ابكي ، أو بالأحرى توسلي

تحليل و نقاش مهم : ماتياس و ليلى

ملحوظهههههه : لو ظاهر عندك ان ده آخر بارت يبقى فيه مشكلة لأنه نزل بعده بارتات كتير عادي😭 فجرب تحذف الرواية من المكتبة و تضيفها تاني مثلاً..ممكن تنبهوني رجاءاً لو قابلتكو المشكلة دي

طبعاً احنا اتفقنا هنحلل و نتكلم عن علاقة ليلى و ماتياس خلال البارتات اللي فاتت.. و آسفة اني منزلتش البارت الجديد بس كنت عاوزه أخلص من ده و انزله علشان هبطت فيه والله😭..بس اوعدكم أن تأخيري عن نزول البارتات ده هيكون شئ نادر الحدوث❤️

فـ هرغي شوية معاكم كده بس متفوتوش الكلام بجد بجددد اللي بيحب الرواية و عاوز يفهم ماتياس و ليلى اكتر مش هيندم على شوية الكلام و التحليل ده...مهم أوووي يعني في الغالب هتلاقو تفاصيل و شرح لتصرفاتهم مأخدتوش بالكم منها

فـ اعملو كوباية شاي و تعالو علشان قدامنا قعدة طوييلة شويتين نرغي فيها مع بعض لأنه بارت طويل يعني🌚😂 بس ان شاء الله مش هتزهقو كأنكم بتعيدو مشاهدهم بس مع فهم اكتر

و اللي يزهق ممكن يقرأه على مرتين مثلاً براحته، لأننا هنجيب أغلب مشاهدهم اللي كانو فيها مع بعض من أول لقاء لحد مشهد القُبلة في بارت 23، لأن من أول 24 بدأنا نحلل في آخر الفصول عادي...المهم قولولي رأيكم في الكومنتس كأننا بنتاقش مع بعض كده🥰

بسم الله نبدأ؟ بسم الله

أولاً ليلى..

1️⃣  :

تعرف ان ليلى بتحب ماتياس؟..أقدر اتجرأ و أقول ان هي الطرف اللي حس بشئ الأول تجاه الطرف التاني في العلاقة دي من وقت أول لقاء ليهم من و هي صغيرة، مش بقول انها وقعت في الحب الأول لا سيبنا من الحب دلوقتي، بس هي اللي حست بشئ الأول، ع الأقل خلينا نقول و هي صغيرة ده كان اعجاب و انبهار نوعاً ما...كانت مسحورة بيه في أول لقاء ليهم

• ليلى في أول لقاء ليها مع ماتياس لما كانت ع الشجرة و رفع عليها البندقية و طلعت تجري لـ بيل تقوله كان فيه راجل طويل في الغابة، وصفته و قالت : "كان له شعر أسود، وعينان زرقاوتان، وصوته كان ناعمًا كريش البط" (بارت 2)

هي هنا كانت بتعبر عن انبهارها أو اعجابها ‹البريئ الطفولي› بتشبيهاتها دي. الواحد لما يكون حابب شئ بيوصف الشئ ده بحاجات جميلة، و لو مش بتحب شئ بتوصفه بحاجة وحشة، ما بالك دي طفلة بقى...ليلى مش بس وصفته بشكل حلو و إنبهار، لا دي شبهته بحاجة هي بتعشقها و بتموت فيييها أصلاًً زي ما احنا عارفين، الطيور!..و دي حاجة مش عابرة كده و خلاص..

بس في اللحظة اللي بعدها على طول لما سمعت صوت البندقية لما بدأ يصطاد، عيطت، و من اليوم ده سمت ماتياس 'قاتل الطيور الجميلة' ، حطته في خانة انه شخص سئ، مع انه من الواضح معملهاش حاجة، بس هو -حتى لو بدون معرفته- بيإذي حاجة هي على ارتباط بيها