■■■■■■■■■■■■■■■■■■■■
قد يحمل هذا الجزء ومايليه احداث مؤلمة وقاسيه ولكنها تخفي بين طياتها مغزى عميق لايصل اليه سوى أصحاب القلوب الحية وأولوا الألباب فهنيئا سلفا لكل من يقرأ بعمق ليصل للعبرة🌸
/////////////////////////////////////////////////////////////
#طوبى "جنة طوبى"
#جمان_فريد
#الجزء_129"إمتحان/تمهيدي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الجنة
ألا إن سلعة الله غاليه..إلا إن سلعة الله الجنة..
..رسول الله صلى الله عليه وسلم..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 صدّقني لو فقدت ما فقدت.. لو كسّر الحرمان أضلاعك ستجتاز هذه الحياة... كما يجتازها كل أحد...
فاختر الرضا يهُن عليك العبور...🍃
________________________________________
صباح يوم الجمعة..
الثاني عشر من شهر محرم..
20أغسطس..سنة 2021..
🍃طلعت من الحمام وهي تفكر بحيرة وقلق وماحستش بروحها الا وهي واقفه قدام باب الدار..
شافت غرفه ومعاها باقي نساوين العيله يلموا في الحاجات لأنهم حيغادروا الشاليه بعد ساعه..
خشت وقعدت تعاون فيهم وبدت تصلي ع النبي همسا وتسمع في هدرزتهم..
🍃🍃
بعد ماانتهوا من شغلهم،النساوين الكبار لبسوا العبايات والحجاب وطلعوا والصغار رافقوهم..
وقعدوا طوبى وغرفه..وحده تساوي في وشاحها والتانيه تلبس في قفازتها..
طوبى بعد ماكملت راجت غرفه تكمل لبس بعدين قالت..
/غرفه..
شافتلها وهي تراجي فيها تكمل كلامها..
طوبى:ماتعرفيش بالعاده النفاس بعد الاجهاض قداش يقعد زي بعد الولادة ولا اقل؟
غرفه:نحس فيه زي الولاده في حالتك لأنك اجهضتي عيل عمره قريب اربعه شهور..
حست طوبى بوجع كبير بعد ماسمعت كلام غرفه الاخير..
نزلوا دموعها مسحتهم وهي تقول..
/معناها طبيعي تقعد اكثر من اسبوعين..
غرفه وهي تحاول تتمالك نفسها قالت..
/ايه طبيعي..انتي زيدي اسألي اكيد عندك رقم الدكتورة متاعك اتصلي بيها واسأليها..
مسحت دموعها اللي كانوا ينزلوا غصب عنها وهي تقول..
/ايه عندي الكرت متاعها..نزلت خمارها وقالت..هي نطلعوا يراجوا فينا..
ومشت طلعت بسرعه..
غرفه بدموع..
/الله لايربحكم يالجالي وياخديجه الله يحرق قلوبكم..
ومشت طلعت من الدار وسكرت الباب..
🍃🍃🍃🍃🍃
وطول الطريق وهي في سيارة عمها..
كان ضامه بنتها لحضنها وتسمع عن طريق السماعات في سورة يوسف اللي لما وصل فيها القارئ احمد العجمي لآية..
"إنما اشكوا بثي وحزني إلى الله"
بكت بألم وصمت ودموعها كانوا زي السيل يجروا ع خدودها..
🍃🍃🍃🍃
وفي حوش محمد شنيبه..
بعد مافطروا ع عصيدة نسرين داروا حملة ع الصاله اللي بيديروا فيها حفلة لمة محمد ولد عمر..
هاليوم كان استثناء بالنسبة لسدرة واريج جو من الصبح لعيون ازواجهم ونفيسه اللي ماشافوش منها الا كل تقدير واحترام...
لكن تجاهلهم لنسرين مازال مستمر وتجاهل مغليه لسدرة كذلك مازال مستمر..
حلفت ع اريج تقعمز وماتحرك حاجه لأنها حامل مع ان خالتها حتى هي حامل ومااهتمتش بأمرها نهائي..
🍃🍃🍃
بعد ماكملوا شغلهم في الصاله توجهوا للكوجينه بش يتساعدوا في تجهيز الغدي الكناين ومرت شيبانيهم وحماتهم..
🍃نسرين:خلاص نفيسه بري قعمزي قاعدة نافس وجايبه بالعمليه مش باهية ليك الحركه هلبه..
نفيسه:نحس في روحي كويسه وناشطه مافيا شي..
سميرة:بري بنتي حدا عيلك بري..
نسرين:عمر ياخد ويوصي يانفيسه..
سميرة:خلاص نفيسه اسمعي الكلام..
هزت نفيسه راسها بصمت بعدين مشت غسلت ايديها ومسحتهم وطلعت من الكوجينه..
هدا كله وسدرة حداهم تخدم بصمت وسميرة مرة مرة تشوفلها بعدين قالت..
/حتى انتي بري تريحي ياسدرة
نسرين:بوي يبي الكسكسي من ايديها...
سدرة:مافي حد يعرف يديره زيي حتى انتي ياسمورة..
ضحكت سميرة وكملت غسل البطاطا..
ويدق باب الكوجينه من برا..
نسرين:مني..
"اني"
سدرة:خش مهدي خش..
فتح باب الكوجينه من برا وخش شافهم وقال..
/يعطيكم الصحه..
ردوا عليه..
/الله يسلمك..
عقد حواجبه وقال..
/مش قتلك حددي العربي؟
سدرة وهي تغسل في اللحم قالت..
/حددتلك انت والولاد..
سميرة:الله يبارك عليها من بكري واقفه ع رجل ماقالت نرتاح شويه..
انقمصت نسرين وسدرة ابتسمت ع جنب..
هوقال:سيبي اللي في يدك وبري قعمزي..
التفتت وقالت..
/اني ولاسميره!؟
ضحكت سميره وهو قال...
/بلاتسهويك واسمعي الكلام..
سدرة بإبتسامه..
/مانقدرش ياغالي عمي طلب كسكسيا طلبة لازم نديره وبعدين ماتخافش عليا من يوم يومي زي الفرس الله يبارك عليا وحرة ونعول ع تلاثه اربعة حياش ومانقولش اه..وراك تنسى ياسيد التريس حتى الغيبوبه ماقدرت عليا..
سميره تسمع وهي تضحك..
وهو كذلك كان يضحك بعدين قال..
/ياودي باهي باهي خلاص فهمنا..معاش تنقي ع روحك..
ضمت اصابع يدها اليمين لبعض وقعدت تحرك فيها دائريا ع راسها وتقول..
/اللهم صل ع النبي..عينك ياحاسد للعمي..
حرك راسه يمين ويسار وهو يضحك بعدين لف وطلع من الكوجينه وسكر الباب..
سميرة بضحكه:عطيك الهني..
لفت سدرة ع الحوض وكملت باقي شغلها وهي مبتسمة ونسرين جنبهم ملتزمه الصمت وكالعاده تغلي من داخل..
🍃🍃🍃🍃
الساعة 6:45مساءا..
فتحت باب الكوجينه اللي يفتح ع الجنان وطلعت لقاته يراجي فيها جنب شجرة الفل..
