🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 فلو أنّي طفتُ العالَم كلّه؛ لرأيتك من حولي أينما كنت، كأنّي محدودٌ بك في حدودٍ مسحورة، تدعك حيث أنت وتمضي معي حيث أكون! 🍃
________________________________________
⏳
"من حضرتك؟"
كان هدا سؤال الطبيبة ليه وهي مستغربة وهو رد عليه وعيونه في مرته..
"راجلها"
عقد حواجبه وبان في عيونه الألم مع الحزن لما سمع طوبى تقول بنبرة فيها شي من التعب..
"دكتورة كان كملتوا اطلعوا وخلوني نرقد مانبي حد هني"
الممرضات قعدوا يشوفوله بنظرات غريبه اما الطبيبه شافت لطوبى لقتها لافه وجهها عنه ومغمضه عيونهاهزت راسها بعدين التفتت لعبد القيوم وقالت..
/معليشي هي توا لازم ترقد وترتاح..
طال النظر لطوبى للحظات بعدين قال..
/تمام..وطول مشي طلع من الحجرة..
🍁شافوله كاريمان وسالمين وسدرة بان عليهم من ملامح وجهه انها رفضت تشوفه..
هو ركز بنظره ع سالمين بعدين قال..
/خالتي سالمين..
ومشي تباعد عنهم وسالمين ناضت لحقاته..
ويطلعوا بعده الطبيبه والممرضات..
الممرضات كملوا طريقهم لكن الطبيبه قدمت لسدرة وكاريمان وقالت متسائله..
/معليشي..صايرة مشاكل بينها وبين راجلها؟
كاريمان شافت لسدرة اللي تنهدت وقالت..
/في شوية مشاكل لكن مش بيناتهم..
الطبيبه بعدم فهم..
/كيف يعني؟
نزلت سدرة عيونها بدون ماترد وكاريمان قاعده ملتزمه الصمت..
الطبيبه قالت..
/سألت بسبب وضعها الحالي نفسيتها توا تاعبة جدا مفروض مايصير شي يزيد يأزم وضعها النفسي..
كاريمان وهي تشوف لعبد القيوم وسالمين قالت..
/لأمتى تقعد هنا دكتورة؟
الطبيبه:اسبوع او عشرة ايام..وغيرت نظرها وين مايشوفوا كاريمان وسدرة..لعبد القيوم وسالمين اللي كانت تكلم فيه بشي من الانفعال ودموعها تنزل..
🍁🍁
"هي كلمتني وماخلت ماسمعتني وقالت عليها وقالت انك تبي طلقها "
غمض عبد القيوم عيونه بغضب بعدين فتحهم وقال..
/لاحول ولاقوة إلا بالله العلي العظيم..
مسحت سالمين دموعهاوقالت..
/يكون في علمك طوبى لعند توا ماتعلمش بيها المكالمة هذي كل اللي تعرفه هو الكلام اللي قلته لمرت المحجوب..
تنهد بألم تنهيده طلعت من وسط قلبه بعدين شاف جنبه لقي الطبيبه ماشيه لحقها طول ووقفها وسالمين شافتله بحزن بعدين ولت لكاريمان وسدرة..
وصلت فيهم وقالت بغضب..
/عمته الشومه طلعت كذابه
سدرة رشفت وهي تقول..
/توقعتها..
ابتسمت كاريمان تهكما ودموعها معبيات عيونها وقالت..
/مازال وين يعرفوا اللي صار فيها ..
سدرة شافت لكاريمان بنظرة ألم ودموعها ينزلوا وسالمين مسحت بإيديها ع وجهها وهي تتنهد بحسرة وتقول..
/حسبنا الله ونعم الوكيل..
🍁🍁
"حني لتوا مستغربين كيف ماعرفتش بوجود الورم حتى بعد صارتلها حالة الاجهاض كيف الدكاترة غادي مابانش عليهم الورم حجمه كبير جدا"
عبد القيوم بألم..
/قدر الله وماشاء فعل
الطبيبة قالت بلوم وشي من الحدة..
/لاهدا اهمال يااستاذ وباين حتى انت مساهم فيه..
هز راسه موافقا لكلام الطبيبة وهو في قمة الشعور بالألم والحسرة..
مسح بيده وجهه بعدين قال..
/باهي مافيش مضاعفات من العمليه؟
قالت:حاليا لا ونفضل انها تقعد هني لمدة عشرة ايام بش نراقبوا حالتها ونشوفوا شن يصير معاها..
هز راسه وقال..
/مشكورة..
هي قالت:ربي يشفيها ويعافيها ويعوضها خير في بنتها..
ومشت وخلاته وهو محطم تماما ومقهور للغايه متأكد ان غيابه عنها هو اللي زاد أزم حالتها ووصلها لهالنتيجه المأساوية..
حرك رجليه وقعد يمشي وهو غارق في مشاعره اللي كلها حزن وألم وتفكيره اللي رفعه للسبب في اللي قاعد يصير مع طوبى تملكاته مشاعر غضب شديد مش بس ع الجالي حتى ع اهله وللأسف مشاعر هالغضب خالطها شعور بالكره...
🍁طلع من المصحة لقي سيارته قاعدة زي ماخلاها والعة وبابها مفتوح..
ركبها وطفاها بعدين فتح الدرج متاعها لقي فلوسه قاعدات فيه خداهم وحطهم في كيسه بعدين نزل منها وسكرها ورجع خش المصحة بش يدفع حساب قعاد طوبى فيها..
بعد ماكمل كل الإجراءات ولى طلع لسيارته..
قعمز فيها شويه..خدي نفس عميق..بعدين طلع هاتفه من جيب جاكيته وحط ع رقم عمه عبد الله واتصل بيه وع وجهه باديه ملامح الغضب..
🍃الغضب اللي كان متملك الصابر..الصابر اللي زاد قوة شعوره بالأبوه اتجاه طوبى..والأب الحقيقي لما يمس صغاره ضر يتألم ع خاطرهم اضعاف ألمهم ولما يكون هالضر بسبب حد من الخلق يتملكه غضب يخليه ينتقم بشراسه..
