🍁هاقد وصلنا إلى مشارف النهايات..
بين ايديكم الاحداث الاخيره لقصة طوبى اللي حتكشف تفاصيل كتيرة مبهمة وغامضه..
بعضكم ممكن مايصدقهاش او يقتنع بيها واني وظيفتي هني ننقلها وكل قارئ حيتلقاها حسب تفكيره وسعة ادراكه..
🍂ويااما فيك يادنيا مدسوس حكايات لو تطلع تشيب شعر الرضيع..
🍂وياما فيك ياواقعنا من مآسي صادمة تدمي القلب والعيون...
وفي هالحياة ياما نعيشوا وياما نشوفوا وياما نسمعوا..
..كل شي ممكن يصير حتى اللي ينقال عليه غير متوقع ومستحيل..
وزي ماقال دوستويفسكي مرة..
🍃" لا داعي للدهشة كل شيء يمكن أن يقع للإنسان
حتى الأمور التي كان لا يتصورها في الحلم "🍃
///////////////////////////////////////////////////////////
#طوبى "جنة طوبى"
#جمان_فريد
#الجزء_الأخير"إمتحان/نهائي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الجنة
ألا إن سلعة الله غاليه..إلا إن سلعة الله الجنة..
..رسول الله صلى الله عليه وسلم..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
طلعت من دارها وهي بكامل اناقتها..
توجهت لدار بنتها ولما وصلت فيها دقت الباب وهي تقول..
/مازال بيبا؟
"خشي امي"
فتحت كاريمان الباب ولما جو عيونها ع طوبى وبنتها ابتسمت من قلبها..
الزوز كانوا لابسات فساتين خريفية من نفس النوع واللون الفرق ان فستان جنة مبهج زيادة..
والزوز كانوا ظافرات شعرهم بطريقة مميزة وحلوة..الام منزلة خصلات كبار حوالين وجهها ومدايرة لبنتها غرة مدرقة جبهتها..
كاريمان بإبتسامه..
/ماشاء الله لاقوة الا بالله..اللهم بارك..
طوبى بإبتسامه:الله يبارك عليك حتى انتي يامزة المزز..
بضحكه قالت كاريمان..
/نجك ليا..فتحت ايديها وقالت..هي تعالي جنو نطلعوا توا وماما تلحقنا..
مشتلها جنه تجري وتلقتها كاريمان ورفعتها في حضنها وهي تقول..
/نرجوا فيك فالسيارة..
طوبى وهي تلبس في خراصها"اقراط" قالت..
/شويه بس..
بعد لبستهم دارت نظره اخيره ع طلتها بعدين مشت خدت ملياتها من الطاوله..لبستها ولبست النقاب وخدت شنطتها وطلعت من الدار..
🍃🍃🍃
طلعوا من الحوش في سيارة الصابر اللي كانت تسوق فيها كاريمان ووجهتهم حوش اخ كاريمان اللي بيعرس لبنته..
اليوم بيلتموا خوات كاريمان ونساوين خوتها وبعض من نساوين عيلتها زي سالمين واختها عياده وبناتها اللي كانت تربطهم علاقة صداقه بزوجة خو كاريمان وبناتها،ولمتهم هادي بيحكوا فيها عن الاستعدادات للعرس اللي يبيبدا بعد يومين..
🍃🍃
وصلوا للحوش واستقبلتهم زوجة اخ كاريمان مع بنتها العروسة استقبال حار كاريمان عمة وحمي محبوبه علاقتها حلوة مع كل نساوين خوتها،وصغار خوتها عاطيينها مكانة خاصه من حبهم ليها وكذلك مراعاة للظروف الصعبه اللي مرت بيها في مرحلة من حياتها قاعد تأثيرها عليها لليوم..
🍃بعد الاستقبال..
رفعوهم للصاله وين ماملتمات النساوين..
اول ماخشوا عيون طوبى جو في عيون سلوى اللي اول ماشافتها ابتسمت ببهجة وفرح وناضتلها طول وهي تقول..
/بيبا..
ضحكت طوبى وقدمتلها طول ولما وصلوا في بعض ضموا بعض بشوق..دمعت طوبى وسلوى كانوا دموعها ينزلوا..حبتها هلبه وولت ليها معزة كبيره في قلبها وبعد سمعت باللي صار فيها تأثرت وبكت عليها ونفسيتها تعبت..
