب..
/لالالا..راكم تقولوها..مستحيل طوبى..طوبى...حركت يده بالرفض وهو يقول..لالا مانصدقهاش..
كاريمان وهي مصدومه بشده قالت..
/كيف هك كيف..كيف ياسالمين..انتي قلتي طوبى بنت وردة..انتي قلتي تعبت وماقدرتش ترضعها..عزيزة وقتها كانت ميته ياسالمين..تكلمي ياسالمين قولي كيف هكي كيف صار هكي..
خدت سالمين نفس وحاولت تتماسك وبدت تحكيلهم ..
سالمين بنبرة مبحوحه قالت..
/بعد حادث السرقه بأسبوعين عزيزة جتني وقالت بنفسخ الخطبه صدمتني واجد وتميت نقوللها ليش شن جاك شن السبب..تقولي ماارتحتش معاه ماقدرتش نحبه وانفعلت واجد تمت تعيط فجعتني وحسيت ان في شي صار قلت مرات فرج غلط فيها ولادار شي خلاها تكرهه هك..حاولت نعرف منها وهي كانت مصرة ع نفس الكلام ماارتحتش ماقدرتش نحبه وامي كانت مساندتها وخلتني غصب عني نوافقها ونخليها تفسخ..
🍂🍂🍂🍂🍂🍂
"ريتي ياامي كيف خالتي حرجت تعرفيه حرجها واعر مرات تقاطعك ياامي"
كتبت ام السالمين في الكراسه اللي عندها وخلت بنتها تقرا..
(المهم راحة عزيزة بس)
شافتلها شويه وقالت..
/امي..عزيزة مازالت تحب مغضوب الوالدين!؟
بدت ع وجهها ملامح الغضب وبدت تكتب وخلت بنتها تقرا..
(الله يلعنه وياخده)
عقدت حواجبها وقالت..
/شن في ياامي!؟
كتبت امها الجواب وخلتها تقرا..
(مافي شي خلوا عزيزة ع راحتها معاش تدخلوا فيها)
🍃"حسيت ان في شي تاني ماقدرتش نعرفه قلت في عقلي ممكن يكون مختار مهدد عزيزة بفرج لكن ماقدرتش نصارح حد باللي نفكر فيه واصلا معاش قدرت نفكر بشي ساعتها غير بالمشاكل اللي صارت لجبريل من ورا هداك الوسخ،وعدن الايام وجي يوم جبريل جاني فيه وقالي.. 🍂🍂🍂🍂
"اتصل بيا لطفي وقالي يبي يجي"
هي بخوف قالت..
/وين يبي يجي!؟
هو بضيق قال..
/مش قبل عرضت عليه شغل هنا بيش يحسن وضعه!؟ هو كان رافض لكن توا قالي وضعي راح متعسر واجد وكان مازال عرضك قائم موافق عليه..ماقدرتش نرده ياسالمين..
خبطت بإيديها ع رجليها وقالت..
/كيف هك ياراجل كيف! كان جو هنا بيعلموا باللي داره ولدهم!
جبريل قال..
/مش حيعلموا بشي وحيده عوضته ع اللي راح منه وانا مسامح في اللي راح مني..مانقدرش نكسر صاحبي ونرده وهو احتاجني ياما صبا معايا ياسالمين عمره ماردني وهذي اول مرة يحتاجني فيها..
خدت نفس بعدين تأففت وقالت..
/باهي ع هك معناها بيتم هنا مدة طويله..
هز راسه وقال..
/ايه..قالي بيجي هو ومرته..
بضيق شديد قالت..
/اخ منك ياجبريل اخ..كيف بيصير توا كيف..
جبريل بندم..
/الذنب ذنبي بوه قالهالي ولده ويعرفه ماينفعش لكن نا اللي غرني هالشيطان وخلاني نتبعه نستاهل شن مايجيني مني نا بس ونستاهل..
