■■■■■■■■■■■■■■■■■■■■
قد يحمل هذا الجزء ومايليه احداث مؤلمة وقاسيه ولكنها تخفي بين طياتها مغزى عميق لايصل اليه سوى أصحاب القلوب الحية وأولوا الألباب فهنيئا سلفا لكل من يقرأ بعمق ليصل للعبرة🌸
/////////////////////////////////////////////////////////////
#طوبى "جنة طوبى"
#جمان_فريد
#الجزء_127"إمتحان/في الضراء"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#التقوى
(وَالصَّابِرِينَ فِي الْبَأْسَاءِ وَالضَّرَّاءِ وَحِينَ الْبَأْسِ ۗ أُولَٰئِكَ الَّذِينَ صَدَقُوا ۖ وَأُولَٰئِكَ هُمُ الْمُتَّقُون.)🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃{فاصبر إن وعد الله حق واستغفر لذنبك وسبح بحمد ربك بالعشي والإبكار}🍃
________________________________________
فجر يوم الخميس..
مقعمزة في مصلاها وهي شاده المصحف وتقرا في سورة" طه"
اكثر سورة كانت تزود فيها بالطاقة الإيمانيه وتقوي في قلبها..
بدايتها تفكر فيها بالله..بصفاته الجليله..بعظمته..بعلوه..كانت وين تقرا الآيات الأولى تتخيل في نفسها مكان سيدنا موسى والله يخاطب فيها هي..
الحوار اللي دار بين الله وسيدنا موسى كل ماتقراه كل ماتفهم ان الانسان المؤمن واللي قلبه متعلق بربه مفروض ديما يقعد عنده يقين قوي بيه..يقين انه حيساعده وينصره ومش حيتخلى عنه وان مهما بان قدامه عدوه قوي هو بالله مافيش اقوى منه..
وين وصلت في الايات اللي تحكي عن الحاجات اللي سأل موسى يعطيهاله لأول مرة تلاحظ الطريقه اللي سأل بيها النبي موسى الله سبحانه وتعالى..
ياربي نبي ونبي ونبي "أريد"..وقعد يشرحله في اسباب بعض طلباته كان يسأل في الله بدون تكلف يسأل فيه وهو عارف ان طلباته هينه جدا ع الله وعنده ثقة كبيره انه حيستجيبله..
والله بشن رد عليه"قد اوتيت سؤلك" سأله مايقارب سبعه حاجات كلهم عند الله مجرد سؤل بسيط..
🍃وللأسف في من يعرض عن الدعاء بحاجات يتمناهل يتمناها ظنا منه ان الله مش حيستجيب او انها مستحيله ع الله والعياذ بالله وهذا كله من ضعف الإيمان او انعدامه🍃
..نزلوا دموعها لما قرت الآيات اللي بعدها اللي فكر بيها الله سيدنا موسى بنعمه عليه وكأنه يقوله كنت معاك من اول لحظه ليك في الدنيا وكيف ماكنت معاك قبل حنكون معاك توا..
وقفت شويه وهي تبكي لما خطر عليها كل شي انعم بيه الله عليها وكيف كان معاها في اصعب ظروفها وحتى احسنهم وكيف سخرلها قلوب حبتها حب كبير ودعمتها ووقفت معاها..
🍃شوق خير محاوطها بيه ربها رغم كل المحن اللي مرت بيهم وكلنا غارقين في نعم الله ومعيته لكن للأسف مرة تانيه البصيرة العمياء مش حتشوف من هدا كله شي 🍃
هدت بكي ومسحت دموعها بعدين كملت التلاوة اللي وصلت فيها لنهاية الحوار اللي عطي فيه الله سيدنا موسى امر حيساعده هلبه في مواجهة عدوه..
"الذكر"
{أذهب انت واخوك بآياتي ولاتنيا في ذكري}
وقفت قرايه عند الآيه هادي وقعدت تتأمل فيها هلبه وهي تتفكر كيف ساعدها الذكر ع مواجهة هلبه مواقف صعبه للغايه ومنها ماكان خطير..
وقفت تأمل وقالت دعاء الفراغ من قراءة القرآن بعدين سكرت المصحف وناضت حطاته في مكانه ومشت طلعت بإتجاه دار النوم..
خشتلها ومشت لدرج الكامدينو فتحاته وطلعت منه المذكرة..
