■■■■■■■■■■■■■■■■■■■■
قد يحمل هذا الجزء ومايليه احداث مؤلمة وقاسيه ولكنها تخفي بين طياتها مغزى عميق لايصل اليه سوى أصحاب القلوب الحية وأولوا الألباب فهنيئا سلفا لكل من يقرأ بعمق ليصل للعبرة🌸
/////////////////////////////////////////////////////////////
#طوبى "جنة طوبى"
#جمان_فريد
#الجزء_128"إمتحان/مفاضلة"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#باب_الحمد
▪︎قيل لأحد الصالحين :
ما هو الصبر الجميل قال : أن تُبتلى و قلبك يقول الحمدلله..🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "يا مَن فقدتُ سروري بعد بُعدهِم
قد صار بعدكُمُ طولُ الأسى سكنا
إن كان يعرفُ إنسانٌ بلا أجلٍ
يموت من شدّة الأشواقِ فهو أنا "🍃
________________________________________
خش لمحل المصور اللي يملكه صاحبه..
سكر الباب وقلب اللافته المعلقه عليه للوجه المكتوب فيه كلمة مغلق..
وصاحبه وهو شاد الكاميرا اللي كان يتفحص فيها شافله بأسف لما سمعه قال متسائلا بعدم استيعاب..
/من جدها ياسامي تبي الطلاق من جدها!
حط سامي الكاميرا ع الطاوله وقعد موجه نظره ليه بصمت..
وعبد القيوم متابع يقول بنفس نبرة التساؤل..
/معقولة تخلى عني بكل سهوله هك وتخليه يوصل للي يبيه؟!
سامي:بكل سهولة!
قعد يشوفله بنظرات انفعال وهو ساكت..
سامي:هي ماتخلتش عنك ع خاطر حرمتها من حاجة خاطرها فيها ولا منعتها دير شي هي تحبه بش تقول تخلت عليك بكل سهوله!..تتفكر في بداية زواجكم لما قلت انك تبي الدنيا كلها تعرف لكن هي واهلها رافضين والسبب الاول والاخير خوفهم عليك من الجالي..واهو جي اليوم اللي عرف فيه الجالي وريته شن دار!انت كنت ع حافة الموت كانك مش مستوعب وبسبب مني؟مش بسببها هي حتى لو ماكانش ليها ذنب..بعد هدا كله مازال تبيها تكمل معاك وتعرضك للموت مرة تانيه!؟..تعرف لو دارت هكي كنت حنأيد الناس اللي خدت منها موقف لما خديتها وكانت اكدت نظرتهم فيها..المراة تحبك بمعنى الكلمه ياعبد القيوم وفضلت سلامتك ع كل شي..
ضحك ضحكة خفيفه متهكمه بعدين قال..
/سلامتي!؟..تعرف الموت ارحم من اللي قاعد نعيشه توا..ومافي حد فيكم يبي يفهم الحاجة هذي..حتى انت ياسامي اللي توقعتك اكثر واحد تفهمني..انت اللي حاربت هلك عشان مرتك المراة اللي حبيتها من قلبك وكنت مستعد تعطيها من عمرك المهم تم معاك..
سامي بضيق:في فرق بين الحالتين ياعبدالقيوم اني ماكانش في خطر ع حياتي مافي حد كان مترصدلي وممكن ينهيني في أي لحظه..
ابتسم عبد القيوم بخيبة امل بعدين لف غير اللافته اللي ع الباب وفتحه وطلع..
غمض سامي عيونه بأسف وقال..
/استغفر الله العظيم..
🍃🍃🍃🍃
وهي فهالوقت.
كانت حبيسة دارها قدامها كيس الهدايا الكبير تشوفله وهي تبكي..
بعد لحظات من التمعن فيه..زحفت ع ركابها لين وين وصلت فيه خداته وفتحاته..
لقيت لبسة مش واضح شن نوعها كانت مغلفه لكيس ومعاه عليه مجوهرات لونها اسود..بس اللي لفت انتباهها من بين محتويات الكيس مذكرة يومياتها..
طلعتها من الكيس وفتحتها وقعدت تقلب في صفحاتها لعند ماوقفت عند صفحة مكتوب فيها بخطه الجميل..
ربعت رجليها وقربتها من عيونها وقعدت تقرا ودموعها مابطلوش نزول..