تنهدت سالمين بضيق وهي تتخيل لو عرفت وردة باللي داره ولدها شن يصير فيها...
🍃كمل جبريل يحكي وهو يقول..
"وجا لطفي مع زوجته وعطيتهم حوشي يقعدوا فيه،الايام الاولى مرت بهدوء وانا وسالمين ع قد مانقدروا حاولنا نديروا رواحنا عاديين قدامهم.."
وسالمين قالت..
"لكن..وردة كانت ملاحظه ان امي وعزيزة متغيرين معاها ويعاملوا فيها بجفاف ورسميه وع طول جتني وسألتني..
🍂🍂🍂🍂🍂
"حسيت امك زي اللي زعلانه مني مافهمتش خيرها وحتى عزيزة تتجنب فيا،لما نجيكم مايقعدوش معانا"
سالمين وهي تحاول تخفي ارتباكها..
/لامافي شي كيف قبل غير زي ماقتلك عزيزة بعد فسخت الخطوبه نفسيتها تعبت..
تنهدت وردة بضيق وقالت..
/ربي يعوضها خير..
سالمين:يارب..
شافتلها شويه وقالت بضيق واستياء..
/بالك هدا علاش..شكلها عزيزة مازال تبي مختار ولا؟
سالمين بضيق..
/والله مانعرف ياخيه مرات هك..
وردة بحزن:قوليلها تنساه ولدي خلاص معاش يروح معاش تأمل روحها..
تنهدت سالمين بحزن وقعدت ساكته..
مسحت وردة دموعها وقالت..
/المهم توا غدوة نبيك تمشي معاي المستشفى نبي ندير تحاليل..مش عارفه كيف حاسه روحي حامل..
ابتسمت سالمين في عز همها وقالت..
/ان شاء الله ياوريده ان شاء الله..بكرا بإذن الله نعدوا مع بعضنا..
هزت وردة راسها وهي مبتسمه من بين دموعها..
🍃"وعدينا المستشفى ودارت تحاليلها وطلعت حق حامل.فرحت فرحة ماريتش كيفها قالتلي قالولي معاش فيك امل لكن ربي قادر ع كل شي..يومها لطفي وزع صدقات من كثر فرحته،وفرحتهم هذي فرحتنا معاهم لكن..لاحظت ان امي وعزيزة ماكانوش مهتمين لابو يطلعوا ولايباركوا والسبب في عقلي وقتها عملة السرقه اللي دارها ولدها..وعدن ايام كان فيهم جبريل يتابع مع الشرطه في حكاية السرقه ولعند هداك الوقت ماوصلوا لشي"
جبريل قال..
"مالقوش لهم اثر ماخلوا وراهم شي نهائي وانا بديت نأيس..ولأني كنت منهم لاحظني لطفي وحاول يعرف مني كني لكن انا كنت نتهرب من سؤاله ونغير في الموضوع..لعند ماجا يوم جو فيه خوات سالمين لامهم زيارة وفي هديك الزيارة صار شي ماكناش متوقعينه.."
سالمين..
"خواتي ماكانوش طايقين ورده نهائي بعد اللي داره مختار وتمن يعزقن في الدوة ويلمحن ووردة ماتحملتش وسألتهم عن قصدهم واختي رابحة الله يسامحها قالت كل شي.."
🍂🍂🍂🍂🍂
"قولي كذب ياسالمين قولي كذب بالله عليك بالله عليك"
سالمين ودموعها ينزلوا..
/اهدي ياخيتي الله يربحك راك تنسي انتي حامل..
وردة وهي تبكي قالت بأنفعال..
/معناها حق ياسالمين حق..هدا علاش امك متغيره عليا هكي!؟ هدا علاش جيرانك تغيرت معاملتهم معايا اني ولطفي! قالي لطفي في شي صاير يدرق فيه جبريل..ياعارنا ياعارنا..قعدت تخبط ع رجليها وهي تقول..علاش هكي يامختار علاش هكي ياولدي علاش علاش..