عقد حواجبه وابتسم لما شافها جايه ع استحياء ووجهها محمر من الخجل..
وقفت قدامها بمسافه وقالت..
/فكرت واستخرت باهي؟
بنفس الابتسامه قال..
/باهي..
تنهدت وقالت..
/ولأني نبي الاستقرار والسند ليا ولصغاري..موافقه..
قال:طيب فينا..
رفعت عيونها في وهي تشوفله بنظرة امل ورجاء قالت..
/بالله ماتخيب ظني ولاتخليني نندم..
وهو مبتسم قال..
/بإذن الله حتلقيني خير ماتتمني..
هزت راسها وقالت..
/ان شاء الله..ولما جت بتمشي وقفها وهو يقول..
/راجي شويه في موضوع تاني بندوي فيه معاك..
هي بإستغراب قالت..
/موضوع شني؟
☘ومن الجنان لدار المعيشه اللي كانت طوبى مقعمزة فيها مع صفيه ع انفراد..
🍃طوبى:انتي مقتنعه وراضيه من قلبك؟
صفيه:وربي شاهد يابنتي..
طوبى:مانبيكش تزعلي مني بس اني خايفه مع الوقت موقفك يتغير وتقولي كيف خليت ولدي العزري ياخد ارملة بصغارها..
صفيه:ومش اميمه مطلقه وخدت عزري..
طوبى:سامحيني لكن في ناس ماشيه بمبدأ حلال علينا وحرام ع غيرنا..
صفيه:واني مش منهم يابنتي..
طوبى:مش قصدي نجرحك بس اني نعرفك من خلال بعض المواقف عندك مصلحة صغارك فوق كل شي وهدا حقك كأم بس في امهات توصل بيهم الحكايه انهم يظلموا ناس تانيه ع خاطر صغارهم..
صفيه بإبتسامة اسف..
/انتي قاعده مش صافيه من اللي صار قبل..
طوبى:لالا كانك عليا اني مسامحه في حق نفسي وموقفك مع سدرة خلاني نحبك اكثر من قبل..بس في الحالة هادي اني نفكر في مصلحة اختي..دمعوا عيونها وهي تقول..مانبيهاش تكرر مآساتها ولاتعيش اللي اني عشته..اني ممكن نتحمل شويه لكن غرفه لا مش حتتحمل تنكسر اكثر من مرة..
صفيه:اني نخاف ربي يابنتي ومانبيش نظلم حد بش مايرجعليش في بنتي اللي ماصدقت تهنيت عليها وحتى غرفه توا ولت زي بنتي ويعلم الله بمعزتها في قلبي هي وصغويرتها..
ابتسمت طوبى وقالت..
/وحتى هي تعزك وتحترمك هلبه..
صفيه بإبتسامه:يعني تريحتي توا؟
هزت طوبى راسها وقالت بإبتسامه..
/تريحت..
🍃🍃🍃
"اني بروحي مركزة ع التواريخ"
حسين:كويس اني بنخلي امي عندكم اليومين هادم ومن الليل لليل نجي نبات هني..
غرفه هزت راسها بإيجاب وهي تفكر بقلق..
حسين بضيق..
/والله ماتمنيت توصل بينها وبين عبد القيوم للطلاق..
غرفه بحزن:غصب عنها مسكينه..
حسين:مش عارف علاش حاس صاير شي تاني..
اخفت غرفه ارتباكها وهي تقول..
/شن بيصير اكثر من اللي صار!؟
حسين:معاش وصل فيها حد من ماليه؟
غرفه:رقمها الجديد مايعرفه حد منهم..
تنهد حسين وقال..
/بنقولك حاجه ومانبيهاش تطلع منك..
غرفه بخوف:شني!؟
حسين بإستياء:عبد الله عم عبد القيوم تلاقى هو وعمي محجوب المدة اللي فاتت..
غرفه:خالي مشاله؟
حسين:لاهو طلب يشوفه..قال في البدايه قعد يستسمح ويتعذر ع تصرفات خواته بعدين قاله حتى انتم انهوها من عندكم ومعاش تأملوه..
غرفه بصدمه:نعم!
حسين:خالك قال فصلت عليه وماخليت ماقلت وسيبته..
غرفه بصدمه:هادم خيرهم محسسينا ان طوبى هي اللي جرت في جرة ولدهم وخداته غصب عنه!
حسين:لقطة الزواج بالدرقه خلتهم ياخدوا عليها وعلينا الفكرة هادي..خالك قال ندمت عليها اشد الندم..
غرفه بضيق:خسارة هو راجل كويس لكن الحلو مايكملش..
حسين؛والله لولا انه عشش بالاتصالات مارديت عليه الجو اللي داروه ماليه خلاني اشبح كيف ع قولة المصاروة قفلت منه..
غرفه بحسرة:بخت طوبى وحظها ماطيحها كان في عيلة شنيبة وامثالهم..
حسين بألم:بجديات مقهور عليها هلبه والله مرات لين تخنقني العبرة مش عارف علاش يصير معاها هكي..
نزلوا دموع غرفه مسحتهم وهي تقول..
/اكثر شي قاهرني كيف كنت نعامل فيها زمان لين نكره روحي..
حسين؛خلي زمان لزمان وفكري في توا بس وشوفي للي درتيه معاها وهي كيف تقابل فيه..نشوف علاقتكم اقوى من علاقتها هي وسدرة..
غرفه بإبتسامه من بين دموعها قالت..
/هي اللي خلتنا هكي..
حسين:باهي خلاص معاش تبكي قلبي مايتحملش..
شافتله بنظرة امتعاض بعدين رشفت ومشت وخلاته وهو يضحك عليها..
🍃🍃🍃🍃
وبدت حفلة اللمة في حوش شنيبه..
والصالة ولت مليانه بالحضور من الاقارب والجيران والمعارف..
اهل نفيسه عجبهم التنسيق والديكور اللي داروه للصاله ونظام الحفلة اللي كان ماشي زي الساعة..
ولاحظوا زي باقي الحضور كيف الكنه الكبيره لعيلة شنيبه مشرفة ع كل شي واللي حواليها يساعدوا فيها..
وهالشي اكيد ماسرش مغليه وخواتها اللي حاولوا يتجاهلوا وجودها ويشكروا في سلفاتها قدام الناس وهي مايجيبوش في سيرتها نهائي..
واكثر شي لاحظاته سميره هو محاولة خلق حساسيات بين اريج وخالتها وحتى اريج مش غافله ع الوضع...
🍃🍃🍃🍃
فتحت بيبان الدولاب وقالت..
/اختاري اللي يعجبك..
طوبى وهي تشوف لفساتين غرفه المعلقات في الدولاب جو عيونها ع الفستان الاسود اللي كان مغلف بغلاف نايلو شفاف..
ضحكت وغرفه لما شافت وين موجهة نظرها ضحكت معاها..
طوبى:خطر عليا هداكا اليوم بتفاصيله..عندك علم جيت بنولي لما خشينا للصالة!
غرفه:بعدين ذبحتك..