🍃🍃🍃🍃🍃
"بالله قولي شن قالك الدكتور بلغة نفهمها"
ضحك الطبيب ع كلام الأقجم وقاله..
/حاضر تو نحاول نسبطلك اللي قاله..قال وضعه كويس واللي صارله لاهو جلطه ولانوبه ولاأي عرض ليه علاقه بمرض قلبه..
الاقجم:معناها نفسيا زي ماقالوا الدكاترة قبل..
قاله:اني شرحتله ع الحاله هادي وهو قالي كلام مش علمي لكن يحاولوا يفسروا بيه الحالات اللي من النوع هدا...قال ان غالبا الاستاذ مختار يكون عنده ارتباط روحي قوي بشخص ما هالشخص وين تصير معاها حاجه هو يحس بيها ومدى قوة الاحساس هادي ع حسب الحاجه اللي تصير مع هداكا الشخص مرض حزن وماإلى ذلك..
الاقجم قاله..
/دقيقه دقيقه..قصدك هو يصير فيه هكي ع خاطر حد تاني!؟
الطبيب:حاجه زي هكي..وهالحد هدا لازم يكون الرابط بينه وبينه قوي هلبه..عقد حواجبه وقال..عنده صغار غير ولده المتوفي؟
الاقجم وهو عاقد حواجبه هز راسه بالنفي..
قاله الطبيب وهو يفكر..
/ممكن يكون صديق مقرب او زوجته السابقه او اي حد من عيلته..
الاقجم قعد ساكت وهو يفكر..
الطبيب قال..
/ع العموم هو مش تفسير علمي والعلم مايعترفش بيه لكن دينا تكلم عن الحاجه هادي ووضح ترابط الأرواح ببعضها سوا كان بالحياة اوالموت شن ممكن يدير...تنهد وقال..ع كل حال هو وضعه حاليا كويس ويقدر يروح..
هز الأقجم راسه بإيجاب ومازال يفكر في اللي سمعه من الطبيب..
•••••••••••
"كلام وهمي ماخشليش راس"
امينه:مدام دكاترة اللي قالوله يبقى حقيقي..
حرك راسه بالنفي وع وجهه باديه ملامح عدم الاقتناع..
امينه:الحاجات دي بتحصل بجد يااقجم..زي بين الام وولادها بتحس بيهم حتى وهما في اخر الدنيا..
شافلها وقال..
/هديكا الام مش الاستاذ مختار..مانعرفش ان في حد يعز عليه في الدنيا هادي غير ولده الله يرحمه..
امينه بحزن:انا اعرفه من زمان يااقجم ع قد مايبان قاسي ومافيش في قلبه رحمه جواه حنية بيحاول يخبيها..
ضحك وقال..
/وع من شفتيها الحنية هادي؟
سكتت للحظات وهي تفكر..ارتسمت ع وجهها ابتسامه خفيفه وهي تقول..
/فاكر فترة مرضه بالكورونا؟..فاكر ازاي كان بيحن ع اخته طوبى وبيراعيها كنت ساعات بحسوا كأنه ابوها مش اخوها..
رفع حواجبه وقال..
/لكن هادي بالذات ناقم عليها هلبه وكارهها..
بدت ع وجه امينه ملامح الحزن وهي تتفكر في اليوم اللي جاته فيه بعد وفاة علي كيف كانت مقابلته ليها وشن دارلها..
ردت نظرها للأقجم وقالت..
/طيب ايه رايك تكلم حد في ليبيا تعرف منه اخبارهم ونتأكد من كلام الدكتور..
رفع حواجبه ونزلهم بعدين قال..
/تو نشوف..
رفع هاتفه وتباعد عنها وهي تبع فيه بنظراتها القلقه...
🍃🍃🍃🍃
وفي هالأثناء..
كانوا كاريمان وسالمين وسدرة في حجرة طوبى اللي كانت فايقه وتكلم فيهم..
بتعب ورجاء كانت تقول لسدرة..
/بالله عليك روحي ارجوك..
سدرة ودموعها ينزلوا قالت..
/مانقدرش يابنتي مانقدرش..
انفعلت شويه وهي تقول لسدرة..
/ياسدرة انتي حامل مش باهي..سكتت لما حست بوجع..
كاريمان بوجع وقلق..
/خلاص ياسدرة اسمعي كلامها وعدي روحي..
طوبى حطت يدها ع مكان الجرح وهي تقول..
/نبي امي تقعد معاي بس..
شافتلها كاريمان ودموعها في عيونها..
سالمين حطت يدها ع ذراع سدرة وقالت..
/خلاص حبيبتي نروحوا توا وبكرا نجوها..
سدرة وهي تشوف لطوبى بألم قالت..
/حاضر..اللي يريحك نديره..طبست عليها وباست راسها بعدين قالت..بنتصل بيك ياكاريمان في كل وقت ردي بالك تغفلي عنها وترقدي..
كاريمان ابتسمت بتفهم وهي تقول..
/حاضر..
وطوبى تشوف لكاريمان بنظرة حب..
هالنظرة خلت سدرة تضايق هلبه لفت ومشت طلعت بدون ماتسلم وعيون طوبى اللي كانوا مليانات حزن معاها..
طبست عليها سالمين وباست جبينها ووصت كاريمان عليها حتى هي وطلعت لاحقه سدرة..
🍃🍃🍃🍃
طلعوا الزوز من المصحة..
سالمين مشت لجبريل وطلعت معاه وسدرة ركبت سيارة المهدي وع وجهها باديه ملامح التجهم..
والصابر اللي كان مقعمز في باحة المصحه قعد معاهم بنظره لعند ماطلعوا منها...
*********
سدرة:بنقعد في حوش طوبى..
المهدي قعد ساكت..
هي شافتله وقالت..
/سمعتني!؟
هز راسه بإيجاب وهو يقول..
/سمعت..
غيرت نظرها للطريق وقالت..
/جيب علي وساكوا فيه حوايجه وحوايجي قول لسدرة تحطهم..
بصوت يدوب طالع قال..
/باهي..
🍃ووصلت سدرة للحوش ولما تخشله تتفاجئ بوجود أريج فيه كانت كيف واصله حتى هي..