🍃سالمين وهي تبكي كملت تحكي...
"عيطت وخبطت وخبشت لعند ماطاحت مغمى عليها وكانت تنزف وراح العيل اللي كانت ترجى فيه سنين.."
جبريل..
"صدمة لطفي كانت كبيره خلاته يقعد في الحوش معاش يطلع منه..وزوجته تمت مع سالمين بعد طلعت من المستشفى عشان تعانيها..ووقتها لطفي خدي قرار انه يرد لطرابلس قال معاش تقدر نقعد اكثر من هك"
سالمين وهي تبكي..
"ويصير مايخليهم يتموا غصب عنهم في بنغازي"
🍂🍂🍂🍂🍂🍂
كانت وردة في الحمام ومجرد ماطلعت منه جت قدامها عزيزة دفتها وخشت تجري للحمام وقعدت ترجع..
ع جية سالمين وهي تقول بخوف..
/لالا انتي تبي معاينه..
وردة بقلق:خيرها؟
سالمين بقلق..
/شكلها نزله معويه..
وقعدوا يسمعوا فيها وهي ترجع قريب طلعت احشائها شويه وجت بتخش عليها سالمين هي جت طالعه كان وجهها شاحب وملامحها كلها تعب يدوب مشت خطوتين وطاحت من طولها..
🍃"شالنا جبريل المستشفى..رشفت وهي تقول..انا ووردة وعزيزة..وفي المستشفى سعفوها ودارولها تحاليل وتغذيه..وبعدين..غمضت عيونها بشده وتنهدت بحرقة وهي تقول..حسبي الله ونعم الوكيل"
🍂🍂🍂🍂🍂🍂
طلعوا مع الطبيبه من الحجرة اللي كانت فيها عزيزة..
كان في يد الطبيبه ورقة شافتلها شويه وقالت..
/متزوجه هي؟
السؤال صدمهم وخوفهم في نفس الوقت ماقدروش يردوا عليها..
رفعت عيونها فيهم وقالت..
"تحاليلها تبين انها حامل"
صاعقه ونزلت عليهم الزوز..سالمين حست بجسمها ثلج وقلبها وكأنه وقف..
ووردة جنبها حالها يشبه حالها الفرق ان قلب ورد حس بقوة بشي خلاها تقول بتوتر واضح..
/ماشاء الله ماشاء الله..
الطبيبه وهي تشوف لحالتهم قالت..
/صاير معاها فقر دم بسبب الحمل..
وقعدت تشرح عن حالة عزيزة ووردة تحاول تنتبه وقلبها يرجف من داخل اما سالمين قاعده ع حالها..
مشت الطبيبه وخلتهم بعد ماقالت اللي عندها ووردة التفتت ع سالمين شدت ذراعها وقالت بنبرة مرتعشه ودموعها طول نزلوا..
/سالمين..
🍃"خشيت في عالم تاني من صدمتي قعدت ندعي في قلبي يارب يطلع حلم مش علم يارب..عقلي وقف معاش عرفت نفكر في شي لكن ورده شكلها فكرت وعرفت كل شي..تنهدت بألم وقالت..ماسودها هذيك الليله ماسودها اسود ليله في حياتي..بعد ماروحنا بعزيزة من المستشفى عدى جبريل ونا انجنيت ع عزيزة"
🍂🍂🍂🍂
"قولي من مني قولي قولي ياكلبه"
كانت شاده ذراع عزيزة وهي تهز فيها بعنف وعزيزة منهارة تماما..
وردة وهي تبكي..
/خليها ياسالمين بالله عليك خليها بش تعرف تحكي..
سالمين وهي تبكي قالت بغضب..
/تكلمي تكلمي..
🍃وامها تسمع وهي في دارها فهمت كل شي واللي فهماته صدمها بقوة وزادها قهر ع قهرتها طلعت بكرسيها المتحرك وهي منفعله وقعدت تمشي بيه لين وصلت فيهم خبطت ع ايدين الكرسي بقوة وهي تبكي وتصيح..
