●●●●●●●●●●●●●●●●●●
🚫نتمنى من القراء اللي عندهم مشاكل صحية تاثر فيها الحالة النفسيه مايقروش الاجزاء هادي في الليل..او انهم يكونوا متهيئين ليها قبل مايقروها 🍃
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 وأنا يا سيدي يُرعبني الفراق..
يُصيبني في مقتل تعلُقي بشخصٍ وفجأة لا أجده، يُثير ذُعري إدماني لتفاصيل أحدهم ثم في غمضة عين عني يغيب، زد على ذلك أني تتعبني التفاصيل وأدقها، تلك التي لا يكترث لها أيّ أحد..
احمد عبد اللطيف🍃
_________________________________________
راقده بروحها في حجرة ريحتها معقمات طبيه هالريحة اللي اخترقت انفها وهي كيف باديه تفيق..
وهي تفتح في عيونها..نظرها كان موجه لسقف الحجرة..شافت مصباح "لمبة" شكله مميز وضيه ابيض ..
الرؤيه ماكانتش واضحة تماما..رجعت سكرت عيونها بعدين فتحتهم وقعدت بنظرها مركزه ع السقف تفاصيله..
مازال مش واعيه بشكل كامل..مش متفكرة شي ولاأي شي..
وصل لمسامعها صوت حركة سيارات..حركت نظرها لمصدرهم شافت شباك مسكر تبان منه السمي اللي كان القمر متربع فيها..
دامت النظر ليه..وهي تشوفله خيللها انها تسبح في الفضاء الخارجي قرب القمر..
رجعت حست بدوخه..وخوف رهيب ملي صدرها..واصوات بدت تتكلم في وذانها بكلام غير مفهوم..
غمضت عيونها بش توقف هالحاله اللي عايشه فيها لكن سرعان مارجعت فتحتهم لما سمعت باب الحجرة اللي فيها انفتح وسمعت صوت تحبه هلبه ينادي بإسمها..
"طوبى"
غيرت نظرها ناحية مصدر الصوت شافت وحده لابسه بالطو ابيض تسأل فيها بإبتسامه..
/شن حالك توا؟
غيرت نظرها عنها وشافت للي نادتها لقتها تشوفلها وهي تبكي بعدين قربت منها حطت يدها ع راسها وطبست تبوس في جبهتهاوتباعدت عنها وقالت..
/شن ياعيوني شن تحسي توا؟
هي لما قعدت تتمعن فيها بالنظر بدي جزء الذاكرة في عقلها يتحرك وبسرعه فكرها بكل شي..
تردد لمسامعها صوت صرخة راجلها وحبيبها..
نزلوا دموعها وتكلمت بصوت متعب كله ألم وقالت..
"عبد القيوم"
سدرة وهي تمسح ع راسها قالت بنبرة باكيه..
/مافيه شي يابنتي مافيه شي..
قالت بألم والدموع مازالوا ينزلوا..
"مات!!"
تكلمت الطبيبة وقالت..
/لاهو حاليا تحت العمليات وبإذن الله مافيش خطر عليه..
سدرة:هاه سمعتي الدكتورة شن قالت؟
هي ردت نظرها للسقف وبين عيونها اللي صار..
عقدت حواجبها ورفعت يدها..حطتها ع بطنها وقالت..
/وولدي!؟ وجنة!؟
سدرة بألم:جنة كويسه مافيها شي قاعده مع اريج..
شافتلها وقالت..
/وولدي!؟
سدرة قالت بنفس النبره..
/ربي يعوضكم خير بنتي ربي يعوضكم خير..
غمضت عيونها بتعب والدموع تنزل حارة منهم بعدين قالت جمله اثرت في سدرة والطبيبه جدا..
"لله ماأعطى..ولله ماأخذ..وكل شيء عنده..بمقدار"
🍃وبعيد عنها في نفس المكان..
كانوا المهدي وولده محمد واقفين في ممر حجرة العمليات يستنوا في انتهاء العمليه الجراحيه اللي قاعده تندار لعبد القيوم بخوف وقلق شديدين..
