ညဘက် ၁၀ နာရီလောက်သာ ရှိဦးမည်။ အစ်ကိုခမ်းတို့အိမ်မှာတည်းရသည့် နောက်ဆုံးည။ ကုတင်ပေါ်မှာ၊ အတိအကျပြောရလျှင် အစ်ကို့ကုတင်ပေါ်မှာ ကောင်းကောင်း ဟိုလူးဒီလှိမ့်ဖြစ်နေသည်။ အရင်ညတွေတုန်းက နေ့ခင်းဘက် လည်ပတ်ထားရလို့ ပန်းနေသည့်အရှိန်ကြောင့် အိပ်ပျော်ပေမဲ့ ဒီနေ့တော့ အိမ်မှာတင် အချိန်ကုန်သွားသည်မို့ ဘာမှလည်းမလုပ်ရ၊ ပန်းလည်းမပန်း၊ နေ့ခင်းကလည်း အိပ်ထားသေးတော့ အိပ်မပျော်ဘဲ ရှိနေသည်။
ဖြစ်ပုံက အစ်ကိုတို့အိမ်မှာ အိပ်ခန်းသုံးခန်းသာရှိသည်မို့ အစ်ကို့မိဘတွေကတစ်ခန်း၊ အစ်ကိုကတစ်ခန်းနဲ့ အခန်းလွတ်တစ်ခုမှာကျ တစ်ယောက်အိပ်ကုတင်တစ်လုံးသာ ရှိသည်မို့ ကုတင်ကို ပိုင်ကျော့်ကိုပေးပြီး ရှိုင်းထက်တို့နှစ်ယောက်က အောက်ကကြမ်းပြင်ပေါ်မှာ ဖျာခင်းအိပ်ကြတော့ ကောင်းကောင်းအတွက် နေရာမရှိ။ ဟိန်းခန့်နဲ့ ပိုင်ကျော်သာ ကုတင်ပေါ်မှာ ကြပ်ကြပ်တည်းတည်းအိပ်လိုက်ရင် ကောင်းကောင်းက ရှိုင်းထက်နဲ့အတူ ကြမ်းပြင်ပေါ်မှာ အားမနာတမ်း အိပ်နိုင်သည်။
ဒါကို ရှိုင်းထက်က ဟိန်းခန့်နဲ့မှအိပ်ချင်သည်ဆိုပြီး ကောင်းကောင်းကို ကုတင်ပေါ်ပို့သည်။ ပိုင်ကျော်က လက်မခံ။ *တစ်ယောက်တည်းတောင်မှ ကြပ်တာကို မင်းလာအိပ်ရင် ပြုတ်ကျနေကြမယ်*ဘာညာနဲ့ပြောပြီး အစ်ကိုနဲ့အတူ ထည့်လွှတ်လိုက်ကြသည်။ သကောင့်သားသုံးကောင်ရဲ့ ကောင်းမှုအစုစု အကြောင်းပြုလို့ အကျိုးဆက်က အစ်ကိုနဲ့အတူ လာအိပ်ရသည်။
ဒါ့အပြင် အစ်ကိုနဲ့ တစ်ကုတင်တည်းအိပ်ရမယ်ဆိုတဲ့အသိက လူကို မရိုးမရွဖြစ်စေသည်။ ရိုးရိုးသားသား အဖြူထည်လေးဆိုရင်တော့တစ်မျိုးပေါ့။ ခုဟာက ကိုယ့်ခရပ်ရှ်ကြီးနဲ့ အတူအိပ်ရတာဆိုတော့ ပျော်လွန်းလို့ အွန်ကလောက်နိုင်းဘာညာ ဖြစ်နေပေမဲ့ ရှိန်လည်းရှိန်ပြီး စိတ်မရဲပါ။
ကောင်းကောင်းက အအိပ်ကြမ်းသည်။ မအိပ်သေးဘူးဆိုရင် ညဘက် ၂ ချက် ၃ နာရီအထိနေရမလား၊ ညလုံးပေါက် မအိပ်ဘဲနေရမလား နေနိုင်သည်။ သို့သော် အိပ်ပြီဆိုရင်တော့ဖြင့် မနက်မိုးလင်း ပြန်ထနိုင်ဖို့ကို အတင်းရုန်းကန်ရသည်။ အိပ်ရင်လည်း အရပ်ရှစ်မျက်နှာနှံ့အောင် လှည့်ပတ်အိပ်သည်။ ဟိုလှိမ့်ဒီလှိမ့်လုပ်လွန်းလို့ ကောင်းကောင်းအခန်းထဲက ကုတင်ဆိုရင် ကိုကြီးက ဘေးဘက်က ကက်နံရံနဲ့ ကပ်ထားပေးပြီး နံရံနဲ့ဆန့်ကျင်ဘက်ကိုလှိမ့်ရင် ပြုတ်ကျမှာစိုးလို့ဆိုပြီး မှို့တွေနဲ့စုချုပ်ထားသည့် ဖင်ခုထိုင်လို့ကောင်းသည့် ဖက်လုံးကြီးတစ်ခုကို ခင်းထားပေးသည်။ ဒီ့အတွက် အစ်ကိုနဲ့အတူအိပ်ဖို့ကို အားနာလို့ ထိန်းပေမဲ့ အိပ်ပျော်သွားရင် အသေလေးသေနေသလိုပဲဆိုသလို ဘာမှမသိတော့တာပါ။
YOU ARE READING
ကိုယ့်ဘဝရဲ့ ရောင်ခြည်ဉီး
Acak"ပတ်ဝန်းကျင်က ဘယ်လိုတွေပဲ ကဲ့ရဲ့ရှုတ်ချနေပါစေ မင်းသာကိုယ့်အနားမှာ ရှိနေပေးမယ်ဆို ကိုယ်တစ်လောကလုံးနဲ့ အတိုက်အခံလုပ်ရဲတယ် ကောင်လေး"