وردة كانت تشوفلها بخوف وسالمين كذلك وهي تقول..
/كنك ياامي !؟
ام سالمين وهي تبكي اشرت بيدها ع ورده قعدت تخبط بيدها ع الكرسي وهي تأشر ع وردة..
سالمين طلقت عزيزة وهي تشوف لوردة ووردة كانت في حالة خوف وألم..
هدا كله وعزيزة تبكي بالعبرة..
سالمين ردت نظرها لأمها بعدين مشت تجري لدار امها لحظات وولت تجري وفي يدها كراسه وقلم عطتهم لأمها وهي تقول بذعر وخوف..
/اكتبي من من!؟
امها خدت الكراسه والقلم وبيدها اللي كانت ترتعش كتبت اسم..
"مختار"
سالمين لما شافت الاسم التفتت ع عزيزة وقالت بصدمة شديده..
"مختار!"
غمضت ورده عيونها بشده..وعزيزة قعمزت ع الارض بهده حطت ايديها ع وجهها وهي تقول بعبرتها..
"اعتدى عليا والله اعتدى عليا والله غصب عني والله اعتدى عليا"..
ام سالمين شدت يد بنتها بقوة التفتت سالمين لأمها لقتها تهز في راسها موافقه ع كلام عزيزة تبي تأكدلها ان عزيزة مش مذنبة...
بدت تخبط سالمين ع وجهها وع رجليها وهي تقول..
/حي ياعليك فضيحه..حي شن بيلمها..حي كيف نديروا توا كيف نديروا..وقعدت تخبط ع وجهها بإستمرار وهي تقول..انا الظالمه انا اللي خليتكم وحدكم انا الظالمه انا كله مني..
وردة وهي تشوف لحالتها وحالة عزيزة كانت تفكر في عز فجعتها ووسط اصوات هالبكاء ونحيب خطر في بالها حل واحد مافيش غيره..قربت لسالمين وشدتها بكل قوة وهي تقول..
/تو نلموها ياسالمين تو نلموها..الفضيحة فضيحتنا حني فضيحة ولدي اللي ماعرفتش نربيه الذنب كله ذنبي اني واني نتحمله بروحي ياسالمين اني..اني اللي ماعرفتش نربي اني..تفي عليا تفي عليا اللي هدا ولدي الله يلعني اللي هدا ولدي..
🍃"ياااه ياربي..وكأنها قاعده قدام عيوني كلامها نسمع فيه توا بصوتها..اااه ياوريده ربي يرحمك ويسامحك ياخيتي..الذنب ماهو ذنبك وحدك ذنبنا كلنا..رشفت وقالت..قالتلي العيل اللي حامل بيه عزيزة حتاخده بعد تجيبها وديره عيلها قالت العيله في طرابلس يعلموا بيا حامل لكن مازال ماخبرتهم اني اجهضت وكأن ربي ماخلانا نخبروهم لهالسبب..انا وقتها مااقتنعتش لأني عارفه لطفي مستحيل يرضى الراجل كاره ولده ومش قابل يسمع سيرته كيف بيرضى يرقع كارثه كيف هذي!قلتلها وهي قالت ماعليكش فيه انا نخليه يرضى..وفي نفس الليله خبراته وانا خبرت جبريل.."
جبريل قال..
"ردة فعله خلتني نبكي بكا..مسح دموعه وقال..والله تم يندب يندب ياالصابر..."
🍂🍂🍂🍂🍂🍂
"شن داير تحتك ياربي اللي عطيتني هالولد شن داير دلني ياربي..علاش ياربي علاش اني هكي يصير فيا مش عاق اني ياربي عمري ماكنتش عاق وانت تعرف علاش تبليني بولد زي هدا علاش"
وردة كانت تحاول ضمه وهي تبكي بالعبره وهو انهار في حضنها وقال..
