هيَ التي علمتني كيف اعشقُها

البارت السادس عشر

رن المنبه على الساعه الرابعه والنصف معلن وقت صلاة الفجر استقامت من السرير تدخل دورة المياه تتوضى وطلعت تؤدي صلاة الفجر انتهت ورفعت يدينها تدعي،تدعي بكل شيء بخاطرها واول شيء دعته انها تلاقي اهلها طول حياتها تتمنى ام واب حولها وحوالينها اخت واخ تتهاوش معهم وتكون سند لهم ويكونون سند لها صح انها الحين مع عائلتها وتحبهم ويحبونها بس مستحيل يغطون على الام والاب، انتهت من دعائها تستقيم تتوجه للنافذه تفتحها غمضت عيونها تبتسم من لعبت بشعرها نسمة الهواء الباردة الي دخلت للغرفه،مرت دقائق بسيطه واشرقت الشمس معلنه بداية يوم جديد تسمع صوت الهواء وزقزقة العصافير تشوف الخيول تحت يمرحون بانحاء المزرعه مشهد ولا في الخيال مشهد تتمنى توقف الزمن وتعيشه بكل تفاصيله،مشهد تتمنى انها حاليًا جالسه تشاهده مع اقرب الناس لقلبها،سمعت صوت طرق الباب تتلاشا كل افكارها تقدمت ناحية الباب تفتحه تشوفه واقف قدامها:مشينا؟
هزت رأسها اخذت عباتها وشنطتها وطلعت معه نزلوا تحت يطلعون على رؤوس اصابعهم عشان مايحس فيهم احد تنفست براحه من طلعوا السيارة
ناظرها سلمان:بنفطر اول بعدين نروح
هزت رأسها:الي تبيه
مرت نصف ساعه ووقف سلمان عند كوفي طلب الفطور ومرت دقايق واخذو الطلب وقفوا بجانب حديقة يفطرون ناظرت دُرر سلمان:هيه
لف سلمان عليها:هلا
نزلت دُرر كوب الشاهي:لو مثلًا مثلًا مثلًا لقيت اهلي وطلعوا عايشين بمدينه بعيدة وطلبوا مني اروح معهم انت وش يعني بتكون ردة فعلك؟
سلمان:شرايك لو مثلًا مثلًا تبطلين تخيلاتك هذي وتكملين فطورك
عبست دُرر تكمل فطورها بصمت

"في المزرعه تحديدًا عند فارس"
كان جالس على السرير بعد صلاة الفجر مو عارف يرجع ينام يتقلب يمين ويسار والنوم كأنه حالف مايجيه استقام يبدل ملابسه يلبس لبس رياضي واخذ كورته ونزل تحت يمارس هوايته لعب كرة القدم

طلعت من دورة المياه تناظر بانحاء الغرفة ماشافت حماس فيها ماهتمت تتقدم ناحية النافذه تفتحها تناظر خارجها شافت فارس بالاسفل يلعب بالكورة حطت اكفافها خلى خدها ترتكي على النافذه تتأمله مامداها مرت دقيقتين الا وداهمتها حماس الغرفه قفلت سارة النافذة بقوة تلتفت لحماس وابتسمت عقدت حماس حواجبها:شفيك؟
نفت سارة ترتكي بضهرها على النافذة:مافي شيء

سمع فارس صوت النافذه رفع انظاره ماشاف احد موجود رفع اكتافه بعدم اهتمام واخذ كورته يدخل داخل

تقدمت حماس تبعد سارة عن النافذة تفتحها تعاين تحت تقدمت عندها سارة تنفث الهواء براحة:شفتي قلتلك ولا شيء
صغرت حماس عيونها تناظرها:هممم مو مصدقك
جلست سارة على السرير:مو مشكلتي
حماس:مردي اعرف

