●●●●●●●●●●●●●●●●●●●●●
وتمر الايام..
ويعدي اسبوع..عاشت فيه طوبى أحلى أيام حياتها في احلى مدن سويسرا اللي تتميز بأحلى مناظر في فصل الشتاء..
وحبيب قلبها اللي مايبي شي في الدنيا غير انها تكون معاه سعيده ومرتاحه كان يدير كل اللي يقدر عليه بش يحقق هالشي..
وهي كانت تشارك في سعادتها مع احبابها بالصور والفيديوهات وكانت تكلم في جنة اللي قاعده مع سدرة والهاديه في اليوم اكثر من مرة لأنها ماترتاحش الا لما تشوفها وتسمع صوتها..
🍁🍁🍁🍁
مقعمزين في فيرندا الكوخ اللي قاعدين فيه وهما يشربوا في الشاهي التارقي الساخن..
حواليهم الثلوج في كل مكان منظر برغم جماله بس في عيون عبد القيوم ماكانش في اجمل من طوبى اللي كانت مقعمزة جنبه وهي لابسه فوق راسها طاقيه "قبعة" شتويه منظرها مميز كانت طالعه عليها حلوة بالمرة والشتاء بأجوائه كان زايد وجهها جمال ع جمالها المميز..
هي كانت لاهيه بهاتفها تشوف في صور وع وجهها ابتسامه ماشبعش من تأملها ابتسم من قلبه لما قالت بضحكه..
/الله عليك اريج وخلاص..رفعت هاتفها وقرباته من فمها وهي تقول...مبارك التخرج روجتي يابطه..ونزلت الهاتف وهي تضحك وهو مازال يتأمل فيها بإبتسامه..
نزلت هاتفها وهي تتنهد وع وجهها ابتسامه حلوة بعدين مررت نظرها حواليها وقالت..
/عندك حق تحب الشتي..
قاللها:معاش نحب شي غيرك انتي واللي تحبيه بس..
ضحكت بعدين شافتله بإبتسامة حب وقالت..
/تعرف..اني ربي ناعم عليا بهلبه حاجات حلوة في الدنيا لكن انت احلاهم..انت النعمه اللي نبيها تقعدلي دنيا وآخرة..
ضحك وغير نظره القدام..
وهي قالت بضحكه:تهبل لما تتحشم نجيه ياربي..
زاد ضحك بصوت عالي لعند ماوخر راسه للخلف وهي تتأمل فيه بإبتسامه بعدين قالت.
/نحبك..نحبك هلبه..ونحمد ربي في كل لحظه اللي خلاك من نصيبي حنقعد معاك لأخر يوم في عمري مهما صار نبي نموت واني معاك بش في الآخره تقعدلي..
كان يسمع في بداية كلامها وهو في قمة الفرح وقلبه ذايب بس هالقلب العاشق انقبض لما سمع اخر كلامها وعلى طول خلا صاحبه يقول..
/بعد عمر طويل ع الطاعة نا نسبقك وانتي تلحقي..
حطت يدها ع صدرها وقالت بضيق..
/اسكت..
قاللها:حتى انتي اسكتي..
ضحكت ونزلت يدها بعدين خدت طاسة الشاهي وشربت منها..
هو قال:راح اسكيمو..
ضحكت وقالت..
/امم لالا قاعد دافي...عبادة..
قال:قلبه..
شافتله بإبتسامه حلوة وقالت..
/نحبك..
بضحكه قال..
/الجو والمكان اثروا فيك واجد وكان تخلينا نكملوا حياتنا هنا..
ضحكت ورجعت تشرب في الشاهي وهو رجع يتأمل فيها..
🍃🍃🍃🍃
"المعلومات اللي وصلتني حاليا تبين ان ابله طوبى مانولدتش في مستشفى"
رفع حاجبه بمكر وقال..
/باهي شن صار في عقد الزواج؟
الاقجم بأسف:هدا اللي محيرني لتوا ماقدرتش نوصل فيه لتوا مهما درت لكن بإذن الله في الاخير حنجيبه..
ابتسم مختار بمكر وقال..
/لالا خلاص فوت..اللي نبيه وصلتله..اللي في بالي شكله بيطلع صح..
الاقجم بشي من التردد قال..
/عادي نعرف اللي في بالك!؟
تنهد وقال..
/مش مشكله لأن قريبا الناس كلها حتعرف مش غير انت يااقجم..
الاقجم قعد يشوفله بإستغراب..
ومختار بنفس الابتسامه بدي يجاوب ع سؤاله..
🍃🍃🍃🍃
"معناها في امل؟"
المهدي:ايه يام وبالله كبير..زراعة النخاع هلبه داروها وبروا من المرض..
مغليه ودموعها ينزلوا قالت..
/تقول في الحق وليدي ماتكذبش عليا ولا؟
المهدي:لاوالله يام مانقول الا في الحق..الجالي لما عرف ان مازال عنده امل حسيته تشجع ونفسيته ولت خير من قبل..
ابتسمت مغليه بأمل وهي تمسح في دموعها...