فتحتها من الخلف وطلعت بيرو "قلم حبر" وبدت تكتب..
تاج الذكر...الصلاة على النبي..التسبيح...
خدت نفس وقعدت تقرا..
"كي نسبحك كثيرا ونذكرك كثيرا انك كنت بنا بصيرا"
مجرد ماكملت قراية الآيه حست بشعور من جماله لايوصف شرحلها صدرها وحسسها كأن في ثلج قاعد ينزل ع قلبها اللي كانت تاكل فيه نار القلق.
تلقائيا لقت روحها تكتب..."نحبك ياربي..نحبك هلبه"
ابتسمت ودموعها عبوا عيونها بعدين سكرت المذكرة ودستهم هي وقلم الحبر في الدرج وسكراته..
ناضت وحولت الملايه وشافت روحها شن لابسه بعدين التفتت ع الدولاب متاعها ومشتله طول..
🍁🍁🍁🍁
وهو كان مروح من الجامع ع رجليه وعقله مابطلش تفكير في كل اللي صار وقاعد يصير وحيصير مستقبلا..
وفي عز تفكيره اخترقت ريحة الخبزة انفه،شاف للكوشه اللي طالعه منها الريحه مشالها طول..
خشلها..وخدي منها خبزة وبريوش ولاحظ عندهم حاجه جديده بدوا يبيعوا فيها..الكعك التركي "السميت" وخدي منه حتى هو..
🍁🍁🍁
واقف ع باب الشقه وهو يفكر شن بيدير لو لقاها تبكي كيف يهديها ويطمن قلبها ويقلب بكاها لضحك!
هالمرة حاس نفسه عاجز ع أنه يدير هالشي..من داخله كان جدا قلق وخايف وهالمشاعر كانت مسيطرة عليه..
خدي نفس وقال همسا..
/يارب هونها من عندك..
فتح باب الشقه وخش وتقابله ريحة القهوة ابتسم ابتسامه خفيفه بعدين سكر الباب..
حول من رجليه ومشي خش داخل لما وصل في اخر الممر سمع صوتها وهي تغني..
"شايف البحر شو كبير"
رفعه قلبه وهو يتبع في الصوت لين وصل في باب الكوجينه
وقف عليه متسمر في مكانه وهو يتأمل فيها بإنبهار ودهشة..
كانت واقفه قدام الطاوله وهي لابسه فستان صيفي ابيض في الوردي كان شكله جدا جميل..رافعه شعرها ذيل حصان ومزينه وجهها بزينه خفيفه وكعادتها مركزة ع ابراز جمال عيونها المميز..وكملت طلتها بتعليقة ذهب ناعمة اكثر حاجة جابهالها تحب تلبسها مع خاتم الزمرد..هدا كله خلا منظرها يبان غايه في الرقة واللطافه والجمال..
هي كانت لاهيه بتغليف صحن عجينة الفطاير اللي دارتها وبنظرة عابرة شافت للباب لقاته واقف عليه وهو مسهم فيها..
ضحكت وكملت غني..بعدين مسحت ايديها وقدمتله وهي مازال تغني..
خدت منه الكياس وحطتهم ع الطاوله بعدين قربت منه حطت ايديها ع خدوده وعيونها في عيونه وهي تغني..
"نطرتك انا..ندهتك انا..رسمتك ع المشاوير
ياهم العمر ويادمع الزهر..ويامواسم العصافير
ماأوسع الغابة..وسع الغابة قلبي..يامصور ع بابي..
ومصور بقلبي"
وقفت ع رووس اصابعها طبعت قبله ع جبينه بعدين نزلت وكملت تغني.
"شايف البحر شو كبير..كبر البحر بحبك..
شايف السما شوبعيده..بعد السما بحبك..
كبر البحر وبعد السما..بحبك ياحبيبي..
ياحبيبي..بحبك.."
ضمها ورفعها فوق وهو يقول..
/والله نا اللي نحبك ونموت فيك كبر الكون ومازال ابعد..
ضحكت من قلبها..
🍃🍃🍃🍃
وهما عايشين اجمل لحظات الحب واصفاها كانت غرفه ع صبح ربي خاشه ع الفيس دور ع ايميل الجالي كانت ناويه تهكره بش تشوف محادثاته لعل وعسى تلقى فيهم شي يخدم اختها وينفعها..
