■■■■■■■■■■■■■■■■■■■■
قد يحمل هذا الجزء ومايليه احداث مؤلمة وقاسيه ولكنها تخفي بين طياتها مغزى عميق لايصل اليه سوى أصحاب القلوب الحية وأولوا الألباب فهنيئا سلفا لكل من يقرأ بعمق ليصل للعبرة🌸
/////////////////////////////////////////////////////////////
#طوبى "جنة طوبى"
#جمان_فريد
#الجزء_128"إمتحان/مفاضلة"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#باب_الحمد
▪︎قيل لأحد الصالحين :
ما هو الصبر الجميل قال : أن تُبتلى و قلبك يقول الحمدلله..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃"إنَّ الأمُورَ لَهَا رَبٌّ يُدَبِّرُهُا
وَكُلُّ شَيءٍ بأمرِ اللهِ مُؤتَمِرُ
فَلَنْ يُفِيدَكَ أنْ تََحتَاطَ مِنْ قَدرٍ
وَلَنْ يَرُدَّ القَضَا حِرصٌ وَلَا حَذَرُ
وَالجَأ لِرَبِّكَ فِي الضَّرَّاءِ مُعتَصِمًا
مَا رَدَّ رَبُّكَ مَن لِلعَونِ يَفتَقِرُ!" 🍃
___________________________________________
عيد الأضحى هالعام كان مختلف ع طوبى وعبد القيوم..
اختاروا يعيدوا برواحهم في شقتهم ويديروا اجواء خاصه بيهم مايشاركهم فيها حد..
🍃اما سدرة والمهدي فاختاروا يبعدوا بصغارهم عن الاجواء الكئيبه والمنغصات ويعيدوا في مزرعتهم وطبعا محمد شنيبه هو من شجع ولده ع الابتعاد،المهدي ولى لبوه ظهره المسنود عليه بدي يخاف عليه من كل شي ومايبيش الاراحته برغم انه كان احد المحفزين للمهدي ع خطوة شهادته ضد خوه في المحكمه لكن بعدين صابه ندم بعد اللي صار للمهدي ولما طلع المهدي من الوعكه الصحيه ع خير قرر يبعده عن أي شي ينغص عليه ويتعبه..
🍃اما ولاده عمر ونضال عيدوا مع العيله ولأنه الاجواء كانت تعيسه بعد العصر اللي هدا خدي مرته وضحيته وروح كمل عيده في حوشه..
☘لكن العيد عند عيلة الواعر كان غير..
كله بهجه واجواء جميله استمعتوا فايزة وبناته بكل لحظه فيه،هذا اخر عيد حيحضروه معاهم من أول يوم ..
☘☘☘☘
الساعه 7:00مساءا..
في الجنان..
كان حسين يشوي وحداه بوه والمحجوب يهدرزوا..
هو مش لاهي معاهم عقله كله عند غرفه اللي كانت طالعه خاشه ع الكوجينه الخارجيه تجهز في طاوله المشاوي..
🌸وهي كانت حاسه بيه مركز عليها لكن كعادتها تحاول تتجاهل وتتهرب..
🌸🌸🌸
بعد ماكملت تجهيز الطاولة بدت تاخدلها في صور..
وهو استغل انشغالها بالتصوير وخدي صونيه معبيه لحم مشوي ومشالها..
غرفه وهي تصور كانت تقول..
/هكي اللقطه تجي احلا..
وكيف جت بتصور خشت صونيه الليموني المليانه لحم ع اللقطه..
قامت عيونها هي مفجوعه لقاته واقف مقابلها ياكل ويتفرج ع صواني السلايط وهو عاقد حواجبه..
وهي في قمة الارتباك نزلت عيونه وشدت صونيه اللحم بش دخلها هو شد الصونيه من الجهة التانيه..
رفعت عيونها مرة تانيه وشافتله لقاته خدي طرف لحمة مشويه غمسه في وحده من السلايط وهو يقول..
/لأمتى بتقعدي ديري فيه الجو هدا!؟
قعدت تشوفله بصمت..
وهو كلي اللحمه وعاود سألها مرة تانيه لكن بالإشارة لما حرك راسه..
عقدت حواجبها وقالت..
/حول ترا..
بلع وقاللها بشي من الصرامة..
/خليك مراة واقعدي في مكانك وتكلمي بشجاعة..
قالتله:شن تبيني نقول؟
ابتسم ع جنب وقال..
/تقولي اللي في قلبك ومعاش دسيه..قولي ياحسين حتى اني نبيك زي ماتبيني غير قاعده خايفه منك..
قالتله بحده وهي متوترة..
/انت مولي معاش تتحشم بكل..
قاللها:لاندير في عيب ولانقول في كلام غلط بش نتحشم منه اني رايدك بالحلال وشاد فيك وحتى انتي خل نقولوا وليتي متقبله الموضوع لكن كيف ماقتلك مازال خايفه مني ومش ضامنتيني صح!
نزلت عيونها وقالت..
/لاهو وقته ولاهو مكانه..
