ريتاج#
دخلت الى البيت وانا لازلت غاضبه من ذلك الاحمق ثم وقفت في حديقه المنزل وهدئت نفسي ودخلت الى المطبخ فوجدت امي هناك تعد الغداء
-هلو ماما
-هاا واخيرا اجيتي ضل بالي عليج ،،، اووه شعجب مشتريه غراض وحلويات مو من عوايدج
-اي صحيح بس انقهرت عليكم كلت خلي اجيبلهم شويه حلويات ويايه اكسب بيكم اجر
-ههه لا واللهه احنه تكسبين بينه اجر
-لا لا جذب اتشاقه وياج بس عجبنني افتر بالسوك شويه وشفتهن بطريقي واشتريتهن اكيد بابا راح يحبهن -ياعمري انتي ،،اصعدي بدلي ملابسج وارتاحي فد نص ساعه ويجي ابوج حتى نتغده سوة
-ماشي ماما
صعدت الى غرفتي وغيرت ثيابي ثم نظرت الى نفسي في المرآه وقد لاحظت كيف اني تغيرت بسرعه
-هاي شنو معقول قبل شويه جنت مخنوكه وبس ابجي وهسة اتشاقه ويه ماما وقبل شويه طلعت وفتريت وماحسيت بالوقت وهم رجعت لعصبيتي الي اصلا نسيت شلون يكون هذا الشعور ،،،
ثم قاطعت افكاري امي التي كانت تناديني للغداء ،، فنزلت بسرعه لاني كنت جائعه ،،، اوه حسنا هناك شي غريب فانا في العاده لااتناول الغداء مطلقا فقط وجبه العشاء مع العصير في الصباح ،،، مالذي يحصل لي ،،، توجهت وجلست بالمقعد بجانب ابي وسلمت عليه فقال لي ،،،
-اي سمعت اليوم رايحه زيارة وحدج
-اي بابا رحت وجبتلك حلويات من الي تحبهن
-هههه صدك والله
-اي بابا شبيك ليش ميصير يعني
-لا مو ميصير بس شو تغيرتي
-اني تغيرت ليش
-البارحه تعيطين وتصيحين ومتقبلين حتى تحجين ويه احد واليوم طالعه ومتسوكه ،،،،، مبين الزيارة عقلتج شويه
-ابتسمت بخفه وخجل قليلا
-اي زين احجيلنه شسويتي هناك
-اي راح احجيلكم اليوم صار وياي شي محرج شويه ومجنت متوقعته ،،،،، فتكلمت لهم عن الخاله هناء وكل شي حصل معي ،، فبدأو بالضحك علي
-شنو ليش تضحكون
-يعني ادري من عرفتي هي امه غير تكولين صدفه حلوة ، تشرفت بمعرفتج ،مو تدرين وجهج عنهم
-اييي شمعرفني اني خجلت بعدين اني اضوج من هذا الولد
-ليش
-هو غبي مدري شلونه ،،امه حبابه ماادري ليش مطالع عليهة
-ههه هسة انتي هم ليش مطلعتي عليه اني هم حباب
-شنووو بابا ليش اني مو حبابه
-ههههههه لا لا علكيفج انتي ورده وين اكو مثلج
-اي عبالي
-اوووف بنتي شكد اشتاقيت اسمع ضحكتج وهوستج بالبيت ،، اتمنى تبقين هيج وتفرحينه وياج
-ان شاء الله بابا
اكملنا الغداء وذهبت لغرفتي لكي ارتاح قليلا ،، فجلست افكر باني يجب ان اتغير من اجل امي وابي ،، فانا لم اكن اشعر بمعاناتهما من قبل ولكن اليوم عرفت كم هم قلقون ومتضايقون بسببي ،، فقررت ان اعيد لهما الفرحه فهم كل ما تبقى لي في هذه الحياة
ومن بعدها ذهبت الى النوم
-استيقظت عصرا وجلست مع امي نتحدث فدخل ابي علينا وقال ،،،،،،،،،،،،