وهي دور خشت ع صفحة نضال فتشت ع اصدقائه لقت خوته عمر والمهدي ومعاهم نسرين وخديجه..
بدت ع وجهها ملامح الازدراء لما لقت خديجه دايرة صورة بروفايلها شخصية "السلطانه حرم" قالتلها..
/ماناقصك..
ومن الفضول خشت عليها قابلها منشور مدايرة فيه تاق لبنتها واختها وناس تانيه كاتبه فيه..
(للي يكرهوني:
الله يخليني ديما غصة في حلوقكم )
غرفه بقرف:ريتها الغصة ليك انتي وخوك يامريضة ياتعبانه..
طلعت من حسابها بسرعه وخشت ع حساب عمر ودورت في اصدقائه وبعد بحث دام طويلا طلعلها حساب الجالي كان كاتب اسمه بالمهنه متاعه باللغة الانجليزيه وحاط صورته وهو واقف في احد مواقع العمل لابس طاقية واقيه ونظارات ع بدلة رسميه..
قالت تهكما:من برا هالله هالله ومن داخل يعلم الله..
وبعتت رابط حسابه لوحده تعرفها عندها حد محترف في الاختراقات هادي وقعدت تراجي في ردها..
🍃🍃🍃🍃
الساعه 10:00صباحا..
طلعت طوبى من الشقه وهي مرافقه جنتها اللي كانت طالعه بأحلى طلة لتحضر الحفل الختامي لقسم الروضه والحضانة في المدرسه..
نزلوا مع بعض من الدروج وحده وحده لين وصلوا تحت وطلعوا من مدخل العمارة..
طوبى:وين سيارة خالتو روفي؟
جنة اشرتلها وقالت:هيا!
شافت وين مااشرت بنتها لقت غرفة مقعمزة في السيارة تأشرلهم وهي مبتسمه،ابتسمت طوبى وقدمتلها مع جنه..
🌼🌼🌼🌼
في الطريق..
غرفه:الله يبارك ع جنوناتي الله يبارك..
طوبى:سلمك..علاش ماجبتيش موبا معاك؟
غرفه:فكيني من دوشتها..
طوبى بضحكه:شافوك وانتي طالعه؟
غرفه:لاماقاعد حد كان مئاب..هوبا واوبا في الروضه حتى هما عندهم حفل ختامي..
طوبى بدهشه:شني!؟
غرفه بضحكه:مش برواحهم..خفت ضحكتها وهي تقول..رفعهم ولد عمك..
ابتسمت طوبى وهي تقول..
/اممم..
تجاهلت غرفه وع طول غيرت الموضوع وهي تقول..
/بتحضري اللمة اليوم ولا؟
طوبى:اكيد لكن ماتشدوش فيا نبات بالله عليكم..
غرفه بضحكه:ياودي باهي باهي..
تنهدت طوبى بإبتسامه بعدين شافت لمراية السيارة الجانبيه بانت عليها السيارة متاع الحمايه لاحقتهم غيرت نظرها عنها القدام وبدت تردد..
"حسبي الله وكفى"
🍃🍃🍃🍃
في المدرسة..تحديدا مكتب نسرين..
حلت عليها ضيفة اول مرة تشوفها..
🍃نسرين:تفضلي بشن نقدر نخدمك؟
قالتلها وهي مبتسمه..
/اني جاية لأبلة طوبى مبعوثه من طرف حد..
عقدت نسرين حواجبها بإستغراب وقالت..
/مبعوته من حد!؟
هزت راسها وقالت..
/اني امتنان **** محامية الباش مهندس الجالي شنيبه..
بدت ع وجه نسرين ملامح الامتعاض وهي تشوفلها..
امتنان:ياريت تبعتي حد يجيبها هني..
نسرين:شن يبي منها؟
قالت:يبي يحل موضوع الحضانه وديا..
نسرين:هدا علاش رفع قضيه!
قالت:لو تفاهموا يسحبها عادي جدا..
نسرين:ع شن يبي يتفاهم معاها؟.
امتنان:اسفه مانقدر نقولك شي هو بعتني نوصل كلامه لطليقته مباشرة..
نسرين قعدت تشوفلها بعدم ارتياح..
وهي ابتسمت بجديه وقالت..
/ياريت تناديها بسرعه عندي ماندير..