••••••••••••
"حتى وجهي ماتبيش تشوفله قالتلي حطني في حوشها خالتي بتروح غادي خفت عليها تنفعل وتصيرلها حاجة درت ماتبي وخلاص.."
المهدي وهو يمرر في نظره ع جنان حوشهم قال..
/معليشي خليها ع راحتها فترة وتعدي..
تنهد نضال بضيق وتنهيده المهدي تبعت تنهديه..
ع جية سدرة بالسكاوات"شناطي صغار"
وقفت ع بوها وهي تقول بحزن وقلق..
/مش حتسيبنا خالتي ولا!؟
تعبوا عيون نضال بالدموع وهو يشوفلها..
وبوها اللي كان صدره مغموم خدي منها الشناطي وقال بإبتسامه تخفي وجعه..
/لا بابا لا بتقعد غادي لين تطلع خالتك طوبى..
مدت سدرة الشناطي لبوها..خداهم منها وهي مشت بتولي لشقتهم..
رجع تنهد المهدي بضيق بعدين مشي طلع من الحوش ونضال معاه بنظراته اللي كلها هم..
🍃🍃🍃
وفي حوش طوبى..
سدرة وهي تعلق في عبايتها ع الشماعه قالت..
/ماقلتيش بتجي هني لما كلمتيني بكري..
اريج وهي مقعمزة ع سرير طوبى قالت بضيق..
/خفت لو قتلك تقوليلي اقعدي في حوشك واني مش طايقاته باللي فيه..
شافتلها سدرة شويه بعدين مشت قعمزت جنبها..
تنهدت بألم وقالت..
/مش قادرة نصدق اللي صار مش قادرة نستوعب..خنفتها العبره وسرعان ماانهارت بالبكي واريج بكت معاها..
🍃🍃🍃🍃
"والله ماكان في بالي ولاعمري نفكر فيه لو شن يصير"
نبيله:حتى اني قلتلهم اكيد في عنده قصد تاني..
عبد القيوم شافلها شويه بعدين شاف للمحجوب وقال..
/كنت نصفي في حسابي مع اللي كان السبب في هالحال اللي وصلناله..
المحجوب وهو عاقد حواجبه قال..
/زي ماتوقع عدي..
عقد عبد القيوم حواجبه وبانت في وجهه ملامح الغضب..
المحجوب:قال كان في لقاءات بينك وبين نساباته عيلة الفاندي..
نزل نظره للارض وبدي يهز في رجله اليمين ونبيله مركزة معاه..
قاله المحجوب..
/نقدر نعرف شن درت بالزبط؟
رفع نظره في نبيله وسريعا غيره للمحجوب وهو يقول..
/اللي لازم يندار..
المحجوب:اللي هو؟
قاله:تو تعرفه في وقته لكن اللي لازم تعرفه توا اني مادرت شي فيه ضرر لاليا ولالغيري...
حمحت نبيله وقالت..
/بصراحة محجوب..هو لما جاني طلب مني الحاجات اللي عطتهملي نجاة..
رفع حواجبه بصدمة وهو يشوفلها..
عبد القيوم:حلفتها ماتخبر حد عارفكم لو وصلكم علم باللي ناوي عليه حتصبوا في وجهي..
عقد المحجوب حواجبه وقال..
/في كل الحالات مش حتستفيد شي لأن طوبى توا حتزيد تصر ع طلب الطلاق..
انفعل عبد القيوم وقال وهو مغمض عيونه..
/رجاءا رجاءا..الموضوع هذى مايحكي فيه حد ولايدخل فيه حد..فتح عيونه وقال..خلوه بيني وبينها وبس..
المحجوب رفع حاجبه وقال..
/واهلك!!؟
قاله:لاانتم ولاهما هذى شي بين مراة وراجلها اطلعوا منها..
وناض وهو معصب ومشي طلع من حداهم وعيونه ماتشوف في شي من الغضب لعند مالقي روحه واصل لسيارته ركبها وشغلها وتحرك..
🍃المحجوب بغضب..
/كيف درقي عليا حاجه زي هادي!؟
نبيله بضيق وتوتر..
/الراجل حلفني يامحجوب وحتى اني تعاطفت معاه وشايفه انه معاه حق مدام بياخد بتاره بطريقه قانونيه..
دام النظر ليها للحظات بعدين قال بتحذير..
/اخر مرة يانبيله..اخر مرة ديري حاجه من وراي يانبيله..
نزلت راسها وهي تهز فيه بالموافقه وكانت مضايقة لأبعد حد..
🍁🍁🍁🍁
ووصل عبد القيوم للمصحة..
درس سيارته وخشلها لقي الصابر مقعمز في صالة الانتظار وهو يتكلم بالهاتف..
قدمله والصابر لما شافه جاي ناحيته نهي المكالمه..
وصل فيه عبد القيوم وقعمز جنبه بهدة..
الصابر شافله وقال..
/ليش ماعطيتش علم باللي ناوي عليه..
تنهد عبد القيوم وقعد ملتزم الصمت..
الصابر:تصدق..شكيت في اللي سمعته من هلك لكن مرات كنت نصدق قلت في عقلي اكيد مل وتعب ومعاش عنده طاقه يتحمل بيها اكثر من هك..
شافله عبد القيوم وقال..
/انت بالذات خليها في عقلك طوبى مانيش مسلم فيها الالو سلمت الروح لمولاها..
ابتسم الصابر وقال..
/بينك وبينها شن ماتبي هي حيصير..
وجه عبد القيوم نظره القدام وقال..
/في أي شي الا الحاجه هذي..
ربع الصابر ايديه وهو يشوف لقدام وابتسامة خفيفة مرسومة ع وجهه..
اما ملامح وجه عبد القيوم كانت مزيج بين الحزن والألم والغضب...
🍃🍃🍃🍃
وفي الجناح اللي قاعد فيه مختار..
وين ماكانت امينه مقعمزة تقرا في القرآن جنب الدار اللي راقد فيها مختار..
خش الاقجم وع وجهه باديه ملامح الصدمه كلمها هي شافتله..اشرلها تطلع..سكرت المصحف وحطاته ع الطاوله وناضت طلعتله وهي خايف..
