الفرج

33

°حور °

اجه محرم وهديل خيطتلي ثياب سودة كأنهم فستان
بس حيل حلوات
مادري ليش اخاف اسولف وياهم
اگعد ويه البنات بس اذا براء موجودة
وعمو شعبان ما اشوفه هوايه
اغلب وقتي بغرفتي
اخاف اطلع منهة
غوث قطع ومحد من اصدقائه يخابروني
اني خسرت
صدُگ هلمرة خسرت
غوث وراح
بعد شنو احصل
اذا ملو وطردوني
زين گروبي يردوني اطلع وياهم من فترة وما اقبل
ما عندي فلوس
خلصت اخر 15 انطيتهن لبراءة الذمة
واخاف اطلب من عمو مُخلد
و اخاف افتح موضوع الكلية وياهم
عمه وعد واگفتلي على الكلمة
ودائما تذب كلام عليه

اندگت الباب
- تفضل

دخل ابراهيم ابن علي محسن وگال - جدو شعبان يريدچ

هزيت راسي ب اي
وخليت حجابي على راسي وطلعت
نزلت وراه وشفت عمو شعبان متمدد وماد ايده والثانية على عيونه

بلعت ريگي وگلت - عمو طلبتني

وخر ايده من عيونه وگال - خدامه انتي

- هاا

شعبان - يعني تنزلين تساعديهن بالتنظيف والمطبخ وتصعدين … لا تتعشين ولا تتغدين … خدامه هنا

- مادري انتم شنو تعتبروني

گعد على حيله وگال - حور

- نعم

شعبان - حاسبة نفسچ خدامه هنا

رفعت كتفي ومجاوبته
اي
اني انظف وما اطلب شي
اكلي قليل ومااگعد وياهم
اخاف اضوجهم ويطردوني
ووين اروح بعد
اذا طردوني اموت نفسي صدُگ

شعبان - اگعدي گدامي

گعدت گدامه وعيني على ايدي

شعبان - شنو الشي اليفرقچ عن اختچ

ومجاوبته

شعبان - ما بينچ وبينهة شي حور انتي بت مُخلد مثل ما هي بته

رفعت كتفه وگلت بصوت شبه ناصي - اخاف عمو

شعبان - منين

عضيت شفتي وگلت - منكم

رفعت عيني أله وشفته عاقد حاجبه وبسرعة گلت - اسفة مو قصدي

غورگن عيوني واني اشوفه ضايج
حيطردني
لو حيضربني
خلي يضربني قابله بس كون ميطردني
اني لو مسويه اي شي تريده فايزة مصار هذا الشي
لا اني لو ميته اصلا مصار هذا الشي كله

زفر بقوة وگال - شنو نسويلچ يعني

رفعت كتفي ومجاوبته
شنو اگول
اخاف تضربني
تهيني و تذلني
اخاف تطردني من البيت
اريد اعيش مثل براء
لو لمار وباقي البنات
حياتهن زينة يضحكن ويسولفن ويشترن كلشي بخاطرهن
كومة اشياء بخاطري اشتريهن بس ماگدر
لان ما عندي ولا فلس
ما عندي ام ولا اب
وهمه اخاف منهم
لان حتى غوث اليگول يحبني حيل عافني وراح
عاشور و قسور الحلفو ميعوفوني عافوني
محد يريدني اني