•••••••••••
نسرين ودموعها في عيونها قالت
/جديات كلامك ولا؟
المهدي:قصدك ماحكتلكش خديجه؟
نسرين:حكتلي لكن اني ماقدرتش نصدق ..
المهدي:لاصدقي صدقي..
قالت وهي تمسح في دموعها..
/باهي وقضية المخدرات؟
المهدي:المحامي اللي وكله راجل خديجه ثعلب بمعنى الكلمه الباين عليه حيطلعه منها..
نسرين تنهدت بقلق وهي تفكر..
هو قال:خل بنمشي نروح بسدرة..
هزت نسرين راسها وهي محتفظه بصمتها..
وهو بعد مامسح ع شعرها طلع من الكوجينه وخلاها مستمرة بالتفكير في وضع خوها الجالي...
🍃🍃🍃🍃
"معقولة!!"
مختار؛وجدا ياالاقجم..اني اصلا مش عارف كيف عدت عليا هكي كيف ماركزتش كيف ماانتبهتش..في هلبه حاجات تبين ان في غموض في حكايتها طوبى هادي..
الاقجم بصدمة ممزوجه بالحيره..
/باهي كيف!؟..قصدي علاش هو ياخد بنت مش بنته يسجلها ع اسمه ويربيها ويعطيها حوشه شن اللي يخليه يدير هكي لوحده مافيش بينه وبينها صلة قرابه! وكان ماعنداش صغار نقولوا لكن..حرك راسه يمين ويسار وقال..مش خاشتلي راس يامعلم سامحني..
عقد مختار حواجبه وقال..
/علاش مافكرتش انها ممكن تكون نتيجة غلطه؟
الاقجم قال بتساؤل..
/غلطه!؟
مختار:ايه يعني لطفي الواعر يكون غالط مع وحده وحاول يرقع غلطته..
الاقجم:مستحيل!
رفع مختار حاجبه وقال..
/علاش!؟
الاقجم؛ايه صح اني مانعرفش الحاج لطفي الله يرحمه لكن صيته سابق الراجل هدا يعرف ربي ومش متاع الحاجات هادي بكل..سامحني يامعلم لو كلامي ماعجبكش لكن هدا الحق..
قاله؛واني ديما نقولك يالأقجم الناس ماليها الا الظاهر مافي حد في الدنيا هادي ماعنداش جانب اسود كلنا نغلطوا والناس هادي بالذت اللي يديروا في ارواحهم اتقياء واصفياء البلي اللي تحتهم ماتحت واحد..اصلا امي ماتت بعد ماروحت من بنغازي بشهور وهديكا سدرة قالتلي قبل امي ماتت مقهورة وطبعا زي العادة حطتها في ظهري اني وقالت ماتت من تحتك..شكلها امي كلتها في عمرها وماتت من تحته هو..وجه نظره للفراغ وهو يقول..وهو يقولي امك ماتت وهي مش راضية عليك..كان يبي يحول الذنب من ع كتافه ويحطه في راسي اني..
الاقجم يفكر في كلامه ومازال مصدوم ومش مستوعب..
شافله مختار وقال..
/فكر فيها..علاش باعلها الحوش؟ لأنها شرعا ماتورثش وقانونا ماتورثش ولأنه حاسب حساب يجي يوم وينفضح اللي داسه باعهولها وهدا اسلم وافضل حل خير من انه يكتبه بإسمها او يوهبه..تاني شي حكاية عقد الزواج اللي ساهل جدا انك توصل فيه ماقدرتش توصله لأنه في حد عارف ان حيجي يوم وحيجي من يدور وراه ووقتها يعرف كل شي..
الاقجم:علاش شن فيه عقد الزواج؟
مختار؛ع حسب مانعرف مجهول النسب او "ابن الزنا" تحديدا النساء لما تبي تتزوج وكيلها يكون حد من المسلمين او القاضي الشرعي..في زواجها الاول من الجالي لطفي كان وكيلها شن ماكانت الصفه متاعه يعني مازوجتش نفسها وهكي زواجها صحيح..بعد ماصار اللي صار بينها وبين الجالي هو وصى انها لو طلقت معاش يخلوها تتزوج غالبا لانه ضميره انبه ع اساس وهما داروا بوصيته..خل نقولك حاجه مهمه عبد القيوم خطبها وردوه وبعدين فجأه عطوهاله وتزوجها في ظروف غامضه..هما قالوا مايبوش الجالي يعرف وهدا مش مبرر مقنع لأنه اولا عن اخرا الجالي حيعرف وهدا اللي يخليني نقول انهم لما عطوها لعبد القيوم وكيلها القاضي الشرعي او موظف في الدوله ليه علاقه بالامور هادي وهالشي حتما مكتوب في العقد اللي قاعدين يدسوا فيه او بالاحرى اللي قاعد يدس فيه المحجوب وزياده ع هكي اللي شهدوا ع الزواج وعندهم علم بكل شي يعني المهدي يعرف واكيد اللي قالتله مرته..
الاقجم وهو مندهش ومازال مصدوم بقوة قال..
/قسما بالله دماغي وقف..!
مختار ضحك ضحكة خفيفه..