🍃ونضال قعد المزرعه مع مرته وصغار خوته وكل في حالة توتر وخوف وحزن..
اريج ماقدرتش تستنى للصبح اتصلت بخالتها غرفه وبلغتها بتفاصيل اللي صار وغرفه كادت تنجن..
سكرت منها واتصلت بخالها المحجوب خبراته وردة فعله كانت مشابهة لردة فعلها وحتى هو ماقدرش يستنى للصبح رفع نبيله لحوش طوبى وتوجه طول للخمس..
🍃🍃🍃🍃
"قالت بعتت الرساله هيا لسدرة "
مدت غرفه هاتفها لنبيله وهي توري فيها صورة الرساله اللي بعتتها طوبى لسدرة واللي كانت كاتبه فيها
( زودولنا في حد هاجم علينا نسمع في عبد القيوم يعيط واني قاعده مع جنه في المشتل خايفه بنموت زودولنا)
نزلوا دموع نبيله وهي تقول بألم..
/لاحول ولاقوة الا بالله..
غرفه ببكاء قالت..
/قالت اريج قريب هبلنا سدرة بعد مااتصلت بيها وماردتش طلعت تعيط وتخبط وتقول لراجلها..خوك هاجم ع المزرعه..اختي وراجلها بيموتوا..بيقتلهم..وهو طول طلع ومعاه نضال وولده ومشوا للمزرعه ووين وصلوا..فيها لقوا العامل مغمى عليه وعبد القيوم ملوح وسايح في دمه والحوش تاكل فيه النار..ولما خبرتهم سدرة عن مكان طوبى وين خشوله سمعوا جنه تبكي تبعوا صوتها لقوها مع طوبى في اخر المشتل مدرقين ياروحي..طوبى مغمى عليها وتنزف وجنه ياعمري جنبها تبكي وتقول ماما..
انهارت غرفه بالبكي ونبيله وهاديه قعدوا يبكوا معاها..
وصوت بكاهم كان مسموع لعبد المطلب وهو مقعمز في الجنان يشوف جهة حوش بوه بعيون مليانات دموع..
كانت خاطره عليه ايام لطفي الاخيره لما كانوا يجتمعوا مع بوهم في جنان حوشه..
🔺️🔺️قبل ثلاث سنوات🔺️🔺️
لطفي بألم:كاسرتلي ظهري البنت هادي والله ماني خايف غير عليها هي يابوي..
علي بحزن:استهدى بالله ياولدي استهدى بالله..
مسح بإيديه ع وجهه بعدين حطهم عليه وقعد يبكي..
عبد المطلب..
/خيرك يالطفي شن جاك! نعرفك ايمانك بالله قوي!
لطفي بنبرة باكيه مكتومه قال..
/يارب سامحني يارب..يارب اغفرلي يارب..
حط علي يده ع كتف ولده وشد عليه بقوة وعبد المطلب يشوفله بحزن وأسف..
🔺️🔺️الوقت الحاضر🔺️🔺️
استاقظ عبد المطلب من الشرود مع ذكرياته لما سمع باب الحوش انفتح..
خشت صفيه تجري وهي خايفه وحسين وهو واقف في الباب قال لبوه بألم ممزوج بالغضب..
/ماشي للخمس..
هز عبد المطلب راسه بصمت وحسين سكر الباب..
🍃🍃🍃🍃
ومرت ساعات وعبد القيوم تحت العملية مش داري بشي ولاحاس بشي..
اما اللي حاسين وواعين لكل شي صار وقاعد يصير عقولهم شبه واقفه عن التفكير ومازالوا عايشين حالة عدم استيعاب..
🍃وصل المحجوب للخمس ولحق عليه حسين والزوز مع بعض وصلوا للمشفى اللي قاعدين فيه طوبى وعبد القيوم..
ولأن وضع عبد القيوم اسوأ من وضع طوبى توجهوا لقسم العمليات..
ع جيتهم هما طلعوا الاطباء اللي كانوا يديروا في العمليه..
تلقوهم مع المهدي وولده محمد اللي سألوا بخوف عن وضع عبد القيوم..
