بحال ريح البحر فحر الصمايم
المذكرة 48
بحال الگمرة فليلة كحلة و بحال عوينة الما فصحرا خالية و بحال ريح البحر فحر الصمايم ! هدا هو هارون و هدا حالي معه ! ادا شفتو عيني كضوي و اذا سمعت صوتو روحي كتغني !
وقف الزمان بيا وانا كنتأمل ملامحه قدامي ! كأنه غاب قرن و مرة اخرى تمنيت لو كان ديالي ! حلالي و من نصيبي ماكنتش نتردد ثانية نرمي راسي عندو ! بحال قطرة العسل على قلبي جا خرجني من الغمة لي انا فيها ! مرة اخرى غير شفتو نسيت همي و علاش كنت مقلقة !
==============
هارون : اختي ؟؟
شريفة: اه اه ! اه كاينة ! كاينة ! تدخل؟! لا زعما واش نعيط لك عليها او ندخل انا ؟؟ زعما تدخل انت ؟؟
هارون : لا غير قولي لها تعطيني ساروت بيت الخزين !
شريفة : واخة !
هارون : شكرا !
شريفة : (دخلات كتجري عندهم) لالة اصيلة ! هارون ولدك...حفيدك ! هو لدق ! بغا ساروت الخزين قاليك !
اصيلة : جا بعدا (وقفات) امتى جا ؟؟
راضية : اصيلة عيطي ليه يجي يتغدى !
اصيلة : لا ويلي ا راضية ! انا مايسحابنيش جا دابة ! قالي حتى لغدا (مشات)
راضية : علاش ويلي (تبعاتها) خليه يجي ! ها حقو كاين !
عبلة : لالة اصيلة انا نسخن ليه دغيا !
راضية : لا بنتي الله يرضي عليك ! (خرجات عندو) هارون ! امتى جيتي حبيبي !!
هارون : (باس يديها) شي ساعة دابة ! ميمة خاص نعطي مارسي تاكل ! قالت ليا خالتي حليمة حطيتي ماكلتها فالبيت !
راضية : هارون ولدي لباس؟
هارون : لباس (باس يديها)
راضية : الله يرضي عليك ! دخل عفا اولدي تغدا ! حقك كاين ! (عبلة كتنغز فيها من اللور)
هارون : لا شكرا مغدي !
راضية : وا دي معك حقك الله يرضي عليك !
عبلة : (مورا ظهرها بشوية) انا نعمر ليه دغيا !
اصيلة : لا راضية بلا ما تشقي راسك ! زد انا نمشي معك !
هارون : خليك عطيني غير الساروت !
اصيلة : لا صافي زيد هدا الوقت !
راضية : اويلي ماجلستي والو ا اصيلة ! كملي غير كاسك !
اصيلة : شربت الله يخلف ا اصيلة ! هدا الجهد !
هارون : (تحرك) انا سبقتك !
اصيلة : البنات نسلم عليكم (باستهم) الله يرضي عليكم و سمحو ليا على تمارتي !
أنت تقرأ
مذكرات شريفة | Sharifa's Notebook
General Fictionاخشى ان استيقظ في الاربعين لأجد انني ضيعت حياتي بسبب خيار خاطئ اتخذته و انا في سن العشرين ....! (د.ا.خ.ت)
