هيَ التي علمتني كيف اعشقُها

البارت الرابع والعشرين

"قراءه ممتعه للجميع"

"الساعه 5:39م"
رن جرس البيت
استغربت دُرر تنطق:مين الي راح يجي الحين؟
وقف آسر وطلع يشوف من الي عند الباب عبست ملامحه وقت فتح الباب وشاف غيث قدامه ناظر ليد غيث:وين ماشوف شيء معك؟
غيث:ممكن نتكلم بهدوء ونتفاهم
آسر:ليه انت تفاهمت مع اختي؟
غيث:اعترف اني غلطان بس خلني ادخل ونتفاهم انا وهي
ضحك آسر بخفه:تتفاهمون؟او قصدك تهددها نفس المره الي فاتت؟
غيث:سويتها مره ومستحيل ارجع اسويها مره ثانيه
آسر:راح اخليك تتكلم معها ولكن صدقني اذا عرفت انك هددتها او قلت لها كلمه وحده
حط آسر يده على كتف غيث:والله مو حاصل لك طيب

"دُرر"
كانت جالسه بالصاله ورفعت أنظارها للباب الي فتح وماكان خلفه الا غيث توقعت انه راح يجي لأنه مستحيل يسكت عن هذا كله
وقفت دُرر تنطق:أسمع قبل لا تحاول تسوي او تقول شيء أعرف اني مستحيل أسمع لك المره هذي
تقدم منها غيث يشدها لحضنه:مو مهم الحين
أنصدمت دُرر تنطق:غيث!وش جالس تسوي تدري انك راح تطلقني الحين!
أبتعد غيث وحط يده على أكتافها:تكفين اسمعيني والله اني نادم والله
دُرر:تدري ان الطريقه الي تزوجنا فيها غلط صح؟
غيث:انا غلطان انا الي غلطت عاتبيني مثل ماتبين بس تكفين لا تتركيني
دُرر:غيث انت مهددني بحياة شخص تذكر وش قلت لي!قلت لي لو ماوافقت عليك مو جاي الصبح الا وسلمان بالمستشفى!
غيث:ووافقتي علي عشانه لأنك تحبينه ماتبينه يتأذى
دُرر:مو لأني احبه انا سبق وقلتلك اني معد احبه
غيث:بس كلامك ماكان طالع من قلبك وقتها وحتى الحين
كمل كلامه:انتي لو كرهتيه صدق كان حاولتي فيني أطلقك
دُرر:ماحاولت فيك لأني ادري انك راح تسويها،وانا مابي أحد يتأذى بسببي
غيث:والي متأذي قدامك بسببك
دُرر:انا الي المفروض اقول اني متأذيه بسببك
رفع يده يحاوط وجهها:لا تكسرين قلبي فيك تكفين
حطت يدها على يده:والي قلبه كل ماتوقع انه التحم يرجع ينكسر؟
نطق غيث بصوت مبحوح:لا تخليني تكفين!
ناظرت لعيونه الي تحولت للون الأحمر وأنصدمت لـ الدمعه الي تمردت تنزل على خده لأول مره تشوفه يبكي قدامها رفعت يدها تمسح الدمعه الي على خده:غيث خلاص
حاوطها بيده يرجع يحضنها ويشدها لحضنه ودُرر الي للحين مافكرت تبادله الحضن
غيث:بادليني على الأقل
رفعت يدها تبادله الحضن وأبتسم غيث بعز ضيقته:احبك والله اني احبك
دُرر:ممكن توعدني بـ شيء؟
ابتعد يناظرها:أمري
دُرر:اوعدني انك ما تأذي سلمان
غيث:اوعدك انه مايمسه أي أذى مني
دُرر:أستودعتك الله
غمض عيونه يشدها له وهو يسمع كلامها الي كأنه سكينه تخترق قلبه:بتلقى لك أحد ثاني الي يحبك وهمه انت وقلبك
غيث:مستحيل القى شخص مثلك
دُرر:لا تعلق قلبك بشخص وانت عارف انكم مستحيل تجتمعون
غيث:دام الشخص الي قلبي متعلق فيه هو انتي فـ راح ابقى متعلق فيه لين مايجي يومي
تنهدت تنطق:اتوقع ان كلامنا انتهى خلاص
أبتعد عنها يناظر عيونها العسليه الي لطالما احبها دخل يده بجيب ثوبه وطلع جوالها يمده لها:نسيتيه
نفت برأسها تنطق:مانسيته بس مابي شيء يذكرني فيكم
أشرت على جوالها الي على الطاوله:اخوي شرا لي جوال وشريحه جديده خله هذا معك
غيث:وش اسوي فيه؟
رفعت اكتافها:ارميه اكسره مو انت عساس تبي تفتشه؟حلالك فتشه مثل ماتبي
مسك يدها وحط الجول بيدها:انتي الي ارميه واكسريه ومستحيل اشك فيك عشان افتشه
دُرر:ممكن تطلع الحين؟
تقدم يطبع قبله أخيره على خدها:استودعتك الله ياقلب غيث
حطت يدها على خدها تناظره يبتعد يطلع ،طلعت تركض خلفه ناظرته للحين ماطلع وجالس يتكلم مع آسر:غيث
ناظرها غيث ينطق:لبيه وسمي ياعيون غيث، لعل قلبك حنّ؟
دُرر:طلقني
غيث:ورقة طلاقك راح تجيك بكره الصبح
دُرر:قصدي الحين ابي أنام وانا مرتاحه اليوم
غيث:ابشري وأنا ماعمري رفضت لك طلب،انتي.....
سكت شوي اختفت كل حروفه مو قادر يقولها مو قادر يتخيل انه راح يطلقها حس بغصه بحلقه قلبه يحرقه مليون مره لأنه ماقدر يصونها ماقدر يخليها تحبه لأن كل الألم الي عاشته كان بسببه هو مو شخص ثاني والي كان متوقعه ان الي كان يسويه هو الصح وانه بهذي الطريقه راح يكسب قلبها وحبها له بس طلع العكس كرهته أكثر من قبل و كل شيء كان مخطط له أنقلب ضده بالنهايه ومين الي أنتصر بالمعركه بالنسبه له؟سلمان،سلمان الي من وهم صغار ماكانوا يواطنون بعض وإلى الأن سلمان الي يأخذ كل شيء غيث يبيه من وقت ماكانوا صغار وإلى الحين،كسب سلمان على جوهرة غيث حبيبة قلبه او هذا الي كان متوقعه
أخذ نفس يهدي فيه نفسه وغمض عينه ينطق بالقوه:انتي طالق طالق طالق
غمضت عيونها براحه وهي تسمعه ينطق الكلمه الي لطالما انتظرتها من زمان:وأخيرًا
صد غيث يتراجع يطلع من البيت بكبره كان رايح لسيارته الي واقفه امام الباب بالضبط لكن وقف من شاف سياره وقفت ونزل منها سلمان الي طاحت عيونهم ببعض لمده ثواني صد سلمان يدخل داخل وناظره غيث لين مادخل وصد يركب سيارته يضرب الدركسون وينطق بعصبيه وقهر:أخذها أخذها أخذها!
حط رأسه بتعب على الدركسون يناظر للباب الي دخل منه سلمان وهو كله حسره على نفسه لأنه ضيعها من يده كانت زوجته كانت حليلته!