شرحلهم المشرف ع حالته عن وضعه بعد ما اكدلهم نجاح العمليه وقال ان الطعنة تسببت في اصابة في الامعاء وتمزق في جدار المعده وهما داروا مايلزم لحالته اللي اصبحت مستقرة وانهم حاليا حينقلوه لقسم العناية الفائقه..
بعد كمل المشرف كلامه ودعي لعبد القيوم بالشفاء شكروه ومشي مع الفريق متاعه..
🍃المحجوب بغضب..
/هو مافيش غيره..
المهدي بأسف واستياء قال وهو منزل راسه..
/طلعوه امس..
حسين والمحجوب قالوا مع بعض بصدمه..
/طلعوه!
هز راسه وقال:بكري شويه كلمت واحد يعرف جماعه غادي سألهم عنه وقال طلعوه امس في الليل..
حسين هز راسه وهو يقول..
/خلاص واضحه..
🍃المحجوب تباعد وهو منفعل ومعصب ع الاخر دار اتصال بالصابر بش يفهم منه اللي صار بالزبط..
لكن الصابر ماكان عنده علم بشي واللي سمعه صدمه للغايه واثار غضبه وخلاه يكلم الناس اللي يعرفهم وحتى هما طلع حالهم من حاله مايعرفوا شي..
🕸وهو في هالوقت كان في قلب السمي..رافعاته الطيارة لوجهه يعرفها هو بس بعد مابرد ع قلبه وحقق انتقامه..
🍃🍃🍃🍃
ليلة حالكة السواد مرت عليهم برغم وجود القمر اللي ضي بازغ في سماها..
القمر اللي كانت تتجنب طوبى تشوفله زي مامتجنبه تاخد وتعطي مع اي حد في الكلام..
كانت في حالة اشبه بحالة الصدمه عقلها ماقدرش يستوعب اللي صار..ولاقادر يفهم كيف وامتى صار..
وصوت صرخة عبد القيوم عالق في مسامعها كل ماتتفكره تتخيل شن صار فيه وقلبها يتفتت من الوجع عليه..
زي ماصاير في قلب سدرة ع حالها..سهرانه جنبها وهي تبكي بصمت وألم وفي نفسها تدعي من اعماق قلبها ع اللي كان السبب..
🍃🍃🍃
وتمر الساعات..وعبد القيوم مازال غايب عن الدنيا وحبيبة قلبه مش قادرة تغفى لحظه من خوفها ووجعها عليه..
كل ماتجي عينها تغفى تسمع فيها ينوض فيها بصوت اللي تعشق سماعه..
"طوبى"
تفتح عيونها بسرعه وهي متمنيه تشوفه قدامها بإبتسامه العاشقه ويطلع كل شي صار مجرد كابوس..
لكن هالأمنيه مستحيله زي ماحيستحيل معاها هلبه حاجات من بعد هاليوم...
🍃🍃🍃🍃
ومع ظهر يوم السبت..
وصلوا الصابر وكاريمان ومعاهم جبريل وسالمين للمشفى..
كلهم كانوا في حالة خوف وحزن ودموع كاريمان وسالمين ماكفتش عن النزول من لما سمعوا باللي صار..
لكن الصابر وهو خاش المشفى..شبح احدى الذكريات المؤلمة قعد يطوف حواليه وفكره بأسوأ يوم مر عليه في حياته..
اليوم اللي فقد فيه ولده رائف..
🍂سبب وفاة رائف هو حادث سير صار معاهم وهما مروحين من احدى مدن الشرق بإتجاه بنغازي..
كاريمان كانت حامل وقتها وبسبب الحادث خسرت الجنين وصارتلها مشاكل في الرحم..
ورائف اصابته كانت بالغة وتعرض لنزيف داخلي اودى بحياته..
هو بس..الصابر اللي كان اقل المتضررين ماصابه شي اكثر من كسور ورضوض..
بعد مااسعفوه في المشفى خالف اوامر الاطباء وتحذيراتهم وطلع يدور ع مرته وولده كان وين يشوف ممرضه ولاطبيب يوقفهم ويسألهم عنهم زي المجنون..