/قوليلي انتي ياوردة اني داير غلط غاضب بوي وامي بش ربي يعاقبني بمختار قولي ياوردة..
ووردة تبكي بألم وقهر وهي تحضن فيه..
🍃مسحت سالمين دموعها اللي نزلوا ع فمها وذقنها وقالت..
"مارضاش بالحل اللي قالاته وردة قاللها تبيني نغضب ربي ع خاطر هالعمل الفاسد قصده مختار..لكن هي لما انهارت وقعدت تترجى وتقوله.."
🍂🍂🍂🍂🍂
"ع خاطر هالمسكينه اللي مالهاش ذنب ذنبها هي حيقعد في رقبتنا..انت بروحك مش حيهنيك خاطرك تخلي دمنا ولحمنا للشارع يالطفي"
لطفي بغضب:مش دمي ولحمي هادي خطيئه ياوردة ماليش بيها اي علاقه وفي شرع الله ماتعنيني في شي..تعرفي لو درت اللي تبيه حيركبني ذنب كبير حتى انتي معاي تبينا نخشوا جهنم ع خاطر الفاسد هداكا..
🍃"انفعلت وردة واجد كادت تنجن وهو من خوفه عليها سايرها مسايره وقال اللي تبيه يصير"
جبريل قال..
"سايرها مسايرة لأن وضعها النفسي كان تاعب واجد وهي بنيتها ضعيفه خاف يصير فيها شي قالي من قبل وهي مهدوده بسببه خايف اللي داره توا يقتلها..قال بنسايرها لين يولي حالها باهي وبعدين نخليها تتراجع ع اللي تفكر فيه.."
سالمين وهي تبكي..
"وفي هديكا الليله السودا الطويله مافي حد فينا رقد كان امي..امي اللي رقدت ومعاش ناضت بعدها"
حطت ايديها ع وجهها وانهارت بالبكي وكاريمان تبكي معاها..
زي ماكان جبريل يدمع ويمسح في دموعه لكن الصابر قاعد مصدوم من هول اللي سمعه مش قادر يستوعبه وبين عيونه طوبى بس...
..هدت سالمين وكملت تقول بنبرة باكيه..
"عزيزة هدها هد موت امي الله يرحمها وقديش تمنيت وقتها لو يصير شي وترمي لكن ربك مارادش وحتى وردة كانت تراقب فيها وديما معاها وراده بالها منها..بعد عدى شهر ع موت امي قررنا كلنا نطلعوا من حوشها ونعدوا لمنطقه مايعرفنا فيها حد نتموا فيها لعند ماتجيب عزيزة..وطبعا قلنا لولادي والعيله ان طالعين برا بنغازي عشان شغل جبريل ولطفي..
وطلعنا من الحوش لمنطقه بعيده مايعرفنا فيها حد..عدن علينا شهور صعبه واجد ايام كل مانذكرهن نقول كيف مرن علينا وعدن كيف...طلعت منها آه وقالت بعدها..مرة عزيزة حاولت تجهض ومرة حاولت تنتحر وفي المرتين كانت تلحق عليها ورده وتمنعها..وردة اللي حطتها في عيونها وعاملتها معامله وكأنها كنتها حق..كانت ترقد معاها حتى الرقاد..تحاول تواسيها وتهون عليها..
لما تقدمت شهور الحمل عدينا بعزيزة لمستشفى برا بنغازي فيها ناس معارف جبريل خلوها دير جهاز وعرفنا منه انها حامل ببنت..كلنا زاد همنا هم..بنت..يعني ابتلاء فوق ابتلاء.. وياكم انقهرت عزيزة اللي دارت كبد ع جنينها من وهو في بطنها لكن وردة كانت تهون عليها واجد وفي مرة سمعتها تقول..