(قبل شهر كنت مجهزلك مفاجأة كيف المفاجأة اللي درتيها ليا يوم ذكرى ميلادي اللي عمري ماذكرته ولافي حد تفكرني فيه غيرك..من شهر وانا موصي ع عقد يشبه خاتم الزمرد مش كنت ديما تقولي ياريت نحصله عقد يشبهه!؟وتعرفي درت حاجه في حياتي ماتخيلت نديرها خلتيني نخش ع مواقع الفساتين والملابس النسائيه بيش ناخدلك فستان يشابهك كيف اللي لبستيه في نفس اليوم واخترت ووصيت وجاني من يومين بس..ااه ياطوبى لو تعرفي لشن كنت مخطط وشن كنت ناوي ندير عشان هاليوم كنت ناوي ندير حفله كبيره لجنة وليا انا وياك حفله لينا وحدنا ليله تكون بعمرنا ماننسوها مهما نكبروا وتضعف الذاكرة..تعرفي لو روحتي معاي يوم اللي جيتك رانا توا مع بعضنا ناسيين اللي صار كله وكأنه ماكان..لكن انتي ضعفتي واستسلمتي وسلمتي وخليتيني وحدي نعاني في عذاب مايعلم بيه الا ربي"
وهي تبكي بالعبرة قلبت الصفحه وكملت قرايه..
"انا كان في حد قهرني في حياتي لاالجالي ولاهلي..انتي ياطوبى لما تخليتي عني وخلتيني..ومع هذا نا مسامحك ياعمري شن ماديري فيا مسامحك مانبي شي من الدنيا غير انك ترديلي ياروحي وصدقيني حتى لو الموت جاني بعدها معاش يهمني ياطوبى..ارجوك ياقلبي يللي نقول عليك فرحتي ودواي وجبري ماتخليش الظلم يجيني منك..."
غمضت عيونها وهي منهارة بالبكي غطت وجهها بالمذكرة وتشم ريحته اللي عالقه فيها وتزيد تتوجع اكثر واكثر وتبكي بألم شديد وهي تقول..
"يارب...يارب"..
🍃ويامصعب ليالي الفراق شن يفوتها ع المحبين!
وديما نقعدوا في حيرة لما يجي في بالنا سؤال..هل الفراق بالحياة اصعب من الفراق بالموت ولاالعكس!؟
كلاهما امر من المر..بس انك تفارق اللي تحبه مقابل سلامته وحياته اهون بألف مرة من انك تفارق وجوده في الحياة بأسرها..
🍃اللي تعلمت في كل احوالها تأوي لركنها الشديد ورفيقها الأعلى وملجئها الوحيد...سهرت هديكا الليله وهي تسأل فيه يهون عليهم الفراق ويخليه ينساها ويعيش حياته مع اللي خير منها..ومارقدتش الا وهي تردد في دعاء يونس اللي فيه النجاة من الكروب..
☘☘☘
ويطلع تاني يوم..وكعادتها تتقن التظاهر بالقوة وتخطي واشعار اللي انها مامسها ضر قط..
..استعدت معاهم للمشيه البحر وكانت تحمس في جنة وجنة بطير من الحماس هي وباقي الصغار..
وحتى هي كانت متحمسه جدا..لكن لحماسها سبب محتلف..
اليوم اول يوم تلبس فيه النقاب..
🌷🌷🌷
بعد مالبست الملايه خدت النقاب قرباته من وجهها ولفت خيوطه حوالين راسها..وربطت اجمل عقده تربطها الاثنى في في حياتها..
رفعت اول طرف من الخمار للخلف..وشافت للمرايه من تحت الطرف الشبه شفاف اللي كان مغطي عيونها..
تأملت نفسها مطولا..بعدين غمضت عيونها وهي تتفكر في كلام سلوى..
تخيلت الدروج"السلم" كيف واصل للسماء ومتعديها..وتخليت نفسها وهي تركب عليه درجه درجه..وكل درجة تخطيها ضوي وكل ماترتفع كل ماتبدا تسم ريحة حلوة احلى من المسك..
فتحت عيونها وتاخد في نفس بش تتأكد من الريحة اللي شمتها فجأة..قاعده هي هي الريحه..قالت بإستغراب شديد..
/زعما غرفه حطت عطر هكي ريحته!
رفعت النقاب وخدت قفازاتها ولبستهم بعدين خدت شنطتها وفتحت الباب وطلعت..