ولما عرف اللي صار لولده..انهار..ادمر..وبكي بكاء شديد فطر بيه قلوب كل من كان حاضر الموقف..
ومن بعد هداكا اليوم خش في حالة حزن عميق مع زوجته واقرب الناس ليهم بدل مايهونوا عليهم ويخففوا عنهم زادوهم اوجاع على اوجاعهم وخلوهم يكرهوا البلاد باللي فيها ويقرروا يهربوا من أحزانهم ومواجعهم ويطلعوا منها🍂
🍃وهو توا رجع عاش نفس الحاله وفي قلبه كان في خوف كبير ع طوبى..طوبى اللي بدي يشوف فيها عوض الله ليه ع ولده ونعمة الذرية اللي انحرم منهم..
اول مابان عليه حسين قدمله بسرعه وهما وراه ملهوفين زيه بخوف..
الصابر:شن حال طوبى؟.
حسين بأسف وضيق قال..
/باهيه الحمد لله..
كاريمان بنبرة باكيه قالت..
/وين نلقوها؟
🍃دلهم حسين ع القسم الموجوده فيه طوبى وهما ع طول توجهوله..
جبريل بقلق:عبد القيوم قاعد في العنايه؟
حسين:ايه..بنطلعه لتونس..
الصابر:حالته تسمح بالسفر؟
حسين هز راسه بإيجاب..
الصابر عقد حواجبه وقال..
/احكيلي اللي صار بالتفصيل..
☘وحكي حسين اللي يعرفه عن تفاصيل الحادثه وهما يسمعوا بألم وغضب..
جبريل مرر نظره ع المكان وهو يقول بغضب..
/الله يلعنه الوسخ..
الصابر:عبدالقيوم عنده كاميرات في مزرعته!!؟
حرك حسين راسه بالنفي..
بدت ع وجه الصابر ملامح الاستياء..
وجبريل قال..
/هذى في عنده حد ثقيل سانده وخلاه يتجرأ يدير اللي داره..
حسين:صح وهالشي قال عليه مختار بروحه..
بدت ملامح الازدراء ع وجه جبريل ما جت سيرة مختار اما الصابر قال..
/عارف من يكون؟
حسين:وعنده معاه شغل..قال لطوبى ماتحطيش راسك براس الجالي وراه ناس ماتقدروش عليهم..
ضحك جبريل بسخريه بعدين قال..
/عشان مصالحه مصباش معاها في وجهه..ضحك تاني تهمكا وقال..حتى نا هبل اللي فكرت ان واحد كيف هذى يجي منه خير نسيت انه عاونه في خطف جنة قبل..
الصابر قال بعدم استيعاب..
/كيف!!؟
جبريل شاف للصابر بألم وهز راسه بإيجاب تأكيدا للكلام اللي قاله..
حسين تنهد بأسف وقال..
/بنمشي نكمل باقي الاجراءات..
🍃ومشي حسين باقي اجراءات خروج عبد القيوم من المشفى والصابر وجبريل رافقوه..
🍃وفي هالأثناء..
في حجرة طوبى..
كانوا كاريمان وسالمين حواليها وسدرة واقفه تشوفلهم وهي تذرف في الدموع بصمت..
🍃كاريمان وهي تمسح ع شعر طوبى قالت بنبرة مواساة يخالطها البكاء..
/معليش ياماما معليش تو ربك ياخد حقكم ويعوضكم خير..
طوبى بنبرة ألم باكيه قالت..
/اني توا مانبي شي غير سلامة عبد القيوم بس..
سالمين بنبرة باكيه..
/ربي ينجيه لك و يقومه سالم مافيه سو..
طوبى غمضت عيونها وقالت بألم ورجاءا..
/ربي يشفيه ويعافيه ويجعل هدا اخر شر يجيه مني.
كاريمان شافت لسالمين وسالمين بعد ماشافتلها غيرت نظرها لسدرة..
وسدرة ربعت ايديها ونزلت عيونها وهي تبكي بصمت وأسف شديد..
🍃🍃
وهدا كله صار واهل عبد القيوم مايجيبوا خبر..
في طريقهم اللي قريب توصلهم لمدينة الخمس حاول عبد الله الاتصال بولد خوه مرارا وتكرارا لكن خطه مقفل..
