ကိုယ့်ဘဝရဲ့ ရောင်ခြည်ဉီး

Chapter 19

ကြီးမားထည်ဝါတဲ့ ၁၅ ထပ်တိုက် အဆောက်အအုံကြီးရဲ့ ၉ ထပ်မြောက်မှာ "Forever K" အမည်နဲ့ အိမ်ခြံမြေ၊ လုံးချင်းတိုက်ဆိုင်ရာ company တစ်ခု။ တစ်ထပ်တည်းသာ နေရာယူထားပေမဲ့ နေရာအတော်ကျယ်တာမို့ အခန်းဖွဲ့အမျိုးမျိုးဖြင့် သေသပ်ကောင်းမွန်စွာ တည်ရှိနေသည်။ ‌အကျွေးအမွေးနဲ့ company အကြောင်း မိတ်ဆက်ကမ်းလှမ်းခြင်းတို့အတွက် ထိုအဆောက်အအုံ၏ အဓိကနေရာဖြစ်သော Main Hall ကြီး၌ ကျင်းပပြီး အလုပ်နေရာနှင့် အကြောင်းစုံကို တင်ဆက်ပြသရုံမျှမက ဝန်းပုံစံတူ စနစ်ပုံလေးတွေ၊ အိမ်အသေးစား ဒီဇိုင်းငယ်လေးတွေကို လက်တွေ့လိုက်လံကြည့်ရှုနိုင်သည်။

လူတွေသည် အများအပြား။ အမျိုးသားတွေက အနောက်တိုင်း suit ကို ဝတ်စုံပြည့် ဝတ်ဆင်ထားကြပြီး အမျိုးသမီးတွေကလည်း အဖိုးတန် အဝတ်အထည်များ ဆင်ယင်ထားကြသည်။ အရှိန်အဝါကကြီးမားလွန်းနေသည်မို့ လူတောမတိုးသည့် ကောင်းကောင်းအဖို့ အသက်ရှုပင် ကြပ်ရသည်။ ဆူသံညံသံတွေ၊ မီးရောင်ဝင်းဝင်းတွေ၊ ဝတ်ထားသည့် အဝတ်တွေ၊ စီးပွားရေးသမားတွေ၊ အားလုံး အားလုံးတို့ကြား ခေါင်းတွေပါ မူးလာသည်။ လေးယောက်သား အစ်ကိုစီစဉ်ပေးထားတဲ့နေရာမှာ ကုပ်ကုပ်လေးထိုင်ရင်း ဟိုကြည့်ဒီကြည့်လုပ်လိုက်၊ မုန့်လေးစားလိုက်၊ သူတို့အချင်းချင်း တိုးတိုးသက်သာ စကားလေးပြောလိုက်ဖြင့်သာ စိတ်လွှဲရသည်။

ဝိုင်ခွက်လေးတွေကိုယ်စီဖြင့် ပြုံးရွှင်နေကြသည့်သူတွေကြား ကောင်းကောင်းတို့ဝိုင်းမှာတော့ စပါကလင်သာ ရှိသည်။ အစ်ကိုက စားပွဲထိုးအစ်ကိုကြီးကိုခေါ်ပြီး ဝိုင်ခွက်တွေအကုန် သိမ်းခိုင်းကာ စပါကလင်နဲ့လဲစေခဲ့သည်လေ။ ပြီးမှ ဝိုင်မချပေးဖို့ပါ အပိုဆောင်းမှာပြီး ဘယ်မှလျှောက်မသွားဖို့၊ သူ့ကိုစောင့်ဖို့ပြောပြီး အသက်ကြီးကြီး အဘကြီးတစ်ယောက်ဆီ ထွက်သွားသည်။ တကယ်တော့ ဝိုင်က ပျော့ရင် သိပ်မမူးလောက်ဘူးလေရော်။ ကောင်းကောင်းတို့ကလည်း ၁၈ မပြည့်သေးတဲ့ ကလေးတွေမှ မဟုတ်တာ၊ ၁၉ နှစ်ထဲတောင် ရောက်နေကြပြီကို။

ကောင်းကောင်း သဘောကျတာတစ်ခုသည် company နာမည်။ အစ်ကို့နာမည်က *ခမ်းရောင်ခြည်* မို့ အင်္ဂလိပ်လိုဆို "K" နဲ့စသည်၊ ကောင်းကောင်းနာမည်ကလည်း *ကောင်းစေမင်း*မို့ အင်္ဂလိပ်စာလုံး "K" နဲ့စသည်။ တိုက်ဆိုင်မှု၊ ရေစက်၊ နှောင်ကြိုး၊ ဖူးစာ၊ သဘာဝ စသဖြင့် အမည်တပ်နိုင်သည်၊ သို့သော် လူတစ်ယောက်ကို တကယ်ချစ်မိရင် မတော်တဆ တိုက်ဆိုင်မှုသေးသေးလေးတွေကိုပင် ချစ်မိသူမှာ တစ်ကမ္ဘာလုပ်ကာ ပျော်ရသည်မဟုတ်ပါလား။ ဒါ့ကြောင့် "Forever K" ဆိုတာက ကောင်းကောင်းအတွက်လည်း အရေးပါသည့် စကားလုံးလေး၊ နှစ်သက်ရသည့် နာမ,လေးတစ်ခု ဖြစ်သည်။