قلبها هشيش كي الفلوس بلا ريش
المذكرة 100
لويت المنديل على البغرير و المسكوتة ! قلبي كيضرب ! الحماس كلو لعندي من جهة ارتباطي بهارون رجع عليا خوف ! ماعرفتش واش هاد الخوف بسبب اقترابي من تحقيق الحلم لي سكني هادي اكثر من عامين او الخوف من تلقي صدمة تكمل ليا صدمة عبلة لي باقي محفورة فيا !
==================
(خارج اطار حكي شريفة)
اصيلة : (مدات لها اتاي) ايوة كيف قلت لك خليتهم مورايا و جيت ! صافي عيت بصداعاتهم ا راضية اختي ! ها الخدمة ! ها دار الضباغة ! ها السلعة ! صافي ! الرجى فالله !
راضية : والله يهدي سرهم ا اصيلة ! ماعندك ماديري ! المراة نهار كتولد ماكتهنى ! هوما صغار تخافي عليهم و كبار تخمي ليهم ! الله يسمح لنا من الوالدين و خلاص !
اصيلة : امين (تنهدات و شربات اتاي)
راضية : كنزة كي وصلات على خير ؟
اصيلة : الحمد لله على خير ! راه خليتها مقابلة ولدها ! كانو بغاو يجيو ولايني هارون عندو شي شغل مع خالو مازال!
راضية : ايه ! الله يسهل عليه وعلى وليدات المسلمين !
اصيلة : امييين ! ايوة هدا علي قولي داها فاسية ياك ؟ منين هي يمكن نعرفها !
راضية : لا هوما غير ساكنين ففاس اما هي امها من الحوز و اباها من دكالة ! و سكنو ففاس ! ناس مزيانين ! وهو وياها خدامين بزوج ! ايوة ماعندنا مانقولو من غير الله يكمل ليهم على خير !
اصيلة : امين ! الله يفرحكم بيه و تشوفو وليداتو انشاء الله !
راضية : امين ياربي ! و تشوفي وليدات حفايدك حتى انت !
اصيلة : (تنهدات) امين ! (حطات الكاس) راضية اختي ! انا عندي ليك شي هضرة بغيت ندي ريك فيها الى جات على خاطرك !
راضية : الله اودي ! قولي نسمع !
اصيلة : دابة ! دابة هدا هارون كي شتي راه كي قلت لك كان خاصو يرصي وريقاتو والرخصة ديال المشروع تماك و يتعارف مع مالين الخدمة ! تعرفي هوما ماشي كيفنا هنا ! داكشي عندهم صعيب و كياخد الوقت و سير و اجي وتسنى ! عرفتي !
راضية : ايه ! ايه ! بصح بلادات الناس صعيب الخدمة فيها !
اصيلة : هادشي لكاين و الله العظيم ! جا مسكين حالتو بقوة الطلوع و الهبوط ! و هو عندي نفسو خايبة ! الحاجة يبغيها تكون مقادة و صحيحة عاد يهنى بيها ! كنعيا فيه وهو لي فيه مايهنيه ! نفسو حارة !
راضية : همم ! بصح ! ايوة الرجال هوما هادو ! لي مافيه نفس مافيه رجلة
اصيلة : داكشي ! ايوة اش غادي نقولك هو دابة دوى معايا ! قاليا الميمة الوقت مزيرة دابة ! راسو عامرين مطارق ! وباقي لدابة مارصاش واش يسكن هنا ! واش لهيه ! البارح الليل كامل وحنا نخممو !
أنت تقرأ
مذكرات شريفة | Sharifa's Notebook
Tiểu Thuyết Chungاخشى ان استيقظ في الاربعين لأجد انني ضيعت حياتي بسبب خيار خاطئ اتخذته و انا في سن العشرين ....! (د.ا.خ.ت)