طوبى بضحكه:نبيله قعدت تشجع فيا وتقولي في كلام حمسني حسيت روحي بنمشي لغزوة..ضحكت وقالت..ولما خشيت خفت نرتبك ونطيح في نص الطريق لكن لما جو عيوني ع العقارب خديجه ونجاه الخوف كله راح وتخيلت روحي ديانا بجديات..
غرفه:تمنيت لو صورتك هداكا اليوم..
رفعت طوبى حواجبها بعدين نزلتهم وقالت..
/عليك يوم..لما نتفكره مرات نحبه ومرات نكرهه لأني نتفكر اللي صار بعده..
غرفه:باهي سكيب سكيب وخلينا في حفلة غدوة شن تختاري..
ضحكت وهي تمسح في دموعها بعدين قالت..
/السماوي..
غرفه:واني بنلبس اخضر..
طوبى:تو زعمك حسين بيبدا في التدخلات؟
غرفه:يقرا فاتحه بعدين يحكم..
ابتسمت طوبى وقالت..
/امتى بيمشي لخالي؟
غرفه:دويت اني وخالتي صفيه..
طوبى بضحكه:قولي عمتي..
ضحكت غرفه وقالت.
/المهم قالوا بيمشوا نهار الثلاث يخطبوني من خالي..
تنهدت طوبى بإبتسامه وقالت..
/ربي مايحرمنا هالخال..اهو هدا اللي ينطبق عليه المثل اللي يقول الخال والد..
غرفه بإبتسامه:صدقتي..
🍃🍃🍃🍃
"والله يامحجوب نبي نواصلهم لكن هما حاقدات علينا هلبه"
المحجوب:مش حقد يا نجوى..خاطرهم واجعهم وعندهم كل الحق..
نجوى"اخت وردة"..
/الصغيرة لزتنا من حوشها..
ابتسم وقال..
/الصغيره بالذات مافيش اطيب من قلبها ممكن وقتها من وجعها ع بوها واختها دارت هكي لكن في حقيقتها مش حتلقي احن منها ولااطيب من قلبها..
سكتت شويه وهي تفكر بعدين قالت..
/كلمها قبل وشوفها كان رضت بجيتي نجي غير هكي وسامحني وخيي..لا ..
هز راسه بالموافقه وهو يقول..
/باهي..
🍃🍃🍃🍃
خشوا العاملات بعربات فيها عشي المعازيم..
وبدوا يفرقوا عليهم وسدرة واقفه من بعيد وتراقب فيهم..
ع خشة سميرة اللي كانت في الكوجينه تساعد في العاملات وقفت جنبها وقالت..
/قعمزي تعشي..
سدرة:خل يفرقوا ع الكل قبل..بري ارتاحي انتي..
مشت سميرة بتقعمز وهي تشوف للعاملات لعند ماوصلت في مكان ام نفيسه وقعمزت جنبها..
وفي جنبهم بمسافه بسيطه نسرين مقعمزة تهدرز هي وفايزة جابولهم العاملات العشي وخدوا صحونهم..
شافت فايزة لسدرة وهي تقول..
/كانت تقعمز وتريح روحها من بكري واقفه..
نسرين:هي هكي تبي..
فايزة:ربي يهديها..
..واريج مقعمزه ع جهة مع صفاء تشوف لخالتها احيانا وهي مضايقه..
"يا...معليشي ياانتي"
شافت لوحده من خوات مغليه تأشر ع خالتها وتكلم فيها بأسلوب مخلي سدرة تبان وكأنها شغاله..
شافتلها سدرة بعدين قدمتلها لين وصلت فيها..
مدتلها علبة مشروب غازي وقالت..
/مانحباش**** قوليلهم يجيبولي ****
خدت سدرة العلبه ومشت والعيون تلحق فيها..
فايزة:خيرها خالتك؟
نسرين وهي تاكل قالت..
/خيرها؟
فايزة:ماشفتيهاش شن دارت؟
نسرين:لاماشفتش شن دارت؟
فايزة شافتلها شويه بعدين غيرت عيونها عنها وقالت..
/سلامتك..
ولت تاكل نسرين عادي جدا وهي تشوف لسدرة كيف جايه بعلبة مشروب تانيه لخالتها.
وصلت فيها وقالت..
/تفضلي..
اخت تانيه لمغليه قالت..
/لالا خلاص ارفعيها مش باهي ليها المشروب..
مغليه:جيبيلها عصير..
قالت اختها:مدابيك تفاح..
مغليه:عندنا التفاح..بري جيبيه بري..
وتنفد سدرة بصمت وبنت اختها كانت تشوفلها بقهر..
ناضت وحطت صونيتها ع الطاوله ومشت طلعت ورا خالتها..
صفاء شافت لامها بضيق وامها بادلتها نفس النظره..
🍃في الكوجينه..
خشت اريج ع سدرة لقتها طلع في العصير من الثلاجه قالتلها..
/كان بتقعدي ساكته هكي بنتكلم..
سكرت سدرة الثلاجه وقالت..
/وانتي شن دخلك..
اريج:كيف شن دخلي!؟ تبيني نشوفهم يديرولك هكي ونقعد ساكته!
سدرة:ايه تقعدي ساكتة وماتدخليش اني نعرف نتصرف مع النماذج هادي بروحي..
اريج بغيظ؛مانيش طالعه..
سدرة خدت نفس بعدين قالت..
/اريج بنتي اني وياك هني سلفات واني مانحبش السلفه تدخل في تعامل سلفتها مع ناسهم ولاطريقة عيشتها..
اريج؛وخيرك انتي دافعي عني لما يوصلوا فيا!؟
سدرة:لاماندافعش عنك نعطي في رايي وخلاص..وهي سكري ع السيرة وتحركي قدامي..
بضيق طلعت اريج وسدرة لحقتها..
🍃واستمر حالهم هدا مع سدرة لنهاية حفلة اللمه..
روحوا الحضور من اهل نفيسة والجيران وقعدوا بس خوات مغليه..
☘نفيسة:بارك الله فيك ياسدرة نعولك في جيابك ان شاء الله..
سدرة وهي تلبس في عبايتها قالت..
/تسلمي حبيبتي..هيا روجه..
اريج ناضت ومشت سلمت ع مغليه وباست ع راسها وقالت..
/تصبحي ع خير عمتي..
مغليه:قدامك كل خير..ماتتحركيش هلبه..
اختها قالت..
/دلعي يامغليه دلعي..
مغليه:الكنه الباهيه تستاهل الدلع.
مرت خوها قالت..
/صدقتي.
اريج:تسلمي عمتي..تصبحوا ع خير.
سدرة:تصبحوا ع خير..
ومشوا مع بعض طلعوا من الصاله..
سدرة خدت ولدها اللي كان راقد في دار المعيشه واريج رفعت الشناطي الصغار وطلعوا مع بعض لسيارة محمد المهدي اللي بيرفعهم لحوش طوبى..
***********
اريج بغضب:حرقتلي دمي حرق لما قالتلي مادخلكش مش عارفه كيف تبيني نشوفهم يعاملوا فيها هكي ونسكت..