قاللها:مالا امتى وقته ومكانه؟ تبيني نجيك للجامعه؟
قامت عيونها فيه وهو قعد يشوفلها بنظرات كلها حب واصرار..
وفي لحظه..خدت الصونيه ومشت بإتجاه الكوجينه الخارجيه وخلاته يغلي من الغضب..
وهو كان عصب لازم يفش غله في شي..نزل عيونه للطاوله وشاف كيف منسقه صحون السلايط بغل لخبط التنسيق متاعها وخدي وحده منهم ومشي بيها وين مافي الشوايه بش يشوي وياكل بيها..
🍃🍃🍃🍃
تاني يوم..
في الكوجينه الدخلانية..
كانت طوبى واقفه ع الغاز طيب في طاجين قلايه وهي تسمع في غرفه كيف تحكي عن حسين وتصرفاته وحداها اريج مقعمزة تاكل في الحلويات..
☘غرفه:تو هدا مش صغر عقل!
ضحكت طوبى..
اريج بضحكه:بالعكس والله جو عليه..تعرفي خويله انتم الزوز ماشيين مع بعض هلبه.
احمر وجه غرفه وهي تقول..
/عينك..
طوبى بإبتسامه..
/فوتي جو المكابرة روفي حتى انتي بديتي تميليله..
غرفه بتوتر وعصبيه..
/بديت عينك..
ضحكت طوبى وطفت ع القلايه بعدين قالت..
/طولي فيها وهي قصيرة اخرتك ليه صدقيني..
اريج:صح شوفي اللي صار معاي..كيف النصيب غلب وخداني نضال بعد كل اللي عدى علينا..وتوا الحمد لله رب العالمين عايشه احلى عيشه ولااني ولاهو مخليين شي يفسد علينا حياتنا ولايعكر جونا..
رفعت طوبى ابهامها وهي تقول لأريج..
/خليكم ديما هكي..
غرفه بضيق..
/مش عارفه..مازال فيا حاجه من داخل مش متقبله..
طوبى:اني نقول زيدوا هدرزوا مرة تانيه اسمعي منه وقولي اللي عندك كله..
سكتت غرفه وهي تشوف فيها كيف توزع في لحم القلايه ع الصواني..
🍃ومن الكوجينه للصاله..
اللي كانوا مقعمزات فيها مطيره وهاديه وصفيه وفايزة وصفاء حوالين عالة الشاهي..
كانت صفاء تحكي وهما يسمعولها..
☘صفاء:كان ماعركاش خوه كريم رانا عيدنا برواحنا..
مطيره:ربي يهديه حتى هو ماله ومال بنت خوه كان بوها راضي باللي دير فيه!
فايزة:والله حتى اني قلت هكي..
صفاء:هي حتى هديكا المشيه ماتهنتش بيها صارت عركه كبيره ع خاطر جيتها..
كلهم شافوا لصفاء بفضول ومطيره قالت..
/شن صار!؟
صفاء:قالت لزتها بنت عمي المهدي..
تاله بتهكم:هدا ماقالتلك هي!؟
ع خشة غرفه بالسفرة وطوبى واريج وراها وهما يسمعوا في صفاء تقول..
/علاش صارت حاجة تانيه!؟
تاله:ايه وسدرة حلفتني مانقولش لكن مدام راما هادي هكي بنقول..محمد خوها بعت لسدرة هديه..
صفاء بضحكه صدمه..
/شن هي!؟
تاله:قداش ليه يناشب فيها ويدير في حركات وجو وهي مش معدله عليه لعند ما بعتلها هديه ورتهم حسابهم هي واخته..
فايزة قعدت ضحكت ومطيره سألت متعجبه..
/هادم امتى حولوا شمالاتهم!!"حفاظاتهم"
كلهم ضحكوا ماعدا تاله اللي ماعجبهاش الكلام..
هاديه بضحكه:جيل هالوقت يالطيف منهم..
طوبى وهي مبتسمه قالت..
/هي اقربوا ياعيله اقربوا..
بدوا يقربوا في السفر وهما يسمعوا في صفاء تقول..
/باهي علاش تلز في راما؟
اريج:سدرة ماتحبش راما وماتبيهاش لخوها..
حركت طوبى راسها يمين ويسار اسفا..
صفيه:اكيده كريهه في خديجه..
فايزة:مادارتش في عيشه شويه اصلا شن سحنها وركبها المرض غير خديجه وبلاها..
مطيره:ماني عارفه كيف بتكون اخرتها المخلوقه هادي..
صفاء:تتجكتر بالكويت وعيشتها في الكويت يومها طلعتلي صفحتها ع الفيس خشيت شفتها لقيتها كلها فخفخه وتباهي..
غرفه:مالا المنشورات التانيه اللي تفصع الرقبه..مرة حتى اني شفت صفحتها طلع قدامي منشور..
للي يكرهوني..ربي يجعلني غصة في حلقوكم..
قالت كلامها هدا وهي تقلد في اسلوب خديجه فالكلام..
مطيره:ياجعنها الغصة ليك ولمخويك ياشيطانه..