🍂🍂🍂🍂🍂
"اني جوني البنات خير من الولد..الله يذكرك بالخير ويرضى عليك ياسدرة يابنتي ابتسمت من بين دموعها وقالت..تعرفي البنت هادي ربي يبي يديرلها اكثر من ام اني وانتي وسدرة..عارفتها سدرة حتكون لهالبنيه امها مش اختها"
عزيزة بألم:نفسي اطمن زي ماانتي مطمنه كدا عايزة اعرف جايباها منين الراحه اللي بتحكي بيها دي!؟
وردة وهي تمسح في دموعها قالت..
/من حاجه في قلبي تقولي ان اللي ندير فيه خير..بنستر عليك ونستر ع هالبنيه..تخيلي لو خليناها لدار ايتام وللشارع مش بضيع! لكن لما تتربى وسط عيلة احسن تربيه وتولي بنيه صالحة حتى لو كبرت بعدين وعرفت كل شي اني متأكده انها مش حضيع وحتسلم امرها لله..اني هكي بعدتها ع النار وان شاء الله ندخلها للجنه
ضمتها عزيزة وهي تقول ببكي..
/والله انا بحبك قوي وتمنيت تكوني حماتي يوم من الايام ع طيبه قلبك وحنيتك..بعدت عنها وشدت ايديها وهي تقول..خليها زي ماقلتي دلوقتي ربيها احسن تربيه عايزاها تبقى حسنة مش سيئه
ضمتها وردة وهي تقول بنبرة باكيه..
/ربي يقدرني يارب..
🍃جبريل
"ولطفي اللي كان مازال رافض يدير ماتبي وردة كنت نحس فيه بادي يلين من كلامها ليه لدرجة انه اختار للبنت اسم..طوبى"
سالمين بألم..
"اليوم اللي سبق يوم جيتها سمعت عزيزة وهي تدعي في عز الليل بعد ماكانت تصلي كانت تقول..
🍂🍂🍂🍂🍂
"ياربي يارحيم هي مالهاش ذنب يارب حبها يارب وخلي الناس تحبها يارب اتوسل اليك ياربي بارك فيها يارب بارك فيها يارب وخليها حسنة مش سيئه يارب هي مالهاش ذنب"
🍃بنبرة مخنوقه قالت سالمين..
"وجا يوم الولادة جبنا مراة كبيرة لاتعرفنا لانعرفوها كانت قابله ساعدتنا في جيبة البنت...كانت الولاده صعبه واجد والتعب ع وجه عزيزة كان باين تعب موت كانت طول ماهي تولد تنادي يارب لعند ماجابتها..
🍂🍂🍂🍂🍂
شدت ع يد ورده وهي تقول بتعب..
/طوبى ياوردة طوبى...طوبى...
وبعد مانطقت اسمها فارقت الحياة...
🍃"وردة ادمرت هداك اليوم بكل معنى الكلمه موت عزيزة دمرها وانا حسيت فيا شي من جوا مات معاها"
قعدت تبكي بالعبرة وكاريمان وهي تبكي معاها قالت..
/يارب يارب..
الصابر وهو في حالة صدمه ووجع..
/كيف درتوا..وين دفنتوها مادرتوش عزا!!!؟
جبريل وهو يمسح في دموعه قال..
/لادرنا العيله كلها حضروا عزاها وجنازتها..
الصابر:باهي كيف ماحد عرف سبب موتها..
جبريل تنهد بألم..
/عرفت كيف ندبرها وماخليت شي يطلع ليومنا هدا..
هدت كاريمان وقالت..
/باهي هلك ياسالمين ماكانوش يعلموا ان وردة اجهضت..
سالمين وهي ترشف قالت..
/لا اللي صار صار بعد روحوا ونحنا ماعطينا علم لحد مافي حد كان يهمه يعرف..
الصابر:ولطفي..كيف قبل يسجل طوبى ع اسمه بعد كان رافض!!؟
جبريل بلع ريقه وقال..