الاقجم بتوتر..
/اخت المعلم الصغيره..
امينه بخوف قالت..
/مالها؟
قاللها بأسف وشي من الاحراج..
/دارت عمليه استئصال رحم اليوم ..
خبطت بيدها ع صدرها وهي تقول بصدمه..
/ايه!؟
الأقجم بأسف..
/هدا اللي وصلني توا ياامينه..
نزلوا الدموع من عيون امينه اللي كانت نظراتها كلها صدمة..
هو قال..
/لاحول ولاقوة الا بالله..ومشي وخلاها..
وهي بعد مامشي ولت خشت للجناح وقعمزت بصعوبه وقعدت تبكي..
🥀وفي هالوقت..
كانت طوبى مغمضه عيونها وهي تسمع في كلام رفيقها الاعلى بصوت امها كاريمان...
طلبت طوبى منها تقرالها سورة طه اكثر سورة تغوص في آياتها وتدبر فيهم كلمة كلمة..
🍁وبرا حجرتها تحديدا الباحه متاع المصحة كانوا الصابر وعبد القيوم مقعمزين في السيارة يسمعوا في القرآن ..
الصابر كان واخده النوم اللي جافى عبد القيوم من بعد ماجفاته حبيبة قلبه وروحه..
مش قادر يتحمل يكون بعيد عنها في وضعها هدا مش قادر يتحمل بعدها اكثر من هكي..
بهدوء نزل من السيارة ومشي خش المصحة..
🍃🍃🍃
وصل في القسم اللي فيه طوبى سمحوله يخش بعد ماخبرهم انه زوجها..
ولما جي عند باب حجرتها قبل ليدق عليه انفتح وطلعت ممرضة.. سألها:واعيه؟
قالتله:تقربلها؟
قال:راجلها..
قالت:لاراقده لكن امها مازال فايقه..
هز راسه وقال:شكرا..
الممرضه ردت عليه وهي تقول..
/العفو..ومشت في طريقها..
اما هو خش وهو يحمحم..
كاريمان استغربت..ساوت حجابها وناضت ومشت للباب شافاته..هو اشرلها تطلع..
طلعت وهي تقول..
/كنك؟
نزل عيونه وقال..
/خليني معاها وانتي انزلي لعمي الصابر تلقيه في سيارتي قوليله يروح بيك لحوش طوبى..
قالتله:لالامانقدر
ش نخليها هي تبيني نقعد معاها..
غير نظره للجهة التانيه وهو يقول برجاء..
/ارجوك ديري كيف ماقتلك ارجوك..
شافتله شويه بعدين قالت..
/حاضر..لكن مش مروحين بنتموا في السيارة شن ماصار رن ع الصابر نسألك بالله ماتزيد تعبها..
نزل راسه وهو يهز فيه بالموافقه..
وكاريمان بعد ماشافتله بحزن مشت وخلاته وهو بلهفه مشي بسرعة خش للحجرة سكر الباب بهدوء..
وقدم بسرعه لعند مابانت عليه..وقلبه انفطر من الألم ع الحاله اللي شافها بيها..
قربلها قعمز ع رووس اصابعه وقعد يتأمل في وجهها بعيونه المليانه دموع وألم وحزن وشوق كبير وهو يقول بصوت هامس..
/ياعمري..ياروحي..ياقلبي..
دموع عيونه حبستهم المحاجر لكن دموع قلبه كانت تنزف بإستمرار..قلبه اللي قاعد يرجف في قربها يبيه يضمها بش يرتاح ويريحها لكن للاسف ماقدرش يلبي طلب قلبه خوف تفيق وتجبره يطلع ويخليها..
وقف ع حيله والتفت للكرسي خداه بهدوء وحطه قريب عليها وقعمز وخلا عيونه الحزينه المشتاقه تتأمل فيها وألم قلبه كل ماله يزيد ع حالها ..
🍃وكاريمان وصلت في سيارة عبد القيوم خشتلها وسكرتها كويس ورقت المرش من الجيهتين بعدين اتكت ع الكرسي وهي تتأمل بنظرها في الصابر..
ويخطروا عليها ايام بعيده عاشت فيها ألم يشبه الألم اللي عايشاته طوبى إلى حد ما ولولا الله ثم الصابر ماكانتش تخطاته...
🍃🍃🍃🍃
وتعدي الساعات ويتبدد ظلام الليل ويطلع فجر يوم جديد..
والآذان يصدح فيه مناديا للصلاة..
فتحت طوبى عيونها وهي تسمع فيه..تسمع فيه وتشم معاه في نفس الريحة الحلوة بس هاالمرة رافقت هالريحة نسمة ماحستش بألطف واحلى منها..
ابتسمت ابتسامه خفيفه وهي ترد ورا الآذان لعند ماتم قالت الأذكار اللي بعده بعدين التفتت لكرسي كاريمان بش تنوضها لقاته فاضي توقعتها تكون في الحمام..غيرت نظرها عن الكرسي للجهة التانيه وتشوف مايرسم ملامح الصدمة ع وجهها وخلا قلبها يدق بسرعه وبقوة..
شافاته راقد بالنوم ع الكرسي..تبدلت ملامح وجهها من الصدمة للوجع وهي تشوفله كيف راقد وجعها قلبه عليه..
ومش بس طريقة نومته اللي وجعت قلبها..حتى شكله..ضاعف وباين عليه التعب والارهاق حتى لونه الاسمر يبان شاحب..
نزلوا دموعها بعدين بلعت ريقها وقالت..
/عبد القيوم..عبد القيوم..
ويفيق وهو يسمع في صوتها ينادي فيه قعد يفتح في عيونه ويسكر فيهم بعدين وجه نظره ليها قعد يشوف لعيونها وبس
مازال مش واعي تماما لكن عيونه كانوا مشتاقات لشوفة عيونها اللي طيحوه في شباك عشقها..
حتى هي كانت مشتاقه لنظرات عيونه المليانه حب وحن هالعيون اللي كانت ديما تشوف في روحها فيهم..
واستمر لقاء العيون للحظات لعند مادق الباب..
