هيَ التي علمتني كيف اعشقُها

البارت الثامن عشر

دخلت حماس غرفة دُرر:دُ...
سكتت تحط يدها على فمها عشان مايطلع صوتها وقت شافت غيث جالس على السرير ودُرر الي غلبها النوم من التعب ونامت بحضنه
ناظرها غيث ينطق بهمس:تبين شيء؟
هزت حماس رأسها تنطق بنفس الهمس:عمتي عائشة تبيك أنت ودُرر
غيث:قولي لها الحين جاي
طلعت حماس تسكر باب الغرفه خلفها
نزل غيث دُرر على السرير يلحفها باللحاف،نزل رأسه يقبل رأسها وهمس:تصبحين على خير
طلع يسكر الليت والباب وراه،نزل تحت يشوفهم منتظرينه بالصاله وهاجر وأهلها رجعوا مزرعتهم،رفعت ام غيث انظارها له:تعال أجلس
تقدم غيث يجلس مقابلها:سمي
ناظرت أم غيث حوله:وينها قليلة الأدب مانزلت معك؟
غيث:كلامكم مو معها الحين معي أنا
ام غيث:لا معها تضرب بنتي وتتوقع بخليها
غيث:يمه لو أحد حكى عن ابوك بالشينه بتسكتين له؟
ام غيث:مو هذا موضوعنا
غيث:إلا موضوعنا<أشر على لمار الي متوسطه حضن امها وتبكي>بنتك غالطه على أبوها الله يرحمه وش تبينها تسوي،تجلس تناظر فيها؟
نطقت لمار بدموع:كذابه جالسه تتبلى علي
ام غيث:اي بالله كذابه بنتي ماعمرها غلطت على أحد
غيث:اذا مو مصدقتني اسئلي البنات الي كانو معهم
ناظرت أم غيث ميار:صدق الكلام الي قاله؟
هزت ميار رأسها:صدق لمار الي بدت وغلطت عليها وعلى ابوها
استغفرت أم غيث ونطقت الجده صفيه:لك ساعه تتحسبين وتدعين على البنت، أخر شيء بنتك الغلطانه
وقف غيث ينطق موجه حكيه ل لمار:وأنتي أخر مره اشوفك تنطقين كلمه لها سواء كلمه زينه ولا شينه تفهمين؟
ام غيث:عجيب والله تهاوش أختك عشان هذيك الي ماتنتخي
تنهد غيث يمسك نفسه يطلع فوق تاركهم يتهامسون تحت عن الي صار
فتح باب غرفة دُرر شافها جالسه بعد مابدلت فستانها،أبتسم ينطق:صحيتي؟
رفعت انظارها له تهز رأسها تنطق بتعب:حلمت بكابوس
تقدم منها غيث يجلس على السرير يمد يده يرفع خصلة شعرها الي تمردت تنزل على عيونها:تعبانه تبين شيء تشربينه؟
نفت برأسها تنطق:لا أبي ارجع أنام بس
تقدم غيث يطبع قبلة على خدها:تصبحين على خير يعيوني
حطت دُرر يدها على خدها مكان ماقبلها تشوفه وهو يطلع من الغرفه ضمت المخده بخجل تنفي برأسها:مستحيل
رفعت انظارها للباب وقت فتح تدخل منه سارة وهي مستغربه قفلت الباب تناظر دُرر:وش كان يسوي عندك؟
نفت دُرر:مو شيء مهم
تقدمت منها سارة تجلس على السرير:كيفك الحين؟
دُرر:أحسن
ساره بتشكيك:صار شيء بينك وبين غيث
ضمت دُرر ركبها لصدرها:تصدقين،مدري بس أحس أبي اعطيه فرصه
انصدمت ساره:هددك مرة ثانيه؟
نفت دُرر بخفه:لا لا،بس أشوف أنه ممكن يطلع كويس وانا ظالمته
مدت سارة يدها لجبهة دُرر:مسخنه؟
ضحكت دُرر:شفيك
نفت سارة برأسها:لا لا مو صاحيه أنتي،أكيد مسوي لك شيء
دُرر:لا والله مو مسوي شيء
أبتسمت سارة ترفع اكتافها:بكيفك الي تشوفينه مناسب سويه