هاللقاء كل من شافه تأثر بيه..اغلب الموجودات سامعين باللي صار فيها منهم من كان مشفق عليها ومنهم من وجعاته وتأسف جدا ع حالها..
🍃تباعدت طوبى عن سلوى وسلمت عليها بالخد وهي تسأل عن احوالها..شافت الدموع ع خدودها مسحتهم وقالت..
/ماشاء الله مزيانه..شكلك حامل ببنوته..
ضحكت سلوى من بين دموعها وقالت..
/ايه..
ضحكت طوبى بعدين شافت للحاضرات ابتسمتلهم وتباعدت عن سلوى ومشت تسلم عليهم مع كاريمان وسلوى تبع فيها بعيونها زي سالمين والزوز قلوبهم موجوعه عليها ع الآخر..
🍃🍃
بعد السلام..
قعمزت طوبى مع سلوى في زاويه من زوايا الصاله وهما يهدرزوا وعيون كاريمان وسالمين مرة عليهم ومرة ع جنة اللي كانت تلعب مع البنات الصغار وفي نفس الوقت يحاولوا ينتبهوا مع هدرزة اللي حواليهم..
••••••••••••
طوبى:قدر الله وماشاء فعل..شوفي اني كنت متوقعة يصير معاي شي زي هدا السحر اثر فيا هلبه واقوى اعراضه كنت نحس بيها في الرحم..قبل كنت خايفه يصير اللي متوقعاته وكنت نبكي كل يوم من خوفي لكن بعدين..تنهدت وكملت تقول..فوضت الأمر لله من كل قلبي بديت نحس ان مافي شي يستاهل نبكي عليه فالدنيا هادي سيورني مسيبتها بكبرها ومش واخده منها ولاحاجه معاي علاش نقهر روحي ع شي اخرته للفناء!؟..
وهي تتكلم سلوى كانت تسمع فيها بإعجاب وفي نفس الوقت شادة دموعها بقوة..
وطوبى مكملة تقول بإبتسامة..
/تصدقيني لو قتلك ماحسيتش بوجع في خاطري ماانقهرتش بكل بعد فقت وقالتلي الدكتورة حولنا الرحم..مش عارفة هكي حسيت روحي راضيه ومرتاحه وقلبي بارد..ضحكت وقالت..تعرفي قبل لنفيق شفت شي ماعرفتاش شن هو حلم رؤيه تخيلات ماعرفتش..شفت قدامي الكعبه قدامي مباشرة كانت تبرق وخيوطها الذهبيه تلمع شفتها حلوة هلبه حلوة بزياده..
سلوى وهي مبتسمه ودموعها رغم عنها نزلوا قالت..
/تقريبا رؤية..الكعبه ليها تفسيرات واجده في الحلم منهن انك ممكن تزوريها عن قريب..
ضحكت طوبى بفرح وقالت..
/يارب..
وسلوى وهي مبتسمه قالت..
/وفي اللي يقول انها ترمز للجنة..
ابتسمت طوبى من قلبها وهي تقول..
/واني هدا اللي مريحني ومسلي قلبي ان كل ابتلاء ينزل عليا ونصبر عليه جزائه ع الله ومرات يكون الطريق اللي رادلي نمشي فيها بش نوصل للجنة..
سلوى وهي متأثرة قالت..
/تصدقي..فرحتي قلبي واجد وفي نفس الوقت غبطتك ع تفكيرك وقوة إيمانك..
طوبى:رحمة ربي مش قوة ايمان..ربي من رحمته بيا خلاني نفهم اللي قاعد يصير معاي هكي...رحمة ربي اللي خلاك صاحبتي اللي في يوم من الايام عطتني نصيحة غيرت فيا هلبه حاجات..قامت هاتفها وهي تقول..اصبري نوريك حاجه..قعدت تقلب في الصور لعند ماحطت ع صورة ومدتلها الهاتف..
خداته سلوى وهي ترشف..مسحت عيونها كويس وهي تشوف للصورة..ابتسمت من قلبها وقالت..رسمك؟
طوبى بإبتسامه:ايه..وشاركت بيها في معرض وبيكرموني عليها في شهر 12 اللي جاي..سميتها رحلة صعود للسماء السابعة..
سلوى قعدت تتمعن في الرسمة وقلبها يدق بقوة..