صفاء بضحكه:ايه شفته لكن الجو كله في اخر واحد نزلاته كاتبه في بما معناه..خلقني ربي بركة ع هيئة بشر هنيئا لمن كنت فيه حياته..
ردات فعلهم ع اللي سمعوه كانت مختلفه..
اللي حطت يدها ع وجهها..واللي ضحكت سخرية..واللي بدت ع وجهها ملامح الازدراء..واللي خدت طرف لحمة كلاته في في فم واحد من الغيظ..
اما طوبى حطت يدها ع رقبتها وطلعت لسانها وحولت عيونها..
حركتها ضحكتهم وهي بعدين قالت..
/بالله عليكم سكروا ع سيرتها الحسنات اللي لميتهم في يوم عرفه مشولها ع البارد المستريح..
اريج:عليك نكبه حتى ذنوبها لحقونا..
ضحكوا وفايزة قالت..
/خلاص فكونا من سيرتها وقولولي بتحضروا عرس بنت الزبيدي؟.
غرفه:ان شاء الله..طوبى المراة ملتزمه مش دايرة منظومه..
طوبى:ماعزمتنيش ياغرفه..
غرفه:لاقالت بتكلمك..
طوبى:كان كلمتني تو نمشي إن شاء الله..
مطيره:امتى؟
غرفه:اسبوع اللي بعد العيد..
مطيره:قوليلهم يعزموني حتى اني خاطري في عرس..
غرفه بضحكه..
/حاضر..
☘☘☘☘☘
الساعه 11:00ليلا..
نثرت ورد الفل والياسمين ع السرير وهي مبتسمه بحب وبعد ماكملت مشت وقفت ع المراية بش تلقي اخر نظرة ع طلتها..
🍁وهو في المربوعه مسكر عليه الباب ويكلم في حد هاتفيا..
عبد القيوم:عارفني والله ماعندي مشكله لكن مانبي حد يدير نكد لمرتي ياعمي وضعها مايسمحش..
"لالا طمن بالك من هالناحيه تو نتفاهم مع عماتك ونطبهن للطريق"
عبد القيوم بضيق..
/والله نتمنى ياعمي لكن عارف الموضوع صعب،عمتي سليمه لما عيدت عليها مانشدتني عنها حتى بالكذب ونا متأكد وواثق مليون في المية انها تتصل بيهن ومايردنش عليها..
"ماعليكش فيهن انا تو نصرف معاهن المهم مايقعدش هذى حالكم بكرا بيجيك عيل ماتبيش عماتك يفرحن بيه !"
تنهد وقال..
/تمام تمام..خلاص الموضوع عندك وكان صار ورضن يجن عطيني علم قبلها..
"ان شاء الله إن شاء الله..هي تصبح ع خير"
عبد القيوم:قدامك كل خير..
نهي المكالمه وهو مضايق لأبعد حد معاش يبي يكون قريب من حد ينكد عليه حياته مع طوبى ولايدخل لقلبها الحزن..ايه وصل للمرحلة هادي مستعد يبيع الدنيا كلها مقابل انه يعيش معاها حبهم ويعيشيلها بش يسعدها وبس..
لكن الحاجه هادي تكاد تكون مستحيله...
🍁تنفس بإنزعاج لما شاف اسم الصابر ع شاشه هاتفه غمض وفتحهم محاولة منه لتمالك اعصابه بعدين فتج الخط ورد عليه..
/السلام عليكم..
"وعليكم السلام..شن حالك اليوم؟"
عبد القيوم:الحمدلله شنو حالكم انتم؟
"بخير بخير الحمد لله..شنو حال طوبى وجنه"
عبد القيوم:في خير ونعمه الحمد لله..
"الحمد لله..بنقولك..يوم السبت ان شاء الله نكونوا عندكم"
هز راسه وقال..
/مرحبتين مرحبا..
"رحب بيك..هاه وتي المزرعه نبوا نطلعوا من المطار شورها عبد القيوم:ان شاء الله..
"خلاص نتلاقوا السبت ان شاء الله"
عبد القيوم:بإذن الله..تصبح ع خير..
"قدامك كل خير..السلام عليكم"
عبد القيوم:وعليكم السلام..
ونهي المكالمه بسرعه وحط هاتفه ع الصامت بعدين مشي فتح الباب وطلع من المربوعه وهو معصب بعض الشي..
وصل في دار النوم فتحها..
ويشوف مايقلب جوه ميه وتمانين درجه...
الاجواء الرومانسيه..وجمال طلتها وابتسامتها خلوه يحس وكأنه كان في عالم باهت ورمادي وخش لعالم كله الوان زاهيه ليه ريحة حلوة..ريحة الفل والياسمين..
سكر الباب وقاللها بعشق وهويام..
/دنيتي كلها انتي اقسم بالله دنيتي وحياتي وعمري..
🍃"لو كنتَ أنتَ مَعِي والناسُ غائبةٌ
عنّي،لمَا ضَرّني مَن غابَ أو هَجَرَ!"🍃
☘☘☘☘
بعد الفجر..والصبح كيف بادي يتنفس..ونور الشمس سبقها بطلوعه..