طوبى:نتفكر قبل لما جيتها نحكيلها ع معاملتهم لأميمه قالتلي ماتدخليش اميمه شخصيتها قويه وتعرف تاخد حقها بروحها وحتى سدرة يااريج هكي وراجلها قايم قدرها مايقدروش عليها ولايحركوا فيها شعرة..
اريج:حتى انتي تبيني ندير روحي مانشبحش؟
طوبى:ماتعطيهمش فرصه يوصلوا للي يبوه ويخلوا وحده فيكم تخرب ع التانيه...فاهمه عليا؟
خدت نفس وزفرت وقعدت ساكته..
طوبى:مادام راجلك كويس ويحبك وصاينك سايسي وسايري ع خاطره زي ماقاعدة دير سدرة بالزبط..هكي الحياة تمشي يااريج..
هزت اريج راسها مواقفة ع كلامها..
طوبى بإبتسامة حماس..
/وتوا فوتي هالسيرة العكرة واسمعي اخر اخبار روفي مع الافندي..
ضحكت اريج بفضول وقالت..
/احكي احكي..
☘ومن دار البنات للصاله اللي كانوا مجتمعات فيها..
غرفه وصفيه وهاديه وسدرة والحديث اللي يدور بينهم عن نفس الموضوع..
سدرة بإبتسامه..
/مبارك مبارك وربي يتمم ع خير..
غرفه بإبتسامة خجل..
/الله يبارك فيك..
هاديه بفضول..
/ايه احكيلنا ع اللمه وجوها..
سدرة:جت قنينه الحمد لله..ومغليه رجعت للملاعب وبقوة..تتفكروا الحركة اللي دير فيها متاع لما تعطي لكناينها الجدد هدايا من شيبانهم وتخليهم يدوروا ع المعازيم بش يوروهم الهدية!..
هاديه بضحكه تعجب..
/اشيه!
صفيه وهي تضحك قالت..
/دارتها؟
سدرة:ايه هدوا لنفيسة طاكم ذهب وحديده اسم فضة لولدها واريج هدوها طاكم ذهب حتى هي ومغليه زادتها حديده..
هاديه:ماشاء الله..
غرفه:وانتي؟
سدرة:سلم راجلي اللي مغرقني في الهدايا ليومها نوضني من النوم وهو يلبس فيا حديده تهبل..مدت يدها ورفعت كمها وهي تقول..هيا..
🍃وهما قعدوا يسايروا فيها مسايره وفي انفسهم كانوا مضايقات جدا بالذات غرفه..
*********
اريج بضيق:معاش تفكريني بالله عليك..
غرفه بغضب:محقرهم..
طوبى:كان حطوا حد في روسهم سلامته لكن مع سدرة مايطلعلهمش..
غرفه:توا لما يجيبوا يديروا لأريج هدايا وسدرة يفوتوها..
وتخش سدرة عليهم الدار وتسمع كلام غرفه الاخير بعدين قالت..
/وبالك تحسابيني مدورتهم ولامعدله ع تصرفاتهم المريضه!
سكتت غرفه وهي مضايفه..
سدرة:مش جدد عليا العيله هادي نعرفهم كويس ونعرف كيف نتعامل معاهم..
"طوبى تعالي لجنة تبيك"
ناضت طوبى وهي تقول..
/اكيد تبي نلبسها شمال بترقد خلاص..
وطلعت من حداهم..
اريج راجتها لين طلعت بعدين قالت..
/الزفته نسرين تلقح ع مشيتها للبحر..
سدرة بغضب:ورقتلها..طلعت شايفه صور في الستوري متاعك!
غرفه:قاعدة عندي الجيفه!!؟
اريج:ماتنزلش هلبه ..
غرفه:ايه واني نسيتها بكل..رفعت حاجبها وقالت..خليها تقعد بش نزيد نسحنها..
اريج:ماتبي الا هكي..
غرفه:باهي شن قالت؟
اريج وهي تعجب عليها..
/شكله طوبى ولى حالها باهي اللي مشت للبحر!
غرفه:شن قلتيلها؟.
اريج:قولي الله يبارك..
غرفه بضحكه:الله!
اريج:والله..
سدرة بضحكه:قالتلها باهي الله يبارك ويدوم عليها..ردت اريج امين ويكفيها شر عباده..
غرفه بضحكه:تستاهل..
ع خشة طوبى وهي رافعة جنة في حضنها وتقول..
/عاودوا شن كنتوا تحكوا..
غرفه:يعلقوا ع طرحة رقيه..
سدرة:لابسه بدلة قونه.
ضحكت طوبى بعدين قالت..
/استغفر الله استغفر الله..باهي قولولنا شن هو العشي..
🍃وكملوا حكاويهم عن اللمة واجوائها لعند ماجاهم النوم..
اقنعت غرفه طوبى ترقد معاهم في الصاله وخدت طوبى بنتها وطلعت بيها للصاله..
والتموا يتبادلو الاحاديث وهما في مراقدهم لعند ماغلبهم النوم وراحو فيه..
🍁وعبد القيوم ساهر الليل وهو مقعمز في بالكونة الشقة وعيونه ع القمر..
قلبه كان مليان خوف وقلق عليها هي حاليا عايشه حزن والحزن يضعف همة الانسان ويمكن منه الشيطان..وخادم السحر حيكون في اقوى حالاته في وضعها هدا..
ويبدا حربه النفسية عليها بالأحلام المرعبه..
🕸خلاها تشوف في نومها مجموعة من الافاعي معبيات دار البنات وهي راقدة ع سريرها...
ويركبولها اكثر من وحده ويوصلوا عند حزامها ويغرسوا انيابهم..
🥀فتحت عيونها وهي تحس بوجع..نزلت نظرها لبطنها تخيلت انها حتشوف الافاعي لكن مالقت شي..والوجع مازال مستمر..
مررت نظرها حواليها لقتهم غارقين فالنوم..
ناضت بهدوء ومشت طلعت من الصالة وهي تحس بوجع فضيع..
توجهت للحمام وخشتله..قعدت فيه بضع دقائق بعدين طلعت وهي حاطه يدها ع حزامها وتتألم بقوة..
مشت بإتجاه دار المعيشه وبدت تقرا في سورة الفاتحه..
وقبل لتوصل لباب الدار تحس بغثيان قوي..خلاص حترجع..
لفت ومشت بسرعه خشت للحمام..
سكرت الباب وفتحت الميه وبدت ترجع ومافي حد حس بيها واستاقظ..
بعد وقفت ترجيع غسلت وجهها وفمها والحمام بعدين بخت معطر وطلعت منه بهدوء متوجهه لدار البنات..
خشتلها وخدت شيشة مية الرقيه وطلعت منها بسرعه من الخوف..
خشت دار المعيشه وقعمزت ع فراش من فراشاتها بتعب وبدت تشرب في الميه ولما كملت الشيشه سكرتها..وانطرحت ع الفراش وبدت تحوقل لعند مارجعلها النوم وراحت فيه..
🍃🍃🍃🍃
تاني يوم..
🍃"ماتكذبيش ياطوبى"
تنهدت وقالت..
/عادي ياغرفه تصير معاي حاجات بسيطه نقدر نغلبها واهي اريج تقولك..