الرسمه كانت للسماء في الليل وهي مزينه بالنجوم..وفي دروج"سلم" يرفع لفوق يضوي ويبرق هالدروج كانت تركب عليه وحده في بدايه كانت لابسه لبس عادي لكن من غير حجاب..وفي نص الدروج..كانت في وحده لابسه نفس اللبس وع راسها حجاب..بعدها بكم درجة وحده لابسة عباية وشاربه كبيره..وفي اخر هالدروج من فوق..كان في وحده لابسه ملاية سوداء لكن في ظهرها راكبين جناحات كبار وفي نور نازل عليها من السماء ومغطيها كلها..
واضحة جدا رسالة الرسمة اللي تأثرت بيها سلوى للغايه..شافت لطوبى وقالت..الله يبارك الله يبارك..سبحان من عطاك هالموهبه..
طوبى:ونحمده اللي خلاني نستغلها في حاجة تنفعني وتنفع غيري...
هزت سلوى راسها بصمت وهي تتأمل في الرسمة..
🍁🍁🍁🍁
"المخلوق هذى مش بنادم شيطان مصور "
عبد القيوم بغضب مخالطه القلق..
/عارف شن يبي في راسه..عارفه..نا ياعمي جبريل معاش نبي طوبى ترد لطرابلس..حط يده ع قلبه وقال..قلبي مقبوض..
جبريل بنفس القلق..
/والله حتى نا مش مرتاح..اللي عشت عمر خايف منه يصير مش عارف ليش حاسه قريب يصير..
شافله عبد القيوم بخوف وهو يفرك في ايديه ببعض..
جبريل بضيق شديد..
/كل شي صاير يقول هك..اللي قاعد يدير فيه شيطان الرجيم مخليني نحس هك..مسح بإيديه ع وجهه بعدين قال..اصلا لعند امتى بيقعد مدرق لعند امتى مافي شي في هالدنيا يقعد مخبي لو بعد مية سنة يطلع يطلع...دمعوا عيونه وقال..وكان ربي يلحقني بلطفي بس..
عبد القيوم بلع ريقه وقال..
/وحد الله ياعمي جبريل..
جبريل شافله شويه وقال..
/لا إله إلا الله..اللي مريحني شوي انك راجل بمعنى الكلمة مادام معاها واحد كيفك انت حتعدي كل شي يصير معاها مهما كان قوي..
عبد القيوم:ولاعمري حنخليها والله لو شن يصير لو من يصبي بيني وبينها حتى هي نفسها،وقلتها قبل ونعاودها لأخر عمري مانسيبها كان بالموت...
ويجيه في هاللحظه اتصال..حط يده في جيب جاكيته وطلع الهاتف شاف المتصل وقال..
/ايمن الفاندي..فتح الخط ورد وهو يقول..ايوه..
"تارقي شن جو"
عبد القيوم:ماشي الحال..الحمد لله..انت شنو حالك؟
"الحمد لله..خود اخر الاخبار"
ضيق عيونه وقال..
/هات..
"هداكا الجالي مش داروله تحاليل مخدرات وطلعت تحاليله نظيفة من ناحية المخدرات بس..لكن لقوا في دمه نسبه من الادوية النفسانيه اللي تثبت انه مريض نفسي"
عبد القيوم:معروفة هذي..
"اللي مش معروفه البلي التاني اللي طلع فيه"
رفع عبد القيوم حواجبه وقال..
/شني!؟
"طلع عنده الخبيث في الدم"
عقد عبد القيوم حواجبه وقال وهو متفاجئ..
/خبيث!؟
شافله جبريل بقلق وعدم فهم..
"ايه..ريت ربك سبحان الله"
ارتسمت ع وجه عبد القيوم ابتسامة جانبيه وهو يقول..
/سبحان الله..
🍃وقع الخبر هدا حتما حيكون مختلف ع عيلته..ع خوته اللي ماقدروش يتحكموا في دموعهم..ع خواته اللي انهاروا تماما..خديجة هادي لين فقدت الوعي من فجعتها،اما نسرين بكت لين طاب كبدها من البكي وسميرة كانت تحاول تهديها وهي حابستها في دارها ماتبيش مغليه تسمع..
مغليه اللي كانت تلهي فيها حفيدتها سدرة المهدي اللي برغم وجعها ع عمها الا ان اللي صار مع طوبى خلاها تحس ان اللي صار فيه عدل..هدا تفكير بنت وعت قبل وقتها ع هلبة حاجات خلتها تاخد مواقف تفوق سنها..