كانت تقرا في اذكار الصباح وهي تصب القهوة في فنجان حبيبها..بعدين حطت كوبايه حليب دافيه جنب فنجانه ليها هي..
وخدت الفل من سلة صغيره موجوده جنبها نثرتها ع السفرة..
ورفعت السفرة وتوجهت بيها للبالكونه..
اول ماوصلت للباب عيونها جو ع السمي لقت القمر مازال قاعد وتحس بشعور غريب تجمع في صدرها للحظه حست روحها بتفقد الوعي لكنها بسرعه غيرت نظرها عنه وبدت تردد همسا..
"لاإله إلا الله وحده لاشريك له..له الملك وله الحمد وهو كل شي قدير"
طلعت للبالكونه وقالت بإبتسامه مصطنعه..
/في شن سرحان السمراوي متاعي اني..
ابتسم وخدي منها السفرة وهي قعمزت مقابلاته..
خدي طاسه العصير مدهالها وقال..
/كلمني عمي الصابر قال جايين يوم السبت..
خدت الطاسه وهي تقول..
/امتى كلمك؟
رشف من فنجانه وقال..
/امس في الليل..
هي قالت..
/غريبه..كلمت امي كاريمان امس وماقالتليش..
قاللها..
/بالك ساعتها مازال مااتفقوش ع اليوم اللي بيجو فيه..
قالت؛ايه صح..
شافلها شويه بعدين قال..
/قلبي..بنسألك سؤال ..
قالت بإبتسامه..
/اسأل..
حك حاجبه بعدين قال..
/تو انتي..شن شعورك اتجاه عمي الصابر وزوجته..يعني حسيتهم هلك حق ولاتجاملي فيهم؟
ضحكت وقال..
/ماتجيش المجامله في الحاجات هادي..ايه صح اني في البدايه تعاطفت مع امي كاريمان بس لما شفت كيف مهتمه بيا ولازم يوميا تكلمني وكيف تخاف عليا وكيف تنصح فيا حسيت وكأنها امي حق وحبيتها هلبه..
قاللها:وراجلها؟
طوبى بإبتسامه..
/في البدايه حسيته يجامل وكأنه يبي ياخد بخاطر امي كاريمان ويساير فيها مسايره لكن مع الوقت بديت نحس في معاملته ليا تغيرت قعدت نشوف الحن باين في عيونه زي الحن اللي كنت نشوف فيه في عيون بابا الله يرحمه..يشبهه في هلبه حاجات بالذات في معاملته ليا..
قاللها:يعني انتي تعزيه لأنه يشابه عمي لطفي الله يرحمه؟
طوبى:هذا واحد من الاسباب..هو بحد ذاته راجل طيب وحكيم وراقي ولطيف هلبه..
هز راسه ورجع رشف من قوته..
هي عقدت حواجبها وقالت..
/علاش سألتني هالسؤال؟
قاللها:كنت نبي نعرف شعورك ناحيتهم بالزبط بس..
شافتله شويه بعدين نزلت نظرها لطاسة الحليب..
شافت صورتها مضببه..رجعت حست بالدوخه وفي نفس الوقت سمعت صوت "ونة" في وذانها..
رفعت طاسة الحليب وشربت منها بعدين مررت نظرها قدامها..
لون السمي وقتها كان احمر بسبب شفق الشمس وهي لما شافاته حست بالدنيا لفت بيها..
غيرت نظرها عنها بسرعه وحطت الطاسه وهي تقول..
/بنمشي نشوف جنة...
ناضت ومشت خشت بسرعه..كانت تراجي تفقد وعيها وطيح في أي لحظه..لكنها وصلت للدار اللي راقده فيها بنتها وماصارلها شي..
خشت قعمزت قريبه قربت ايديها من فمها وبدت تقرا في سورة الفاتحه..
قرتها سبعه مرات بعدين نفثث فيهم ومسحتهم بيهم من راسها لاصابعه رجليها..
"كنك؟"
شافت للباب وهي متفاجئة بعدين قالت..
/شي..نرقي في روحي..
خش قعمز قريب عليها وقال بشي من الغضب..
/كذابه..لاحظتك قبل لتخشي كنتي مش طبيعيه
طوبى ودموعها في عيونها قالت..
/لاطبيعيه..الوضع هدا تعودت عليه وولى عادي وطبيعي عندي..
غمض عيونه وفتحتهم بأسف بعدين قال..
/مانقصدش اللي فهمتيه..خاني التعبير..قصدي..
قاطعاته وقالت..
/عارفه عارفه..مازعلتش منك بس اني فهمتك ان مافي شي يخوف..راك تنسى تاريخ اليوم بالعربي..
بشي من الألم قال..
/تبي تقولي ان صارلك هك من قبل واجد ونا مش فاطنلك..
ابتسمت وحطت يدها ع خده بعدين قرصاته وقالت..
/اني مانخليش فيك تفطنلي...
قعد يشوفلها بنظرة عدم رضا..
هي شدت خدوده الزوز وقعدت تخبرش فيهم وتقول..