اريج بضيق:ايه حكتلي عليهم..لكن وضعك توا يختلف مازال نافس مفروض اول ماتحسي حاجه تكلمينا طول..
طوبى:باهي شن تشوفوا فيا قدامكم توا!؟ مافيا شي معاش تكبروها..
غرفة:باهي سألتي الدكتورة عن وضعك؟
طوبى؛ايه قالت زي نفاس الولاده هدا علاش طول..
اريج:قوي؟
طوبى:عادي.
اريج:وجهك اصفر وعيونك محلقات..
طوبى:طبيعي يااريج..
تنهدت غرفه وقالت..
/باهي تحركي قدامي للفطور..
ضحكت ومشت طلعت من الكوجينه وهما لحقوها وكانوا مستاءات وفي حالة قلق بالغ..
🍃🍃🍃🍃
الساعه 6:00مساءا..
امام احدى قاعات المناسبات في العاصمه..
درسوا سيارات حسين ونضال ومحمد المهدي تباعا..
نزلوا منهم النساوين وخشوا داخل القاعة مباشرة..
☘ويلقوا سلافه وامها وميار وامها في الاستقبال.
رحبوا بيهم ترحيب حلو بعدين خدتهم سلافة لطاولتهم
وميار بعيونها مع طوبى ونظراتها ليها نظرات تهكم وتعجب..
وترجع سلافه توقف جنبها وتسمعها تقول..
/هادي اللي حالتها بالويل وتقطع القلب!
سلافه:هلأ بدك تبلشي!؟.
ميار:بصدق تو هي بالها فالمناسبات!! ماتقولش راميه ونازله بيها مصيبه!
سلافه:شو بدك ياها تعمل يعني تحبس حالا بالبيت ولاتنتحر!؟
ميار:ياودي ع الاقل يبان عليها شويه البلي اللي هي فيه جايه ع سنقة عشرة وتضحك وجوها مليح!
سلافه:المظاهر خداعه ياميار..
ميار:في هادي صدقتي مع هادي فعلا المظاهر الخداعه..
سلافه ضيقت عيونها وقالت..
/بس بدي اعرف انتي ليش بتكرهيها كل هالقد!.
ميار:مش كره..لكن نوعيتها اللي يديروا في رواحهم ملايكه ومافيش منهم لانحبهم ولانرتاحلهم..
سلافه بملل..
/طيب سلمي ع الملايكه الجايين علينا..عمتك وبناتها..
ضحكت ميار بكتمان بعدين التفتت ع قريباتها بإبتسامة مجامله..
عمتها سلامها كان عادي لكن بناتها سلموا ببرود وترفع ع سلافه وامها وهما الزوز لأنهم تعودوا تغاضوا عن تصرفاتهم تغاضي تام..
🍃🍃🍃🍃
وبدت حفلة السبوع وطلت لبانة ع الحضور بالزي التقليدي الليبي اللي زادها جمال ع جمالها وهي دف في كروسة"عربة اطفال" ولدها ع لحن نشيد يتغنى بالرسول الكريم..
☘اريج:طالعة تجنن الله يبارك..
غرفه:لبستنا تزيد ع الزين زين..
واللي معاهم مكتفيات بالمشاهده بإعجاب..
☘☘☘☘
🍃وفي حوش طوبى كان حسين قاعد مع الولاد وبوه معاه ويجيه اتصال من عبد القيوم يرد عليه غصب عنه..
حسين:ايوه تارقي شنجو..
"تمام..اسمع قول لأختها ماتخليهاش وحدها الليله قوللها ترقد جنبها ماتفارقهاش مرات تشوف كوابيس وتوعى مفجوعه لازم مية الرقية تكون عند راسها وبعد تفيق تشربها منها وتقرا عليها الفاتحه والفلق"
حسين:الفاتحه والفلق..باهي..
"نسألك بالله كان صار شي ياحسين تخبرني"
تنهد وقاله..
/حاضر حاضر..
"تصبح ع خير"
حسين:قدامك كل خير..نهي المكالمه وهو مستاء وبوه اللي كان يشوف للتلفزيون وهو يسمع فيه قاله..
/شن يبي؟
عقدحسين حواجبه وهو يقول..
/يوصي فيا ع طوبى..
هز بوه راسه بصمت ورجع ركز مع التلفزيون..
🍃🍃🍃🍃
وفي حفلة السبوع كانت الاجواء جميله استمتعوا بيها كبار وصغار اللي منهم بنات غرفة وطوبى؛إلى جانب نظام الحفلة اللي كان ممتاز من جميع النواحي..
لكن صارت بعد الامور عكرت شويه جمال الاجواء..
**********
اريج وهي تمسح في مكياجها قالت..
/حركاتهم بايخه وشبحاتهم يالطيف..
غرفه:حتى اني لاحظتهم بالذات لما خدوا صورة جماعيه..
لمت طوبى شعرها فوق وهي تقول..
/ياحناتي في ناس من اهل راجلها مايبوهاش وع خاطر هكي رفضاته اكثر من مرة لما خطبها..
اريج:ربي يكفيها شرهم مسكينه..
ساوت غرفه التيشرت متاع بيجامتها وهي تقول..
/صاحبة سلافه درهتلي كبدي
التفتت اريج وقالت لطوبى..
/مش طايقاتك.
طوبى بضحكه:وياريت نعرف علاش..
غرفه:والله لين قريب نشك فيها حاطه عينها ع عبد القيوم..
طوبى بإبتسامه فيها مسحة حزن قالت..
/لالا حتى هو تتعامل معاه بنفس الطريقه وهو يعطي فيها ع راسها..
اريج:بيبو نسألك سؤال تجاوبيني بصراحه..
قالتلها:اسألي..
اريج:انتي بلعاني ديري هكي ولا
وهي مبتسمه قالت..
/شن قصدك؟
خدت نفس وقالت..
/يعني الحركات اللي ديري فيها مشيتك للبحر واليوم للحفله كله بالقصد..
غرفه تشوفلها وهي تراجي في اجابتها..
وطوبى هزت راسها تأكيدا لكلام اريج..
غرفه:راك تقوليلي تبي سلافه تستغل الوضع بش تسهل طلاقك من عبد القيوم!
حركت راسها بالنفي قالت..
/لا..سلافه لو تبي هكي ماكانتش قوت علاقتها بيا راهي ماصدقت صار اللي صار بش تسحب نفسها وتبدا تلود عليه..
اريج:باهي نبي نعرف شن في بالك بالزبط..
تنهدت وقالت..
قلتلكم ميار هادي لاتحبني ولاتحبه ومادابيها تحرق دم عبد القيوم وتستفزه متأكده انها اول تشوفه مش حضيع الفرصه وطلع سمها عليه..
غرفه:وهكي تستفزه وتخليه يتعفلق منك ويطفح عنده الكيل ويطلقك..
تعبوا عيونها بالدموع وهي تقول..
/يارب..
شافت غرفه لأريج لقتها تمسح في دموعها مع المكياج..
طوبى وهي شادة دموعها بقوة قالت..
/خل نمشي نشوف جنوني..