وراجل صفيه كذلك حاول الاتصال بيه وكانت نتيجة الاتصال وحده..
تعبت قلوبهم بقلق حاولوا يخفوه ع النساوين..
🍃في مقدمه السياره..
كانوا الرجالة مقعمزين حدا بعض جنب السواق وهما يتكلموا بصوت منخفض..
معمر:عندي رقم حسين عبد الله بقلق..
/كلمه..
حط معمر ع رقم حسين واتصل بيه بعدين حط الهاتف ع وذنه والخط بدي ينادي..
مرة..تنين..تلاته..وفي الرابعه انفتح الخط وجاه صوت حسين وهو يقول..
"السلام عليكم"
معمر:وعليكم السلام..كل سنة وانت طيب..
"كل عام وانت بخير"
معمر:شنو حالك وحال العيله؟
"والله ماعارف شن نقولك ياخوي معمر"
معمر شاف لعبد الله بخوف وقال..
/ان شاء الله خير!
قلب عبد الله انقبض..والنساوين في الخلف خلوا انتباههم معاهم..
وقعد معمر يسمع في اللي صار من حسين وملامح الصدمه والفجعه باديات ع وجهه..
عبد الله جنبه مركز ع ملامحه ومن الخوف حس قلبه وصل لحلقه..
"توا بنطلعوا بيه لتونس وبإذن الله حينوض منها ويولي حاله باهي"
معمر نزل الهاتف وفصل الخط ع حسين وهو مصدوم ومفجوع ومعصب..
عبد الله بخوف:تي احكي قول شن قالك؟!
شافله وقاله..
/اللي خفنا منه صار ياعمي عبد الله..
عبد الله بعصبيه..
/ادوي باهي قول كلام نفهمه!.
سليمه ومهرة وصفيه كانوا يرعشوا من الخوف ووين سمعوا شن قال معمر عيطوا مع بعض وبدوا يندبوا وينادوا بإسمه وسليمه تقول..
"قلتلكم نا قلتلكم مافي حد سمع مني"
التفتت ع بنتها صفعتها ع وجهها وهي تقول ببكي وغضب..
"شن رايك هاه..قولي عجبك اللي جا لخوك من ورا البومه هذكي اللي جعنها ماتربح"
وصفيه منهارة بالبكي ومش قادرة تنطق بكلمه..
مهرة وهي تبكي..
/ياناعليا عبادي ياناعليا ياكبدي..ودرت روحك بروحك ياولدي..
عبد الله التفت عليهم وقال بعصبيه..
/اسكتن وسكرن افوامكن مانبش نسمع وحده تبكي ولاتندب عليه..مامات هو ياحمارات ماماتش تبن تفاولن عليه بالشر!
سليمه ببكي:الشر جاه من نهار عرفها الله لايسامحها..
عبد الله بصوت عالي..
/خلاص اسكتي اس اللي بنسمع حسها بننزل نضربها من ماكانت صغيرة ولاكبيره..
قعدوا يبكوا بصمت وهما مقهورات ع عبد القيوم زي ماانقهر عليه معمر..
والسواق اللي كانت عنده معرفه سطحيه بعبد القيوم حتى هو اتأسف لحاله وحال اهله وزاد السرعه بش يوصل بيهم في اقرب وقت..
🍃ومن بعد ماوصل الخبر في الاهل وصل للأصحاب..
سامي عرف من المهدي وبعدين خبر ربيع..
وربيع سيب كل شي عنده ورفع مرته وصغارها لحوش اهله وتوجه لشقه سامي..
🍃🍃
فتح سامي باب الشقه بعد ماسمع دق ربيع القوي عليه..
خش ربيع وهو يقول بفجعة وأسف ودموعه في عيونه..
/هاه ياسامي ريت! ماكنتش ندوي من فراغ ياسامي اللي صار توا شفته بعيوني من عام فات..الله يسامحك ياعبد القيوم ع اللي درته في روحك الله يسامحك..
سامي قال بألم..