/وخيتي عليهم لما يزعلوا يولوا عسولين هلبه..
شد ايديها وهو شاد ضحكته بعدين قال..
/بطلي الجو اللي ديري فيه..
جبدت ايديها وحطتهم ع شعرها وقعدت تنكش فيه وهي تقول..
/جو شني ترا..
قعد يشوفلها وهو مبتسم بإمتعاض وهي تشوفله بنظرة براءة مصطنعه وحواجبها مرفوعات..
ضحك بعدين ضمها وقال..
/اخر مرة يصير معاك هك وماتحكيش..
ضماته وقالت بضحكه..
/باهي..
"صباح الخير"
تباعدت عنه لما سمعت صوت بنتها وهي تتصبح عليهم بالفصحى..
التفتت وقالت..
/صباح الفل يانور عيوني..
وقربت منها باست من خدها..
جنة شافت لعبد القيوم وقالت..
/صباح الخير حوبادة .
بضحكه قال. /صباحك عسل وقشطه
جنه:وبربى وزبده
ضحكوا عليها من قلوبهم وهي مازال تعدد في الحاجات الحلوة..
☘☘
وبعد ساعة جهزوا انفسهم وتوجهوا للخمس..
كانوا ناويين يقضوا النهار في مزرعة المهدي وفي الليل يروحوا لمزرعتهم اللي حيبدوا تجهيزها اليوم اللي بعده لضيوفهم..
☘☘☘☘
اول ماوصلوا لمزرعة المهدي لقوه في استقبالهم هو وولاده وخوه نضال اللي اول ماشافاته جنه نطت عليه وقعد متعنقاته..
وامها فرحت هلبه بجية اريج ماكانش عندها علم بجيتها..
*******
اريج:ماعطانيش الأكيده واليوم بعد الفجر قالي وتي روحك..
طوبى بإبتسامه:المهم جيتي..
سدرة:هيا انتي وياها ياسركم دوة..سدرة بنتي قصصي الخبزة..
سدرة المهدي:حاضر
شافتلها طوبى شويه بعدين لهت بمساعده اريج ع تجهيز السفرة..
🍃🍃🍃🍃🍃
مقعمز شارد بتفكيره..قدامه فطوره اللي ماباش يشوفله نهائي..
وحواليه العيون تراقب فيه ومترصده للفطور اللي مخليه.
واحد منهم قال..
/ياهوو انت..كان ماتبيش جيب جاي..
نزل عيونه للصحن البلاستيك اللي فيه كسرة خبزة وطرف جبنه..دفه ناحيتهم وقال..
/فوتوني..
فجأة انفتح باب الحجز وكلهم وجهوا انظارهم ليه..
خش واحد شافله وقال..
/تعالى..
دام النظر ليه للحظات بعدين ناض لما سمعه يهزب فيه بصوت عالي..
/تحرك يابهيم..
قدمله وهو يمشي بكبر..
خداه من ذراعه وطلعه وسكر الباب..
🍃وقعد يمشي بيه في الممر لعند ماوصلوا للحمام..
وقفوا قدامه..
مدله الهاتف وقال..
/مش اكثر من خمسه دقايق..
خداه منه وقال..
/شن صار في الموضوع التاني؟!
قاله:تلقى كل شي مكتوب في المذكرة متاع الهاتف غير خش بسرعه دير المكالمه متاعك..
هز راسه بعدين فتح باب الحمام وخش وبعد مايقارب دقيقتين طلع منه وعطاه الهاتف وهو يقوله..
/خش ع المذكره وشوف شن كاتبلك فيها..
هز راسه بعدين حط الهاتف في جيبه وخداه من ذراعه ومشي بيرده وين ماكان..
🍃🍃🍃🍃
الساعه 6:00عصرا..
مقعمزات تحت مظلة كبيره في الهواء الطلق يشربوا في الشاهي الاخضر التارقي ويهدرزوا..
وقبالتهم سدرة تلعب مع جنه ع القطاطيس..
🍃سدرة المنتهى بألم:اللي صار معاهم مش قادرة تنساه حكتلي حاجات حرقتلي قلبي حرق..قالت هديكا مغليه جبدتها ولوحتها برا الحوش وقالت معاش نبي منكم حد..قالتلي وقتها قلت ياربي علاش ماخدتنيش مع ماما..
تأثروا طوبى واريج باللي سمعوه ودموعهم نزلت..
وسدرة مكمله تقول..
/وياما حكتلي ياما..عيل وقلبها ياما حامل من قهر وحزن ماليهم لكن ماداروش فيهم طيب..
اريج:المواقف الواعره والكلام الجارح لما يتلاقهم البنادم في صغره مستحيل ينساهم..هدا علاش اني عاذرتها مهما دارت..
طوبى:تعذريها بس في نفس الوقت لازم ماتعطيهاش مبررات لأي تصرف غلط ديره بعدين بدل ما تقعد مظلومه تولي ظالمه..
سدرة:صح..هدا علاش حاولت نوريها الصح من الغلط ومابيتش نعطيها مبررات لكل تصرفاتها..
