■■■■■■■■■■■■■■■■■■■■
قد يحمل هذا الجزء ومايليه احداث مؤلمة وقاسيه ولكنها تخفي بين طياتها مغزى عميق لايصل اليه سوى أصحاب القلوب الحية وأولوا الألباب فهنيئا سلفا لكل من يقرأ بعمق ليصل للعبرة🌸
/////////////////////////////////////////////////////////////
#طوبى "جنة طوبى"
#جمان_فريد
#الجزء_127"إمتحان/استعانة"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ٠إلهي رفعتُ يَديَّ إليكَ
ومَن لي سِواكَ سميعٌ مُعينُ؟🍃
_________________________________________
الإنتظار..
ومن يحب الإنتظار!؟
اطول وأصعب وأبغض اللحظات اللي تمر ع الانسان هي لحظات الانتظار..
لكن لحظات انتظار الفرج ربي جعلها عبادة..
اللي يستغل هاللحظات في الذكر والدعاء واحسان الظن بالله فوق الفرج اللي حيجيه حتما اجور وحسنات لاحصر لها،ربي قال هكي..قال..
{إنما يوفى الصابرون اجرهم بغير حساب}
🌼وطوبى بش ماتخليش وساوس الشيطان والهواجس يسيطروا عليها ويغلبوها استغلت هاللحظات في قراءة سورة البقرة والاكثار من الصلاة على النبي ودعاء يونس..
هي توا مسكرة ع روحها دار البنات في حوشها وباقي افراد عيلتها مقعمزين في الصاله يراجوا بخوف وقلق وحرارة الجو زادتهم ما بيهم..
🍃🍃🍃
"هي امتى بيجي دورنا انطبخنا!"
امتنان:اصبر باش مهندس وخليك رايق..
ناض وقال..
/بنطلع نقعمز في السيارة لما يجي دورنا رني عليا..
وكيف جي بيطلع سمعهم ينادوا ع اسمه..
التفت وشاف الناس اللي كانوا قبلهم طالعين بعدين شاف لامتنان لما قالتله..
/هيا باش مهندس..
مشت وهو وراها،شاف لنبيله كيف تمشي قدامهم بثقه ابتسم تهكما والمحجوب كان يشوفله ببغض شديد..
🍃🍃
خشوا للقاعه اللي كانت مكيفه..
كل حد فيهم وقف في مكانه..
القاضي مرر نظره عليهم الزوز بعدين ثبته ع الجالي لقاه يشوفله بنظرات ليهم معنى..غيرهم وكلم الكاتبه اللي جنبه بعدين شافلهم وقال..
/انت الجالي شنيبه..رافع دعوة طالب فيها بحضانة بنتك..
الجالي:ايه..برغم انها من حقي والقانون عطاني هالحق لكن طليقتي واهلها يبوا يحرموني منه..
امتنان:طليقته ليها حوالي عام متزوجه برجل اجنبي عن المحضونه ومخليه البنت عندها وموكلي ماكانش عنده علم بزواجها لأنه موجود خارج البلاد..ومؤخرا عرف وعرف ماهو ادهى وامر..ان الراجل اللي تزوج طليقته يعتبر عدو لموكلي صار بينهم مشاكل في الماضي لدرجة ان زوج طليقته اعتدي ع موكلي بالضرب وهالفعل تكرر قبل فترة قصيرة لما مشي موكلي بش يشوف بنته في رحلتها المدرسيه جاه زوج طليقته واعتدي عليه بالضرب المبرح..
القاضي:الاستاذة قالت انك كنت خارج البلاد وماعرفتش ان طليقتك تزوجت الامؤخرا وزواجها مر عليه عام..امتى عرفت بالزبط؟
قال:قبل شهر..
قاله:اهلك عندهم علم؟
نبيله حركت نظرها ناحيتهم لاحظت ان السؤال اربك امتنان ووتر الجالي اللي قال..
/ايه..
القاضي:علاش ماعطوكش علم؟
امتنان:طلاق موكلي لزوجته كان اجباري صارت هلبه مشاكل من طرف اهل زوجته خلوه يطلقها غصب عنه والامر هدا تسبب حزن كبير لموكلي خلاه يسيب البلاد وخوف عليه من الصدمه ماقدروش اهله يخبروه بشي..
الجالي بدي يدمع ويتكلم بصوت مخنوق..
/اني كنت ولازلت نحب ام بنتي ياحضرة القاضي..حسبي الله ونعم الوكيل في اللي فرق بيني وبينها..
امتنان:والى جانب موضوع زواجها عرف ان طليقته تعاني من مشاكل نفسيه وصلتها للإنتحار..
طلعت وراق من الملف وقدمت للقاضي وهي تقول..
/وهدا تقرير من المصحة اللي اسعفوها ليها بعد محاولتها الانتحار بشنق نفسها..
خداها منها وقعد يشوفلها وهي ولت لمكانها وكملت تقول..
/ومازال الام تعاني من مشاكل نفسيه في من قال انها سحر حتى ان زواجها التاني تم بطريقه غامضة وسريه وماانتشرش خبر زواجها بين الناس الا بعد اربعه شهور..
الجالي:هدا كله عرفته في المدة الاخيره وصدمني بقوة لكن خوفي ع بنتي كان اكبر..مش عارف كيف عايشه مع ام تعاني من مشاكل نفسيه وزوج ام معادي بوها!
شافله القاضي شويه بعدين غير نظره لنبيله وقال..
/شن ردك ع اللي سمعتيه؟
خدت نبيله نفس وقالت..
/سيدي..اللي سمعته كله هو عبارة عن محاوله لتشويه الحقائق او تزييفها ورمي بالافتراءات هنا وهناك..سيدي الجالي شنيبه في الحقيقه هو شخص يعاني من مشاكل نفسيه منذ تسعه سنوات..
ضحك الجالي بسخريه التفتت عليه امتنان وفنصت والقاضي قاله...
/تعاودها مرة تانيه
