سمير - الجزء الاول
عمري كله تقريبا لابس عسكري ، من فتحت عيني وشبيت لبسونه زيتوني كبرت دخلت حرب ويا ايران خلصت حرب ايران بدا تحرير الكويت خلصت بدا حرب بوش وكلهن عاصرتهن لحد السقوط شكم سنه كعدنه لان حلوا الجيش والشرطة وراهه ذبيت البدلة العسكرية ولبست بدلة الداخلية باحدى السجون ، الجندي يختلف اختلاف جبير عن الشرطي ، الجندي يحمي البلد من التهديد الخارجي والشرطي يحميه من التهديد الداخلي ، او هذه اللي تعلمناه بس السجون شي مختلف ، عالم مختلف بداخل عالمنه ... كل عشرين متر باب لازم ينفتح موجودين بيهه اشكال انواع الارهابيين والمتطرفين بلحاهم واشكالهم الغريبة ، احتيال ، قتل ، سرقة ، اغتصاب علاقات محرمة مخدرات كلشي يخطر ببالكم ، من الحرامي الجبير اللي بايك ملايين الدولارات للحرامي الزغير اللي بايك ماطور مال ماي ... من اللي قاتل متعمدا العشرات للي عن غير قصد داعم وقاتلله شخص ... هنا الكل سواسي ... زنزانات جبيرة كل زنزانة بيهه تقريبا 100 بحيث لا اكو مكان للكعدة ولا مكان للنوم ، تكرمون مرافق بالنص يعني اللي يريد يتكرم الكل يشاركونه الاحداث ، وهذه المرافق بالليل يتحول الى مكان للنوم ، خاصة النزلاء الجدد ينامون هناك ... ورغم فوضوية الوضع الا ان النزلاء خالقين نظامهم الخاص ، نظام عشاير ، قوانين خاصة بيهم ... كل واحد من محافظة معينة ينظم لمجموعة من نفس المحافظة يساندون بعض ويحمون بعض رغم هاي الحماية الهه ثمنهه تندفع عاجلا او آجلا...
يبدي شغلي ويا النزلاء الجدد ، اول ما يدخلون ننزعهم ملابسهم ونرش عليهم ماي ضغط عالي عادة ما بارد بالشتا وحار بالصيف حسب تعليمات آمر السجن وبعدين ناخذ اغراضهم واللي طبعا تنباع كبل لا توصل للأمانات وننطيهم الملابس البرتقالية اللي تتكون من قطعتين وفانيلة ولباس وحدة احتياط اذا موجود بالمخزن واذا لا نبقيه بملابسه ، تخيلوا نفس الهدوم على ما يكمل الحكم ماله
آمر السجن رائد حمدي انسان مريض نفسيا حرامي محتال واستغلالي ... يستاهل يكون ورا القضبان اكثر من النزلاء ، بس واسطاته قوية ومستغل منصبه ابشع استغلال ، مشتري سكوتنه انه يخلينه نبيع ونشتري...
اي نبيع ونشتري
مواد غذائية مثلا كيلو الطماطة اللي تنباع بالسوك بالف هنا نبيعه بخمس الاف ، التايد اللي بالتموينية يوزعوهه ببلاش هنا يوصل سعرهه لخمس الاف للجيس ، الجكاير اللي بالف هنا باربع لو خمس الاف ، وطبعا اكو منتسبين يبيعون حته نقالات بس شنو النقال الصرصور اللي دين دينه كامز ينباع ب600 الف لو ب750 ، وبعد اكو تجارات اكثر بشاعة من هيج ، تجارة الحلوين ... اي هاي هم تجارة ، يجيبون نزلاء زغار حلوين ويسوون عليهم مزايده ، اللي يدفع اكثر ياخذه طبعا اكو مؤقت ينباعون واكو يشتروهم مشتره وطبعا الاسعار توصل للملايين والحلو بالموضوع يغارون عليهم ويعاملوهم معاملة الصديقة او الزوجة ، بس اللي يجي ببالكم كل هاي الفلوس منين تجي؟ وشلون؟ طبعا اكو ناس عدهم فلوس ويدزونه للنزلاء بس اغلب الفلوس تجي من المخ*رات
أنت تقرأ
الخذلان +21
Horrorقصة للبالغين فقط باللهجة العراقية تقدم هذه القصة رؤية معقدة للاخلاق والتضاربات الانسانية ، وتجعل القارئ يتسائل عن معنى النجاح وثمن النجاح والفشل في ضوء ظروف صعبة ، تروي قصة رجل واجهته صعوبات الحياة حتى خسر كل شيئ ، بدلا من الاستسلام يلجأ الى طرق مل...
