انا و أمي

الجزء 3

هاد العام عندي السيزيام درت الأدب الإنجليزي حيت تتعجبني لونجلي بزاف اما مريم دارت الأدب الأصيل و واخا هاكاك بقينا تنتلاقاو فالاستراحة، فأول حصة قالينا الأستاذ نعرفو ريوسنا، وصلات نوبتي
انا : السلام سميتي نسيمة و فعمري 17 سنة الأب ديالي متوفي و الأم ديالي طيابة
غير قلت طيابة بدا كلشي تيضحك و شي تيغمز فشي و انا مرضيتش و معجبنيش الحال
انا : مالكم تضحكو ياكما قلت شي نكتة
نطق واحد و قال : اسكتي عندك الوجه تقولي ماما طيابة هاهاهاها
انا : اه نقولها و راسي مرفوع حيت ماما إمرأة شريفة هي اللي رباتني و كبراتني و قراتني، ماما تتخدم بعرق كتافها و تتجيب رزقها حلالا طيبا، ماما هي اللي منحاتني الحياة و حيدات الحاجة لراسها و عطاتها ليا و متنحشمش منها بالعكس تنفتخر بها و غنبقا نفتاخر بها حتا نموت .
كلشي صقل و داك الدري تكمش فبلاصتو معاودش نطق و انا رجعت لبلاصتي عادي و فاش سالات الحصة جا عندي دا الدري
هو : سمحيليا اختي والله مقصدت نهينك ولا شي حاجة
انا : لا عادي موقع والو
هو : متأكدة؟
أنا : اه والله أصلا دكشي ولا من الماضي تمسح
هو : المهم انا سميتي عادل
انا : مشرفين
عادل : عطيني نمرتك باش لبغيتك نعيط ليك
انا : معنديش تيليفون
عادل : المهم هايا نمرتي لحتاجيتيني غي صوني نجاوبك
انا : واخا
داز داك النهار عادي و رجعت للدار لقيت ماما ناعسة و دايرة فوطة على وجهها
انا : ماماتي هاني جيت
ماما : بنتي على سلامتك
انا : مالكي واش عيانة مال وجهك صفر
ماما : غا راسي تيضرني و صافي
انا : لا ضاراك شي حاجة أخرى ماما متخبيش عليا
ماما : عييت ابنتي ديك الخدمة مبقاتش مسلكاني
انا : حسن عوانك شحال من عام و انت معذبة معايا و كبرتيني و قريتيني سمحيليا
ماما : الهبيلة راكي بنتي و كبدتي متبكيش را فاش تتبكي قلبي تيتكوا
انا : واخا
انا واخا نبان قوية و الهضرة ديال بنادم متتأثرش فيا ولكن نقطة الضعف ديالي هي ماما منقدرش نشوفها تتعذب و هي من طبعها تتخبي فقلبها و متتبينش و تتحاول متخلينيش نحس بالنقص من أي جهة، مسحت دموعي و غطيتها و الليل كلو منعستش، بقيت تنفكر حتا انا نقلب على شي خدمة نعاونها بيها، الغد مشيت للسويقة خديت طرف ديال التوب كبير و إبرة و الخيوط ديال الطرز و رجعت للدار فصلتهم و بقيت كل مرة تنلقا شي وقت تنطرز فيهم شوية و فاش ساليتهم كلهم ديتهم للمدينة و اتفقت مع مول التوب لتمشاو ليه انبقا نبيعهم ليه و دكشي اللي كان، كان تيعطيني التوب تنطرزو و فاش تنساليه تنعطيه ليه و تيعطيني شي بركة، فالأول ماما مكانتش موافقة ولكن فاش شافتتي متلهيتش على قرايتي و وليت تنعاونها عجبها الحال، نهار عيد ميلادي 17 جات عندي نجلاء تتعوج فحال ديما
نجلاء : حبيبة مبروك عقبال 100 عام
انا : ربي يخليك
نجلاء : هاوا الكادو ديالي باش متقوليش نسيناك
انا (فرحت) : شكرا بزاف
فاش حليتو تصدمت حيت هو نفسو الكادو اللي جبتو ليها، هي دارت واحد الضحكة صفرة
انا : كادو زوين شكرا
نجلاء : ماشي مشكل أصلا را ماشي شي حاجة
انا : ولكن الأهم ماشي قيمتو المادية ولكن القيمة ديالو انك تفكريني و تفكرتي عيد ميلادي شكرا
نجلاء : اه بصح
مشات تتفقص و انا تنضحك على تفكيرها معرفتش شنو قصدات بدكشي ولكن شغلها هاداك .
داز العام دغيا و دوزنا الجهوي و نجحت و ماما فرحات بيا بزاف، ديك العطلة خدمت فواحد المخبزة واخا ماما مبغاتش ولكن قنعتها، تحسنات الحالة ديالنا و دوزت ديك العطلة مبين الخدمة و فاش تنرجع تنقرا روايات بالإنجليزية، فالدخول شريت الأدوات و حويجات جداد المهم على قد الحال و وليت تنخدم فواحد القهوة تندير الميناج فاش تتخوى و تنرجع مع 8 تنطيح كاو
ماما : ابنتي بزاف عليك القراية و الخدمة را خلصتي تتكفي
انا : الا مبزاف موالو أصلا تتجي واحد السعاية تتجلس تحسب فلوسها و تنشدو الحديث تتفوج عليا عرفتي واقيلة غا قلبي الحرفة عرفتي مكاين غا الالفينات تيتشيرو
ماما : الله ينجيني نموت و منمدش يدي لشي واحد
انا : الله ينجيك أصلا شكون فحالك خصكي تاخدي اللقب ديال أنقى وحدة فالعالم مكاينش شي واحد تيتحمم كل نهار
ماما : ههههه احياني عليك العفريتة
انا : يالاه انا انعس غدا عندي 8
ماما : ألله يصبحك على خير
انا : و انت بخير
دازو دوك الأيام عادي حتال نهار سقنا الخبار را عمي مبارك مات، هو اللي كنا كاريين عندو الدار، مشات ماما عزات و فاش فاتت الجنازة جا ولدو عند ماما و قاليها خويو الدار، فاش رجعت لقيتها مهمومة و تتخمم و ماما تتشدها منين خفافت ولكن ليوم العكس، جلست حداها و هي عنقاتني و بقات تتلعب فشعري .
انا : ماما مالكي
ماما : ولد مول الدار جا الصباح و بغانا نخويوها
انا : كيفاش ياك من نهار تزوجتي انت و بابا الله يرحمو و نتوما كاريين عندهم و ديما فلوسهم تنحطوها فالوقت باينا حق يجريو علينا .
ماما : الدار دارهم ابنيتي معندنا منديرو
انا : يا ربي تسهل علينا
ماما : آمين