مساء الخير والعافية
اليوم بديت اكتب قصة جديدة ، اسلوب مختلف شوي اقل سوداوية اكثر فكاهية ، نبتعد شوي عن اجواء الحزن وحبيت اشارككم شكم فصل ، اذا عجبتكم نكمل على هذا النهج واذا ماشفت تفاعل يمكن ما اكمله.
فرجاء لا تبخلون علي بآرائكم اكو موقع للصراحة موجودة بصفحتي او ممكن تراسلوني على زنجي او السناب باي وقت
متواجد عادة الصبح
اتمنى تعجبكم
بس الاسماء واسم القصة والخلفية مو النسخة النهائية
******************************************************************************
فتحت الباب ... وباوعت بالصالة لكيتهه لابسه دشداشة قصيرة ضابة على جسمهه الناعم المخصر اللي كل شي بيه صح ومضبوط ضبطة العكال ، والوجه ااااخ الوجه ابيض ويلمع من النظافة والشفايف وردية كرزاية تلمع وتبرج والعيون الكبار الملونات ، والشعر اااخ الشعر الطويل الاحمر اللي نازل على ظهرهه وذيج الحجلة التخبل اللابسته شكد جميلة .... ااااخ شكد جميلة ، من الصدمة رجعت سديت الباب...
باسم: ولك ليش سديت الباب؟
اني: لا ماكدر...مايصير
باسم: شنو هو المايصير ... غير مطلعيهه بفلوسنه
اني: واذا يمعود...شفتهه انته؟ آية من آيات الجمال مستحيل هاي شغلتهه
باسم: ولك شنو مستحيل؟ هاي نايمه ويا ثلاث ارباع المنطقة...حتى ويا استاذ حمدي نايمة علمود تنجح ابن اخوهه بالخامس ابتدائي...
اني: استاذ حمدي؟ ابو الموسيقى؟
باسم: اي...
استاذ حمدي بدا يعزف ويغني ببداية السبعينات بأوج ظهور الفنانين الناجحين ، نكدر نكول عنهه الفترة الذهبية للطرب بالعراق مثل المرحوم فؤاد سالم ، سيتا هاكوبيان ،المرحوم رياض احمد ، المرحوم صباح فخري، بس استاذ حمدي جان فاشل ، كلش فاشل ، بس عايش الدور،و بالاخير من اعترف بفشله كام يغني بحفلات اعياد ميلاد الاطفال ، مو الاطفال الطاكين طبعا المناطق الشعبية اقصد، حته مره مصورينه يغني اغنية " بايبي شارك" بوحدة من الحفلات...
استاذ حمدي مواليد الستينات او نهاية الخمسينات ، يعني هسه عمره فوك الخمسين ، معقولة تنام ويا هذه الكائن؟هذه الجمال كله...
واستاذ حمدي قصير القامة كانما برميل ويمشي وخاصة من يلبس الدشداشة ... وباسم يعرفني زين ربينه سويه وذكر استاذ حمدي لان عندي موقف طريف وياه ....
يوم من الايام باسم خابرني اخذ ولده لبيت اهله ، باسم كح*جي قديم سكير يلعب قمار ساقط الى ابعد الحدود ، بس القدر خلاه يتعرف على اجمل واحسن بنية بالكوكب زوجته نسمة ، نسمة تعرف عليهه بالصدفة من مرة من المرات مطوخ بالشرب وفاقد الوعي وماخذيه للمستشفى ، وهناك ممرضة بالطوارئ اهتمت بيه ، هو باسم مظهره مقبول طوله زين و شكله شكل ممثل اجنبي يلوكله هيج بس هوه موظف بالكهرباء ووضعة تعبان ، المهم نرجع لسالفتنه ، هناك التقى بالممرضة نسمة ، نسمه صدك نسمه ... شعر اسود شادته مثل طوبة وره راسهه شفايفهه شوي مارونية وشامة جميلة فوك الشفة وبشرته حنطاوية ، جسمهه وسط مو سمينة ولا ضعيفة ، ممكن اكول جان حب من اول نظرة .. باسم ظل يومية يجي للطوارئ ... ضغطي صاعد عندي صداع سكر نازل ، بعذر وبدون عذر يروح للمستشفى علمود يلتقي بنسمة... لحدما بعد ما بقه عذر جديد يشوفونه ما بيه شي ... الحراس بدوا يمنعونه ... اخر شي كسر بطل مال ببسي وجرح ايده وراح للطوارئ...اني ما جنت معاصر الاحداث بس هوه سولفلي هاي الرواية وجان دايما يعيدهه على...
أنت تقرأ
الخذلان +21
Kinh dịقصة للبالغين فقط باللهجة العراقية تقدم هذه القصة رؤية معقدة للاخلاق والتضاربات الانسانية ، وتجعل القارئ يتسائل عن معنى النجاح وثمن النجاح والفشل في ضوء ظروف صعبة ، تروي قصة رجل واجهته صعوبات الحياة حتى خسر كل شيئ ، بدلا من الاستسلام يلجأ الى طرق مل...