طوبى:مازال ماعطيتهاش رسالة امها؟.
سدرة بضيق:ماقدرتش بعد ماتعب بوها خشت في حالة خوف كان تشوفيها كيف ترعش عليه تقطعلك قلبك..مابيتش نفكرها بأمها وهي فهالحاله..
طوبى:ومع هدا لازم تقرا رسالة امها ياسدرة..
سدرة:اني جبتها معاي نحساب روحي بنقدر نعطيهالها..
طوبى:وينها نعطيهالها اني..
سدرة:خشي داري اني والمهدي تلقيها في جيوب شنطه كبيرة شويه لونها ازرق..
حطت طوبى طاسة الشاهي وناضت ومشت بإتجاه الحوش..
شافت لسدرة لسميتها وهي تقول بقلق..
/ربي يستر..
التفتت اريج وهي تشوفلها بحزن..
☘☘☘
وتطلع طوبى بالرساله وتمشي لسدرة..
وصلت اريج وسدرة المنتهى ع جنه وخدت سدرة المهدي وتباعدوا عنهم..
☘طوبى؛نقعمزوا تحت الشجرة هديكا..
سدرة بإبتسامه قالت..
/باهي..
وصلوا في الشجرة وقعمزوا تحتها..
طوبى:شن جديدك؟
سدرة بإبتسامه:مافيش جديد القرايه ونكد الامتحانات..
ابتسمت طوبى وقالت..
/شن جوك مع خطيبة خوك..
ضحكت وقالت..
/حكتلك خالتي سدرة؟
طوبى:لامش هي سمعت من حد تاني ع العموم مانبيش ندوي معاك في اللي صار بكل اني كنت نبيك بروحك بش نعطيك حاجه..
سدرة:شن هي؟
مدتلها ظرف الرسالة وقالت..
/هادي..
شافتله سدرة بإستغراب بعدين خداته وعيونها ع جمله مكتوبه بخط مستحيل تضيع عنه..
خط امها اللي كاتبه بيه..
(إلى مهجة قلبي..سدرة)
لاحظت طوبى ان ايدين سدرة بدوا يرجفوا..شافت لوجهها لقت دموع ينزلوا من عيونها..
ناضت ومشت تباعدت عنها شويه بدون ماتتكلم..
وخلتها وهي تبكي تفتح في الظرف بعدين طلعت منه الورقه..
فاحت ع سدرة ريحة امها باست الورقه بشوق..
وطوبى تشوفلها وهي تبكي بصمت..
باعدت سدرة الورقة وفتحتها وهي تبكي وبدت تقرا فيها..
(السلام عليكم ورحمة الله وبركاته..
سدرة..بنوتي..احلا بنت في الدنيا..
بنتي ماتبكيش باهي نبيك تفرحي..اني توا في هداكا المكان اللي حكيتلك عليه..هدتكا اللي قعدنا نبنوا فيه مع بعض بش نعيش فيه قبل لنمشي للجنه تتفكري لما قتلك هداكا المكان حلو هلبه ولما نعيشوا فيه نرتاحوا..اني توا عايشه فيه ومرتاحه هلبه ياماما..
بنوتي..نبيك حتى انتي ديري كل شي حلو في الدنيا بش تبني مكان حلو زيه وبعد عمر طويل تجيني ونعيشوا مع بعض لين نمشوا للجنه..
حافظي ع صلاتك واذكارك..البسي الحجاب ياماما لما تخشي للصف الخامس باهي الحجاب يحميك دنيا واخرة ياماما..
ديري كل الافعال الطيبه باهي وردي بالك توجعي حد ولاتظلمي حد خليك ديما طيبه وقلبك ابيض ونظيف زي قلب صاحبتي اللي سميتك ع اسمها..
اسمعي كلام بابا وديري كل شي يخليه فرحان وردي بالك منه ومن خوتك حبيبتي باهي...
ديري الحاجات الحلوة هادي كلها بش نتلاقوا في الجنة بعدين باهي..
وديما ادعيلي بنتي ديما ادعيلي..
ربي يحفظك وينبتك نبات حسن ويخليك احسن بنات الدنيا..
نحبك هلبه..)
ضمت الورقه لصدرها وقعدت تبكي بألم..
قدمتلها طوبى وقعمزت جنبها..خدتها في حضنها وقعدت تمسح ع ذراعها وهي تبكي معاها بصمت..
شويه سدرة قالت بنبرة باكيه..
/كتبتها وهي تبكي..دموعها معبيات الورقه..
زادت ضمت طوبى وهي تقول..
/الله يغفرلها ويرحمها ويجعل مكانها الجنه..
سدرة بنبرة مرتعشه قالت..
/يارب يارب..
🍁🍁🍁🍁🍁
الساعه 11:30ليلا..
في طريقهم لمزرعتهم..
طوبى بنبرة باكيه..
/لتوا مش قادرة نطلع من الموقف مانحسباش بيكون صعب هكي..
عبد القيوم:الله يرحمها ويغفرلها..