رفعت نسرين سماعة الهاتف بش دير اتصال مع قسم الروضه..
🍃وهالاتصال ردت عليه ابله زهرة وهي بدورها خبرت طوبى وطوبى توجهت لمكتب الادارة..
🍃🍃
في مكتب الادارة..
دق الباب اذنت نسرين بالدخول..
فتحت طوبى الباب وخشت وهي تقول..
/السلام عليكم..سرقت نظرة سريعة لأمتنان بعدين ردت نظرها لنسرين وقالت..خير استاذة نسرين.
نسرين:تعالي قعمزي..
مشت قعمزت طوبى مقابلة امتنان اللي كانت تشوفلها بتركيز..
نسرين:هادي محامية الجالي قالت تبي تشوفك..
شافتلها بطرف عينها وهي رافعة حواجبها..
ضيقت امتنان عيونها وقالت..
/ياريت تخليني برواحنا..
نسرين شافتلها شويه بعدين ناضت ومشت طلعت من المكتب وسكرت الباب...
ابتسمت امتنان وقالت..
/تباني صغيره هلبه..
قعدت تشوفلها طوبى بصمت..
امتنان:اني امتنان **** محاميه الباش مهندس الجالي..
طوبى:قالت نسرين..
ضحكت وقالت..
/ok..طوبى اني بعتني الباش مهندس بش نتفاهموا على قصة الحضانه بشكل ودي..
عقدت طوبى حواجبها ورفعتهم شويه وهي تقول..
/كيف ترا؟
امتنان:تتنازلي عن حضانة بنتك نهائيا مقابل انك تشوفيها مرتين في الشهر وفي الاعياد والمناسبات..
بدت ع وجهه طوبى ابتسامه واسعه فيها شي من السخريه..
امتنان؛شوفي لو سكرتي راسك القاضي معاش يخليك تشوفيها نهائي يعني بحكم انك مراة تعاني من مشاكل نفسيه ومسحورة وحاولتي الانتحار..وحده بحالتك هادي حتما حتشكل خطر ع بنتها ناهيك ع انك تزوجتي واحد في بينه وبين بو بنتك عداوة ومشاكل كيف تكون البنت في امان معاكم!
ضحكت طوبى ضحكه خفيفه وهي تحرك في راسها يمين ويسار..
رشفت امتنان وقالت..
/شوفي ياطوبى انتي مازال صغيره وواضح مش عارفه مصلحة نفسك لأنك مش واعيه كفايه وهالشي عرفته من قصتك مع الباش مهندس..راجل زيه سخرلك حياته وعيشك عيشه الاف يتمنوا يعيشوا ربعها ودار حاجات مافيش راجل يديرهم في وقتنا هدا بش يكسب رضاك وفرطتي بيه بسهوله وماخليتي مادرتي فيه ومع هذا قعد متمسك بيك وحتى بعد الطلاق قاعدة قيمتك عنده كبيره حتى بعد عرف بزواجك من راجل يعتبرفيه عدو ليه مزال قاعد يفكر في مصلحتك ومبديها ع نفسه ومصلحته..يجديات متأسفه عليه جدا..
طوبى ناضت وهي تقول..
/تعبتي روحك ع فاضي وضيعتي وقتك ووقتي..
ولفت ومشت بإتجاه الباب وهي تسمع في امتنان تقول..
"حتندمي هلبه ياطوبى"
فتحت طوبى الباب لقت نسرين قدامها قالتلها..
/جيبولها ميه..وطلعت..
خشت نسرين وهي تشوف لأمتنان كيف ناضت وهي تقول بحمق..
/شكرا ابله نسرين..
ومشت طلعت حتى هي ونسرين تشوفلها بقلق..
🍃🍃🍃🍃
وبدي الحفل الختامي للروضة اللي كان بدون معازف..
اناشيد واهازيج يرددوها الاطفال وحركات استعراضية لطيفه..ومسرحيه ابطالها اعمارهم اربعه سنوات مع انها لطيفة ولذيذة كانت تحمل فايده..
🌼جنة شاركت في احدى الاستعراضات وهي تغني مع المجموعه اللي معاها في الاناشيد وكله توثق بالصوت والصورة من امها وكذلك ادارة المدرسه..
🍃🍃
ومساءا..
تنزل صور الحفل والفيديوهات متاعه ع صفحة المدرسه..
