العشرة بالكدوب ماكطولش
المذكرة 89
10/08/1982 مكناس
البارح مالقيناش عبلة ! عينا ندورو انا و جداتي فالجردة والو ! رجعنا قلناها لامها و درنا نرجعو عندها مورا المغرب ! من سوء حظنا جاو عماماتي بزوج يطلو على جداتي ! واخة من بعد اكتشفنا انهم جايين يعرفو اخر الاخبار علينا او ان صح التعبير عليا ! تجمع تافه و هضرة باسلة و فالجو كيبان لك الصواريخ و القنابل كتشاير بينهم و بين ماما
هاد المرة ماما ما تقلقات ماغضبات من هضرتهم على العكس مرتاحة جدا وراء الفرحة بالمواصفات لغادي تصدم العائلة كلها نهار زواجي! وماشي اي زواج ! الزين و الخاريج و الفلوس و العائلة الكبيرة ! لهدا الجملة الوحيدة لكتعاودها لهم كل مرة هي " اللخر مبخر و التالي قدرو عالي" تمهيدا للضربة القاضية لغادي تجيهم نهار عرسي !
لالة اصيلة عاودات اتصلات بينا ! وصلات للامارات و امورها مزيانة ! عطاتنا خبار على هارون انه بخير و كيسلم علينا ! دويت معها كدلك و قالت ليا الجديد ديالو ! ترخفت شوية و فرحت بخبارو و حسيت الامور مقادة بيني و بينو و كون جداتو كتعطيني خبارو و توصل لينا سلامو معناها باغيني و الامور كلها في امان الله بحال لي تفاءلت بيها انا و ماما !
====================
سليمة : (راجعين للدار) صافي دابة بقا غير مانشريو فرجليك ! غدا انشاء الله نهبطو عند اباك للقيصارية ناخدو ما تلبسي فرجليك !
شريفة : (هازة فيديها التواب) وهاد التواب ا ماما لاش !
سليمة : هادوك ليا و لامك لالاك ! نخيطوهم نحيدوهم علينا ! رمضان مابقا ليه غير شي شهورا و الخياطة كتغلى و مصاب تلقاي غير نوبتك بعدا
شريفة : (وصلو للدار) ماما انا نمشي دغيا عند عبلة و نجي واخة !
سليمة : ماشي دابة ! دوزي دخلي نصبي الغدا (حلات باب الدار) انا خاصني نجبد داك الباليزة نحيد دوك القفاطن و التكاشط البالين ! سمعتي الخياط قالي جيبيهم ياخدهم من عندي !
شريفة : (دخلات) و ماما شكون غادي يلبس البالي !
سليمة : (سدات الباب) كاين لي يلبس راه كيبيعوهم فالجوطية ! اللهم نربحو فيهم و لا يمشيو خسارة ! (دخلات للدار) السلام عليكم !..... اولى ندير معه ينقص ليا فتمن خياطة هادو (خدات منها التواب لهازة).... خالتي ؟؟؟؟!!!! خالتي !! طلعي شوفيها واش فالبيت و قوليها تنزل تشوف معايا التواب !
شريفة : واخة (طلعات)
===================
حطينا طبلة الغدا و تغدينا ! مؤخرا نفس الحوارات كتعاود و على نفس الموضوع ! بابا كالعادة غير عاطي ودنيه لكن الكلام كيدخل من ودن و يخرج من ودن اخرى ! بالنسبة ليه ماحدو مادواش مع هارون ماكاين والو و هادي هي الهضرة الوحيدة لكتردد على لسانو !
أنت تقرأ
مذكرات شريفة | Sharifa's Notebook
General Fictionاخشى ان استيقظ في الاربعين لأجد انني ضيعت حياتي بسبب خيار خاطئ اتخذته و انا في سن العشرين ....! (د.ا.خ.ت)