استاقظوا وهو مسح عيونه وقال..
/خش.
انفتح الباب وخشت كاريمان شافت لطوبى وقالت.
/وعيتي ياعمري..
طوبى وهي تشوفلها بعيون مدمعه قالت..
/وين مشيتي وخلتيني..
وصلت فيه كاريمان شدت يدها وهي تشوف لعبد القيوم اللي كان يشوف لطوبى بحزن..
طوبى وهي تشوف لكاريمان قالت..
/مانبي حد غيرك هني..
غمض عيونه وتنهد..بعدين فتحهم..وقف وقربلها نزل ع راسها وباسه وطول..بعدين خدي يدها وطبع عليها قبلتين من داخل ومن برا..
وهي تشوف لكاريمان ودموعها تنزل..
رفع عيونه في كاريمان وقال...
/عمي الصابر عدى للجامع؟
هزت راسها بإيجاب..
هو شاف لطوبى ثواني بعدين مشي طلع من الحجره وسكر الباب..
وبعد ماسكر الباب بدت طوبى تبكي وجرح العمليه يوجع فيها وكاريمان قعدت تمسحلها في دموعها وتهدي فيها..
🍃🍃🍃🍃
وتقعد كاريمان مع طوبى اللي كانت تحت رعايه طبيه مخلية باب حجرتها كل كم ساعه يدخل في الممرضات ومعاهم الطبيبة المسؤوله عن حالتها..
لكن في شي اثار استغراب كاريمان..رد فعل طوبى ع اللي صار فيها تتفكر في روحها لما عرفت انها فقدت القدرة ع الانجاب خشت في حالة كآبة وطوبى توا خسرت رحمها كله بس تبان نوعاما مرتاحه وصابرة..
والاعجب..انها وين استقبلت زوارها وقت الزيارة قعدت تصبر فيهم مع ان مفروض اللي يصير العكس..
⚘"ارادة ربي ومادام ربي يبي هكي معناها خير نحمده ونشكره عليه..اهو ع الاقل ارتحت من هم كل شهر اللي كنت نشوف فيه عذاب مش خافي عليكم"
قالت هالكلام لسدرة واريج وعمتها مطيره اللي كانت تبكي وفايزة اللي كل ماتمسح دموعها ينزلوا بروحهم وهاديه مرت عمها..
مررت نظرها عليهم وهي تقول..
/والله ماني حاسه غير بالرضا وربي شاهد وبعدين الحمد لله عندي جنة اللي تستاهل نعطيها عمري كله بروحها بروحها بنيتي
سدرة رشفت وهي تقول..
/ربي مايحرمكم من بعض..
ابتسمت وقالت..
/آمين..المهم زي ماوصيتكم لاغرفه ولااميمه ولا ولافردوس ولا آلاء نبيهم يعرفوا شي بالذات اميمه المراة ع وشك ولاده ماتفجعوهاش...
مطيره رشفت وهي تقول..
/كان عرفوا بعدين يحرجوا يابنتي..
طوبى:خل يحرجوا المهم توا مانبي نفجع حد ولانعطل حياة حد بالله عليكم..
سدرة هزت راسها بالموافقه وقالت..
/حاضر ياماما حاضر اللي تبيه يصير..
🍃🍃🍃
روحت فايزة من الزيارة وهي متألمة ع الآخر قعدت تحكي لبناتها ع حال طوبى وصبرها ورضاها العجيبين..
والكلام اللي قالاته كان تأثيره قوي هلبه عليهم بالذات مروة..مروة المقربه من طوبى وبالنسبه ليها قدوة وصديقة واخت كبيرة..
وهي تبكي كتبت منشور يعبر عن اللي تحس بيه..
"حتى الاوجاع انيقة لاتختار الا القلوب الطيبه"
وهالمنشور شافه خطيبها وشغل قلبه عليها وخلاه يخشلها ع الخاص..
(مروة)
شافت رساله وهي تبكي بعدين ردت عليه..
(نعم؟)
بعتلها..
(صاير شي)
ردت عليه..
(ايه لكن مش لينا حني لحد عزيز ع قلبي هلبه)
بعتلها..
(نقدر نعرف مني)
بعتتله..
(تتفكر المراة اللي مرة راجلها خطف منها بنتها)
بعتلها..
(ايه ايه..جارتكم خيرها)
قعدت تشوف في رسالته للحظات بعدين قالت..
(مسكينه ديما من هم لهم ماارتاحتش في حياتها بكل)
رد عليها..
(هلبه ناس زيها)
ردت عليه..
(مانحسش ان في حد عانى اللي عاناته هي حتى امي)
رد عليها..
(ربي يكون في عونها ويفرج عليها)
بعتتله..
(يارب..لكن تصدق تمنيت ربي يعطيني ربع ايمانها ع قد مايصير فيها ديما راضيه تخليك مرات تكذب اللي يصير معاها)
بعتلها..
(يابختهم اللي زيها)
ردت عليه..
(ايه والله يابختهم)
معاش بعتوا لبعض شي بعد هالرساله للحظات بعدين مروة بعتت..
(تصبح ع خير)
هو رد عليها..
(وانتي من اهلي)
ضحكت من بين دموعها..
شويه بعتلها..
(عارفها قديمه لكن قلبي قالي لازم تزرقلها كليمة حلوة)
ضحكت تاني وهي تمسح في دموعها بعدين سكرت النت وخشت ع الاستديو حطت ع الصورة متاعه وقعدت تتأمل فيها...
🍀🍀🍀🍀
وتعدي الايام..
وطوبى في المصحة وقعدت كاريمان مرافقتها..
الى جانب المراقبه الطبيه كانوا يساعدوا فيها ترجع لنشاطها شويه شويه..
واول خطوة كانت المشي..يطلعوا فيها يوميا لفترة محددة تتمشى في ممر القسم..
كانت مغطيه تماما مش باين منها شي وفوق هكي كان عبد القيوم يراقب من بعيد ومش قادر يقرب منها تنفيدا لطلبها هي بس بالنسبه ليه الوضع هدا مؤقت لعند ماتستعيد عافيتها تماما..
🍃خلال هالفترة..