/هو لقبل ولادة طوبى كان ناوي يعطيها لدار الايتام لكن بعد موت عزيزة وتحديدا بعد ماطلعتله مرته طوبى يشوفها تغير تفكيره مية وتمانين درجه..ابتسم من وسط دموعه وقال..حتى نا لما حقيتها خذت قلبي لدرجة اني قلت نبيها تم عندي مستعد ناخدها هي وسالمين ونعدوا بيها لمصر ونكملوا حياتنا غادي وسالمين صارلها زي ماصارلي..
سالمين وهي مبتسمه بألم قالت..
/ذابت في قلبي من اول ماطاحت عيني عليها ياعمري من يشوف بيبا ومايحبها..
طاحت دمعة من عين الصابر وهو يفتكر في الفترة اللي قعد فيها معاهم طوبى كانت تكبر مع ولده قدام عيونه استلطفها هلبه لكن كاريمان اللي كانت تذكر في هديكا الفترة حتى هي تذكرت مشاعرها اتجاهها رضعتها مع ولدها وحبتها هلبه...
جبريل مسح بيده ع وجهه وشد ذقنه وقال..
/ماتسجلتش ع طول لطفي كان متردد واجد بس في الاخر حسم امره وقرر يسجلها ع اسمه وحتى هذي انا اللي عرفت كيف ندبرها..ماكانش ساهل ع لطفي اللي داره الراجل تم ايام يصلي في الليل ويطول وهو يدعي ويستغفر ويطلع في صدقات وديما يقول..نيتي خير ياربي تجاوز عني بنيتي..وتمر الايام وتكبر طوبى قدام عيونا ومن حبنا ليها تناسينا وضعها الحقيقي وصدقنا انها بنت لطفي ووردة..
سالمين وهي مبتسمه بألم..
/كله قدام عيونكم صار بعدين حضرتوا حتى السبوع اللي درناه لها..
الصابر مسح دموعه وقال..
/لحظة لحظه..موعد ولادة طوبى يختلف عن اليوم الموجود في شهادة الميلاد..
جبريل هز راسه بأسف وهو يقول..
/جت في شهر 7..
الصابر غمض عيونه بشده ونزل راسه للأرض..
وكاريمان تشوفله ودموعها تنزل..
جبريل بحزن..
/الذنب ذنب عند رب العالمين مهما كانت النيه وربي عاقبنا كلنا عليه واهي طوبى عرفت بأبشع طريقه عرفت واللي خلاها تعرف اللي جني عليها وع امها وع هله..الوسخ اللي قاعد يشوه في سمعتها شيطان الانس..
كلهم شافوله بصدمه وسالمين قالت..
/شنو!!!؟
جبريل بغضب وألم..
/القذر ماباش يصدق نشرها في شارع القهوة وكل هدفه ان يجليها من غادي وياخد الحوش منها..
🍃🍃🍃🍃
وتستمر هالإشاعة في الانتشار وخلت عبد المطلب ياخد مرته ويمشي يقعد في حوش ولده وهدا كله وللآن غرفه واريج مايعرفوا شي لكن بدي يساورهم شك ان في شي كبير صاير بسبب وضع اللي حواليهم وكذلك غياب سدرة وطوبى وانقطاعهم عن التواصل معاهم يومين ع بعض..
🍃واكيد هالخبر حيوصل لخديجه..
وخديجه زيها زي كل من سمع الخبر انصدم بقوة لكن في نفس الوقت خلاته لصالحهم هكي هما ولوا مظلومين في عيون الناس ومجني عليهم..
وفكرت كذلك ان هالخبر حيريح الجالي ويخليه يحول من كتافه شعور الذنب اللي زاد مرضه..
🍃"شن تخرفي انتي!!؟'
خديجه؛والله مانقول كان في الحق ريت وخيي ريت ريت كيف ربي نصفك ونصفنا..ريت كيف غشوك هالعيله الساقطه وغشونا وعطونا بنت حرام..
