المذكرة 28
كوني لالة يصفقو لها اليدين ماشي مغبونة يمسحو فيها الرجلين
===============
هارون : (حاط قلم الرصاص فودنيه) ميمة دخلي فحالك ! (شدها من دراعها) دخلي هادو راه مسالين !
الجدة : بلاتي نشوف ! هاديك واقيلة عرفتها عتيقة !
هارون : اش تعرفي فهادو الميمة ! دخلي بحالك !
الجدة : شفتك باغي تحكمني ! دخل شد غير امراتك شوية تلقاها خرجات هاربة !
هارون : ههههه ! ويالاه عفاك دخلي !
الجدة : دخل غير انت ! خليني نشوف شكون هادو (مشات)
هارون : (ساط و دخل)
================
مكرهتش فهاد اللحظة الارض تشق و تبلعني ! شي طير ينزل و يخطفني ! الخلعة و الاحراج و الشوهة و دابة كملات منين شفت جداة هارون جاية ! لا انا لا البنات جمدنا ! ام عبلة دخلوها لدار المعلمة و عتيقة كيجروها العيالات الاخرين يمشيو !
انا و البنات دخلنا بحالنا ! حتى وحدة ما رضات تبان فهاد الموقف قدام جداة هارون ! المعلمة كتهدن سعيدة لداخل و انا و البنات طلينا من الشرجم بالتخبية نشوفو واش جداة هارون مشات او باقة ! تسمرنا كاملين ! منين شفنا جداة هارون وقفات كتدوي مع عتيقة و جميلة حداهم ! العيالات تفرقو و خلاوهم بتلاتة واقفين !
==============
الجدة : عتيقة؟
عتيقة : لالة اصيلة ! (كتسلم عليها) كيبقيتي شوية و كي بقا مول الدار ؟
الجدة : الحمد لله ! ياك لباس ! مع من هاد الدباز؟
عتيقة : (ضربات جميلة لكتفها) سلمي !
جميلة : (شدات يديها باستها)
الجدة : يبيض سعدك ا بنتي ! (شافت فعتيقة) ياك لباس !
عتيقة : (شدات فعينيها) وها انت كتشوفي الحگرة ا لالة اصيلة ! بنت اختي دخلتها لهنا تعلم الصنعة ! ناضو شي بنات هنا تحاماو فيها و باش كملوها و جملوها وحدة فيهم جابت امها و ماخلاتش لجميلة بالمعيور ! وهي هادي لدابزت معها ! انا مادياليش هاد الشوهة و الغوات فالزناقي ! ولكن باش يحگرو بنت اختي و انا فالحياة هادي مانسكتش عليها ا لالة اصيلة ! الا الحگرة !
الجدة : ماتبكيش ا عتيقة ! الله يرضي عليك ! شوفي بكيتي البنت معك (جرات جميلة لصدرها كطبطب عليها) صافي ا بنتي الله يرضي عليك !
عتيقة : اربع ايام دابة و هي مريضة بالفقصة ! وانا كنقول الله يسامح دابة تفوت ! دابة تفوت ! حتى لقيتها خايفة ترجع لهنا ! قالت ليا خالتي راه كيحگروني البنات تماك و ماكيخليونيش نتعلم فخاطري !
أنت تقرأ
مذكرات شريفة | Sharifa's Notebook
Ficção Geralاخشى ان استيقظ في الاربعين لأجد انني ضيعت حياتي بسبب خيار خاطئ اتخذته و انا في سن العشرين ....! (د.ا.خ.ت)