"نرجع لبطلتنا"
وصلوا للمركز بعد ساعه ونص تقريبا من خروجهم من المزرعه،دخلوا للمكتب من سمح لهم العميد آسر انهم يدخلون رفع انظاره لهم:تفضلوا اجلسوا
جلسو مقابل للمكتب ناظره سلمان ينطق:بشر
تنهد آسر:اول شيء نبي نتأكد من اسماء افراد عائلة الام والاب معكم
هز سلمان رأسه وناظر لدُرر:انا اتكلم ولا انتي؟
نفت دُرر:لا انا
ناظرها آسر:طيب نبدأ من المدعو فيصل بن سلطان الي عرفناه عنه انه معه اثنين اخوان واخت صح؟
دُرر:صح
آسر:ممكن تعددي لي اسمائهم
دُرر:مهند ومحمد وحصه
هز آسر رأسه:كويس والام؟
رفعت اكتافها:ماعرف
زادت شكوك آسر حول الموضوع:معك اخوان او اخوات؟
نفت دُرر:لا انا وحيدة امي وابوي
هز رأسه:متأكدة؟
دُرر:الي اعرفه اني طول حياتي عشتها بدون لا اخوان ولا خوات وماعرف اذا كان لي اصلًا
كمل آسر اسألته عشان يثبت صحة كلامه:جدتك اسمها صفيه؟
دُرر:ايه صفيه
ثبتت شكوك آسر وعرف انها اخته الي لو لاها هو مو بمنصبه الحين هو ماقرر يصير عسكري الا عشان يبحث عنها خلخل يده بشعره مو عارف كيف يبدأ مو عارف كيف يصارحها مو عارف وش بتكون ردة فعلها اذا عرفت
توترت دُرر من سكوته انتبه لها سلمان ونطق:بشر وش وصلتوا له؟
تنهد ينطق:حنان بنت طلال آل هادي متوفيه من سنة 2005 شهر8 يوم16 اي من 19 سنه
نطقت دُرر بصدمه:هذا يوم ولادتي
كمل يسترسل بكلامه:فيصل بن سلطان ال ثنيان توفى سنة2024 شهر12 يوم3 اي قبل سبع ايام
شدت على يدها تتكلم بغصه:س.سبع ايام كيف؟
آسر:توفى بمرض خبيث الله يرحمه
رفعت انظارها لسلمان:يعني جدي كان يكذب علي طول هذي المده!
مارد سلمان عليها كيف يرد وأيش يقول بالضبط،رفع انظاره لآسر:متأكد انه هو نفس الشخص؟
هز آسر رأسه:متأكد مئه بالمئه
سلمان:بس كيف عرفتوا بهالسرعه ماكملتوا اربعه وعشرين ساعه
دُرر ببريق من الامل:صدق يمكن انكم مخلبطين بين ابوي وشخص أخر
نفى آسر:احنا اخذنا العلم من أبنه نفسه
دُرر:بس انا ماعندي اخوان
آسر:لا عندك أخ واحد واكبر منك ب سبع سنوات
سلمان:متأكدين لانها ماعندها اخوان كيف تقولون من أخوها
آسر:قلتلكم متأكدين واذا مو مصديقيني نقدر نسوي فحص DNA
ناظر سلمان دُرر ينتظر ردها على كلامه
نطقت دُرر بعد تفكير:وينه فيه طيب؟
آسر:موجود قدامك
سكتت بصدمه تتجمد اطرافها بصدمه بعدم تصديق
نطق سلمان:تمزح معنا صح؟
آسر:والله مامزح معكم ماني بزر امزح بالامور ذي وادري انكم مو مصدقيني بس انا مستعد اثبت لكم والله اني من وقت ماعلمني ابوي عنك يادُرر اني ماوقفت تفكير فيك واني مادخلت العسكريه الا عشان ابحث عنك بنفسي انا بسبب رفض ابوي انه يعلمني مكانك او انه يخليني ابلغ عليك وهذاني احلف لك والله اني صادق بكل كلمة قلتها الحين والكذب ماهو من شيمي ولا شيم ابوي ولا يمسني انا شخصيًا كوني عسكري بس والله هذاني حلفت اقولها وانا صادق أسمي آسر بن فيصل ابن سلطان آل ثنيان
تقدم سلمان بينطق بس قاطعته دُرر:انا مصدقتك
سلمان:بس دُرر واذا طلع يكذب ماتقدرين تأخذين بكلام شخص هذا ثاني لقاء بينكم
دُرر:بس كلامه كله على بعض منطقي مو ملاحظ،كيف جابوا المعلومات بسرعه،واصلا وش بيستفيد لو كذب علي بالنهايه بنعرف بنعرف
سلمان:هذا مو مبرر ان كلامه صح
ناظر آسر لدُرر:تعرفين شكل ابوك؟
هزت رأسها:ايه معي صور له هو وأمي
اخذ آسر جواله وبدأ يعرض لهم صور له وهو صغير مع امه وابوه وبعد ماكبر وفديوهات:صدقتوني الحين؟
شدت على يدها نزلت منها دمعه وهي تشوف صور كثيره لاهلها ماكان معها الا صورة وحده لامها وابوها والحين تشوف لهم مقاطع فديو وصور كثيره وهم يضحكون ومستانسين والظاهر هذا كله قبل لا هي تجي على الدنيا
ناظرها سلمان:دُرر
مسحت دمعتها الي نزلت بسرعه
ناظر آسر لسلمان:تقدر تطلع شوي بكلم اختي بكم كلمه
ناظرها سلمان يشوفها تهز رأسها بمعنى عادي اطلع
طلع سلمان ووقف آسر يمشي ناحيتها وقف قدامها ينزل نفسه لمستواها فتح فمه بينطق:م...
قطعت كلامه وقت ارتمت بحضنه وهي تبكي غمض عيونه يحاوطها بيده ويشدها لحضنه مرت دقايق وهي تبكي وتشاهق بين احضانه حاوط وجهها بكفوفه يبعدها عنه:مصدقتني؟
هزت رأسها:ايه
آسر:لا تعلمين احد من اهلك
دُرر:ليه؟
آسر:انا بعلمهم بس مو الحين،تمام؟
دُرر:تمام
رفعت جوالها تناظر للساعه:الساعه سبعه لازم ارجع المزرعه
هز رأسه يقبل رأسها:انتبهي على نفسك
وقفت تطلع وآسر خلفها قابلوا سلمان متكتف ومرتكي على الجدار رفع سلمان انظاره لهم:نروح؟
آسر:بكلمك يسلمان قبل تمشون
تقدم منه سلمان وابتعدت دُرر توقف بعيد عنهم
سلمان:بغيت شيء؟
آسر:بس بطلبك طلب صغير
سلمان:آمر
آسر:مابي اي أحد من أهلك يدري بالموضوع ذا
رفع سلمان يده على خشمه:على خشمي
حط آسر يده على كتف سلمان:عليه الشحم،انتبه لدُرر
سلمان:في عيوني هي لا تأخذ هم