البريئ روح طاهرة جسد جريح (+18)

البارت الثامن

وحق عينكَ وحق جفنك ورمشاكً
اضل طول العمر امشي ورا امشاكً
عدي بالگلب منك ورم شاكً
يهيدالورم لو مريت بيه.....

                        الشاعر: حمزة الحلفي 

علي::_ كلت لآسر يجيب بس هلال طلع جايب ليان وامير وهذولة الاثنين ابد ما يكعدون راحة دعيت الله يعدي اليوم ع خير وما يضوجون زينب..

آسر::_ كلت لهلال تجي وياي وهلال كالت لليان وليان جابت امير واكتملت السبحة بس الله يستر من اليوم..

_ اول شي كعدنا بالمطعم نتريك ونشرب كهوة زينب وعلي واني كعدنا بسطر وامير وهلال وليان مقابيلنا واحمد ع راس الطاولة قريب مني ومن هلال؛ طلبنا ريوك وصل وبدينا ناكل ..

ليان:: الله طعم الجاي يخبل لو يتعلمون هذولاك الناس شلون يسون جاي طيب نفس هذا

امير:: باع البيض والطماطة شلون يخبل قابل نفس ذولاك الناس البيض ما مستوي والطماطة محروكة

ليان:: محروكة نفس وجهك المفحم انت بيوم القيامة ما يحتاجون يسودون وجهك هو من كاعه اسود

_ امير ضربها على راسها كامت ليان جرته من شعره

آسر:: كافي شبيكم خل ناكل براحة

آسر::_ اباوع على زينب خربانة ضحك عليهم بعدين سكتت وكالت

زينب:: انتو لو تجتمعون ببيت واحد شنو راح يصير؟؟

هلال:: يحترك طبعا بدون نقاش هههه

ليان:: لا مو لهاي الدرجة بس امير مرات يضوجني واني عصبية ما اتحمل ..

آسر:: واني اشهدلج بهاي العصبية اخر مرة عصبتي ركضتي ورى امير بالماسحة

_امير غص بالجاي وعلي وزينب ضامين وجوهم ويضحكون احمد وهلال هم ..

علي::_ اباوع لزينب حيل متونسة بالكعدة وتسولف ومندمجة ويانا اتصورتها مراح تحب الاجواء بس بالعكس

علي:: هاج هاي اللكمة من ايدي

_مديت ايدي منتظرها تفتح حلكها باوعتلي متعجبة  بعدين فتحت حلكها واكلت

علي:: بالعافية زنوبي ..

هلال::_  آسر يسوي لفات وينطي لاحمد وبعدين شافني اباوع عليهم سوالي لفة وانطاني ..

_ اباوع لاحمد طول الكعدة وهو ساكت ما حجى كلمة يباوع علينا ويضحك بعدين خلصنا اكل وكمنا نفتر بالمول ..

_انقسمنا مجموعتين مجموعة اني وليان وزينب ومجموعة احمد وآسر وعلي وامير الولد راح يشترون القاط وملابس العريس واحنا نآجر البدلة ونشتري ملابس لزينب ونآجر بدلات النا ومن نخلص نتلاكى بمحل الذهب علمود الحلقات وباقي الذهب ..