🍃اللي كان يتفرج عليهم الجالي عن طريق جهاز اللاب توب وهو مقعمز في فيرندا شقته..
كل مايشوف صورة لبنته يضحك ويبكي وهو مقهور ومتحسر ووين يجي بين عيونه عبد القيوم وهو حاضنها وهي متعنقاته يحس بغضب شديد يخليه يتمنى لو يقدر يحرق عبد القيوم حرق..عبد القيوم اللي سرق منه حبيبته وبنته وحياته كلها كيف مايفكر..
ناض بغضب وخش داخل خدي هاتفه من فوق الطاوله ودار اتصال بإمتنان وهي ترد عليه فورا..
"ايوه باش مهندس"
الجالي:ايوه استاذة شن صار معاك؟
"سؤال واحد نبي تجاوبني عليه شن اللي مخليك متمسك بوحده زي هادي "
عقد حواجبه وقال..
/انتبهي لكلامك..
ضحكت وقالت..
"الدنيا حظوظ...ع العموم مابتش تاخد وتعطي معاي سمعتني وهي تضحك وتتسهوك بعدين طلعت وخلتني.."
هز راسه بعصبيه بعدين قالت..
/درت اللي عليا وانتي نبيك ديري اللي عليك يوم الجلسة..
"بإذن الله"
ونهي المكالمه ع طول ورفع نظره في صورتها وهي يقول بغضب..
/انتي اللي هكي تبي..انتي..
🍃🍃🍃🍃
"كاني منك قلتلها خوديه وفكيني منه"
ضحكوا وطوبى قالت..
/ع راس لساني والله غير ماكنتش نبيها تشد عليا حاجة..
سدرة:تعرفي الحركة هادي تثبت انه مش ضامن يربح القضيه..
نبيله:خل نكونوا واقعيين هو دار هكي بش يبين ان عنده حسن نيه..
طوبى:حتى اني هكي فهمتها نعرفه كويس وحافظاته حفظ..
نبيله بإبتسامه:حسيتك اليوم غير امس متشجعه ومعنوياتك مرتفعه..
طوبى بإبتسامه:وكلت امري لله وعارفه انه مش حيضيعني..
كلهم قالوا بأصوات متقطعه..
"ونعم بالله"
بعدين هاديه قالت..
/ديما وين نشوفلك نحس في ربي يحبك وجهك باينه فيه الحاجه هادي هلبه..
دمعوا عيون طوبى وهي تسأل..
/كيف باينه فيه؟
هاديه:اللي يحبه ربي يعطيه نور من عنده يبان في وجهه..
كلهم تأثروا بكلام هاديه واكثر من تأثر سدرة اللي دموعها نزلوا زي السيل..
طوبى ابتسمت وهي تمسح في دموعها وتقول..
/يارب يكون اللي تشوفي فيه حق..
هاديه بإبتسامه من بين دموعها قالت..
/يارب..
🍃🍃🍃🍃
"تفضلي"
قالت فرح هالكلمه بالفصحى وهي تعطي في كيسة هدايا لراما..
خدتها راما وهي تقول بضحكه..
/هدية الخطوبة؟!
فرح قالت بإبتسامه وهي ترقص في حواجبها..
/ايه..لكن مش مني من خطيبك..
راما وهي متفاجئة قالت..
/تتسهوكي!
فرح بضحكه:والله من محمد..
ضحكت وهي مندهشه وقلبها يدق بقوة..
طلعت من الكيسه علبه صغيره وفتحتها وتشوف عقد فضة ناعم فيه تعليقه ع هيئة جناوح طير ضحكت وهي تقول بإنبهار..
/تجنن..
فرح؛يابختك..
راما وهي تلبس فيها قالت..
/انخطبي حتى انتي..
فرح بيأس:اللي نبيه مانقدر نوصل فيه الا بمعجزه تجيبه من كوريا ولاترفعني ليه..
...تتكلم عن مغني كوري مشهور!...
راما وهي تضحك قالت..
/ختشة..
بعدين ناضت ومشت وقفت ع المرايه وهي تشوف لشكل العقد كيف طلع عليها وهي بتطير من الفرح..
🍃وخوك ياراما كان ناوي يجيب هديه لحماتك بعد ماقرر يعترفلها بمشاعره،وتفكيره الوردي خلاه يتخيل كيف بتكون ردة فعلها..متوقعها ماتكونش لطيفه لكن كان متأكد انه حيأثر فيها..🍃
🍃🍃🍃🍃
الساعه 10:00ليلا..
