المذكرة 27
سيطرو بالغوات و حكمو بالشوهة
10/08/1980 مكناس
اليوم حزمت راسي و تشجعت اني غادي نمشي نسالي هاد الموضوع ! دخلت و غوباشتي بين عيني ! صافي مليت من هادشي ! ما بغيتش نفكر فهارون حيت هو نقطة ضعفي ! وهو لكيخليني ديما نتراجع و نزيد نغرق هنا !
===============
عبلة : و ناري ا شريفة صافي طلبت منك السماحة عشرة المرات ! راه مادزتش عندك البارح حيت عرفتك مقلقة عليا قلت الى ماجاتش اليوم غادي ندوز عندها والله العظيم !
شريفة : عبلة صافي ! انا ماشي على المجية لي ماجيتيش ! انا هادشي عيت منو !
عبلة : شنو لعيتي منو ؟
شريفة : هادشي لكديرو على هارون ! صافي عيت ! ول البارح تشوهنا قدامو و انا ماشي ديال هادشي ا عبلة !
عبلة : وكلنا ماشي ديال هادشي ا شريفة ! و زايدون اش درنا ! عادي كندوزو من تماك راه هاداك لحمار بسل عليا و هارون دافع فين المشكل !
شريفة : (تنهدات) عبلة هادشي فيه الخطر على السمعة ديالنا ! ديك الخطرة شفتي المعلمة شنو دارت و دابة كن ...
المعلمة : شريفة !!!!!!!!!
شريفة : نعم !
المعلمة : اش كتوشوشو تماك ! عبلة رجعي بلاصتك ! رجعي !!!
عبلة : لا غير وريتها الطرزة لدرنا البارح !
المعلمة : تقنتيها انت بعدا باش تعلميها ! كحزي لهيه ! ثريا ! اجي ا بنتي جلسي حدا شريفة وريها شنو درنا البارح ! شريفة !!
شريفة : نعم ؟
المعلمة : هاد شدني الوجع ! ضرني راسي ! رجلي فاشلين ! اخر مرة غادي نتيق بيه ! لا انتيا لا انتوما ! كلنا كيضرنا راسنا و الوجع ديال حق الشهر راه كيجي مرة فالشهر ! ماشي انتوما كل مرة ها هي هابطة ليكم ! داك الجامع راه انا لبنيتو ! تفاهمنا؟
==============
الى كانت شي حاجة غادي تشجعني كتر نشد فقراري هو الهروب من هاد الغوات ديال المعلمة ! الله يسامحني حلقها مزعج ! كيدير الشقيقة فالراس ! ماجاوبتهاش و حركت راسي ! مابقيتش غادي ندير السبة لا بصداع الراس لا بحق الشهر ! انا ناوية نخرج فحالي بمرة ! تسالي هاد الحصة و الله يخلف ....!
=================
بثينة : المعلمة ! شي وحدة كتعيط لك !
المعلمة : (حطات المقص) يالاه كل وحدة تاخد طرف ! انا جاية ! (غادة للباب) خليو التوب الاخضر وافي ماتقيسوهش !
عتيقة : هنية لباس ؟
المعلمة : عتيقة لباس عليك (سلمات عليها) جميلة؟ على سلامتك؟ كي بقيتي؟
أنت تقرأ
مذكرات شريفة | Sharifa's Notebook
Ficción Generalاخشى ان استيقظ في الاربعين لأجد انني ضيعت حياتي بسبب خيار خاطئ اتخذته و انا في سن العشرين ....! (د.ا.خ.ت)
