~ عنـد العيـال ~
جلسوا على الارض يلعبون جاكارو ويصارخون بأصواتهم العاليه وطلع ابو سيّاف من اصواتهم وردف بحده : وجعاه ان شاء الله خير وش هالاصوات
سكتوا كل العيـال ولف فهـد وردف : يبه جالسين نلعب
ابو سيّاف : والعب مايصير الا بالاصوات العاليه ؟
فهد : اسفين
ابو سيّاف ناظرهم كلهم يدور سيّاف وعقد حواجبه وردف : فيصل وين سيّاف ؟
فيصل : طلع مع هنـاي للشاليه حقهم
ابو سيّاف : وراه ماجلس !
فيصل : مدري والله تبي ادق عليه ؟
ابو سيّاف : لالا يمكن تعبان خله
ومشى يدخل ولف عليهم قبل لا يدخل وردف بحده : قصروا اصواتكم عشان ما اجي واكسر هاللعبه على روسكم
فيصل : ابشر ان شاء الله ياعم
ودخل ابو سيّاف واخذ فيصل نفس طويل وضرب راس فهد : انت السبب
فهد وهو يحك مكان الضربه : وهو اي شي يصير تحطونها براس فهيد
ضحك تركي : بس تبون الصدق ابوك يافهيد عصبي وهيبه
فهد وهو ياخذ الكروت ويرتبها : من طلعت من بطن امي وهو كذا
فيصل وهو يصب قهوه : عاد عمي ناصر محد يعرف له غيري
مشعل : اي ابوي مايحب غير سيّاف وفيصل مايعترف فيني انا وفهيد
ضحكوا كلهم وناظر تركي بنواف وسرعان ماتذكر الموضوع الي كان ناوي يقوله له وقام من اللعبه وردف فيصل: شفيك
تركي : بروح الحمام
فيصل: زين
قام تركي وابتعد شوي وطلع جواله من جيبه وارسل رسالة لنواف يجي عند الحمامات لانه المكان الوحيد الي يقدر يكلمه بالموضوع
، انتظر كم دقايق عند مغسلة الحمام ولف من سمع خطوات شخص يقرب ودخل نواف وهو عاقد حواجبه : شفيك ليه تبي تشوفني هنا !
تركي : شفيك زعلان طول الوقت ولا انت بحولنا ؟
نواف تنهد لثواني تنهيدة هموم مالها اي نهاية وردف : مافيني شي
تركي مسكه من كتوفه : تقدر تكذب على كل عيال اعمامك لكن انا ماتقدر محد بيفهمك بهالدنيا كثري يانواف ! انا وانت عشرة عمر لدرجة امي وامك صاروا جيران
ابتسم نواف بخفوت وكمل تركي : اي اضحك وترا عندي لك خبر حلو
عقد حواجبه نواف : وشهو
تركي : توقعت امك قالت لك
نواف : عن وش مافهمت اي موضوع
تركي : اختي ليان ماعاد تبيك
فتح نـواف فمه بصدمه متفاجئ وكمل تركي كلامه : قبل لا اجيكم كلمتني اقولك انها ماعاد تبيك
نـواف : في مليون سوال ببالي !!!
تركي سند ظهره على الجدار وردف : تصدق حتى انا منصدم اختي ليان كانت تبيك وتحلف ان مستحيل تفصخ الخطبه لو ايش
نواف : طيب من الي اقنعها
تنهد تركي : مدري والله المهم استانس واذا رجعت البيت كلم امك وابوك واخطبها باسرع وقت لا تحتري شي
ابتسم نواف وحضن تركي لثواني وهو مو مصدق هاللحظه الي كان مو متوقع يعيشها
تركي بضحك : ايوااا هذه نويف الي اعرفففه
ضحك نواف وطلعوا اثنينهم يروحون للعيال
~ عند هنـاي ~
قامت من مكانها وهي تمسح دموعها ودخلت الغرفه وتقشعر كامل جسدها من برودة الغرفه وناظرت بسيّاف الي كان يطالعها من فوقها لتحت وتقدمت تفتح شنطتها وتطلع لها فستان نوم قصير لونه احمر وقامت من مكانها تدخل دورة المياه وتبدل ملابسها وتمسح مكياجها
ناظرها سيّاف من دخلت لين طلعت للحمام ( يُكرم القارىء ) واخذ جواله من شافه يرن كان المتصل ابوه وتنهد لثواني ورد عليه : هلا يبه
ابو سيّاف : وينك ليه رجعت الشاليه
سيّاف : تعبـا.......
ماكمل كلامه الا وصنم بمكانه من شاف هنـاي بفستان النوم الي شبه عاري وشعرها البُني الطويل الي مسويته ويفي وتقدمت للتسريحه تحط كريماتها على كامل جسمها
ابو سيّاف : الوو
سيّاف : هه هلاا يبه ، كنت اقول تعبان شوي من الطريق
ابو سيّاف : زين ماتشوف شر وتعال افطر الصباح معنا
سيّاف : ان شاء الله ، وسكر المكالمه ولف يناظرها بصمت وقامت من مكانها للسرير واخذت مخدة سيّاف وحطتها على الكنبه ولفت عليه : مخدتك هنا ولو تبي تنام عند العيال يكون احسن
وتقدمت وانسدحت على السرير بالجهه اليُمنى معاكسه له عشان ماتشوفه واغمضت عيونها تكتم بكائها ودموعها
قام سيّـاف وعدل المخده وانسدح وحط يده على جبهته وهو يحاول بكل مافيه يتماسك نفسه من فز قلبه لما شافهه بفستان النوم الفاتن
تحرك للجهة اليُسرى وردف وهو مغمض عيونه : طفي النور
انتطر لثواني وعقد حواجبه ولف يمين يشوفها متغطيه ونايمه وتنهد قام من مكانه يطفي النور وناظر بالفستانالمرمي على الارض واخذه يتامل تفاصيله ويتذكر شكلها بالفستان ولف عليها يسمع شهقاتها الهاديه والواضح انها تحاول تخفيهم ، حط الفستان وتقدم يرجع للكنبه ينسدح ويغمض عيونه يدور النوم وهو كله ندم لانه صرخ عليها لاول مره نيران تاكله من الندم هالكثر.
