المذكرة 19
شحال عزيز عليا الناس لكيفهمو راسهم
دار نسابو؟ عبلة قلبات ليا الراس و سدات ليا الشهية بهاد الخبار على الصباح ! كنكره نصبح او نمشي على هضرة خايبة ! انا من النوع لكيمثل مامسوقش قدام الناس و لكن اي كلمة تقالت ليا كتبقى تحفر فيا لداخل بالايام ! جمعت و طويت عبلة باش تمشي بحالها ! بانت ليا عبلة فاتت الحد فالتعلق بهارون و ماشي غير هي ! البنات كلهم ! انا وريتهم فين كيكون غابر و هوما مشاو كيقلبو فقلب الدار شكون كاين تماك !
هاد الخبار تكون جاية غير من جميلة ! باينة ! هي من نهار وريت البنات ديك الطريق و فين كيكون و من فين كيتقدى و هي زادت بغضاتني ! حاجة عادية، البنات كلهم قلبو عليها و تجمعو عليا ! وحتى هادوك لبقاو معاها ماكرهوش بجلسو معنا ! ولكن مارضاوش بيا ! او يمكن مارضاوش يبانو صحاب حاجتهم !!
كل وحدة فيهم تماك كتضرب على عرامها و كتنش على كبالتها ! و جميلة من النوع لي اذا ماكلاهاش يحرمها على كلشي ! و وارد تكون دارت هاد الحاجة باش تعاود تجر البنات عندها او باش تفقصهم حيت قلبو عليها !!
فنفس الوقت منين كنتفكر انه فكل مرة كيتقدى شي حاجة عاد كيمشي لديك الدار كنخاف و قلبي كيتزير ! يكون كيتقدى لنسابو؟ او هي كاينة تماك و داكشي ليها؟ طيبت الخبز مرفوعة و بطا عليا فوقاش نمشي لدار المعلمة باش نعرف شنو هادشي لطاري و شنو كيدور تماك ...
وصلات الوقيتة و طرت لدار المعلمة ! حتى السعدية ماتسنيتهاش ! اساسا من نهار غيبت ديك تلات ايام و هي كتمشي راسها موراها ماعاودتش قلت لها دوز عليا و واقيلة فهمات راسها ! شحال عزيز عليا الناس لكيفهمو راسهم ....!
غير دخلت بانو ليا البنات مجموعين على جميلة ! فهمتها طايرة ! داكشي لشكيت فيه هو لكاين ! هادي كدبة قالتها باش ترجعهم عندها ! البنات غير شافوني جيت و تكبو عليا كيسولو !
==============
شريفة : باش غادي نعرف انا !
ادريسية : شريفة ياك انت لوريتينا الدار ودابة بلا ماتخبي علينا الى عارفة شي حاجة قوليها !
عبلة : وا ويلي راه قلت لكم مافراسها والو ! مالكم ماكتيقوش !
فاطمة الزهراء : شريفة ! عمرك شفتيه خارج مع شي وحدة من تماك؟ (قربات لها اكثر بصوت خافت) جميلة قالت بلي تماك ساكنين والدين البنت لباغي يتزوج بيها !
شريفة : و باز ! ايوة تقوليكم شكون هوما ! علاش كتوسولوني انا
عبلة : وا هي قالت لهم سيرو عند شريفة لتابعاه و كتعطيكم الخبار عليه !
شريفة : تابعاه !!! لا هادي كتقلب عليا !
عبلة : وناري غادي تندميني حتى قلت لك ! صافي !
أنت تقرأ
مذكرات شريفة | Sharifa's Notebook
General Fictionاخشى ان استيقظ في الاربعين لأجد انني ضيعت حياتي بسبب خيار خاطئ اتخذته و انا في سن العشرين ....! (د.ا.خ.ت)