وتبدا الريحه تختفي شيئا فشيئا لعند ماانعدمت تماما لما وصلت في غرفه..
غرفه بإبتسامه:الله يبارك الله يبارك..
ابتسمت طوبى..
"هيا يابنات"
سمعوا نداء صفيه وعرفه قالت..
/جايين جايين..
طوبى:الصغار في السيارة؟
غرفه:ايه..
طوبى؛طفيتوا وحولتوا كل شي..
غرفه:ايه ايه..هيا سقدي روحك قبل ليولع فينا هداكا..وطلعت غرفه بسرعه..
وطوبى لحقتها وهي تضحك..لبست في رجليها بعدين طلعت وسكرت الباب..
وتنزل خمارها وتتوجه لسيارة عمها..
🍃شافها حسين وهو في سيارته قال..
/طوبى لبست خمار؟
صفيه بإبتسامه:ايه..
هز حسين راسه بدون مايعلق بعدين شغل السيارة استنى لين يطلع بوه هو الاول وبعد طلع لحقه..
نزل منمن السيارة وسكر الباب كويس بعدين رجع ركب سيارته وتحرك وبوه وراه..
🍃🍃🍃🍃
"خاطري فيه وهلبه"
نضال:البحر الايام هادي زحمه والدنيا مخلطه في بعضها..
اريج:باهي نمشوا لبحر مافيشي زحمه..
نكش شعره وهو يفكر بعدبن قال..
/امم..استني نشوف ونقولك..
ومشي طلع من حداها وخلاها تقول بهمس استياءا..
/الله ينزعك يالجالي..
..ويرجع نضال بعد لحظات وهو يقول..
/فستقتي وتي روحك بنمشوا بعد المغرب..
نطت عليه اريج وضماته وهي تقول بفرح..
/نجيلي بعلي اللي مافي مثله من بين البعول..
بضحكه قال:بعول!
وخرت عنه وشدت ياقة تيشرته وهي تقول..
/شن رايك نرفعوا معانا عمتي تحط رجيلاتها في مية البحر باهي ليها راه..
طبع قبله ع سبابته وحطه ع مقدمه انفها وهو يقول..
/نحبك..
ضحكت بعدين مشت بإتجاه الكوجينه وهي تقول..
/اني بنطيب الغدي اليوم..بحبح هي..
ضحك ولحقها وهو يقول..
/ياسعدي وياهناي..
🍃🍃🍃🍃
الساعة 6:30مساءا..
في شقة نفيسه..
كانت سميرة عندها بناءا ع طلب نفيسه..
دارت قهوة وقعمزوا مع بعض في الصالون وفتحت نفيسه معاها الموضوع اللي جابتها ع خاطره..
☘نفيسه:قالي سأل عنها ومالقاش الا اللي يشكر وقال مناسبين عيله كبيرة ومعروفه..
سميرة:ايه اختها واخدها ولد ******..
نفيسه:قالي عليهم..المهم البنت عجباته هلبه ويبي يبعتلها حد يفتح معاها الموضوع..
سميرة:امك تعرف؟
نفيسه:وماعندهاش مشكله لاهي ولابوي..
سميرة:خلاص راجي لين يروحوا من***** بش نكلم طوبى..
نفيسه؛عاد انتي تعرفي سعد كويس خالتي سميرة..
سميرة بإبتسامه:نعرفه من صغره الله يبارك عليه وخوتك كلهم مايتخيروش عن بعض..
نفيسه بإبتسامه..
/بارك الله فيك..
🍃ومن شقة عمر لجنان حوش اهله..
كانت موجوده سيارة نضال واريج راكبه فيها من الخلف..
وفي الحوش.
كان نضال يدف بأمه كرسيها المتحرك وجنبه نسرين تقول..
/شوره مايجيش علينا البحر يانضوله!
نضال:ايه مش مقاسك..
ضحكت وضرباته ع ظهره وهي تقول..
/مبردك..
نضال:افتحي الباب كويس افتحي..
مشت بسرعه وفتحت الباب ع مصرعيه..
وطلع نضال بأمه لعند ماوصل بداية الدروج..
نزلت اريج ومشت فتحت الباب من القدام..
وهو جي لامها رفعها في حضنه وهي تقوله..
/ايدك؟
نضال بضحكه:مافيها شي يام..
