شهد - الجزء الاول
ابوي محامي معروف وجبير بالعمر واني البنت الوحيدة من بين ثلاث اخوان ، امي موظفة حكومية وحياتنه جدا مستقرة ويمكن نكول من الطبقة الراقية بوحدة من المناطق المعروفة ببغداد. جنت مجتهدة كلش بالدراسة وكل تركيزي بدراستي جنت اريد اصير محامية مثل بابا ، وهو كلش جان فرحان بيه مدللني اخر دلال ماكو شي اطلبه وما يجيبلياه لحدما يوم واني تقريبا عمري 14 سنة طلبت منه نقال حالي حال اغلب البنات وسويت حسابات وبديت ادخل بهل العالم وشوي شوي ادائي بدا يسوء بالمدرسة ، حاولت اوازن بس جانت مهمه صعبة .
مرت الايام طبيعية لحد ما صار عمري 16 سنة ، بدا جسمي يبرز وخاصة اني طويلة ، ابن خالتي مصعب بهل الفترة جان كلش يتقربلي ، يراسلني دوم عل الانستا وغيره ، هوه طويل كلش اظن 185 هيج طولة ومهتم بنفسه ويلعب حديد وهذه الشي جذبني اله ، بدت رسايله شوي شوي تصير اكثر رومانسية ، ومادري شلون حسيت روحي بديت اتعلق بيه خاصة هوه جريئ بالحجي ، اخته مريم هم دوم تحجي عنه وكلما نكعد سوه تبدي تمدح بيه وتكول "اني لو ما اخته جان تزوجته" جانت صديقتي المقربة اللي احجيلهه كلشي وخاصة هوه اكبر مني ب4 سنين سيارته اخر موديل عايش حياة ترف . بديت اتعلق يوميه اكثر واكثر لحدما انقطعت اخبار مصعب واختفى ، اخابره ماكو اراسله ماكو صدف بيومهه اجتنه مريم ولكتني بغرفتي ابجي.
مريم: ها ولج شبيج ؟ ليش تبجين؟
شهد: ماكو شي؟
مريم: احجي ولج شبيج؟ اني اختج؟
شهد: ماكو شي بس خانكتني العبرة.
اجت كعدت يمي ، مريم: احجي ولج شصاير؟ خالو مزعلج؟ لو خالة؟
شهد: لا يمعودة، اصلا ما اشوفهم الا ساعتين باليوم ملتهين بالدوام ، بس...
مريم: بس شنو؟
شهد: مادري شو قلبي يعصرني
مريم: ليش؟
شهد: صدك مصعب وينه؟ شو مختفي؟
مريم: هاااا يعني هاي الدموع عله مصعب؟
شهد: مادري بس احلفج بكل عزيز لا تحجين لاحد شي
مريم: وعد ما احجي بس كولي شبيج
شهد: مادري شو من يختفي احس روحي مخنوكة
مريم: هههه هذه العشق واسراره...
شهد: يمعودة يا عشق كعدي وسكتي ، ابن خالتي هذه واكبر مني
مريم : واذا اكبر منج واذا ابن خالتج
شهد: مادري ... مادري افكاري كلهه مخربطة
أنت تقرأ
الخذلان +21
Hororقصة للبالغين فقط باللهجة العراقية تقدم هذه القصة رؤية معقدة للاخلاق والتضاربات الانسانية ، وتجعل القارئ يتسائل عن معنى النجاح وثمن النجاح والفشل في ضوء ظروف صعبة ، تروي قصة رجل واجهته صعوبات الحياة حتى خسر كل شيئ ، بدلا من الاستسلام يلجأ الى طرق مل...