وسميتها..برد قلبها لما سمعت باللي صار في الجالي حتى انها حمدت الله وشكراته اللي خدي حق طوبى بكري بكري بش يشفي غليلها..
وهدا مصير كل من يعادي حد محبوب عند الله..
(من عادى لي وليا فقد آذنته بالحرب)
سبحانه وتعالي هو اللي قال هكي اللي يعادي عبد مطيع ليه تقي عارف بيه يعاديه ويعلن الحرب عليه وحرب الله من يقدر عليها! واللي يبالغ بأذى أولياء الله يولوا اعدائه وياويله وياسواد ليله اللي يعادي الله العلي الجبار..
وزي ماقال ابن القيم في كتابه..زاد المعاد..
{ إذا أراد أن يُهلك أعداءه ، ويمحقهم ؛ قيّض لهم الأسباب التي يستوجبون بها هلاكهم ومحقهم ، ومِن أعظمها : مبالغتهم في أذى أوليائه !.}
🍃"وينها؟"
الاقجم:اليوم رابع يوم ليها في بنغازي..
عقد حواجبه ونزل نظره ليده اللي كان حاطها ع طاولة المكتب وهو يضرب بأصابعه عليها..
قعد ساكت للحظات بعدين قال..
/المهم توا..ناض وكمل يقول..الليله عندي مشيه ل***** معزوم غادي..طلع من ورا المكتب ومشي بإتجاه الباب وهو يقول..في عندي امور عالقه خل نسرحها وبعدين نلهى بيهم..
ومش طلع من حجرة المكتب والأقجم لحقه وسكر الباب..
🍃🍃🍃🍃
"بيعدن البنات لتفريشة الشقة وانتي معاهن ياكاريمان"
العروسة قالت بعد ماسكتت امها..
/نبي كل شي يكون علي عينك عميمه..
كاريمان بإبتسامه..
/حاضر حبيبتي حاضر..ضيقت عيونها وشافت لوحدة من نساوين خوتها وهي تقول..كنها بتول ماجتش؟
تنهدت وقالت:بتول مش حاضرة الفرح بالمرة ياكاريمان..
قالتلها بقلق:ليش؟
وحدة تانيه من بنات خوها ردت..
/بنت صبيتها توفت..
كاريمان بشي من الفجعة قالت:اين منهن!؟
=حلا بنت رحمة..
سالمين بصدمة:هديك اللي زوجت العام اللي فات؟
قالولها..
"ايه..هي"
كاريمان:كنها مسكينه!؟
=ماتت منتحره..
طوبى بألم قالت..
/لاإله إلا الله..!
وسلوى جنبها منزله عيونها لفنجان القهوة وهي تشوفله بنظرات حزن..
كاريمان وهي متأسفه سألت..
/وليش انتحرت؟
قالتلها مرت خوها..
/ياخيتي شن بنقولك..فاجعة وفضيحة ربك يسترنا..
عقدت سالمين حواجبها بخوف وهي تقول..
/فضيحة!؟
وحده من البنات قالت..
/قصة ولافي الخيال ياخالتي سالمين والله العظيم لعند توا مش قادرة نصدقها ولانستوعبها..
كاريمان:قصدكن خيانه!؟
حركت وحده فيهم راسها بالنفي وهي تقول..
/لا ياعمتي..تنهدت وقالت..ريتي امها حماة بتول..طلع عندها قصة قديمة..زمان بكل كانت تخدم في مكان تعرفت فيه ع واحد يخدم معاها وداروا علاقه وللاسف العلاقه هذي تخطت الخطوط الحمر.
بدت ع وجه طوبى ملامح الاستنكار مع الالم..
والبنت مكمله تقول:وبعد ماطاح الفاس في الراس هي اعترفت لأمها وخواتها باللي صار ولأن باتها متوفي وخوها الوحيد راجل اختي بتول كان صغير واجد وقتها امها عدت استنجدت بهلها وحكتلهم اللي صار وهما عاد لما فكروا يرقعوا عملتها ماجاش في بالهم يقتلوها خوف من الفضيحة..عدوا للشاب اللي دايره معاه علاقه علقوه عليه وعطوه طريحه وخلوه يعقد عليها غصب عنه وهو عقد عليها وتم معاها اسبوع بعده طلقها واختفي معاش لقوله اثر والمصيبه انه بعد ماطلقها بأسبوع طلعت حامل وحملها كان قبل مايعقد عليها يعني الفضيحة لاحقتهم لاحقتهم وبيش يرقعوها مرة اخرى واحد من عيال خالتها قال انا نزوجها ونستر عليها ونسجل العيل اللي بيجي ع اسمي
قاطعتها كاريمان وقال..
