زاواج الاجبار "بالهجة الجزائرية "🇩🇿

ضربة وراء ضربة

" فجأة حبس طوموبيل في بلاصة شويه خاليه و قالي و هو يقدملي وش راحلي !!؟ اه رانا وحدنا ذركة متقدريش تتهربي مني " انا خفت منو و بديت نبعد فيه و نفتح في الباب مي كان مكودي قالي وينو لسانك الطويل نقصهولك و تهجم عليا و انا نعيط مي شكون لي رح يسمعني كان يحاول يغتصبني بأي طريقة و انا نضرب فيه قدملي و هو يبوس فيا في كل بلاصة حتان وصل لفمي و انا نبعد فيه بيدي خبشتو من وجهو ضربتو بلافايدة باسني بقوة حسيتو بالدم و كان جرحلي شاربي من التحت بديت نحس روحي فشلت و دموعي غير يطيحو تبكمت معرف كيفاش دزیتو و فتحت القفله نتاع الباب و خرجت نجري طحت في الرض تجرحت مي نورمال لمهم نهرب منو نسيت وراقيا في الطموبيل ساكي تليفوتي كلش لمهم كي سلكت روحي و هو راح و خلاني كالرخيس و انا بقيت غير نرعش
و نبكي و حت الطريق خالية مكان حتى عبد
بقيت نجري وحدي كالمهبولة ندمت على النهار لي روحت فيه معاه تمرمدت قشي تقطع خماري طار دم في فمي و سروالي جيهة ركبتي تقطع من الطيحة لي طحتها و ستر بيا ربي و جات نقل حضاري فايتة روحت نجري للطريق نبكي و نعيط بقيت شي نص ساعة و نا نسنى ايا حبسلي ركبت و انا نبكي نسيت حت لادراس نتاع الدار مقدرتش مامبا نهدر لا إراديا قلتلو لادراس نتاع دار بابا
وصلت لدارنا بعد نص ساعة طبطبت الباب كانو خاوتي راقدين بسكو خلصو لقرايا كنا في لي كونتول نتاع الصيف جات ماما تفتح في لباب دخلت طول طول تحضنتها و هي
مشوكيا في حالتي وش بييك وش صرالك ؟؟....
و انا غير نبكي مقدرتش نهدر ايا دخلتني و جابتلي لماء شربت و انا مزالني نشهق خرج بابا و خاوتي كامل ناضو خايفين قربلي بابا و قالي شهد بشوية برك ... " بعدتو و نضت نعيط "متمسنيييش بعد عليا نكرهك نتا لي دمرتلي حياتي ... و هوما كامل تحت الصدمة نضت روحت للدوش نبكي و نعيط نغسل في وجهي و في فمي و نبكي و ماما طبطب في الباب ابنتي وش بيك شهدي و إستغفري كلش بمكتوب ربي و حنا تاني رانا مشوكيين كتر منك ... " فتحت الباب و انا مبلوكيا في مخي وش كا این ؟؟ قلتلها و انا نرجف قاتلي إدعيلو" بالرحمة هذا ما يفيدو في هذي الحالة ... عيطت عليها و نا نصبر في روحي و نبعد في اي فكرة سلبية من راسي "شكووون ؟؟؟ وش صرااا ش... شكووون ماات ..." قبل ما تنطق كنت عرفت شكون لي مات مبغيتش نسمعها منها هي تكذب اني عارفة حسيت بالسخانة طلعتلي من لتحت للفوق.....

_____
شكون مات فرأيكم ؟