"ضمي فمك"
انفجعت وهي تشوفله..
رفعت سبابته في وجهها وقال بغضب..
/تعاوديها مرة تانيه ماتلومي الا نفسك ياخديجه نزل يده وقال..كان في ظالم في اللي صار كله انتي بعدين اني وعيلتنا اللي تقولي ربي نصفها..ناسيه علاش خلتيني ناخدها ناسيه!! ناسيه شن اني شن كان وضعي وقتها..كان اللي انقال حق مافي حد غش غيرنا ياخديجه وحني اللي بدينا بيه حني..
خديجه:لالالافي فرق وفرق كبير..انت ناسي بنتك..تعرف شن بيقولوا عليها توا!؟
بغضب قال..
/ردي بالك تعاوديها ردي بالك..بألم ونبرة مرتعشه قال..بنتي اني جبتلها العار الناس كلها تعرف ان جيت بنقتلها ياخديجه..نزلوا دموعه وهو يقول..ردي بالك تغلطي في طوبى طوبى عمرها ماغلطت ولاكانت غلط في حياتها..طوبى ديما بنت حلال ديما...
••••••••••••
"صدمني يانسرين قسما بالله صدمني خوك طلع يحبها بكل معنى الكلمه يانسرين"
نسرين وهي تبكي..
/تصدقي ان امي انوجعت عليها تصدقي لما سمعت قالت الفجي فيها الفجي..!
"وبوي شن قال"
نسرين رشفت وقالت..
/بوي همه جنة بس كلنا قهرتنا جنة ياخديجه..
"واني هادي بس اللي وجعتني ياعمري عليها بنيتي..لكن هالعيله استغفر الله وخلاص"
نسرين:اسكتي ياخديجه بالله عليك من عاب ابتلي..
🍃لكن امثال خديجه عمرهم مايفهموا الكلام هدا اصرت ان اللي صار منصف ليهم حتى انها وهي تتواصل مع بنات الشارع عن طريق الماسنجر كان تنزل في عيلة الواعر وماتخلي ماتقول عليهم وهما زيها ماصدقوا وزي ماقال دوستويفسكي مرة..
☘ "ان الإنسان يحلو له أن يرى سقوط الرجل الصالح و تلطخ شرفه بالعار."☘
🍁🍁🍁🍁
وهاليوم اخر يوم لطوبى في المشفى وضعها الصحي كويس نوعا ما لكن النفسي كان مدمر تماما..حالها قاعد زي ماهو..
🍁في حجرتها كان عبد القيوم يساعد فيها تلبس ملايتها وقلبه منفطر من الألم ع حالها..بين عيونه لما خشت عليها سدرة وحاولت تكلمها كيف رقدت وعطتها بالظهر رفضت تشوفلها حتى..
وسدرة هاليوم تبي تعاود الكرة مرة تانيه ماكانش عندها علم ان طوبى بتطلع اليوم لأن عبد القيوم قاطع الكل المهدي المحجوب اي حد يمت لعيلة الواعر بصلة..
وين وصلت في حجرة طوبى قعد المهدي في الباب وهي دقت الباب بعدين فتحاته وخشت..
نزلوا دموعها وهي تقول..
/طوبى عيوني..
ردة فعل طوبى وقتها قطعت قلب سدرة ضمت راجلها ودفنت وجهها في صدره وشدت ع ظهره بقوة..
عبد القيوم قال برجاء واألم..
/ارجوك اطلعي ارجوك..
لفت سدرة وطلعت وهي تبكي بألم والمهدي تلقاها ضمها وقعد يمشي بيها وهو يقول..
/معليشي اعذريها معليشي..
وهي تبكي بألم وتقول..
/خلاص ياالمهدي خلاص..فجأه سكتت لما شافت الصابر وكاريمان جايين وهما يمشوا بسرعه فاتوا من جنبهم بدون مايشوفوهم..
سدرة لحقتهم والمهدي لحقها لين