طوبى:اللهم آمين..نزلت عيونها لبنتها اللي كانت راقده في حضنها بعدين قالت بإبتسامة من وسط دموعها..من بكري تقولي هيا نروحوا لونوسي..
ابتسم وقال:تلقيه حتى هو يرجى فينا تقول عليه يعلم بجيتنا..
ضحكت طوبى وهي تمسح في دموعها بعدين قالت..
/ايه حقه قلت لسدرة يقعدوا بش يحضروا جية عرب الشرق..
عبد القيوم:ونا عزمت المهدي ونضال وقالوا باهي..
ابتسمت طوبى بصمت..
هو تنهد بعدين مسح ع لحيته وقال..
/العشيه كلمني عمي قال بيجوا يوم الاحد..
طوبى بفرح:جديات!
ابتسم لما حس انها فرحت وقال..
/والله..جاي هو وعماتي سليمه ومهره وكالعاده صفيه لازم تلصق روحها..
ضحكت طوبى وقالت..
/فرحتني هلبه..
مد يده لخدها قرصه بلطف بعدين خدي يدها وباسها وهي تشوفله بإبتسامه حب..
🍃🍃🍃🍃🍃
ومن طلوع صبح تاني يوم..
تساعدوا ع تجهيز الحوش والمكان اللي بيقعدوا فيه الرجاله وجهزوا حتى الاماكن الخارجيه..
🍁🍁🍁🍁🍁
الساعه 7:00مساءا..
كانوا متوجهين للمكان اللي فيه الدرجيحه..
هو رافع جنة في حضنه وهي جنبه تهدرز..
طوبى:ياربي اغفرلي..امتى يتم الصيف بس..
عبد القيوم:مستعجله ع فصل الكآبه والغم..
وصلت في الدرجيحة "المرجوحه"وركبتها وهي تقول..
/مش راده عليك..
قاللها:ماعندك ماتقولي..
جنه:ماما اركب..
طوبى:خل ناخد دوري بعدين انتي باهي..
جنة:به..
فكت طوبى شاربتها وحطتها ع كتافها وربطتها..
بعدين طلقت شعرها وبدت تدرجح..
وعبد القيوم يتأمل فيها وهو هايم..
جنة صفقت وقالت..
/محلاها محلاها..
ضحكت طوبى بعدين شافتلها وبعتتلها قبله وجنه ردتهالها..
وعبد القيوم يتنهد من وسط قلبه بكتمان..
☘☘☘☘
ويأذن عليهم المغرب ويصلوه في الهواء الطلق وجنة تصلي معاهم..
عبد القيوم من خوفه ع طوبى يصير معاها شي فهالليله المقمرة مامشاش للجامع..
☘☘☘☘
بعد الصلاة حكمت عليهم جنة يرفعوها لمشتل الورد..
خشوله وقعدت جنه زي الفراشه تتنقل من وردة لوردة وأمها تصور فيها بالهاتف..
🍁عبد القيوم بإبتسامه..
/خل نعدي نطلع اللحم من الثلاجه بعدين نولع الفحم في الشوايه..
طوبى وهي تصور في جنة قالت..
/شويه ولاحقينك..
شافلهم بإبتسامة حب..بعدين مشي طلع من المشتل..
🍃وفي هالأثناء..
قدام حجرة العامل الافريقي..
كان مقعمز ع كرسي وهو لاهي بهاتفه وفي عز انسجامه معاه سمع صوت حاجه هبطت ع الارض..
قام عيونه شاف واحد ملتم شاد عصا وجاي ناحيته..
حاول ينوض بش يهرب لكن الملتم لحق عليه وضربه ع راسه وافقده الوعي..
بعدين مشي طول للباب الصغير متاع البوابه فتحه..
ويخشوا اربعه تانيين كانوا ملتمين حتى هما وشادين عصيي..
اللي فتحلهم الباب قال..
/هيا..
ومشوا مع بعض..
🍃ويوصل عبد القيوم للحوش..
وهو ماشي ناحية الباب تلامح شي غريب بنظرة عابره!
رد نظرة القدام شاف مجموعه ملتمين جايين ناحيته..
بصدمه وغضب..
/من انتم..شن ديروا هنا!؟
وقدملهم وهما جوه يجروا حاصروه وطاحوه فيه ضرب بالعصي..
هو حاول يقاوم ويدفع الضربات عنه وعقله مايفكر في شي كان طوبى وبنتها..
لما حس نفسه انه عاجز عن مقاومتهم طلعت منه صرخة قهر..وتتبعها ضربه ع راسه تفقده الوعي
🍃صرخته وصلت لمسامع طوبى وهي فالمشتل..
جمد الدم في عروقها..نزلت هاتفها وشافت ناحيه باب المشتل بعيونها اللي كانوا جاحضات من الصدمه والخوف..
🍃وهو غايب عن الوعي سحبوه الملتمين لعند ماوصلوه تحت رجلين عدوه اللدود..
شافله بحقد شديد وضربه برجله بكل قوة..
واحد منهم قاله..
/نقتلوه!؟
الجالي:لا..