ومشت فتحت الباب وطلعت وسكراته وراها..
غرفه بحزن:بكري حسين بعتلي رساله قالي عبد القيوم كلمه ووصاه بحاجات نديرهم لطوبى الليله..
اريج التزمت الصمت وهي تبكي..
وغرفه تنهدت بحزن بعدين فتحت الباب وطلعت وسكراته وراها..
🍃🍃🍃🍃
"هالخنفورة بيقيمهالي الليله عارفاته"
طوبى وهي ضامه علي لحضنها قالت بلغة طفوليه..
/ارقدي يامامي ياحلوة اني بنسهر مع خالتي بيبو..
سدرة:واعر هدا راهو وتنقريزه مايتمش..
طوبى بإبتسامه..
/مادوريش انتي نعرف نتفاهم معاه..
خشت اريج قعمزت شافت للصغار وهما راقدين بعدين قالت..
/منظرهم يسهف للنوم..
سدرة:وارقدي من شادك؟
اريج:حاسه روحي جعانه جوع مش طبيعي تقول ماكليت شي..
بلعت سدرة ريقها وقالت..
/حتى اني..
طوبى: تو نتكملكم سفرة مليحة..
سدرة:قعمزي تو نديرها اني .
ناضت بعلي وهي تقول..
/والله مادايرها واحد غيري..ومشت بعلي وهي تقول..سلملي العسول..
☘☘
خشت للكوجينه..
عطت علي تفاحة يلهى بيها بعدين بدت تجهز في السفرة..
حطتلهم من كل شي فيه كالسيوم وفيتامينات وصبتلهم عصير فواكه طبيعي..
وقبل لترفع السفرة رفعت علي وين مافي امه واريج بعدين رجعت جابت السفرة وحطتها قدامهم..
☘اريج بشهيه:تسهف..
سدرة:عطيك الهني كيف تعرفي تنسقي وتفتلكي..
ضحكت وقالت..
/صحتين..وخدت علي وتوجهت بيه لدار البنات لقت غرفه تكلم في حسين هاتفيا..
ضحكت بكتمان وولت طلعت وسكرت الباب..
🍃غرفه:توا خشت عليا وطلعت..
"المهم ديري زي ماقتلك"
غرفه:ان شاء الله..
"تمام خلينا نحكوا في مستقبلنا"
غرفه بإمتعاض..
/حسين!
"ياودي افهمي قبل..نبي ندوي معاك في موضوع العرس"
قاطعاته وقالت..
/عرس!؟
"ايه عرس مالا شنو وبنديره كبير يدووا بيه شهر القدام"
سكتت غرفه وهي مضايقه..
"غرفه"
قالت:معاك معاك..بس هكي يبي وقت..
"نبيه في شهر عشرة نبي خوتي يحضروه.."
غرفه:اميمه بتجي في تسعه زعمه تقعد لعشرة!؟
"اميمه بتجي في نص تسعه وبتروح في نص عشره واني نبي نديره في اول اسبوع من عشرة.."
شدت شفها السفلي بأصابعها السبابة والابهام وهي تفكر..
وهو كمل يقول..
"وبعدين بنطيروا لقبرص"
ضحكت بدون صوت..
"تكلمي علاش ساكته "
هزت راسها وقالت بإبتسامه..
/كويس..
🍃🍃🍃🍃
في الجنان..
كانت طوبى حاطه علي الطاوله ومقعمزه مقابلاته وتلعب معاه..
داعب بوجهها بطنه وهي تقول..
"قرقر"
وهو يضحك بالصوت..
صوت ضحكته فكرها بولد خاله دمعوا عيونها مسحتهم وهي تقول..
/ربي يطول في عمرك ويفرح سديره بيك وبوخيك ولااختك..
"جنوني قولي لخوك تصبح ع خير ..
جنو قولي لأختك تصبحي ع خير..
دوخت البنت..
انتي اللي دوخي فيها صدقيني جايتها اخت من شكلك باينه..
من شكلي!؟ كيف ترا؟
زدتي احلويتي ويقولوا المراة تزيد سماحة لما تحمل ببنت..
من وين عرفتها هادي!؟..
اللي يقرا يعرف..
والله انت تهبل باهي..
مافش جديد..
تعلمت الغرور حتى انت..
من عاشر قوما..
مامي نلقد.."نرقد"
صبي رقدي البنت وفكيني من هرجتك..
هرجتي اني صار!..خل نرقد جنوني ونوليلك نتفاهم معاك"
استاقظت من سرحانها مع الذكريات وهي تضحك ودموعها ينزلوا وعلي يضرب بإيديه الصغيرات ع وجهها يبيها تلعبه...
مسحت دموعها وقالت بضحكه..
/باهي باهي..
ع طلعة غرفه لما شافتهم ابتسمت..
قدمتلهم وقعمزت معاهم لاحظت ع طوبى اثر الدموع تراجعت عن اللي جت بتحكيلها عنه لكن طوبى فاجئتها لما قالت..
/مش قادر يصبر الافندي؟
ضحكت وقالت..
/قالي بنكلمك في مستقبلنا..
ضحكت طوبى وعطت علي لعبة يلعب بيها بعدين قالت..
/ع شن تفاهمتوا..
غرفه؛قالي يبي يدير عرس كبير..
طوبى:ايه؟
غرفه:شن ايه!؟ كان بيديره عرس كبير معناها بيجيب كسوة معناها بنلبس البودري والفيلو..
طوبى:وهدا الطبيعي.
غرفه:خيرك طوبى! معقوله بندير هدا كله مرة تانيه!.
طوبى بإستغراب..
/مافهمتش يعني شن فيها!؟
غرفه بضيق:تعرفي شن بيقولوا عليا الناس!
طوبى:خيرك غرفه شن جاك!؟ اهو اني واميمه واريج درنا عراس وفرحنا برواحنا مش حرام راهو..
ردت بضيق شديد:نحس في وضع المطلقه في الحالة هادي اهون من الارمله..
طوبى:مطلقه ولاارمله ولابنت من حق اي وحده تفرح بروحها شن ماكان ظرفها مدام ربي مش محرم الحاجه هادي طز في غيره..
حطت غرفه يدها فوق عينها اليسار وقعدت تحك في جبهتها وهي تقول بضيق واستياء..
/مش عارفه..حاستها بايخه..
قالت طوبى بكره وازدراء...
/المجتمع اللي عايشين فيه خلاك تشوفيها بايخه..هالمجتمع اللي ديما يشوف للمراة بنظرة استنقاص لين خلا المراة نفسها تستنقص نفسها وتشوف لحاجات من حقها تعيشهم انهم عيب ويابخات..اسمعي مني سلم وخيتي افرحي بروحك وعيشي حياتك بمايرضي الله مدام ربي راضي ماتعدلي ع حد..
نزلت غرفه يدها وتنهدت وهي تفكر..
طوبى بإبتسامه..
/بإذن الله بنديرولك عرس كبير حتى انتي وبتعيشي فرحتك حق المرة هادي..
ابتسمت غرفه بأمل وهي تشوفلها بعدين ضحكت لما شافت علي ضرب وجهها باللعبه اللي في يده وهي تصنعت الزعل منه بعدين قعدت تلعب معاه وهو يضحك..