الاقجم شافله شويه بعدين قال..
/غير دقيقه..تو انت الحاجه هادي تبي تثبتها باش تاخد الحوش ولا!؟ لكن الحوش منباع يعني ماتقدرش تاخده منها الا في حالة وحده..
اشر عليه مختار بسبابته وقال وهو مبتسم بدهاء..
/ايوه اللي خطر في بالك توا..نزل يده ع الطاوله وقال بنفس الابتسامه..الفضيحة..
بدت ع وجه الاقجم ملامح الاستياء رغما عنه ومختار لاحظها وقال..
/لازم الناس كلها تعرف من هو لطفي الواعر وتعرف من هو اللي دار العار بالحق لعيلة الواعر وهدا العدل بعينه يااقجم العدل..
الاقجم بلع ريقه وهز راسه موافقة ع كلامه بعدين قال..
/باهي توا نزيد ندور ورا معلومة المستشفى زي ماقتلك قبل الحكايه ليها سنين وتاخد وقت عطيني اسبوع تاني..
اشرله بسبابته وهو يحرك فيها نفيا ويقول..
/لالا خلاص..نزل يده وهو يقول..كل شي حنعرفه بروحي وبطريقتي..اشرله بيده ع الباب..
الاقجم هز راسه ومشي طلع من المكتب ومازال عقله يفكر في اللي عرفه وخلا مختار يفكر كيف يخلي توقعه وتحليله صح مية في الميه المهم عنده انه ينصف نفسه المظلومه في نظره وياخد حقه من الماضي وكل من آذاه وظلمه حسب ماعقله مصورله...
🍃🍃🍃🍃
مروحين من حوش نضال وطول الطريق وهما يحكوا عن..
سدرة المنتهى بضيق..
/قلبي مغموم ونفسيتي تاعبه كان نلقى ناخد وجهي..
المهدي فكر للحظات بعدين قال..
/شن رايك نمشوا للخمس؟
قالتله بتمني:ياريت نرتاح غادي..
هز راسه وقال:راجي الايام هادي نظم اموري وبعدين نمشوا نقعدوا غادي لأمتى ماتبي..
هزت راسها وهي ساكته..
وهو بعد ماسرقلها النظر شاف من المرايه لعلي وجنة وهما راقدين في الكرسي الخلفي..ابتسم ابتسامه خفيفه ورد نظره للطريق..
🍃🍃🍃🍃
"شياطين هادم مايترالهم شي"
صفيه:مازال عنده عمر..
غرفه بحقد:ان شاء الله ماتنجح..
صفيه؛ماتدعيش هكي يابنتي مرات يولي عليك وكلي عليهم ربك قولي حسبي الله ونعم الوكيل..
تنهدت غرفه بقلق وقالت..
/حسبنا الله ونعم الوكيل ويارب اكفي طوبى وراجلها شرهم يارب..
"غرفه"
ناضت غرفة بعد ماسمعت حسين ينادي فيها وقالت..
/تصبحي ع خير عمتي..
صفيه:قدامك كل خير بنتي..
ومشت غرفه بإتجاه جناحها هي وراجلها وصفيه بعد ماتبعتها بعيونها ناضت وهي تقول..
/خل نمشي نرقد حتى اني..
🍃ومنين يجي النوم لعيون حمالين الهموم يعدي ليلهم كله وهما يفكروا بخوف وقلق من اللي داساته الايام الجايه..
لكن في عيون ماتبيش النوم يجيها..عيون العشاق اللي مايتمنوش تفوت ثانيه بدون مايعيشوا فيها حبهم الصافي العفيف..
زي عبد القيوم وطوبى اللي عذبهم الفراق وانهك قلوبهم الشوق..
🍁خش عليها الدار لقاها شاده مذكرة هو يعرفها كويس شافها تكتب فيها وهي مبتسمه..
مشالها وخش السرير وقعمز جنبها وهو يقول..
/هي خلاص سيبي اللي عندك وارقدي من قبل الفجر وانتي واعيه..
طوبى بضحكه:ماخاطريش نرقد..شافتله وقالت..كان نلقى نقعد ديما فايقه واني معاك..
قاللها بهويام؛ناعلي..
قعدت تضحك..
عبد القيوم بضحكه..
/جد والله رحتي رومانسيه واجد يامراة ونا من قبل قلبي مش سالك معاك..
سكرت المذكرة وحطتها ع الكامدينو اللي جنبها بعدين ساوت جلستها ع السرير وهي تقول بضحكه..
/اني بروحي مستغربه في روحي..
ضحك وقال..
/باهي ارقدي وتغطي كويس..
تمددت هو قعد يغطي فيها بعدين تمدد جنبها هي غطاته وعيونهم تتأمل في بعض..
استمرت للحظات العيون تحكي لعند ماهي كملت كلامهم وقالت..
/باهي قبل لنرقد احكيلي هديكا القصه...
بإستعباط قال..
/قصة شني!؟
هي قالت بإنزعاج..
/هيا عاد من غير جو..قصة هداكا الرحاله مع السمحه ام العيون الحايرة..
ضحك بعدين غطاها كويس وهو يقول..