شاف ناحيه الحوش وقال..
/خليكم هني ماتتحركوش..
ويقدم ناحية الحوش لعند ماوصل لبابه..
ضربه برجله انفتح..خشله وقعد ينادي..
/طوبى...وينك ياخاينه وينك..
مرر نظره ع المكان وقعد يتخيل في مشاهد الخيانه المزعومه ليه..
عاود ناداها بغضب شديد وصوت مرعب..
/طوبى ياخاينه..مانيش طالع من هني قبل لنسيح دمك..
ومشي طول باتجاه الديار..
وحده فيهم كانت مفتوحه خشلها..لقي فيها العاب اطفال..خطرت عليه تفاصيل اللي صار يوم المحكمه..
ويتحول لغول مرعب..ويبدا يكسر ويخرب في كل شي يشوفه قدامه..
حتى الالعاب كان يكسر فيها بغل وهو يتخيل في عبد القيوم يلاعب في جنة بيهم..
بعد ماخلاها خراب طلع منها وهو يقول..
/ناخدها بنتي ناخدها غصب عنكم ياخونه يافاسدين..
ويشوف قدامه دار مسكره قدملها بسرعه وخبط الباب كسره وخشلها..
وقف فيها وقعد يمرر عليها في نظراته الغاضبه الحاقده اللي يتناثر منها الشر لعند ماثبتهم ع اللوحه..
قعد يتمعن فيها بنفس النظرات اللي زادت عليهم الصدمه..
تفكر اللوحه اللي رسمتهاله وهو شن دار فيها..
واللي داره في لوحته داره للوحه هادي..
خداها وقعد يخبط فيها لين كسرها بعدين رماها ع طول يده ورجع مرر نظره ع الدار وهو داهش..
كان واضح عليها دار النوم وتزيد تستعر نيران الغيره والحقد في صدره وبغل الدنيا كلها طلع منها وتوجه للكوجينه اللي بانت عليه من اول ماخش..
وين خشلها بدي يكسر ويخبط فيها حتى هي وهو يصرخ بأعلى صوته..
لعند ماشاف الولاعه..خداها بقوة وطلع يجري لدار النوم..
خشلها ومشي طول لللسرير..جبد الورغان اللي عليه وولع فيه النار..بعدين قدم للستاير وولع فيهم النار حتى هما..
تباعد بخطواته للخلف ووقف في الباب وهو يشوف في النار كيف باديه تاكل فيهم زي ماقاعده نار الغيره والقهر تاكل في قلبه..
لف وطلع بسرعه للكوجينه تخطا الركام وخدي سكين كبير بعدين مشي يجري طلع من الحوش..
قدم وقعد يدور حواليه الدنيا كانت ظلام..
نادى بأعلى صوته..
"طوبى"
🍃وطوبى في اخر الركن في المشتل المظلم مدرقه هي وبنتها اللي كانت ضامتها لحضنها بيد واليد التانيه حاطتها مكان جنينها..
فوق حالة الرعب اللي كانت عايشتها حاسه بألم فضيع لايوصف..وكأنه في سكاكين قاعده تقطع في حزامها..
"طوبى"
غمضت عيونها اللي كانوا ينهمروا منهم الدموع وقعدت تردد بهمس ونبرة مرتعشه..
"حسبي الله ونعم الوكيل..حسبي الله ونعم الوكيل.."
فتحت عيونها لما حست بشي قاعد ينزل منها..
وبدت شويه شويه تحس بفشل وهوان في جسمها..
حاولت تقاوم وهي تقول بتوسل وضعف شديدين..
"ياربي مالينا حد غيرك يارب"
نزلت نظرها لهاتفها اللي مرمي جنبها شافاته يضوي وكأنه في حد يتصل بيها..
حاولت تمد يدها وتاخده لكن قواها اللي انهارت منعتها تاخده..
بصوت متقطع متعب للغايه قعدت تنادي..
"يارب..راجلي وصغاري..يارب..يارب"
وجنه في حضنها كانت خايفه لكن مش قادره لاتبكي ولاتتكلم شاده في امها وبس..
🍃وبوها المجرم بعد عمي الله بصره وبصيرته عنهم مشي طول بإتجاه جماعته وصل فيهم وقال..
/وقفوه..
جبدوه ووقفوه قدامه وهو مازال فاقد الوعي..
انهال عليه بالصفعات واللكمات..حقده وعقده النفسيه كلها طلعها عليه..
بعدين قال..
/مانيش مخليك تموت براحه...ويغرس في بطنه السكين وهو يقول بحقد..
/حتى لو قعدت عايش اللي درته فيك حيخليك تموت بدال الموته الوحده الف موته..
وطلع السكين من بطنه وقال..اطلقوه..
طلقوه وطاح ع الارض بقوة والدم ينزف من بطنه ووجهه..
ويدفل"يبصق"عليه الجالي بعدين يمشي بسرعه بأتجاه والجماعه اللي جابهم وراه..
بعد ماخلفوا وراهم دمار شامل طال الحجر والبشر...
#امتحان
#طوبى
...يتبع...