ونزل بيها ومشي بيها للسيارة ركبها وهي تسمع في اريج تقول..
/ايش حالك ياشيخة العرب..
مغليه قالت بضحكه..
/مليحه..
نضال:نجيلي امي وكنتها يارب..
ضحكت اريج ومشت ولت لمكانها بدون ماتعبر نسرين..
وهو بعد ماسكر الباب جهة امه خدي كرسيها حطه في شنطة السيارة وركب وتحرك طلع بالسيارة من الحوش..
نسرين بغضب:مااحرف من الخاله الا بنت اختها..
وقبل ليتكسر الباب خشوا فرح وسدرة للحوش..
فرح:خالي نضال وين رافع حنينه؟
نسرين:للبحر..
سلموا ع بعض بعدين سدرة قالت..
/ماشيه لحوش خالي المهدي..ومشت بسرعه..
نسرين بعد ماتبعتها بنظرها رداته لفرح وهي تقول..
/تمشي معاي لشقة خالك عمر..
هزت فرح راسها بالموافقه وقالت..
/ok
ومشوا مع بعض بإتجاه شقة عمر...
☘☘☘☘
مقعمزة في الشاليه تكلم في اختها هاتفيا..
غرفه:يهبل الشاليه ياسدرة هو في الاساس فيلا ع البحر وع دورين ديكوره كله حلو وفيه شاشات ونت مجاني وفيه مسبح برا وجلسه مغلقه..وجاي ع البحر ع طول..
"الله يبارك الله يبارك"
غرفه:حتى البحر تقول مرايه تشوف فيه اللي ف وسطه والشط نظيف هونا يلعبوا عليه الصغار والافندي معاهم..
"ماشاء الله،باهي طوبى شن جوها؟"
غرفه:مقعمزة تحت مظله وشاده كراسة الرسم وترسم..
"ترسم؟!"
غرفه؛حتى اني فرحت لما شفتها ترسم..
"دير في روحها قويه وعاديه وحالها ربي اللي عالم بيه"
غرفه بحزن:عارفتها لكن خلينا رواحنا معاها عاديين مدام هي تبي تتناسى علاش نفكروا فيها؟!
"صدقتي..باهي نخليك تهيجي وماتنسيش صوري وابعتي"
غرفه بضحكه:حاضر
☘وصورت غرفه اجمل المناظر وخدت احلى اللقطات ونزلتهم ع الستوري..
ولأنها ناسيه وجود نسرين بين اصدقائها في الفيس بوك تفرجت نسرين ع صور الستوري والفيديوهات وعلقت تهكما..
/هدا غير نفسياتهم تاعبه وحالتهم حاله! اهم طالعين للبحر يهيجوا وماخاصتهم حاجه..
نفيسه وفرح شافوا لنسرين بإستغراب اما سميرة قالت..
/من هما؟
نسرين وهي مبتسمه بتهكم..
/عيلة الواعر
سميرة:لاحول ولاقوة الا بالله..
نسرين؛قصدي معليشي سميره خليك حقانيه..علاش الجو اللي يديروا فيه سدرة واريج!؟ اللي يسمعهم يقول اني باعته الجالي يدير اللي داره! الله غالب خوي مرفوع من عليه القلم ماعندنا مانديروله..
سميرة:ماحد لام عليك ولاكلمك يانسرين وهما من حقهم توجعهم بنتهم لو كنتي مكانهم درتي زيهم واشر..
نسرين؛واهي بنتهم عايشه جوها وتهيج ع البحر ومامدورة شي!!
سكتت سميرة لأنها عارفه روحها كان ردت عليها مش حيصير خير..
اما نفيسه اللي كانت ماسكه نفسها بالغصب ماشيه ع اتفاق مع راجلها انها تحافظ ع علاقتها بعيتله بحدود معينه وماتدخل في حياة حد.
لكن كلام نسرين ماقعدش من غير رد عليه..
وهالرد جاها من بنتها اللي ضحكت بإستغراب وقالت..
/قصدي يعني ماما سوري يعني..انتي بعد طلقتي من عمو ربيع وقفت حياتك! ماهو عشتي وهيجتي وتخطيتي وحتى هي لازم تتخطى بش تعيش حياتها والحقيقه اني نهينها هلبه ع قوة شخصيتها وحده تانيه غيرها عاشت اللي عاشاته راهو قداش ليها ميته..