كانت سلافه تجيها زيارة يوم بعد يوم مرة وحده بس جابت معاها امها واختها..وطوبى كانت تراجي في زيارتها مراجاة لأن سلافه الوحيده من بين كل اللي يزوروا فيها ماتحسسش فيها بالشفقه والحزن ع حالها..
زي ماشافت من صاحبتها عبير وابله زينب واختها ايمان ونساوين عيلة الفاندي اللي قعدوا يبكوا ع خاطرها بكي..
هي كانت مقدرة مشاعرهم اتجاهها لكن هالمشاعر كانت تسببلها في ألم ماتقويش فيها..
⚘⚘⚘
"خناقة للسما انا وياه كرمال هالوشاح"
طوبى وهي تضحك وحاطه يدها ع جرح..
/يابنتي مية مرة نقولك معاش نعانديه رجالتنا حني كان تعانديهم يولوا زي هداكا الحيوان اللي مانقدرش نقول اسمه..
صدحت الحجره بأصوات ضحك كاريمان وسلافه وطوبى شادة جرحها وهي تضحك وتتوجع..
سلافه بضحكه:يبعتلك الهنا..بس ليش انت مفكرة ان رجال هالبلد بس هيك نوعيتهن كل الرجال بالدنيا من نفس الصنف..
كاريمان:صدقتي..
طوبى:درجات درجات..والنوعيه اللي عندنا حني درجة اولى..
كاريمان بضحكه..
/حتى هي صدقت في هدي..
ضحكوا بعدين طوبى قالت..
/حجزتوا في الصاله؟
سلافه:ذكرتيني..قامت هاتفها وهي تقول..امبارح بس..مدتلها الهاتف وهي تقول..صورتها فيديو..
خدت طوبى الهاتف وقالت..
/اقربي امي..
قربت منها كاريمان وقعدوا يتفرجوا..
كاريمان:سمحة وديكورها راقي..
طوبى:ايه ديكورها حلو هلبه..وشن درتي تاني؟
سلافه:ولاشي..
طوبى:والمزين؟
سلافه:لهلأ مااستقريت ع وحده..
طوبى شافتلها وقالت بأبتسامه..
/شن رايك نطلعك اني؟
ابتسمت كاريمان وسلافه قالت بضحكه..
/وهو المطلوب..
ضحكت طوبى ضحكه خفيفه وكاريمان تشوفلها بإبتسامة..
🍃🍃🍃🍃
"حسيتها بالقصد دارتها تبي تعزز ثقة طوبى بنفسها وتقوي عزمها"
سدرة سرحت بتفكيرها وهي تقول..
/سبحانك ياربي..لو من يجيني قبل عام ويقولي سلافه وطوبى بيولوا صاحبات هكي مانصدقه..
اريج:قبل الصاحبات يفرقهم راجل اما هما ولوا صاحبات بسبب راجل..
ضحكوا..
بعدين قالت صفيه..
/غدوة تطلع الصبح ولا العشيه؟
سدرة:مع الساعه 12..
صفيه:كان تروح علينا خيرلها..
سدرة:سكرت راسها ع المرواح لحوشها..
هزت صفيه راسها بصمت وحداها سالمين تتبادل في نظرات ليها مغزى بينها وبين كاريمان..
🍃ومن حجرة طوبى للباحه اللي كانت مقعمزة فيها مع الصابر..
كان عبد القيوم مقعمز في سيارته يراقب فيهم وقلبه والعه فيه النار ماكانش حاس بالغيرة منه هو بس كان يغار من كل حد قادر يحظى بقربها والكلام معاها وهو اللي مفروض يكون اقرب الناس ليها محروم حتى من شوفتها..
🌾الصابر:كانت فاجعة كبيره حلت علينا خلتنا عايشين في حالة حزن فترة طويله لعند مافي يوم ربك من عنده نزل عليا قوة خلتني نطلع من هالحاله لكن امك تمت فيها وعشانها هي زدت قويت نفسي وربك ساعدني بيش طلعتها منها..
طوبى:هدا علاش سافرتوا برا وقعدتوا السنين؟
هز راسه بإيجاب..
طوبى:نسألك سؤال وتجاوبني عليه بصراحه..
ابتسم وقال..
/اسألي..
طوبى:اهلك مايحبوش امي كاريمان؟
ابتسم بأسف وقال..
/مش كلهم..
طوبى:حاولوا فيك بش تخليها؟
هز راسه بإيجاب..
طوبى:باهي انت شن درت بش حافظت عليها؟
تنهد وقالت..
/تمسكت بيها..بعت الدنيا كلها وشريتها هي..
قالتله:باهي ماحاولتش تصلح الوضع بيناتهم بش ماتنحرمش من اهلك؟
الصابر:حاولت واجد وحتى هي حاولت ولما شفتها قاعدة تتعذب وتنقهر قطعت علاقتي بيهم مرة وحده مع ان ماكانش راضيها نهائي وقالتلي معليش مستعده نتحملهم عمري كله لكن انا مارضيتهاش لاليها ولالنفسي..
طوبى:باهي هي مافكرتش تخليك؟
رفع حاجبه وقال..
/مال انا بنخليها تسيبني!؟بعدها...
ضحكت طوبى وهي شاده جرحها وهو شافلها بإبتسامه بعدين قال..
/حتى عبد القيوم مش ناوي يخليك مهما ديري..
غصت بضحكتها وسكتت..
الصابر:بنتي اسمعيني..في حاجات التضحية بيها يكون اكبر خطأ ديريه في حياتك..الانسان اللي يحبك بصدق بدون مقابل او شروط راهو هذى نعمه من ربك انتي قاعده تفرطي فيها..
نزلوا دموعها اللي كان مدرقهم الخمار وهي تقول..
/مانعرفش نكون انانيه..مانقدرش..
الصابر:انتي يابنتي ماجبرتيه ع شي بيش تكوني انانيه هو اللي مازال متمسك بيك وتوا اكثر من قبل وعشانك ياما دار المهم تبقي معاه وبس..
سكتت طوبى وهي تذرف في الدموع بصمت وألم..
والصابر حس بيها حاوطلها وباس راسها بعدين قال..