"5:44 الفجر"
طق عبدالله باب غرفة أمه يدري انها صاحيه بهالوقت عشان صلاة الفجر فتح الباب يدخل وقت سمحت له يشوفها جالسه تقرأ قرآن على الكنبه:صبحك الله بالخير يمه
قفلت حصه القرآن تحطه على الطاوله تبتسم تناظره:صبحك الله بالنور<فتحت يدينها له>:تعال
دخل عبدالله يسكر الباب وراه ابتسم يتقدم يجلس بجانبها يحط رأسه على صدرها:يمه
خلخلت حصه يدها بشعره:وش تبي
ضحك عبدالله بخفه:الواحد مايشتاق لأمه
أبتسمت حصه:ماتجيني انت واخوانك إلا اذا بغيتو شيء
عبدالله:الصدق اني ابي شيء
حصه:اي بالله اني دريت وش تبي
عبدالله:بغيت أخطب يمه
أبتسمت حصه:منهي الي تبيها؟
عبدالله:أبي ميار
نطقت حصه بحده:بنت عائشه
استغرب عبدالله ينطق:ايوه شفيها؟
نفت حصه:مابيك تأخذها شفت لك بنتٍ ماشاء الله عليها
عدل عبدالله جلسته:بس يمه انا أبي ميار
حصه:وأنا مابيك تأخذ من بنات عائشه
مسك عبدالله يدها:بس يمه انا ابيها
حصه بحده:ان كانك خذيتها فلا أنا أمك ولا أعرفك
أنصدم عبدالله ينطق:عطيني سبب واحد بس يخليك ترفضين
حصه:لأنها بنت عائشه هذا أكبر سبب يخليني ارفضها
عبدالله بعدم اقتناع:بس يمه مو منطقي أنك بتمنعيني منها عشان أمها،اذا كان بسبب تصرفات أمها فأنا احلف لك أنها مو نفسها
حصه:عبدالله خلاص أنا قلتلك بكلمتي
عبدالله:يمه تكفين فكري
حصه:حتى لو فكرت قراري مستحيل أغيره
وقف عبدالله يطلع وهو مو مصدق مو مقتنع بسبب أمه مادخل عقله،دخل غرفته يتمدد على السرير بضيق يفكر وش يسوي وش بتكون ردة فعل ميار أذا عرفت مليون فكره وفكره تدور برأسه ومايقدر يعصي أمه،هذي أمه بالنهايه