-ريتاج شنو رائيج نطلع نتعشه بره اليوم
-اليوم بس ليش ،،يعني شنو المناسبه
-اليوم رجعتلي بنيتي ريتاج الي اعرفهة شلون مانحتفل
-ههههه بابا ،،،،قمت من مكاني بسرعه واحتضنته فقالت امي
-اي زين لعد يله حبيبتي روحي حضري نفسج
-ماشي ماما
صعدت الى غرفتي وفتحت خزانتي وبقيت واقفه امامها انظر الى ثيابي ولم اعرف ماذا سارتدي فناديت على امي
-ماما تعالي شويه
-ها خير شبيج
-ماما مااعرف شراح البس اختاريلي انتي
-ها يعني ماتبطلين من هاي السالفه لازم اختارلج كل ملابسج يعني
-اي ماما اني يعجبني ذوقج يله حبابه
-ماشي ماشي ،، اوكفي خلي اشوفلج فد فستان ،،،،،،شنو رأيج بهذا الفستان حلو عليج
-امممم اي حلو يله راح البسه ،،،،،لقد كان فستان قصير باللون الازرق الغامق مطرز بخيوط فضيه ناعمه
بعد ان خرجت امي غيرت ملابسي ووضعت بعض المكياج وارتديت حذاء الكعب فضي اللون وسرحت شعري وتركته ينسدل على ظهري ،،،،،،وعندما نزلت
-اووو اميرتي الحلوة شنو هذا الجمال
-بابا خجلتني
-قالت امي وهي تمرر يدها على شعري ،،،،، بنتي حبيبتي هي احلى اميره بالدنيا
-فقمت بمعانقه امي ،،،وقلت لها
ماما اني احبج هوايه
بعدها صعدنا بالسياره وذهبنا الى مطعم كبير وجميل وعندما بدأنا بتناول الطعام قلت لهم ،،،
-بابا ماما اني اسفه لان ضوجتكم بذيج الفتره وانشاء الله ماعيدهة مره ثانيه
-فقال ابي ،،،بنتي احنه نعرف الي مريتي بي مو سهل وبعدين احنه مزعلانين منج
-صدك بابا
-اي حبيبتي احنه شنريد بس تضلين فرحانه ومرتاحه
-اكيد بوجودكم راح اضل مرتاحه
-بس لازم توعديني اتضلين هيج دائما وتنسين الي راح ماشي بنيتي
-ماشي بابا الي تريده يصير ،،، اهم شي عندي تبقون راضين عليه
-واحنه راضين عليج بنيتي
-الله يحفظكم اليه
اكملنا العشاء وعدنا الى البيت صعدت الى غرفتي مسحت المكياج وذهبت للاستحمام وبعد ان خرجت جلست على سريري وانا اقول بيني وبن نفسي ،،،،،
-الفضل بتغيري هذا لرب العالميين لان استجاب دعائي وفعلا هاي الزيارة خلتني ارتاح ،،، يعني اني ماجنت اتوقع نفسي راح ارجع مثل قبل بس فعلا اليقصد الامام ابد ميرجعه مهموم ،،،،، الحمد والشكر الك يالهي ،،،،،
ثم اخرجت صوره علي وبقيت انظر اليها وانا اقول ،،،، سامحني حبيبي لان اني اعرف الي سويته بنفسي يهذيج الفتره انته ماتقبل بي ،،، انته قبل جنت تكلي اهلج يحتاجوج بس اني ماجنت اصدك وجنت دائما اكلك شلون يعني يحتاجولي وانته ماجنت تجاوبني ،،، بس هسه عرفت شتقصد ،،،،،، عرفت هم يحتاجوني حتى اسعدهم واعوض عنهم مكان اخويه ،،،، بس لاتظن راح انساك بمجرد اني غيرت تصرفاتي ،،،،
لا انته راح تبقه محفور بكلبي للابد ،،،،