/تعدي معانا لبنغازي؟
رفعت عيونها فيه وقالت..
/ياريت..
ابتسم وقال..
/جنة تقدر تسافر؟
هزت راسها بإيجاب وهي تقول..
/ايه..
قاللها:خلاص اليومين الجايات ان شاء الله نحجزلكم..
ابتسمت وهي تقول..
/نبي نركب فوق..
نوضها وناض معاها وخداها معاه وتوجهوا لباب المصحة ونظرات عبد القيوم المقهورة والغيرانه لاحقتهم...
🍃🍃🍃🍃
وتطلع طوبى تاني يوم من المصحة لحوشها اللي كان زاحم بأحبابها..
اول ماخشت لاقت بنتها اللي لما شافت امها فرحت فرح شديد ومشتلها تجري ضمت رجليها..
نست جنة اللي صار هديكا الليله من حبها الشديد لأمها لكن باقي الصغار ماقدروش ينسوا كانوا يشوفوا لطوبى بخوف وهما مدرقين ورا هاديه اللي كانوا شادين في فستانها..
🥀وقعدت جنة باقي اليوم في حضن امها مافارقتهاش حتى وهي تصلي..
لكن طوبى لما خشت للدار للصلاة لاحظت شي اثار استغرابها شناطي محطوطات جنب سرير غرفه فكرت للحظات وسرعان ماعرفت لمن يكونوا..
••••••••••
"ليهم عشرة ايام هني"
طوبى بصدمه:عشرة ايام!!؟
هاديه هزت راسها بإيجاب..
عقدت طوبى حواجبها وهي تفكر بعدين قالت..
/بالله ناديهملي..
هاديه:باهي..وفتحت باب الدار وطلعت..
غيرت طوبى نظرها ع الباب وشافت لجنة اللي كان حاطه راسها ع رجل امها لقتها راقده تعبوا عيونها دموع وهي تبتسم وقعدت تمسح ع شعرها..
"طوبى"
غيرت نظرها لسدرة واريج وهما خاشات عليها تنهدت بعدين قالت..
/اريج سكري الباب ترا..
سكرت اريج الباب وسدرة تقول..
/خيرك؟
طوبى:انتم اللي خيركم! معقوله مسيبين حياشكم عشرة ايام!!
شافوا لبعض بضيق بعدين شافولها..
طوبى:علاش ولمن قاعدين هني!؟
غيرت سدرة نظرها للشباك وهي رافعه حاجبها..
اما اريج نزلت عيونها هي مضايقه..
هزت طوبى راسها وهي تشوفلهم بعدين قالت..
/الليله تروحوا..
وجهوا انظارهم ليها..
طوبى:ايه تروحوا مانبيش وحده تقعدلي هني..
سدرة:تلزي فينا!؟
طوبى بضيق:ياسدرة ربي يهديك ماعنديش حيل للنقاش..ماتعاودوش نفس سيناريو بالله عليكم..
نزلوا دموع سدرة وهي تقول..
/اللي صار فيك شويه يابنتي يش نتخطوه وكأن ماصار!؟
طوبى:لاتخربوا حياشكم وتقعمزوا خير!..
سكتوا الزوز وهما في قمة الضيق..
طوبى:المهدي ونضال هما الزوز بالذات اني مسامحتهم ومافيش في قلبي عليهم شي بكل ولو نعرف انهم مايصلحوش بيكم ماسعيتش بش ياخدوكم وراهو نقولهالكم لو كنت مكانكم مستحيل نفرط فيهم ع خاطر اي حد..
ابتسمت اريج بتهكم وسدرة هزت راسها وهي مبتسمه نفس الابتسامه..
غمضت طوبى عيونها بعدين فتحتهم وقالت..
/كان تبوا راحتي حق روحوا الليله لحياشكم وطيبوا خواطرهم وحافظوا عليهم نسيتوا ولاتبوني نفكركم!؟مش بالساهل وصلتوا في بعض..
مسحت سدرة دموعها وقالت..
/باهي تو نروح الليله..
طوبى؛اريج..
هزت اريج راسها بالموافقه بدون ماتتكلم..
طوبى بعصبيه مصطنعه..
/ايوه وردوا بالكم تعاودوها ماعنديش بنات يباتوا برا حياشهم بالعشرة ايام..
ضحكوا غصب عنهم..
وهي ابتسمت بعدين قالت..
/بالله نادولي ع امي..
تنهدت سدرة ولفت ومشت طلعت وهي مضايقه واريج لحقتها وهي تنادي في كاريمان..
لحظات وخشت عليها وهي تقول..
/بيبا..
طوبى بإبتسامه..
/بالله امي ارفعي جنه حطيها ع السرير هداكا..
كاريمان وهي مبتسمة قالت..
/نجها ليا..
وقدمتلها ورفعتها وهي تسمي بالله بعدين مشت حطتها ع سرير غرفه وطوبى تشوفلها بإبتسامة حب..
🍃🍃🍃🍃
ويليل الليل ويروحوا سدرة واريج لحياشهم لكنهم قعدوا متمسكين بموقفهم والمهدي ونضال عاطينهم العذر وخلوهم ع راحتهم...
🍀🍀🍀🍀
ويعدوا يومين..
ترددوا فيهم الجيران و الأصحاب ع حوش طوبى بش يواسوها في مصابها لكن طوبى فاجئتهم بإبتسامة الرضا المرسومه ع وجهها وبكلامها اللي فيه تسليم تام لإرادة الله سبحانه وتعالى..
اغلبهم تأثروا جدا بقوة إيمانها اللي بدت عليهم حتى من ملامح وجهها واكثر من تأثر بيها..
🍃"تعرفي ياعواطف واني نسمع فيها شن تقول خطر عليا اللي صارلي لما هديكا الدكتورة قالتلي عندك ورم ولازم تحولي الرحم تتفكري شن صار فينا وقتها!؟"
عواطف بحزن:والله حتى اني خطر عليا نفس الشي اني بروحي صارت فيا حالة...
نجاح ودموعها ينزلوا..
/حني كبار ماتحملناها كيف هي تقبلت وصبرت وراضيه!..