سميرة:يسلم فمك يافروحه..
فرح بإبتسامه عريضة..
/Thanks
ضحكت نفيسه اما نسرين بعد سمعت رد بنتها دارت روحها لاهيه بالفيس وكأنها ماسمعت شي لكن من داخلها تغلي غلي من الغضب..
🍃🍃🍃🍃
درست سيارة"اللاند كروزر" قدام شركة المحاماة اللي يديرها المحجوب..
نزل منها صاحبها وبعد ماسكرها توجه للمبنى ووخشله..
وهو ماشي بطريقه لمكتب المحجوب شاف عدي واقف ع واحد كان عاطيه بالظهر غير نظره عنهم وركز في طريقه لعند مافات من جنبهم بدون مايلاحظوه..
🍃عدي:تعال معاي لمكتبه وزيد فهمه بروحك..
ايمن الفاندي هز راسه وقال..
/مش مشكله..
ومشوا مع بعض متوجهين لمكتب احد المحامين..
🍁وعبد القيوم قعمز في مكتب السكرتيرة يستنى في جية المحجوب..
بعد ماعدا ربع ساعة ع انتظاره اتصل المحجوب بالسكرتيرة يبلغها انه مش جاي..
وهي لما نقلت هالخبر لعبد القيوم استاء للغايه وعصب ..
ناض ومشي طلع من المكتب بغضب..ومن الغضب كان يمشي بسرعه وهو مايشوف في شي لعند ماوقفه شخص ناداه بإسمه..
التفت وشافه لقاه ايمن الفاندي ومعاه نسيبه..
قدموله الزوز وايمن مد يده وهو يقول..
/كيف الحال..
صافحه عبد القيوم وهو يقول..
/الحمد لله..
عدي:واخيرا شفناك بش نتحمدولك ع السلامه..
شافله عبد القيوم بنظرة امتعاض ووجه متجهم..
عدي بإبتسامه:الحمد لله ع سلامتك وع قولتكم نجوتك كبيره..
ايمن:المدة اللي فاتت رفعت العيله زيارة لحوش عيالك توقعت نلقاك غادي..
عدي:هديكا الفترة وضعه الصحي ماكانش يسمح..
عبد القيوم مرر نظره ع عدي من فوق لتحت وهو يقول..
/بارك الله فيك ياايمن..رد نظره لأيمن وقال..عدت ع خير..
عدي:قول الحمد لله..
ايمن حس ان الوضع بيناتهم مش مزبوط ماعنداش علم عن مشاعر عدي اتجاه طوبى ورغبته في الزواج منها..
عبد القيوم تنهد بنفاد صبر وقال لأيمن..
/سامحني مستعجل توا نتلاقوا مرة تانيه ونحكوا..
ايمن هز راسه وقال..
/ان شاء الله..
عبد القيوم:السلام عليكم..
ولف ومشي وهو يسمع في ايمن يقول..
"امتى تبيني تلقاني"
وقف عبد القيوم والتفت شافله..
حط ايمن ايديه في جيوبه وهز راسه بإيجاب..
عبد القيوم بعد دام النظر ليه لثواني رفع يده وحياه بعدين كمل طريقه..
عدي غمز وهو يسأل بإستغراب..
/شن قصدك ؟
ايمن بإبتسامه..
/كلمة تعودت نقولها.. صفق بإيديه وقال..هي قدامي ياافوكاتو اختك قالت ماتروحش من غيره..
ضحك عدي ومشي وايمن رافقه لخارج مبنى الشركه..
🍃🍃🍃🍃
وظلم الدنيا ويطلعوا النساوين مع الرجاله ع الشط ماعداها هي اللي قعدت مقعمزه في نفس مكانها تعطي في دروس القرآن لطلباتها..
بعد ماكملت..وجهت نظرها للشط لقت عمها عبد المطلب خاش بهاديه للبحر وشكري خاش بمطيره..
اما غرفه وصفيه قعدوا واقفات مع حسين حدا الصغار وهما يتفرجوا ويعلقوا..
☘صفيه:شوف بوك كيف خايف يقدم..
غرفه بضحكه:هاديه تكر فيه كران..
حسين بإبتسامه:عمتي وراجلها عايشين جوهم..
صفيه:منسجمين مع بعض..
رفع حسين حاجبه وتنهد تنهيده مصطنعه بعدين قال..