🍃وبعد ماتحاكوا شويه خشوا للحوش وكان كل من فيه راقد..
صفيه وهاديه مع سدرة واريج راقدين في الصاله..
خشت طوبى لدار المعيشه بعلي وغرفه لحقتها وهي تسأل..
/بترقدي هني؟
طوبى وهي ترقد في علي قالت..
/ايه بنرقد حدا الصغار..
غرفه:حتى اني بنرقد هني زحمة الصاله..
طوبى:باهي جيبيلنا الفرارة التانيه..
طلعت غرفه وهي تقول..
/باهي..
🍃وتفرش غرفه ليها هي وطوبى فراشين جنب بعض وطوبى بعد رقدت علي طلعت للدار التانيه دارت روتينها متاع الرقيه بعدين خدت شيشة مية رقيه وطلعت بيها لدار المعيشة..
🕸وتعدي الساعات..والقمر اللي كاد يصل لمرحلة اكتماله يدور حوالين نفسه ومع كل دورة يتغير مكانه شويه شويه..
هو توا مع الساعة الثانيه بعد نص الليل وصل في الجهة اللي فيها كرم العنب..
كرم العنب اللي يجي مقابل الدار اللي راقده فيها طوبى مع غرفه والصغار
وطوبى وقتها كانت تشوف في واحد من الأحلام المخيفه..
🕸شافت الدار متاع البنات مليانه اسود واحد منهم راقد ع سريرها والباقي متفرقين ع كبر الدار..
هي خشت للدار شافتهم..استغربت مع خوفها لكن قعدت واقفه تشوفلهم وهما يشوفولها لعند مانزل اللي راقد ع سريرها وقدملها..
وقف قدامها وهو يشوفلها وهي تشوفله بخوف وفجأة يعضها من بطنها وياكل منها،والدم قعد ينزل منها ودار بركة تحت رجليها
..فاقت وهي منتفضة في مكانها بفزع وفيقت غرفه معاها..
غرفة بفزع وخوف:خيرك!
شافتلها طوبى ببصر شاخص من الفجعة وشيئا فشيئا ارتخوا عيونها وهي تقول..
/شي مافي شي..
ناضت غرفه قعمزت خدت شيشة الميه فتحتها ومدتهالها..
قعمزت طوبى وخدتها سمت بالله وشربت منها شويه شويه لعند مااكتفت بعدين مدتها لغرفه..
خدتها غرفه وهي تسأل..
/شن حلمتي!؟
قالتلها:نفس الكوابيس اللي نشوف فيها ديما اسود وافاعي وقرود ومرات حشرات..
غرفه بخوف وألم..
/هدا كله من السحر..
هزت طوبى راسها بإيجاب بعدين قالت..
/ماتخافيش حاجه عاديه تعودت عليها..خدت منها الشيشة والغطا..غطت الشيشه وسكرتها بعدين حطتها في مكانها وقالت..
/ارقدي روفي
تنهدت غرفه وتمددت ع الفراش وهي تشوفلها..
وطوبى تمددت وحطت راسها ع المخده وهي تشوف لنظرات غرفه ليها..ضحكت وقالت..
/ارقدي ماتخافيش مانديرلك شي
قربتلها غرفه وخدتها في حضنها وقالت..
/ارقدي انتي وسكري فمك..وبدت تقرا عليها في الفاتحه والفلق ودموعها ينزلوا..
وطوبى غمضت عيونها وشدت فيها..وقعدت تسمع في الآيات بقلبها فجأة تبدل صوت غرفه في مسامعها لصوته هو وحضن غرفه في خيالها ولى حضنه هو..
ابتسمت بحزن ودموعها نزلوا من عيونها المغمضات وقعدت تسمع في صوته لعند ماراحت في النوم..
🍁وهو كل مايجي يغفى يفيق مفجوع يشوف جنبه ويتخيل انه بيلقاها فايقه من كابوس وهي خايفه بش ياخدها في حضنه ويهديها ويبدل خوفها لطمأنينة لكن للأسف ماشاف شي من اللي تخيله وحس بحزن شديد فوق خوفه عليها
ناض قعمز ومسح بإيديه ع وجهه بعدين نزل من السرير ومشي طلع من الدار..
خطوات رجليه رفعوه للبالكونه..وقف فيها ووجه نظره للقمر وهو يتسائل بقلق..
"يامن يقولي شن صاير فيها يامن يطمن قلبي عليها!"
🍁🍁🍁🍁
وماصدق طلعت الشمس ليتصل بحسين ويسأله عنها وحسين اللي بدي يشفق ع حاله طمنه عليها..
☘وهي فهاليوم زي عادتها..عاديه..قويه..جوها حلو..ظاهريا
وفي الخفاء لازمه تاج الذكر وتكرار سورة الفلق والفاتحه..
وكانت تهرب بإستمرار من نظرات غرفه اللي يبان فيهم الحزن والألم..
🍃🍃🍃🍃
الساعه 12:09قبل الظهر..
طلعوا من المكان المخصص للأكل والشرب وهما يتكلموا عن حفلة اللمة ويعلقوا ع اجوائها..
ميار بضحكه:يهبلوا الحق..
سلافه بإبتسامه:انا كمان حبيتن..
ويوجهوا انظارهم مع بعض لمدخل المعهد الدخلاني ويشوفوا مديرهم خاش ونظاراته مغطيات عيونه..
ميار بصدمه:حي عليه كيف ضعف !
سلافه بألم وحزن..
/الله يكون بعونه..
وصل فيهم وقال..
/السلام عليكم..
ردوا عليه السلام بعدين قالوا مع بعض..
"حمد لله ع سلامتك"
هز راسه وقال..
/الله يسلمكم..
ميار:حالك باهي استاذ؟
قال:الحمد لله..
رفعت حاجبها بإبتسامه وقالت..
/حتى ابله طوبى حالها باهي هلبه جت امس مع ماليها لسبوع ولد خوي ولاكأن صايرة فيها حاجه الله يبارك..
سلافه قعدت تشوفلها بصدمة وهو بعد ماشافلها شويه مشي وهو يقول..
/سلافة تعالي..
سلافه قبل لتلحقه قالت بإنزعاج..
/زودتيها كتير..
ومشت لحقت عبد القيوم..
وميار ابتسمت تهكم ومشت بإتجاه الدروج..
🍁في المكتب..
قعمز عبد القيوم ع حافة طاوله المكتب وهو ثاني ركبه وفارد التانيه حول نظاراته وقال لسلافه..
/تلاقيتوا قبل الحفله اللي قالت عليها ميار؟
سلافه بضيق:ايه رحت لعندا ع البيت..
بنظرات حزن ممزوجه باللهفه قال..
/حق كويسة؟
سلافه بأسف..
/عم تعمل حالها منيحه..
سألها بلهفه اكبر..
/شن قالتلك؟
سلافه بحزن:قالت مابدها شي من الدنيا غير انك تكون بخير..
نزل عيون ليده اللي كان شاد ع قبضتها بقوة..
وهي تشوفله بحزن وتعاطف..
