البريئ روح طاهرة جسد جريح (+18)

المقدمة

قصتنا لها ابعاد عاطفية قد لا تناسب البعض وقد تؤذي مشاعر البعض فهي تسلط الضوء على موضوع يكاد يكون طرحه معدوم بالاعلام بالاضافة الى اني لست مهتماً ان اعجبتكم القصة ام لا فكل ما يهم ان يكون لديكم علم بان مثل هذه الامور تحدث في الحقيقة وليست من وحي الخيال وشكرا..

_____________________________________

قبل 5سنوات من احداث القصة ...

كريم: اهوو صارت بال ١١ بليل واني لسة ما سويت عشا للبنات خرب هاي شبيه .
هلال: بابا مدري شبيه هالفترة دومه حاير واكثر الاحيان صافن خاف صاير وياه شي بالدوام مشكلة مدا ينطيني مجال احجي وياه دومه يشتغل بالبيت يله بعدين اشوفه شبيه خل انوم ايو لان تاخر الوكت، رحت شلت ايو من الكاع جانت لامه لعاباتها وتلعب بيهم اخذتها للغرفة بدلتها ومشطت شعرها وحطيتها بحظني وبديت اغني الها علمود تنام متعودة ع صوتي تعتبرني امها

بديت اغني:
ماء النهر اسرع يجري حين دعاه صوت البحر
ثم انطلق يروي البشر يسقى السهل والمنحدر
زبد حلو يعلو موجه يرقص فرحا يضحك بهجا

غفت ايو دخل بابا للغرفة اتقرب للجرباية حط ايده ع راسي وبهدوء كال يله بابا صار العشا واسف اتاخرت هواي
باوعت لوجهه تعبان كلش وعيونه بيهن دمعة متقبل تطلع كتله تسلملي باباتي جايتك رحنا وكعدنا ع الميز بالمطبخ جان مسوي دجاجة بالفرن وياه بصل وطماطة وبتيتة شوي جان الاكل كلش طيب كام يفلس بالدجاج وينطني هي هاي طبيعته من الطفولة كلما اصفن عليه كلبي يتحطم عليه شايل همنا وهم البيت وفوكاها الشغل مالته وحزنه ع ماما اتمنى اكدر اخفف عنه بطريقة ما .

كعدت الصبح ع صوت المنبه طلعت دا اروح لغرفة بابا وجان اشوفه واكع بالكاع كدام المطبخ رحتله اركض ورجليه ما يشيلوني واردد بكلبي ربي لا تسويها مرة ثاني ما اريد اعيش اليتم مرة ثانية احاول اكعده ما يصحى متت خوف طلعت لبرة اجرت تاكسي وخليت الولد ينزلي يشيله وياي ورحت ركض للغرفة اخذت ايو واخذت جنطتي وصعدنا بالسيارة وصلنا للمستشفى بسرعة للطوارى فحصه الطبيب وقاس ضغطه طلع عالي شك الطبيب جلطة لكن من فحص السكر مالته طلع هابط لذلك غاب عن الوعي اني كلبي يرجف وايو بحظني تبجي احاول اهدي بيها وروحي دا تطلع اريده يكعد ويحجي وياي خابرت عمي واجو للمستشفى هو
وبيبي وظلت بيبي تبجي عليه وتكول لو يسمع كلامي ويزوج جان ما هيج تعب..
عمي اخذ ايو وداها لبيته وبقيت اني يم بابا جان تعبان واخر شي كوة فتح عيونه واول شي كاله كالعادة (هالة) دوم يردد اسمها يحبها ما يكدر ينساها صفن بوجهي شافني شابعة بجي سحب ايدي لشفايفه وباسهن وكال: حبيبة ابوج لا تبجين لخاطري كلشي ما بيه راح اكوم وتشوفين باوع لبيبي وهم مسح دموعها وباس ايدها ويسولف وياها وببيي تكوله لو تسمع كلامي فد ما يصير بيك هيج هو يضحك ويكلها مو بيدي والله مو بيدي ..

هلال:لليل راحو بيبي وعمو للبيت واحنا بيقنا بالمستشفى كالو للصبح يله نطلعه الا نتاكد ما بيه شي بقيت بصف بابا لحد ما حسيت لازم اروح للحمامات كلت للبابا وطلعت من ردهة الرجال دا اروح للحمامات لكيتها مقبطة مكو مكان فكالو اكو بالطابق الرابع مصلى وكافتريا والمصلى بيها حمامات كلت اي خوش علمود اشتري شي لبابا وصدك صعدت لهناك ولكيت المصلى بوجهي اول ما طلعت من المصعد طبيت للحمامات غسلت وطلعت جان اكو بصف المصلى مكان يشبه المطعم كاتبين عليه مطعم المنتسبين وجان مسدود بباب زجاج ينفتح بالبصمة بس تكدر تفتحه بيدك لان البصمة الظاهر عاطلة لنهاية المطعم اكو باب توصل ع البلكونة جان مفتوح الباب حاولت اركز شوية وشفت احد واكف ع حاف المحجر مال البلكونة وكانه يريد يشمر نفسه فتحت الباب بسرعة وطبيت اركض بكل سرعتي وكعت جنطتي بنص المطعم وصلت للبلكونة جريته من ايده وكع ووكعني وياه طلع ولد وشاد كاينولا بيده مبين مريض ويرجف كبل دفع ايدي منه وجان يصيح بيه ليش ليش سويتي هيجي ليش ما خليتني ارتاح اباوعله يبجي ويرجف...

كتله::شوف اني ما اعرف شبيك ولا ليش ولا شنو الدافع ولا اي شي بس الي اعرفه اذا نهيت حياتك هسة مراح تصيرلك فرصة بعدين توكف يم رب العباد وتشرحله المك بوقتها تكون انت لغيت كل فرصك وياه حتخسر اخرتك نفس ما خسرتك دنيتك راح اتخلي الدنيا الفانية تنتصر عليك وانت حتخسر والي اذوك وسببو هالالم عايشين برغد وانت تريد تنهي حياتك ..

الولد: انتي ما تعرفين شنو صارلي خسرت عمري وحياتي وما باقلي سبب واحد اعيش علمود الجرح الي بروحي لو بعد الف سنة ما يطيب احس نفسي نكس وما استاهل يغفرلي ربي ...

هلال : ان الله غفور رحيم هو الي خلقك ومستحيل يعفوك لو جنت بنص المستنقع يطلعك بس خل ايمانك بيه قوي...

الولد :والالم الي بروحي اريد ينتهي اريد هذا الشعور يخلص دا ياكل بيه مدا اكدر اجر النفس..

هلال:الالم هو جوهر الحياة وبدونه ما نكدر نحس بطعمها لازم نحس بالالم ولازم نعرف شلون نتعامل وياه وشلون نخففه الحياة دار اختبار وكلشي نمر بيه اختبار علمود ينعرف مقدار صبرنا وايماننا بالخلقنا لازم تكون اكثر قوة غلط ننتحر ونعوف كلشي ورانا غلط ننهي حياتنا بهاي الطريقة لازم نحارب...

_شفته ظل يون ونته تكسر الكلب وضل يكول: ربي سامحني ربي اني احبك وغلبني الالم ربي ساعدني والتفت الي وشكرني وكام ع حيله وطلع كمت وراه وصحت ..

::ياريت لو كلشي ينحل بالموت بس الحياة اصعب من ما اتصورنا بس الالم وي الايام يخف باوعلي وكال الالم يبقى بالروح ما يروح اتبسم وراح كسر كلبي شكله وملامحه ياترة شنو الي صاير وياه ومن اي الالم دا يعاني الله عالم ..