/اللي غلطت معاه ماعنداش هل ولاشنو!؟
ردت مرة خوها وهي تقول..
/ماهوش ليبي كان جاي يشتغل في ليبيا وهله مش معاه..
كاريمان وهي مصدومه قالت..
/باهي وبعدين!؟
بنت خوها ردت:زوجها وداروا فرح وبعد الفرح سافر بيها لمصر تمت غادي لعند ماجابت بنت وكانت حلا الله يرحمها وبعدها ردوا لليبيا وكملوا حياتهم عادي..ولد خالتها طلع راجل بمعنى الكلمه عاملها بالحسنى وجاب منها عيال اخرين وربى حلا وكأنها بنته متعلق بيها بكل،بتول قالت لما زوجت حلا بكا عليها بكاء..
مرت خوها قالت:ومن شهرين صارت مشكله عشان فلوس ورث ماورث وحده من خوات حماة بتول تعاركت معاها عليهن مانعلمش بالتفاصيل بالزبط المهم العيله كلها صبت مع حماة بتول ضدها وهي عاد نقمت ع اختها نقمة سودا..قولوا شن دارت بيش انتقمت منها!؟
طوبى اللي كانت متأثرة جدا وصدرها ضايق قالت..
/شني!؟
شافولها ووحده منهم قالت..
/عدت لهل راجل حلا وحكت قصتها كاملة وفضحتها..
حطت طوبى يدها ع فمها وهي مصدومه بقوة وعيونها دمعوا..
كاريمان بألم وغضب قالت..
/الله يلعنها من اخت..
=ايه والله..وعاد هل راجلها طارت عقولهم من رووسهم وخبروا ولدهم باللي سمعوه وهو عدالها كيف المجنون عطاها طريحة قبل قتلها وروح بيها لحوش هلها وهي دايخة من الضرب ودارلهم فضيحة كبيره في الشارع وهو يقول..
"غشيتوني عطيتوني بنت حرام وغشيتوني" الشارع كله شهد ع العار وباتها وخوتها بعد عطوه طريحة عدوا بحلا للمستشفى..المسكينه كانت حامل واجهضت وتكسرت تكسير تمت في المسشتفى فترة وطلعت منها وماكانش في عقلها شي غير الكارثه اللي عرفتها وين سألت امها وباتها عنها حكولها القصة كامله ماتحملتش من صدمتها يومين ولقوها شانقه روحها فوق سطوح حوشهم..
طوبى قعدت تبكي بصمت ومازال مصدومه بقوة من اللي سمعاته..
وكاريمان قالت بصدمه ودموعها ينزلوا..
/ياربي عليك مصيبة!
وحده من خوات كاريمان قالت..
/تقول فيلم هندي..
سلوى قالت بألم..
/ياما يصير وياما نسمعوا والله في قصص سمعتهن مازال احرف من القصة هذي..
طوبى بنبرة مرتعشه قالت..
/عندها صغار؟
بنت اخكاريمان قالت بحزن..
/ولد واحد وباته وهله عزقوه لهلها قالوا عليه ولد حرام كيف امه..
سلوى باسف:عليك جهل..زواجها كان صحيح وعقد زواجها صحيح العيل ولد حلال..
طوبى بألم:لكن حيقعد معروف بأمه في مجتمع زي مجتمعنا حيعايروه بيها ديما ويقولوله..
"امك بنت حرام"
نزلوا دموعها وهي تقول..ان شاء الله ربي يسامح امها وراجل امها هما اكبر الجانيين عليها عيشوها سنين من عمرها في كذبه كبيره..خلوها تعيش ع انها بنت طبيعية عندها عيلة طبيعيه اب وام وخوت وخوات وفوق هكي زوجوها..معقوله مافكروش يجي يوم زي هدا وينفضح اللي دسوه سنين! اصلا كيف قدروا يدسوه السنين هادي كلها!!!؟
سلوى:فعلا ذنبهم كبير..فوق هذى كله الراجل نسب لنفسه بنت مش بنته ومعروف حكم الشرع في الحاجه هذي..حرام ومن اكبر المحرمات..باهي اللي كانت هي الكبيرة واللي جو بعدها كلهم خوتها تخيلوا لو كانوا مش خوتها وتربت معاهم ع اساس انها اختهم!
