اعزائي المتابعين والمتابعات التفاعل جدا خجول ، راح اتوقف اذا بقى التفاعل بهاي الصورة او راح اختصر الاحداث وانهي القصة بالاربع فصول الجاية...واكيد راح اتأخر بالنشر
والشكر موصول للمتابعين اللي عل الاقل يصوتون او يشاركون بتعليق يسعدني ويفرحني ويحسسني ان فعلا قصة جميلة وممتعة
وموجود على الانستا والسناب لارائكم وطلباتكم
هذا الجزء +21 فاللي ما يحب المشاهد المثيرة ممكن يترك هذه الجزء وبالاجزاء القادمة راح اذكر مختصر عن الاحداث اللي صارت
واللي يحبون المشهد الثاني كامل ممكن تراسلوني عل الانستا (بالصورة فوك) او السناب jjamal_87
اتمنى تستمتعون بالفصل
تحياتي ج جمال
///////////////////////////////////////////////////////////////////////
هذه البيت اعرفه ، وصلت حنان اله يوم اللي مطرت ، شنو العلاقة بين مدحت وحنان؟ معقولة رواء اللي طلقتهه من زوج حنان هي اللي جاي اتزوجهه اليوم؟ وقبل لا ادخل مثلما اتفقت ويا وداد سابقا نزعت المحبس ، عدلت شعري وعدلت الرباط... واني جاي اعدل المراية ... جان اشوف بنية كاعدة ورا... اخترعت وفزيت...والتفتت
كامل: منو انتي؟ شعدج هنا؟شلون صعدتي
البنية: ماعدنه هواي وقت كاظم...
كامل: اني ... اني اسمي كامل...وجاوبيني شلون صعدتي بالسيارة؟
البنية تقربتلي وخلت ايدهه على خدي : كاظم راح تدمر حياتك بس تدخل لهذه البيت ، بعدهي وداد مو قوية تكدر تشمر المحبس هنا وترجع لحياتك ... وتنسى كل اللي صار
كامل: شلون...شلون تعرفين عن المحبس؟
البنية: انته ما تعرف شنو اللي مورط روحك بيه
كامل: عشت كل عمري مذلول ... الجاي والرايح يدوس علي...عشت الفكر عشت الجوع عشت التعب وتكليلي ارجع لحياتي القديمة؟
البنية: صدكني حياتك القديمة ارحم بالف مرة من الجاي...واني حذرتك هواي ، الكيان اذا قوة مراح تكدر تتخلص منهه بسهولة بدون ما تقدم تضحيات كلش جبيرة...وصدكني راح يصير بيك مثلما جاي يصير بفهد... اشمر المحبس هنا واخذ مريم وارجع لبيتك القديم...
فجأة سمعت صوت طكة عالية عل البنيد طفرت من مكاني مخروع...التفت لكيت بزونة سودة صافنة علي بعيونه الحمر ... تباوعلي ... رجعت التفتت ما لكيت البنية... البزونة ظلت كاعدة عل البنيد... لحدما حركت السيارة ... وخرت وبدت تباوعلي من بعيد...من ورا سياج البيت...
دخلت للبيت والف فكرة ببالي...منو هاي البنية شنو قصدهه الكيان مو قوي؟ ليش اشمر المحبس ؟ اعوف الترافة والدلال وارجع لحياة الفكر ؟ ارجع عل الاندومي والخبز اليابس والجبن؟ ارجع انام لوحدي بالغرفة لو ميت من الحر لو ميت من البرد؟ ارجع لنظرات الاستحقار اللي تباوعلي بيهه حوراء؟ مليت من السيارة المطعطعة مليت انتظر الناس بباب البيت انتظرهم يطلعولي ويباوعلي بنظرة الاحتقار وهمه يشوفون هندامي وشكلي وسيارتي ، ويشتلوني نص ساعة لو ما يردون علي من اريد اوصل طلبياتهم ... حته مرة واحد شافني وهز ايده يكلي شنو حياتك ، انته ما تنشاف... فعلا ما جنت انشاف،فعلا جنت جرذ ، لا شيئ ... ولو ما اهلي جان نمت بالشوارع ، ما تعينت لان ما عندي واسطات رغم شهادتي رغم تفانيي بشغلي ، ما توفقت بالزواج لان ما عندي فلوس ، ما تزوجت اللي احبهه لان ما توفقت بحياتي...ما توفقت بحياتي لان ما عندي واسطات لو معارف اتعين بيهه واعيش حياتي مثل البشر ... هي دائرة مغلقة ... الفلوس - الحب - السعادة ، واللي يكلك الاخلاق ... كله خل الاخلاق ب.... عمري ما رفعت عيني عله وحدة متزوجة ، عمري ما مديت ايدي بجيب احد وعمري كله عشت خسران ... اللي جاي اسويه صح ... متونس ويا النسوان اشكال انواع يومية وحدة حته مليت ، الاكل احسن اكل الشرب احسن شرب الناس تحترمني الناس تهابني الناس تحبني بيت بمنطقة راقية وسيارة راقية ... ارجع للفكر؟ وطلبات وداد لحد الان جانن سهلات ... شنو اسوأ شي ممكن يصير؟
أنت تقرأ
الخذلان +21
Horrorقصة للبالغين فقط باللهجة العراقية تقدم هذه القصة رؤية معقدة للاخلاق والتضاربات الانسانية ، وتجعل القارئ يتسائل عن معنى النجاح وثمن النجاح والفشل في ضوء ظروف صعبة ، تروي قصة رجل واجهته صعوبات الحياة حتى خسر كل شيئ ، بدلا من الاستسلام يلجأ الى طرق مل...