قدام باب الحوش الدخلاني كانت غرفه واقفه ع طوبى وجنة وهي تقول..
/غير خليها تبات عندنا هالليله بس..
طوبى:لالا اصلا قرب وقت نومها اول مانروحوا ترقد طول..
غرفه:قبل نبوا نخدموك لكن ع راحتك ياحنه..
طوبى غمزت لغرفه وهي تقول..
/نردهولك في الفرح..
غرفه بإمتعاض..
/بري روحي..
طوبى بضحكه:بنخليهم عندي شهر بش تهيجي في قبرص..
غرفه:بري..روحي..
طوبى:مش خاطرك تمشيلها! يقولوا مافيش احلى منها في شهر العسل..
سكرت غرفه في وجهها الباب وطوبى مشت مع جنه وهي تضحك من قلبها بصوت مكتوم..
🍃وتخش غرفه وهي مرتبكه متوتره سمعت صوت صفيه وهي تهدرز زادت توترت ومشت طول للدار خشتلها وسكرت عليها..
وتنتفض من الفجعه لما تسمع هاتفها يرن مشت طول خداته من ع السرير لقت البنت اللي طالبه منها تهكرلها حساب الجالي تتصل بيها ردت عليها طول..
/هلا..شن صار معاك؟
"بعتتلك رساله ع الماسنجر فيها كل شي"
غرفه:بري غدوة للمحل خودي فلوسك..
"Ok..باي"
غرفه:باي..نهت المكالمه وطول خشت ع الماسنجر..
🍃🍃🍃🍃
راقدات جنب بعض وهما يتحاكوا بهمس..
غرفه:داير روحه الشعرواي وافلاطون والبوست اللي ينزله يعلقوا عليه قريب ميه شي عرب وشي اجانب وع الخاص ماعنداش دوة مع حد..
سدرة:شيطان هدا مايخليش وراه ممسك..
غرفه:سحيقه..ياقداش زهقتلي كبدي اللي ينقاللها خديجه لما تعلقله دايراته صلاح الدين الايوبي..
سدرة:من يومها وهي هكي رهمه ليها وليه..
تنهدت غرفه وقالت..
/ربي ينصر طوبى عليهم ومايحرمها من بنتها..
سدرة غيرت نظرها للسقف وقالت بقلق وحزن..
/آمين..
🍀🍀🍀🍀
يوم السبت..
19يونيو..سنة 2021..
فهاليوم من الساعه الثامنه صباحا انطلق باص رافع طلاب روضة المدرسه لرحلتهم..
بعد ماقطعوا مسافه لابأس بيها وصل لمكان الرحله..
نضموا الابلات والمشرفات بحضور نسرين المكان والطلبه وبعد فراغهم من مهمتهم فطروا كلهم..
وع طول بعد الفطور بدت نشاطات الرحلة..
🍀وتمر عليهم احلى الساعات وسط اجواء حلوة زادت بهجتها ضحكات الصغار وموافقهم اللطيفه..
لكن..
في الساعه الاخيره لاحظت نسرين من بعيد شخص واقف لابس تيشرت ابيض وسروال جينز ارزق وع راسه طاقيه بيضا ولابس نظرات رماديه..
الطول والقد تعرفهم لمني كويس وبدت من الخوف تدعي يطلع واحد يشبه اللي في بالها..
وفهاللحظه تلتفت ع بنت خوها لما سمعتها تبكي..
شافتها مقعمزه وامها تشوفلها في ركابها..
قدمت وهي تقول..
/خيرها؟
طوبى:عترت وهي جاياتك تجري
"خيرها بنتي"
توسعوا عيون طوبى بفجعة لما سمعت صوته وبنتها جنبها سكتت ع البكي وقالت..
/بابا!
هو قعمز ع رووس اصابعه قدامها وقال..
/خيرك ياروحي..
ناضت جنة وضماته وهي تقول..
/تحت"طحت"
هوقعد يطبطب ع بنته ويشوف لأمها ويقول بحدة
/وينك عن بنتك ياهانم!
نسرين وهي تشوف لطوبى بخوف قالت..
/جالي بالله عليك برا الله يربحك ماديرلناش العار..