وحده من الحاضرات قالت..
/لاحول ولاقوة الابالله..
كاريمان قالت بألم..
/باهي الراجل اللي سجلها ع اسمه محرمه عليه ولا؟ لان امها مرته وهي محارمه مادام رضعتها معناها حارمه عليه!
سلوى هزت راسها موافقه لكلام كاريمان..
طوبى بشي من الانفعال..
/لكن هدا كله ماقدرش يحميها من اللي صار فيها في الاخير..تخيلوا كيف كانت عايشه حياة هاديه عاديه مستقرة وفجأه بين يوم وليله تتزلزل حياتها هادي وتنهد ع راسها..ياااه ياربي..زعمت شن حست شن اللي كانت تحس بيه وقتها ياربي!
سلوى بالم واسف:هذي اخرة الاختلاط والحياة السايبه البعيدة عن ضوابط الشريعة..وسط العيله الدنيا مخلطه السلاف مع الكناين ولاد العيله مع بناتها وشي يصير بينهم الله المستعان وخلاص..تخشي مؤسسة حكوميه ولامستشفى وحتى في المدارس تلقي الوحده مقعمزة وسط شباب وهي لابسه لبس فاضح ومكياج والعطر متاعها واصل لأخر الدنيا وتهدرز وتضحك معاهم..تجيب فطور لهذى وهداك وتاخد في ارقامهم وضيفهم ع الفيس ومش معروف لوين توصل بيهم بعدين..واللي يصير في الجامعات حدث ولاحرج قسما بالله وكأنك في اوروبا مناظر مقززة تزعم الكبد..توحلي فيهم وانتي تسألي نفسك هذوما وين هلهم !! من ويين جايين!!؟
وحده منهم قالت..
/تصدقي..حلا هذي كانت قمة في الاخلاق والتربيه وتخاف ربي خير بواجد من بنات حلال مامخليات عار ولاحرام مش دايراته..
طوبى وهي ترشف قالت..
/الناس مستحيل تفكر هكي..حتى لو كانت من اتقى الاتقياء حتقعد في نظرهم.."بنت حرام"..
فجأة وبدون سابق انذار وحده فيهم انهارت باكيه..
كلهم وجهوا انظارهم ليها ماعدا طوبى اللي حطت مافي يدها وناضتلها تجري وهي تقول..
/خالتي سالمين!
وتخش سالمين في نوبه بكاء غريبه كلهم ناضولها وهما يحاولوا يهدوها اللي بختها بالميه اللي حاولت تشربها ميه..
عيادة اختها قالت بفجعة..
/كنك ياسالمين شن جاك!!
كاريمان وهي مفجوعه قالت:سالمين!
طوبى ضمتها وبدت تقرا عليها...
وسالمين زادت في البكي لعند ماهرب عليها النفس وفقدت الوعي...
🍃🍃🍃🍃
"ربك كبير اللي داره في طوبى لقاه تالت ومثلت"
حسين:اللهم لاشماته لكن فرحت فيه فرحة..
غرفه:اشكاله يستاهلوا الشماتة..
صفيه:عمايله السود ولت عليه واللي داره في بنت عمك مش شويه..
غرفه بحقد:الفال لهداكا الابليس ان شاء الله تجيه بأحرف من هكي نبي ربي يطول في عمره ويكمله كله متعذب ويعاني..
بدت ع وجه صفيه ملامح الضيق والالم برغم كل شي داره مختار مازال مش هاين عليها اما ولدها حسين قال..
/مافي حد يفلت من عدل ربك ياغرفه اللي مايلقاش عقابه في الدنيا يجيه في الآخرة..
غرفه بحقد:مختار بالذات نبيه يتعاقب دنيا وآخرة..
🍃ومختار في هالوقت كان يجهز في نفسه لعزومه واحد كان عنده معاه شغل..وقف قدام باب خزانته السحاب بيطلع حاجه يلبسها..
لما فتحه جت قدام عيونه لعبة لولده علي..هاللعبه خداتهاله طوبى لما قعد عندها وعوداته عليها بدل لعبة "الجوكر" اللي خداهاله وقعد علي متمسك بيها لأخر ايام حياته..
وهو يشوفلها ناضت في داخله مشاعر تشابكت مع بعضها..
ألم..وحزن..حقد..وغضب..