/ياقعادي نتفرج وخلاص..
غرفه تجاهل تام..
صفيه وهي شادة ضحكتها قالت..
/من شادك؟ برا تزوج وخش انت وياها للبحر..
حسين شاف لغرفة وقال..
/من هي؟
صفيه:صاحبة النصيب..وتقدم للصغار وهي تقول..تعالي هني يامئاب..
خدي حسين مكانها وقال لغرفه..
/سمعتي امي شن قالت؟
غرفه:ايه ومفروض حتى انت تسمعه..
ابتسم وقال..
/شن نفهم من كلامك؟
غرفه:نكلمك اخلاص بنت اخت صاحبتي!؟
شافلها شويه بعدين قال..
/خاطر في بالي نطبك ونخش بيك للغريق ونقعد نغطس فيك ونطلعك مانردكش للشط لين تقولي خودني ياحسين..
غرفه:هدا انت كل شي عندك بالسيف..
ضحك بعدين قال..
/باهي شن رايك نقعمزلك ع ركبه ونص ونقولك..Merry me
لفت وجهها عنه جهة التانيه وهي شاده ضحكتها..
وهو عقد حواجبه بإبتسامه وقال..
/عجباتك هادي!
شافتله وقالت بتحدي..
/كانك حسين حق ديرها..
ضحك بصدمه..
غرفه:والله كان درتها لما نقول باهي..
حسين قعد يضحك من جده..
وامه تشوفله بإبتسامه.
غرفه؛مانبصرش راهو..
حسين هدا ضحك وقال بمزح..
/لاجعلك وافقتي..
شافتله من فوق لتحت ولفت ومشت وهي معصبه.
التفت ولحقها وهو يقول.
/نبصر ياودي نبصر..خيرك هكي انتي!..غرفه..
شدها من مرفقها ووقفها هي نفضت يده وقالت..
/بجديات..انت ماتشجعش نعطيك فرصة بكل عقليتك وتفكيرك مخوفيني منك هلبه..
حسين:خيرهم عقليتي وتفكيري! اني لو كنت متخلف مااختارتكش انتي بش ناخدك..
غرفه ضحكت بقله حيله وهي تقول..
/اسلوبك صفر بصراحه..
ضحك ومسح بإيديه ع وجهه بعدين قال..
/ممكن مانعرفش نوصل الفكرة مانعرفش نعبر كويس حاولت بأكثر من طريقه نوصلك اللي نحس بيه نوضحلك شعوري ناحيتك..الكلام مانفعش..الهدايا مانفعتش حتى المفاجآت مامشتش معاك..باهي نقولك..انتي عطيني المفتاح متاعك..قوليلي شن ندير بش ترتاحيلي وترضي بيا!؟..
وجهت نظرها للبحر وهي ملتزمه الصمت..
تنفس بقوة وقال..
/من الاخير اني ناوي مانروحوش من هني الاواني واخد منك الموافقه..
وجهت نظرها ليه وهو قاللها بإصرار ولهفه..
/عندك علم الشاليه هدا ملكي وراهو جيت بنأجره بعدين لغيت الفكره قلت بنخليه ليا اني وياها بعد ماناخدها كل صيف نجيبها هني..ضحك وقال..ومش تقولي بيضحك عليا بشاليه هني والناس تسافر لاخر الدنيا في الصيف!؟ بالعكس وين ماتبي نرفعك لوين ما يعجبك ويجي في خاطرك مش حنحرمك من شي..انتي بس اطلبي وتمني ياغرفه والله ع قد مانقدر نحققلك اللي تبيه وربي شاهد عليه كلامي هدا ياغرفه..
كمل كلامه وهو يتمعن في عيونها بالنظر..نظراته كانت كلها اصرار...
هي نزلت عيونها وتنهدت بعدين رفعت عيونها فيه وقالت..
/شن ماتجيبلي وديرلي وتعطيني لو تغرقني في الفلوس او ترفعني لأخر الدنيا مش حتقدر تكسبني..اللي يخليك تكسبني ويخليني ندخلك لقلبي حاجتين الاحترام والتقدير مانبيش غيرهم...
عقد حواجبه بإبتسامه وقال..
/واني قبل لنحبك احترمتك قبل لتخشي قلبي كبرتي في عيني واللي درته كله ع خاطرك عبرتلك بيه عن قيمتك عندي..من الاخير اني مش متحرك من هني قبل لناخد الموافقه..