وقف ع حيله وهو رافع بنته ويقول..
/عار شني!؟ جيتي لبنتي عار قصدك!؟
وقفت طوبى ع حيلها وهي تشوفله كيف رافع جنه وهي متعنقاته..
هالمشهد ردها سنتين للخلف..لأبشع لحظه عاشتها في حياتها اللحظه اللي جي هالمخلوق بينهي فيها حياتهم هي وبنتها..
طوبى وقتها ولأول مرة ماتحسش بالخوف اللي كانت تحس بيه لما تشوف الجالي..كل اللي حساته توا خوفها ع بنتها بس..
وينزل عليها ثبات عجيب يخليها تقول بهدوء..
/نزل البنت..
قعد يشوفلها وهو مصدوم وفي نفس الوقت فرحان اللي كلماته بدون مايشعر نفد امرها ونزل جنه واخته مركزة عليه..
🍁وفي هالأثناء درست سيارة عبد القيوم في نفس المكان..
كان ناوي يفاجئهم بجيته ويروح بيهم طول للخمس اللي خططوا يقعدوا فيها اسبوع..
🍃🍃
"بري لصاحباتك بنتي".
جنة:حاضر..اشرت لبوها وهي تقول..ما السلامه بابا..
هو رد عليها بحركة اليد ومشت جنة تجري للمكان اللي فيه زملائها..
وامها وين جت بتلحقها وقفها الجالي لما قال..
/حاولي تشبعي منها ع قد ماتقدري في ايامها الاخيره معاك..
فكرت ترد عليه لكن تراجعت ومشت..
هو قدملها بسرعه ونسرين لحقاته وهي تقول بصدمه وخوف..
/نهار اسود!
اعترض طريق طوبى وهو يقول..
/كيف تزوجتي هداكا الحشرة قولي كيف!؟.
ومايحسش الا بحد شاده بقوة ومبعده عنها..
كانوا زوز من افراد الحمايه مابوش يدخلوا من البدايه بش مايثيروش فوضى تخوف الصغار لكن الوضع اضطرهم للتدخل السريع..
الجالي وهو يفك في روحه منهم كان يقول لطوبى..
/والله ماني مخليك تتهني انتي وياه..
كل من كان موجود في المكان انتبه للي قاعد يصير..
وطوبى قاعده تمشي بسرعه وهي خايفه كانت تبي تاخد جنة وتهرب
وتوقف في مكانها لما تشوف عبد القيوم جاي يجري..
طوبى بصدمه:عبد القيوم!عبد القيوم وين ماشي!
ولحقاته تجري...
الجالي لما شاف عبد القيوم جايه ضحك بسخريه..
واحد من الشباب وقف عبد القيوم وقال..
/فوته وخود مرتك وبنتك روح بيهم
الجالي قال بصياح
/مش بنته..هادي بنتي..تو ناخدها منكم ياكلاب وانتي والله معاد رايتيها عمرك كله
عبد القيوم بغضب..
/من بيخليها لمجرم زيك انت !..
هز راسه بوعيد وهو يقول..
/تو نوريك المجرم شن يدير ياوضيع..
نسرين وهي تعيط عليه قالت..
/خلاص برا..انتلف..اقلب وجهك..
وطوبى وهي ترعش شدت ذراع راجلها وهي تقول بتوسل..
/بالله عليك هيا..
هو شافلها بألم بعدين شد يدها وقال..
/تعالي..
هدا كله كان يشوف فيه الجالي وهو بينجن خلاص من قوة نار الغيره اللي كانت راكبه فيه قال..
"هدا مستواك انت ماتاخد الا فضلة اسيادك يا..تارقي"
🍃خشت كلماته القذرة هادي في قلب طوبى زي الطعنه..
طوبى وقتها حست بشعور بشع للغايه..بشع لدرجه خلاها تتمنى لو ربي ياخد روحها في هاللحظه..
قامت عيونها وشافت لعبد القيوم لاحظت ملامح ونظرات اول مرة تشوفهم ماكانوش موجهات ليها بس هي حستهم ليها هي..
سيبت يده ودموعها طاحوا من عيونها..
وفي لمح البصر قدم عبد القيوم للجالي وهو مايشوف في شي دف اللي جو قدامه بقوة ووصل فيه وشده وبدي يضرب فيه بدون وعي...