/معاش تنفع بشي الدوة هادي ياربيع..اني بنلحقه لتونس بتمشي!؟
ربيع مسح عيونه وقال..
/مالاشنو..!
سامي قال:خلاص برا وتي روحك بنحجز في رحلة غدوة الصبح..
هز ربيع راسه بإيجاب ومشي طلع من الشقه وسامي سكر وراه الباب بعدين تنهد بحزن ومشي بإتجاه داره..
🍃🍃🍃🍃
ومع اولى ساعات فجر يوم الاحد وصلوا اهل عبد القيوم للخمس..
رجع معمر كلم حسين وعرف منه مكان المشفى وقاله انهم بيطلعوا بعبد القيوم توا وهو بلغ السواق اللي اسرع بيهم للمشفى..
🍃🍃
اول ماوصلت السيارة نزلوا منها يجروا..
شافوا في مدخلها سيارة اسعاف مفتوحه من الخلف..
وبعدين يشوفوا مايخليهم يصرخوا بفجعة والم..
عبد القيوم وهو ع الباريلا في حالة يرثى لها وجهه متورم من الضرب وغايب عن الوعي..
ركبوه سيارة الاسعاف فورا...وعمه عبد الله خدي شطنته ووصى معمر ع النساوين ومشي طول ركب مع حسين ولحقوا سيارة الاسعاف..
وقعدوا في مدخل المشفى..
الصابر وجبريل مع المحجوب والمهدي يشوفوا لنساوين عيلة عبد القيوم وهما يبكوا ومعمر يحاول يهديهم..
🍃هدت سليمه وقالت لراجل بنتها..
/قالولك حتى هي قاعده هنا ولا!؟
معمر قال بتوتر..
/ايه..
ويشوفها ماشيه مندفعه بإتجاه مدخل المشفى..
خشت بسرعه قدام الرجاله وبنتها واختها يلحقوا فيها بش يوقفوها ووراهم معمر..
لكن وهي في هديكا الحاله ماقدر حد يوقفها سألت عن مكانها في الاستعلامات وبعد دلوها مشت طول وهي غير مباليه لمحاولات مهرة وصفيه ايقافها..
🍃🍃
في حجرة طوبى..
كانت مقعمزة تاكل بالغصب من ايدين كاريمان..
هي اجهضت عيل عمره مايقارب اربع شهور ونزفت هلبه ووضعها الصحي تعبان لازم تاكل مايعوضها عن الدم اللي فقداته وتلقى بش تصلب طولها..
لكن سليمه اللي خشت عليهم مقتحمه لما شافت وضعها جن جنونها..
رفعت خمارها وقالت بغضب وكره..
/ماشاء الله عليك..تاكلي وتشربي وحالك تقول ايش وهو ع سباك قاعد كيف الميت!
سالمين بغضب:اطلعي ياسليمه مانبش نغلط فيك..
سليمه:وليك عين تحكي انتي! اصلا كله منك انتي..انتي ساعدتيها بيش تلعب عليه وتخليه ياخدها..
صفيه برجاء:يمي الله يربحك اطلعي رانا في مستشفى!
سدرة :خوديها واطلعوا خير مانجيبوا من يطلعكم..
مهرة:ولد خونا هو الغالط ياسليمه هو اللي التم ع وحده ماتصلح بيه
سليمه:الله يسامحه ع النكبه اللي دارها في عمره..وانتي الله لايسامحك ولايربحك كيف ماودرتي ولدي معاك..
ومشت طلعت وبنتها واختها معاها لقوا طبيبه وممرضه جايات وحده فيهم قالت..
/هادي مستشفى ياماما مايجيش منه التصرف هدا..
نزلت سليمه الخمار بدون ماتهتم لكلامها وكملت طريقها لعند مالاقت راجل بنتها اللي لام عليها حتى هو وهي تجاهلاته زي مادارت مع غيره ومشوا طلعوا من المستشفى..
🍃وخلوا وراهم طوبى منهارة ..بكت بشدة بكت بالعبرة ومن قوة البكي حست بتعب وشعور بالغثيان وبعد مارجعت كل مانزل في جوفها فقدت الوعي...
#امتحان
#طوبى
...يتبع...