فكر ياخد اللعبه ويرميها لكن تراجع عن هالفكره وغير نظره عن اللعبه وبدي يختار في حوايج يلبسهم وهو شاد دموعه بقوة..
🍃🍃🍃🍃
"روحت بيها اختها عيادة"
قالت كاريمان هالجملة ردا ع راجلها اللي سألها عن حال سالمين بعد ماحكتله اللي صار فيها..
الصابر بأسف:حتى انا تأثرت واجد بالقصة هذي المصيبة انها تمت فضيحة كبيره والناس تدوي بيها..
كاريمان بحزن:الله يرحمها ويغفرلها مسكينة..
الصابر بضيق:حقيت طوبى الدموع في عيون طوبى..
كاريمان:بكت واجد من كثر ماتأثرت وانفجعت ع سالمين..
تنهد وقال:بكرا عبد القيوم جاي يتغدا هنا..
كاريمان:يبي يحكي معاها..
هز الصابر راسه إيجابا..
🍃ومن دارهم للدار اللي قاعده فيها طوبى..
بعد ماصلت العشاء وقرت وردها من القرآن رقدت جنة..
وبعد ماجنة خداها النوم هي قعدت مع نفسها تفكر قي القصة اللي سمعتها اليوم..اثرث فيها تأثير كبير مش قادرة تتخطاها..
فجأه جاها اتصال ماسنجر قامت هاتفها شافت المتصل تنهدتوفتحت الخط وردت..
/السلام عليكم روجة..
"وعليكم السلام بيبو..شن حالكم انتي وجنوني"
طوبى:الحمد لله..انتي شن دايرة مع الفستق الصغير..
"اهو مرة مرة يتعب فيا"
يدوب ابتسمت وهي تقول..
/احلى تعب..مشيتي لحوشنا اليوم؟
"لااليوم لا ماطلعتش من الحوش"
طوبى:علاش؟
"توقعتك مش سامعة"
طوبى بقلق:شن في؟
"مافي شي يخوف بالعكس حاجه تبرد ع القلب..هداكا الجالي شدوه برا في قضية مخدرات"
طوبى بصدمه..
/مخدرات؟
"ايه..ليه فترة..لكن القصة مش هني..قالك لما داروله تحاليل ماطلعش مدمن لكن شكوا في حاجه تانيه داروله تحاليل تانيه بش يتأكدوا وطلع عند سرطان دم.."
الخبر صدمها لكن ماقدرتش تفرح بيه حست وقتها بشعور مش قادرة تفهمه..هو مش شفقة ولاتعاطف..لكن ماقدرتش تفرح..
"طوبى وين مشيتي!؟"
طوبى تنهدت وقالت..
/معاك..
"خيرك حسيتك زي اللي انصدمتي"
قالتلها:مش عارفه..مافهمتش بشن حسيت..
"ياخوفي يكون وجعك"
ضحكت غصب عنها وهي تقول.
/اكيد لا..لكن مش عارفه كيف..تنهدت وقالت..المهم ربي صرفه عني..
"واضح من صوتك ان جوك مش حلو"
طوبى بضيق:ايه..اليوم واني في حوش خالي الهادي سمع قصة وجعتني هلبه..
"قصة شني احكيلي"
🍃🍃🍃🍃
"هاه شن حالها توا؟"
جبريل بضيق:راقدة..
عبد القيوم:نبات حداكم الليله؟
جبريل:لاولدي مش لازم عدي تريح..
هز راسه وقال:باهي كان احتجتني رن عليا..
جبريل هز راسه ايجابا بصمت..
تنهد عبد القيوم وقال..
/تصبح ع خير..
جبريل:قدامك كل خير..
ومشي مع عبد القيوم لين طلع من الدور الاول وركب الدور التاني بعدين رجع خش وسكر الباب..
خدي نفس عميق وزفر وتوجه بطريقه وين ماراقدة مرته..
وصل في الدار اللي كان بابها مفتوح..خش عليها ومشي قعمز ع الكرسي اللي كان مقابلها..
قعد يتمعن فيها بالنظر..عيونه كانوا مليانات حزن ويلمعوا بالدموع..بانت عليه دمعة نزلت من عيون مرته وهي راقده..
قرب مسحها بلطف..بعدين حرك نظره للكامدينو جنب السرير شاف لصورة محطوطه عليه تمعن فيها للحظات بعدين قال بحزن...
"الله يرحمك ويسامحك ويسامحنا..."
