الفرج

13

• زينة •
طول طريق رجعتنه وهي تسولف وتضحك
ضجت من وجودهة اي
بس هيه حلوة
و رغم الاذيه العاشتهة تبتسم
وتسولف عادي
تربعت على چربايتي
حتجي تعيش ويانه
لو تبقه ببيت بيبيتهة

زين خاف ماما سميرة تعوفني وتروحلهة

اندگت الباب
- تفضل

دخلت ماما سميرة و بيدهة ماعون كليچة وگلاص عصير

سميرة - مجوعانة يمه

- هاا اي شويه

خلتهة گدامي وگالت وهي تبتسم - شفتي حور عيني

- اي شفتهة

سميرة - بعدچ تكرهينهة

رفعت كتفي وگلت - حلوة هيه بس اخاف تعوفينه

سميرة - ما اعوفكم … بس بنيتي هم ماگدر اعوفهة

هزيت راسي ب اي واني اباوع للاكل

سميرة - انتي عكسهة

باوعتلهة وهي تبتسم
اشرت للكليچة وگالت - انتي تحبين الحلقوم وهي تحب التمر بس

هزيت راسي ب اي
بدت تحچي بيهة
اضوج والله

سميرة - اريدچ تحبينهة … بنيتي تجنن والله

- كافي عفية

سميرة - شوي شوي وتعرفينهة

هزيت راسي ب اي واني عيني بالماعون

عافتني وراحت
باوعت للدخل وراهة

ابتسم بوجهي وگال - هاا

- تمدح بيهة كل ما تشوفني كافييي

سد الباب واجه گعد يمي
باوع بوجهي وگال - ما لان گلبچ

- لا ما لان ولا راح يلين مدا اگدر احبهة هيه گوة

باس راسي وگال - لا بوية مو گوة بس البنية واضح حبابة

- گول عجبتك غوث

غوث - عيب هو اني اول مرة اشوفهة

- ايي بعدين تتزوجهة وتطردوني من البيت

غوث - شنو هلحچي زينة

- متشوف نفسك طول ما احنه بالزيارة عينك عليهة

غوث - لان شفتيهة شلون متأذيه

- صح بس ………

غوث - زينة لتصيرين حقودة عيب

برطمت ونزلت عيني لأيدي

غوث - انتي شفتيهة شلون متأذية … وجهة ونوب ضربوهة بين الحرمين تتحملين هيچ

- لاا

غوث - چا اسكتي وصيري حبابة وياهة

- اوكيييي

عافني وطلع
••
مرت ايام وكل منروح لبيت حجية صبيحة منلگاهة
حابسة روحهة بالغرفة وتقرة
والبيت فارغ بس هيه وخالهة و بيبيتهة بالبيت
خالتهة رجعت لبيتهم وكلهم طشو
وبيوم السبت
فزيت الصبح على صوت اثنين بالمطبخ