رفع عيونه فيها وقال..
/معناها رقمها الجديد عندك..
سلافه:بعتذر منك كتير مافيني اعطيك ياه هي امنتني..
عض ع شاربه بقوة من داخل بعدين قال..
/اتصلي بيها وحلي المايك..
سلافه هزت راسها بصمت ورفعت الهاتف..
حطت ع رقم طوبى ..اتصلت بيها وفتحت المايك..
هو نزل من ع الطاولة ومشي رد الباب بعدين وقف وراه..
حط ايديه في نصه وعيونه ع الهاتف..
ويبدا خطها ينادي ودقات قلبه تتسارع..هالقلب اللي حسه انتفض من مكانه لما سمع صوتها اللي اانحرم من سماعه شهر كامل زي ماانحرم منها..
"السلام عليكم سلافه"
سلافه:وعليكم السلام طوبى كيفك شو اخبارك..
"الحمد لله شن حالكم اليوم انتي وابله شاديه ولبانه والعزري"
ابتسمت وقالت..
/الحمد لله كلنا بخير..كيفن بنتك وباقي العيله؟
"الحمد لله..لليوم نهدرزوا ع اللمه بجديات جت الله يبارك حلوة ع الاخر.."
سلافه:تسلمي حبيبتي كلك ذوق..شافت لعبد القيوم لقاته يشوف للهاتف بنظرات لهفه ممزوجه بالألم وحركة صدره تبين تسارع انفاسه.
"انتي في المعهد"
رفعت سلافه حواجبها وقالت..
/ايه..
سكتت طوبى وهو قعد ع شعرة وياخد الهاتف من سلافه..
"باهي سلافه بنسكر توا مش فاضيه بعدين نكلمك"
شافتله سلافه وقالت..
/ع راحتك حبيبتي..مع السلامه..
"في امان الله..السلام عليكم"
سلافه:وعليكم السلام..
نهت المكالمه وهي تشوفله بأسف وحزن..
وهو فتح الباب وقال..
/بارك الله فيك..
هزت سلافه راسها ومشت طلعت وهو مشي قعمز ورا المكتب وقلبه موجوع ع الآخر ..
🍃🍃🍃🍃
الساعه 9:00مساءا.
واقفة ع الطاوله وهي تكوي في ملايتها وتقول بإبتسامه..
/فاجئتني هلبه..
هاديه بضحكه:زعمه شن شكله؟
غرفه؛مدام خو نفيسه معناها غزال زيها..حصلتيها؟
طوبى:واتفقنا نتلاقوا بعد مانروح من المدرسة..
غرفه:وين بتتلاقوا؟
طوبى:في مكان خاص بالجمعيه متاع الخطاطين والرسامين بنهدرزوا غادي وفي نفس الوقت بنسجل في دورة هي بتعطيها..
غرفه:حلو..وان شاء الله سعد يكون سعد لسلافه..
هاديه بإبتسامه:سعد مثل الرعد..
ضحكوا الزوز وطوبى قالت بضحكه..
/لا خلاص بإذن الله تم النصيب..
☘الانسان لما يصفي قلبه مع خلق الله تصفاله مع الله والله يعطيه لين يرضيه جزاءا وفاقا..
🍁قدام شط البحر مقعمز ع مقدمة سيارته يتأمل في البحر وحركة امواجه،البحر اللي يفكر فيه بعيونها اللي صابوا قلبه في مقتل..
استاقظ من سرحانه لما سمع صوت نغمة رسالة جاته ع هاتفه..
قامه وشاف للشاشه لقي الرساله جاته من سلافه فتحها وهو مستغرب..
(بكرا طوبى رح تطلع من المدرسه ع الساعه 11 هي فرصتك)
عاود قري الرساله اكثر من مرة ابتسم في البدايه بعدين بدي يضحك..
شويه كتب رد لسلافه..
(شكرا)
وهي ردت..
(العفو استاذ)
ضحك وقالت..
/حي عليك وكان تشوف هالرسايل ياعبد القيوم تخنقك..
ضحك تاني بعدين نزل ومشي ركب السيارة شغلها وتحرك بطريقه للشقه..
🍃🍃🍃🍃
وعدت هالليله زي سابقتها الكوابيس نفسها مع آلام في منطقة الرحم تبدا قويه وتضعف شيئا فشيئا لين تتلاشى..
وتفيق تاني يوم بحالتها المعتادة بس هالمرة جهزت نفسها بش تمشي للمدرسة وتحضر الاجتماع اللي بيكون عن الاستعداد لإمتحانات الشهادة الاعداديه..
بعد ماجهزت نفسها جي في خاطرها تمشي بسيارة غرفه وصارحت غرفه برغبتها وهي وافقت بدون تردد..
🍃🍃🍃🍃
درست السيارة قدام المدرسه..نزلت منها وسكرتها كويس بعدين خشت..
🌼وهي ماشيه شافت ابله زينب واقفه ع وحده من الابلات وهي عاطية بالظهر..
وصلت فيها وضربت باطراف اصابعها ع كتفها..
شافت زينب جنبها بإستغراب ضحكت طوبى وقالت..
/السلام عليكم..
زينب بمفاجأة..
/طوبى!
بضحكه قالت..
/ايه طوبى..
ضمتها زينب بفرحة وهي تقول..
/مبارك مبارك مبارك..
طوبى وهي حاضنتها قالت..
/الله يبارك فيك..
تباعدت زينب عنها وقعدت شادتها وهي تقول..
/ليا فترة مافرحتش من قلبي هكي..
وضمتها مرة تانيه وطوبى تضحك ودموعها تنزل..
🍃🍃🍃
وتفاجئ في الاجتماع حتى نسرين والبعض من زميلاتها بطلتها المختلفه اللي زداتها بهاء ع بهائها..
شاركت في الاجتماع اللي استمر لمدة ساعتين وبعد الانتهاء منه طلعت بسرعه بش تلحق ع موعدها مع سلافه..
🍁وتوصل في الباب الخارجي وتجمد في مكانها لما تشوفه واقف ع باب سيارته من الجهة اللي جنب السواق
وهو لاهي بهاتفه..
وتعصف في داخلها مشاعر شوق عارم وقلبها اللي يرجف وسط ضلوعها يكاد يطلع من مكانه ويمشيله..
قام عيونه فيها حست ان قلبها وقف،ولأن ماعنداش علم انها ولت تلبس في النقاب ماعرفهاش وغير نظره عنها..
خدت نفس وحركت رجليها اللي حستهم ولوا ثقال ومشت لسيارة غرفه..
هو حس بشي غريب اتجاه ذات الخمار..شافلها مرة تانيه لقاها تركب لسيارة مش مألوفه هلبه بالنسبه ليه..
ركبت السيارة وشافتله لقاته يشوفلها بعدين غير نظره القدام فهمت انه من عرفهاش..شغلت السيارة وتحركت وفاتت من وراه وهي تبكي بألم..
وخلاته مازال يراجي...
🍃 ومضَى كل منهُمَا في طريقٍ والقلبُ يَلتَفِتُ!
- الرَّافعي.🍃
#امتحان
#طوبى
..يتبع...
