عَصْر الدبَابِير || AGE OF HORNETS

43- (شُـعـور جَـديـد)

بعتذر على التأخير عشان كنت مسافرة الفترة اللي فاتت والوقت كان أضيق من خُرم الإبرة بلا مبالغة، أتمنى متبخلوش على اختكم بتعليقاتكم وتصويتكم للفصل ..

قراءة ممتعة ♥️

______________________________________

** بعد مرور ستة أشهر **

تحركت بخطوات متمهلة وخرجت من غرفتها ببطن منتفخة تعلن عن وصول حملها للشهر السابع ؛وهي تحيط شعرها المجعد ببندانة شعر حمراء اللون مرتدية فستانًا بسيطًا وواسعًا يسمح لها بالتحرّك بحرية مع الحمل ..

خرجت إلى ساحة المنزل لتصطدم بوالدها في وجهها ؛سرعان ما غلبه التعجب وسألها بفضول :

_ايه ده على فين؟؟

نظرت له مجيبة بوجه محتقن من الملل :

_زهقت يابا بقالي كتير قاعدة، عايزة انزل اشم هوا شوية

_يابنتي إنتي قادرة تتحركي؟؟

ربتت على يده مجيبة بعدم اهتمام :

_متقلقش انا كويسة

قالتها وهي تستعد لتتخطاه وتذهب، إلا أنه أوقفها بقوله :

_بهيج رن عليا دلوقتي على فكرة

أيقنت ما هو قادم فوقفت تغمض عينيها بنفاد صبر وهي تنفخ باختناق شديد، بينما أردف راضي بهدوء :

_يا زبدة مينفعش .. قولتهالك ٥٠٠ مرة مينفعش .. إنتي بقيتي في السابع مستنية تقوليلُه امتى؟؟ .. أنا قعدت أطاوعك طول الفترة اللي فاتت ومش عايز اضغط عليكي بس كدا كتير

قفزت تقاطعه بملل رافضة سماع شيئًا آخر :

_يا ابويا ارحمني بقى مبيعدّيش يوم إلا وتقول لي نفس الكلمتين .. ريّح نفسك أنا مش هقول لُه غير لما أولد

انفعل راضي في وجهها متخلّيًا عن آخر قطرات صبر يمتلكها، صائحًا :

_انتي دماغك فيها ايه يا بت؟؟ إنتي مش طبيعية، ده مش تفكير واحدة طبيعية أبدًا !! .. سمعتي فين عن واحدة حملت من ورا جوزها ومستنية تولد الأول عشان تقول لُه ؟؟ ما تعقلي بقى ده مالوش دعوة بالمشاكل اللي بينكوا

تمالكت أعصابها بصعوبة ورفعت يديها تربت على كتفه متمسكة بذرات هدوءها القليلة :

_ماشي يابا حاضر لما آجي هنتكلم ونعمل كل اللى يرضيك .. ماشي؟ .. يلا سلام !

قالتها بسرعة قبل أن تسمع منه كلمة إضافية وتحركت إلى الخارج لتهرب قبل أن يحاصرها بالحديث مرة أخرى ..

*
*
*

انطلق آدم على قدميه يتجوّل هنا وهناك راكضًا كالقرد الصغير وهو يحمل لعبة صغيرة من ألعابه وضحكاته الطفولية تتعالى بصخب ؛مستمتعًا بلعبة المطاردة التي أقامها مع راجح ؛حيث صار راجح يركض خلفه يدّعي أنه يريد سرقة اللعبة منه متعمدًا التحرك بخطوات بطيئة مناسبة لخطوات الصغير الذي ظن نفسه سريعًا حقًا لا يستطيع أحد اللحاق به ..