"5:36م العصر بالصاله"
كلهم مجتمعين من بنات وعيال واهاليهم
نزلت ميار من فوق:دودي
لفت عليها دُرر الي كانت تسولف مع سارة:لبيه
تقدمت منها ميار:تكفيين سويلي عضيتك هذيك الي مدري كيف
دُرر:من عيووني أذا ماسويت لك اسوي لمين أنا
أرسلت لها ميار بوسه في الهواء:أحبك
أبتسمت دُرر بخفه:أموت فيك،أمشي بس
تقدم ميار تجلس على الأرض عشان تعضي لها شعرها نطقت الجده حصه:ألا مافكرتي متى بيكون عرسك؟
تدخلت أم غيث تنطق: ان شاء الله بع....
قاطعتها دُرر وهي تعضي شعر ميار:فكرت
الجده صفيه:متى قلتي
دُرر:مابي عرس
انصدموا كلهم ونطقت الجده صفيه:ليه عسى ماشر
دُرر:مو شر ان شاء الله،بس أنا مابي عرس أبي عزيمه بالمزرعه وصلى الله وبارك ليه التكاليف
حصه:وش تكاليفه هذا عرسك يابنت مامن تكاليف
ام سلمان:صدق هذا اليوم كل بنت تحلم فيه عشان تعيش لحظة أنها تكون عروس وتنزف،ليه ماتبين؟
دُرر:ان...
قاطع حديثهم دخول غيث
ام غيث:الله جابك
ناظرها غيث:ليش وش صاير؟
ام غيث:زوجتك ماتبي عرس،تقول عزيمه وانتهينا
تنهد غيث يطلع فوق:دُرر تعالي وراي أبيك بكلمتين
وقفت دُرر تطلع خلفه دخل غرفته وهي دخلت وراه:تبي شيء؟
سكر باب الغرفه يلف عليها وينطق:صدق الي قالته أمي؟
هزت رأسها:صدق
تقدم ناحيتها غيث:والسبب؟
تراجعت دُرر للخلف ترتطم بالجدار وغيث امامها:أبعد اول شيء
تجاهلها غيث يقترب أكثر يحاصرها بينه وبين الجدار ويكرر سؤاله:السبب؟؟
صدت دُرر برأسها:مافي سبب أنا مابي وبس
حط غيث يده تحت فكها يخليها تناظر:عشان سلمان؟
دُرر:ل..
نطق غيث بحده يقاطعها:للحين تحبينه
دُرر:مو سالفة أني احبه
ضحك غيث بعدم تصديق:للحين تحبينه وهو مو طاق لك خبر ماكلف على نفسه يعارض ماتكلم مانطق بحرف واحد،تتوقعين أنه يحبك؟لا طبعًا لو يحبك صدق كان سو المستحيل عشان يبطل زواجنا بس هو لاعب عليك وانتي بكل بساطه صدقتي
دُرر:غيث خلاص
غيث:لا مو خلاص دُرر افهميني تكفين،سلمان مايبيك
دُرر:وأنا مابيه
غيث:كذابه،موافقتك على زواجنا أكبر دليل أنك تحبينه للحين
ضربت صدرها تنطق بحرقه:وهذا أكبر غلط سويته بحياتي أني وافقت عليك
مسك غيث يدها يشد عليها:مو غلطه وأنا بثبت لك هذا بعد زواجنا
دُرر:مابي أسوي عرس ياغيث
غيث:أذا عشان سلمان ا....
قاطعته تنطق:مو عشانه،عشاني أنا أنا للحين مو مصدقه فكرة زواجنا والطريقه الي تزوجنا فيها ياغيث
غيث:هذا مو سبب مقنع
دُرر:مو مقنع بالنسبه لك بس مقنع بالنسبه لي،غيث أنا للحين أحاول اتقبل الوضع بس ماقدر،فكرة أني بنزف لشخص أنا مابيه توجعني وتوجعني كثير
ترك غيث يدها:بكيفك الي تبينه
شبكت يدينها ببعض:طيب وأمك؟
غيث:ماعليك من أحد أهم شيء هذا الي انتي تبينه
دُرر:طيب ممكن تبعد شوي؟
غيث:ليه مايعجبك قربي؟
دُرر:أنت كلك ماتعجبني وقفت على قربك
ضحك غيث بخفه:ماتذكرين وش صار البارح،ولا تبيني اذكرك
دُرر:وش صار ماصار شيء
غيث:نمتي في حضني البارح ولا فقدي الذاكره
توردت خدودها:تكذب
غيث:لا بالله ماكذب،يالبييه كان احلا حضن في حياتي
نطقت دُرر بخجل:غيث وجع
ضحك غيث يتراجع للخلف:والواضح أنه عجبك لأنك نمتي وماحسيتي بنفسك
دُرر برتقيع:هو لأني كنت تعبانه ولا من زينك انت وحضنك
غيث:ايه واضح واضح
تقدمت دُرر تطلع من الغرفه:كريييه
ضحك غيث يتمدد على السرير يحط يده تحت رأسه وبيده الثانيه ماسك فيها طرف شنبه:مردك بتحبيني يابنت فيصل

انتهى...

____________________________
اعتذر البارت قصير بس منشغله مره الفتره ذي وانتم خير من يعذر