كلما تقاليتي كلما توزني اكثر
المذكرة 49
30/09/1980 مكناس
من نهار عرضنا على جداة هارون و انا حالتي النفسية تدهورات خصوصا منين جداتي خبراتني بلي لالة اصيلة بغات عبلة تجي لفاس معها و شرحات ليا بلي عجباتها و باينة بغاتها لحفيدها !
عبلة قبل ما ترجع ماما بقات معنا ! وجداتي علماتها لكن ماقالتش ليها بلي بغاتها لحفيدها فقط انها معروضة لحضور الاربعين معها ففاس اذا بغات امها ! واكيد ام عبلة من المؤيدين لهاد الفكرة و قبل ماتكملها جداتي لي جات تتأكد منها واش بصح موافقة تمشي بنتها معاها قالت اه مع ابتسامة عريضة !
الاربعين غادي تجي مع ايام قرايتي و كرهت راسي ! لكن فنفس الوقت لقيت بلي ممكن نمشي بحكم يالاه بدينا يعني يومين ماشي كثيرة و ماغاديش تأثر عليا فالدراسة ! لحد الان ماقلت والو و بقيت مترددة واش نقول لجداتي نمشي معهم او لا !
================
شريفة: (دقات فالباب) امي لالة (حلات الباب شافتها كتصلي)
راضية : السلام عليكم ورحمة الله..... السلام عليكم ورحمه الله !
شريفة: الله يتقبل !
راضية : امين !
شريفة : حتى انا واقيلة خاص نبدى نصلي النوافل
راضية : مالك شارفة !
شريفة: ههه ! امي لالة النوافل ماشي غير ديال الشارفين !
راضية : (كطوي الزربية) والله يسمح لينا شحال من صلاة فلتناها و جمعناها ! عقل الصغر ! انت مازال راك بديتها صغيرة ! قدك الله يسمح ليا كنت كنجمعها فصلاة وحدة ! (باست التسبيح) ياربي تغفر ليا ! شنو هداك؟ صافي نشف؟
شريفة : اه ! كنت فالسطح قلت نهبطو ليك معايا !
راضية : حتى تصبني ليا الله يرضي عليك دا القميص الابيض و الجلابة ديالو عرفتيه ! موراها ديه ليا للمصبنة يتحدد !
شريفة: واخة !
راضية : (باستها من حناكها) وا يخلي ليا بنتي كلشي عندها واخة ! الله يبيض سعدك و نشوفك فمقام كبييييير و اولاد السلطان يدورو بيك ! نفرح بيك و باولادك ! الله يعلي مقامك ا شريفة ا بنت ولدي !
شريفة : امين ! امي لالة؟
راضية : ا امي !؟
شريفة : دابة منين غادي تمشيو الاربعين تماك واش باش زعما يشوفو عبلة؟
راضية : شريفة ! قولي لصاحبتك كلما تقاليتي كلما توزني اكثر !
أنت تقرأ
مذكرات شريفة | Sharifa's Notebook
Aktuelle Literaturاخشى ان استيقظ في الاربعين لأجد انني ضيعت حياتي بسبب خيار خاطئ اتخذته و انا في سن العشرين ....! (د.ا.خ.ت)