وجهت نظرها لصغارها بعدين قالت..
/يوم الجمعه نرد عليك..ومشت بطريقها لصغارها ومرت عمها وخلاته يشوفلها بإبتسامه فرح ونظرة كلها امل..
🌼وطوبى من بعيد كانت تراقب فيهم وترسم..
🌷رسمت وقفتهم ع بعض مع البحر واجواء الليل ومارسمت حد معاهم من البشر..
وضافت من عندها اضافه خياليه وكأن حسين وهو يتكلم يطلعوا من عيونه وقلبه مشاعره ع هيئة نجوم لامعه وصلت لقلب لغرفه وحاوطتها من كل جهة وغرفه تشوفله بإبتسامه..
الابتسامه اللي اخفتها غرفه في الحقيقه وهي تسمع لحسين🌷
وقفت طوبى رسم وهي تتمعن في الرسمه بعدين قالت..
/بعد تتلون تبان اكثر..
تنهدت وشافت للشط..لقت حسين رافع اواب ومهاب في حضنه والبنات وحده مع صفيه ووحده مع غرفه وكلهم متوجهين للشاليه وهي ناضت ضمت حاجاتها ولحقتهم..
☘☘☘☘☘
عشوا الصغار ورقدوهم وبعد الصلاة وتوا عشاهم اللي جاهم جاهز من احد المطاعم القريبه..
☘النساوين وهما يتعشوا مع بعض وصل لوحده فيهم اتصال ماسنجر..
رفعت هاتفها ولما شافت المتصل قالت بإبتسامه.
/وسيفه..
فتحت المكالمه وتشوف قدامها يوسف حاضن اميمه وجهينه..
ضحكت بدهشه واللي حواليها يشوفولها بإبتسامة فضول..
"امي شن جو..شن جو ماما..شن حالك عمتي"
صفيه بضحكه..
/الحمد لله الحمد لله..انتم شن لمكم ع بعض مني اللي جاي للتاني؟
"اني يام طبينا عليها اني وجهينه والكعبور اللي مش مهني روحه..علي تعالى شوف نينه تعالى"
مطيره بإبتسامه..
/وسيفه..
"عمتي الزعيمه..عميمه حتى اني معاه راهو"
مطيره بضحكه:قطوستي..هاتي خل نشوفهم هاتي..
مدت صفيه الهاتف لمطيره وهي تضحك..
مطيره خداته وشافت للشاشه لما بانوا عليها..
/الله يبارك الله يبارك..استاحشناكم ياسفاتيل..
ضحكوا وقالوا..
"حني اكثر"
مطيره:نجي علي الواعر نجي..تعالي حداي ياصفيه شوفي حفيدك..
☘قربتلها صفيه وقعدت تهدرز ع حفيدها وتلعب فيه وكذلك تكلم ف صغارها وكنتها وهما سلموا ع الموجودات..
قبل نهاية المكالمه..
صفيه:مش مفكر تجي مع اختك وسيفه؟
"والله صعب يام..بالذات بعد ترقيت في خدمتي"
كلهم بأصوات متقطعه قالوا..
"الله يبارك"
صفيه:ماشاء الله ماشاءالله..
"الترقية زادت عليا ضغط الخدمه وحتى جهينه صايرة معاها نفس القصه.."
صفيه وهي مبتسمه بتفهم قالت
/براحتكم ولدي براحتكم وربي يفتح عليكم ان شاء الله..
كلهم ردوا عليها..
"اللهم آمين"
🍃🍃🍃🍃
وبعد العشي..النساوين الكبار والرجاله راحوا في النوم..
وقعدوا طوبى وغرفه فايقات..مقعمزات الشط يتحاكوا وحسين مقعمز بعيد عنهم شويه ولاهي بهاتفه..
☘طوبى بإبتسامه..
/توكلي ع الله وصلي استخاره.
غرفه:هو هدا..تنهدت بعدين قالت..ايه حقه ماوريتكش بكري اريج بعتتلي صورها وهي ع البحر مع السلطانه مغليه..
طوبى:طالعين هما وياها بس؟
غرفه:ايه قالت اريج اني اقترحت عليه يرفعها معانا..
طوبى بإبتسامه..
/صحة ليها..كان كسبت امه معاش دور معاها حد تاني..