عواطف:زعمه يطلقها التارقي؟
نجاح:لاان شاء الله لا،ان شاء الله يقعد ولد أصل ومايزيدهاش كسر فوق كسرها..
🍃🍃🍃🍃
"لبنغازي!؟"
الصابر:ايه تبي تقعد فيها لنص 12..
مرر عبد القيوم نظره ع الطريق بعدين رده للصابر وقال..
/كان هي اللي تبي خلاص..
ابتسم الصابر وقال..
/كان تبي تلحقنا الحق..
رفع حاجبه وقال..
/من غير كلام..
ضحك الصابر وعبد القيوم غير نظره عنه لحوش ام العيون الحايرة اللي قاعده تغرق فيه في عشقها اكثر واكثر..
🍃وفي من قاعد يغرق في ظلام سواد قلبه المريض يغرق بكامل ارادته وبإصرار منه..
.."وهدا هاتفك يامعلم"
خدي مختار هاتفه المحمول اللي ليه شهور مفارقه وهو يقول..
/خلاص اكتفينا منها النقاهه هادي..رفع حواجبه وقال..احجزلي في اقرب رحلة لتونس..
الاقجم:ناوي ليبيا؟
هز مختار راسه ايجابا..
عقد الاقجم حواجبه وهو يفكر يقوله الخبر اللي درقه عليه لأكثر من عشرة ايام ولايخليه يعرف بروحه..ضيق عيونه لما سمعه يقول..
/بنكمل اللي وقفت في نصه..
الاقجم:امم..باهي اني عندي خبر ليا فترة داسه عليك..
شافله مختار بنظرة مخيفه وهو عاقد حواجبه..
الاقجم بشي من الارتباك قال..
/مادسيته عليك الا من خوفي ع صحتك بس..
قاله:قول اللي عندك..
تنهد وقال..
/ابله طوبى..صارتلها مشكله صحيه خلتها تستأصل الرحم..
بدت ترتسم ع وجه مختار ملامح المفاجأة وهالملامح كانت مخالطتها ابتسامه..عقد حواجبه وقال..
/عاود عاود..
الاقجم وهو يشوفله بإستغراب عاود يقول..
/صارتلها مشكلة صحيه خلتها تحول الرحم..
ضحك ضحكه واشر بسبابته ع الاقجم وقال..
/ليك مني هديه ع البشارة هادي هديه يااقجم لاقبلها ولابعدها..
بدت ع وجه الاقجم ملامح الصدمة وهو يشوفله..
نزل مختار يده ورفع عيونه للسمي وهو يقول..
/واخيرا درت معاي حاجه فيها شويه عدل..
والاقجم يمرر في نظره بين مختار والسماء وهو مصدوم لأبعد حد...
••••••••••••••
"وتقولي حنين وبيخبي حنيته لا ويتعامل مع ابله طوبى زي بوها!؟"
امينه ودموعها في عيونها قالت بأسف شديد..
/لاحول ولاقوة الا بالله..
الاقجم وهو مبتسم تهكما قال.
/قتلك من البدايه دوة هداكا الدكتور وهم وفيلم هندي ماتخشش الدماغ اللي زي المعلم مايحب حد حتى نفسه..
🍃🍃🍃🍃
ومن هديكا البلاد لمطار معتيقه..
اللي كانوا ضمن الناس اللي فيه..
طوبى والصابر وجبريل وسالمين وكاريمان اللي كانت رافعه جنة في حضنها..
يودعوا في سدرة والمحجوب اللي حملوا عرب الشرق توصيات ع طوبى خلتها تبكي بصمت تحت نقابها..
بعد ماسلموا عليهم مشوا مع بعض لباب المغادرين..
وسدرة والمحجوب يلحقوا في طوبى بنظراتهم اللي كلها حزن وخوف..
🍃🍃
ركبوا الطيارة وقعمزوا في مقاعدهم وكاريمان وجنة جو جنب طوبى..
كاريمان وهي تكلم في جنة قالت..
/شن ياسمحه بتعدي معانا لبنغازي!؟ بتحقي بنغازي اللي انولدت فيها ماما؟
طوبى وهي تسمع فيها كانت تضحك بعدين غيرت نظرها للخلف بش تشوف الصابر ويجوا عيونها ع شخص خلا قلبها يطير من مكانه..
هو لما زبط انها شافاته ابتسملها وغمزلها..
ردت نظرها القدام وقلبها يدق بقوة..وهو قعد بنظره عليها وابتسامته اللي كلها حب ع وجهه..
🍃🍃🍃🍃
طلع من الحمام بعد مادار دوش وهو لابس الديشمبر..
توجه لدار النوم واول ماخشلها حس بدوخه لكن تماسك وكمل طريقه لين وصل للسرير وين مافي حوايجه..
حول الديشمبر وبدي يلبس لعند ماوصل في القميص شاف المرايه وقدملها..لما حي بيلبس القميص شاف شي اثار استغرابه..
كدمتين كبار وحده في ذراعه والتانيه في صدره شافلهم شويه بعدين قال بإستياء..
/من الهم والغم والضغط النفسي..
لبس قميصه ولما جي بيبطم اول زر انتفض بفجعه بعد ماسمع صوت دق قوي ع باب الشقه..
وهو مفجوع مشي بإتجاه الباب وصل فيه وشاف من العين السحريه ويبانوا زوز لابسين زي الشرطه اللي يخص البلاد اللي هو قاعد فيها..
رجعوا دقوا الباب بقوة وهو من الخوف ع طول فتحه..
ويدفوه عليه ويخشوا عناصر يأمرهم القائد متاعهم يفتشوا الشقه والجالي يسأل فيهم بلغتهم عن سبب وجودهم القائد استفسر منه عن اسمه والجالي اكدهوله ورجع سأله عن سبب وجودهم وشن يديروا؟!
ويجيه جواب سؤاله مع احد العناصر وهو شاد في يده اكياس متوسطة الحجم معبيه بمخدر الكوكايين..
اول ماجو عيون الجالي عليهم من قوة الخوف والصدمه فقد الوعي...
#امتحان
#طوبى
...يتبع...
