قبل ما تدويو على فعالنا شوفو فعالكم
المذكرة 70
عبلة تحركات معايا حتى للدار ! لا انا ولا هي تفهمات لينا بثينة فهاد اللحظة ! كيفاش هي كانت رافضة تزوج و باغة دير مشروع ديال الخياطة ديالها و دابة ترشمات و غادي تخطب !!
=============
عبلة : وا غير عقلي على هضرتي ! ماغاديش تكمل ! نقطع دراعي الى وافقات على الرشيم غير باش تحيد عليها تهمة هارون و الشمعة لشعلاتها عليه !
شريفة : ا عبلة بعقلك !!! غادي ضحي براسها مع واحد على ود هارون ! ماشي لهاد الدرجة !
عبلة : وماشي على ود هارون ! وا فهمي ! باش زعما تبت لينا بلي السعدية كدبات عليها ! واخة راها غير كترگع ! صافي قلنا لها تقنا بيك و كدبنا السعدية ! ماعرفتش شنو باغة تصنع حتى هي !
شريفة : (تنهدات) مهم مانحكموش حنا حتى تجي و نعرفو منها ! ماتعرفي ربما تكون بدلات ريها ! او عجبها هدا لرشمها !
عبلة : وا منعرف ! انا ما بانش ليا ! يالاه ها انت وصلتي ! انا غادي نرجع حتى العشية و عاودي ليا على الاخرى كيفاش حتى خطبها داك الدهايبي !
شريفة : ضبر راسها ! انا عائلتي شحال هادي خرجت سوقهم ! واخة عارفاهم دابة غادي يدورو ليا !
عبلة : ماديهاش فيهم ! اصلا يالاه تخطبات حتى تكمل بعدا و ديك الساعة و يهزو علامها !
================
دخلت للدار كنخمم عاود فهاد خبار السعدية ! مابياش هي ! بيا ماما لغادي يشعلوها عاود ! وفعلا مع الدخلة مع لقيت امراة عمي كتلاج مع جداتي و ماما فالصالون ! مادخلتش عندهم و دخلت لبيت ماما جلست تماك كنسمع اش كيقولو !
===============
نجية : وا خالتي دابة علاش مابغيتش تيقي ! وا والله الى جا مزروب داكشي ! و انت كنت ففاس و حتى دابة باقي ماعطيناها ! غير خطبة صغيرة بيناتنا ! ماكان حد !!
راضية : ماكان حد ! غير انت و اختك و بنتك جات ! هادوك عرفتي تعلميهم و حنا لا ! نقولو عماماتها انت ديما ملاجة معهم ! هادي ولفناها عليكم ! و انا ؟ و عمها؟ علاش ماتحضريناش ؟
نجية : و العزيزة (جلسات حداها) والله العظيم الى هو جا غير دوا فيها و درنا عشا دغيا و اختي عيطت لها غير باش تعاوني و اختها خلاص راه كانت جاية بخطبة و بلا خطبة طل علينا !
راضية : وفين هي لالة العروسة ! مالها ماجات معك؟ صافي نسات حبابها باقي حتى ماراحت عندو !!
نجية : لا خالتي ! راه خليتها مشات القيصارية مع ختها ! ماحدها هنا تقدى لخاصها لضريب الصداق !
راضية : و غادي تعرضينا لهاد ضريب الصداق اولى حتى هو غادي يكون مزروب !
نجية : اويلي انت الاولى ا خالتي (باست راسها) ربي و انت تقلقي مني ! هادوك بناتك قبل مايكونو بناتي ! انا غير منين شفت ربي يسرها ليها و هو كان مزروب باش قضينا الغرض فيساع ! و والله كن ماكنتيش ففاس حتى كن علمتك انت الاولى !
أنت تقرأ
مذكرات شريفة | Sharifa's Notebook
General Fictionاخشى ان استيقظ في الاربعين لأجد انني ضيعت حياتي بسبب خيار خاطئ اتخذته و انا في سن العشرين ....! (د.ا.خ.ت)