غرفه:رغم انها ماتستاهلش..
طوبى:نضال هو اللي يستاهل..
ابتسمت غرفه وقالت..
/صح..وعطت الهاتف لطوبى وطوبى خداته وقعدت تتفرج..لماشافت مغليه حست بشعور سيء للغايه بس تجاهلاته زي ماتجاهلت صورها وركزت بس ع فرحة نضال واريج اللي ماتبي شي يخربها عليهم..
☘وبعدين انشغلت غرفه زي حسين بهاتفها وطوبى ناضت من جنبها وتمشت ع الشط..
وهي تتمشى..كان عقلها سارح بفكره في الحبيب وذكرياتهم الحلوة تحوم حواليها..
"لالانخاف منه البحر بالله عليك لا..
تخافي منه ونا معاك..
مانحباش قتلك..
لكن نا نحبه واللي نحبه لازم تحبيه معاي..
لالانزلني بنعيط راهو..
عيطي..من يسمع فيك"
وقفت قدام البحر ووجهت نظرها ليه ودموعها تنزل..
"الله يسامحك وخلاص..
ياودي تعالي لقلبي وغني اغنيه فيروز..
لالاتو اني مانحبكش مانبيش نغنيها بالكذب..
تمام..تو نجيب من يغنيها ليا
تجيب عينك..
ايي ياضبعة بطلي عض..
باهي اسكت واسمع بنغني..
تحبيني؟شايف البحر شو كبير..كبر البحر بحبك"
وبدت تغني فيها بصوت منخفض ونبرة باكيه..
..شايف السما شو بعيده..بعد السما بحبك..
كبر البحر..وبعد السما بحبك ياحبيبي بحبك..
🍁وهو في هالوقت روح للشقه بعد ماقعد ساعات هايم في الشوارع...
قبل كان يخاف يخش الشقه وهي مش فيها وتوا يروحلها بشوقه وآلامه بش يعيش مع ذكرياتها الموجوده في كل مكان..
رمي بنفسه ع الكنبه بتعب سند راسه ع ظهرها وهو موجه نظره للسقف..
غمض عيونه وهام مع ذكرياته..
كان وين مايقعمز في الصاله يلهى بشغله في الخط او مجال عمله لما تناديه ع الغدي او العشي.. تجيه تحط ايديها ع كتافه وتنزل ع راسه وتطبع قبله عليه بعدين تقول..
"سمراويا..تعالى تعشى.
شويه نكمل هذي وجاي..
شن رايك نجيبه هني؟
احسن ماديري.."
وين تجي تمشي للكوجينه وتحرك شعرها اللي نازل عليه يضرب خده..
🍁حط يده ع خده بعدين فتح عيونه وناض مشي للكوجينه..
خشلها بش يدير مايتعشى،بسبب حالته الصحيه ماياكلش الا حاجات معينه جهزتهم خالته قبل لتروح وحطتهم في الثلاجه هو لما جي بيفتحها..
جت بين عيونه لما تخش بينه وبين الثلاجه وهي تقول..
"حول خل ناخد فروالاتي بش ندير العصير لجنة نسيته بكل"
غمض عيونه بألم بعدين فتحهم ومشي طلع باتجاه دار النوم..
خشلها وع طول مشي تمدد ع السرير مازالت الذكريات تلاحق فيه بش تزيد عذابه اضعاف مضاعفه..
🍁🍁🍁🍁
تاني يوم..
في ساعات الصباح الأولى توجه للخمس..
وين خشلها شعور الراحه اللي كان يحس بيه فيها اختفي تماما وحل محله الوجع..
وهالوجع يولي قاتل لما يخش للمزرعة ويشوفها بعد ما كانت جنة ولت خرابه...
وحوشهم اللي لم اجمل ذكرياتهم مع بعض..ذكريات بداية زواجهم محروق ورماد هالذكريات منثور حواليه..
ويتعبا قلبه بحقد وغضب شديدين ع الشخص اللي كان السبب في هدا كله..
لايمكن يعديله اللي داره معاه..ولايمكن يخليه يفرق بينه وبين حب حياته..
"امتى تبيني تلقاني"..
وين تفكر هالجمله وقائلها فكر للحظات بعدين طلع هاتفه من جيبه وخش ع سجل المكالمات دور رقمه لين لقاه واتصل بيه..
#امتحان
#طوبى
....يتبع....
