انا و أمي

الجزء 14

داز شهر بنفس الروتين و ياسين لقا واحد الخدمة مع واحد صاحبو فطنجة عندو شركة عاد بداها، كانت فرصة عمل زوينة لياسين و انا شجعتو باش يقبلها واخا مبغاش يخليني بوحدي فكازا ولكن قنعتو و فالاخير اقتنع، مشيت معاه حتا قاد امورو و استقر و توادعنا و انا رجعت على أمل نتلاقاو فاقرب وقت، بقينا على اتصال تنهضرو كل ليلة و تنعاود ليه على نهاري كيف داز، فقت فطرت و توجهت للشركة كالعادة نخدم حتا دخل شي واحد و سورت الباب، انا : موسيو أرسلان ياك لاباس، هو (قرب لعندي و حط يديه على البيرو و تحنا لعندي) : مبقيتش قادر نصبر مبقيتش قادر حتالين غنزيد نتسنا ليوم بغيت نسمع جوابك واش قابلة تكوني معايا ولا لا، انا : باقا مفكرت مزيان، هو : 3 شهور و انت تتفكري و باقا معرفتي، كل نهار تيفوت تنبغي نحماق راني تنبغيك فهميها صافي، انا : صافي موافقة، هو كان غيطير بالفرحة فاش سمعني قلت هاكاك، قرب وجهو ليا و انا منعتو : أرسلان دكشي ماشي دابا خلي حتا نتزوجو، هو : ولكن را عادي، انا : بالنسبة ليك و لكن بالنسبة ليا انا لا، هو : صافي الحاجة اللي تريحك هي اللي نديروها، انا : ولكن عندي شرط، هو : شنو هو، انا : منعلنوش على العلاقة ديالنا مبغيتش الموظفين فالشركة يعرفو خلي علاقتنا تبقا عادية هنا واخا، هو : واخا كلامك معقول، مكنتش مرتاحة لدكشي اللي درت، تنحس براسي تنلعب لياسين مور ظهرو ولكن معندي مندير، داز شهر مور الحوار ديالي مع أرسلان، كنت تنخرج نتعشا معاه بعض المرات و تندير راسي فرحانة و عاجبني الحال، و لكن قلبي تيكون مقبوض عليا متنتهنا حتا تنتفارقو، شحال من مرة حاول يقرب ليا ولا يبوسني ولكن تنرفض بحجة دكشي مور الزواج، تعرفت على عائلة ياسين بصفتي البنت اللي تيبغي، كانت تتكون من الأم و الأب و جوج الخواتات و جوج خوت، ياسين هو الاخ التاني و البنات هوما الصغار وحدة فيهم مزوجة و وحدة عندها الباك ،كانو كلهم ضريفين معايا و عاملوني فوق مزيان و رحبو بيا بزاف، دازت 3 أشهر و انا فعلاقة مزيفة مع أرسلان، حسيت بيه طاح فيا بالبيان و جا الوقت باش ننتقل للخطة رقم 2، بعدما جمعت واحد الضوسي عامر بالفضايح عليه و جميع الاختلاسات ديالو و تسجيل صوتي كيعترف ليا فيه بكلشي، ضربات 12 ديال الليل، لبست كسوة فالاحمر غامق قصيرة و لاصقة، درت مكياج مثير و عكر باين، طلقت شعري و درت عطر مثير، شفت فالمراية بنت بحال بحال بنات الليل تفو كرهت راسي و حشمت مني ولكن معندي مندير، هزيت دكشي اللي انحتاجو فصاكي و توجهت للفيلا ديال أرسلان، دقيت و تسنيت شوية و هو يفتح ليا، بقا حال فيا فمو و بان ليا شوية و غينقض عليا، انا : متخلينيش ندخل، هو : اه تفضلي، دخلت كان غي هو بوحدو فالدار، مشيت للصالون جلست و جا جلس مقابل معايا : متوقعتش فالحقيقة شي نهار تجي لعندي فهاد الوقت للدار، انا : الحياة هادي ممكن توقع أي حاجة، انا فكرت مزيان و اتخذت قراري، انت اللي تنبغيك و انت اللي نقدر نكمل معاه حياتي، هادي مدة و انا تنحاول نقنع راسي بالعكس ولكن هادي هي الحقيقة، هو (غيطير بالفرحة) : متصوريش شحال فرحاتني هاد الهضرة، انا : :)، هو : تشربي شي حاجة؟ انا : نشرب عصير بارد لعندك، مشا تطير جاب قرعة و جوج كيسان و انا غفلتو مشافنيش درت ليه واحد الحبوب تتخدر فكاسو و بقا يشرب داك العصير و شوية بدا تيدوخ و تيدخل و يخرج فالهضرة و مبقاش قادر يهز راسو، ديتو لبيتو و كيف حطيتو نعس فالبلاصة، مشيت للصالون و جلست فوق الأرض، جمعت رجلي عندي و غمضت عيني و سرحت فأفكاري، واش هدشي اللي تندير خاطئ؟ واش خصني نتراجع؟ نحبس؟ ولكن ميمكنش صافي وصلت لنقطة إلا رجعة ميمكنش نوقف دابا، داني النعاس حتا فقت مع 4 الصباح كملت على خطتي، فاق أرسلان لقا راسو مربوط مع الكرسي و فمو مسدود و انا جالسة قدامو و دايرة رجل على رجل، بقا مدة حتا بدا يستوعب شنو واقع ليه، بقا تيتحرك تيحاول يفك راسو، انا : بلا متعذب راسك على والو مغتقدرش تفكو واخا تبقا تال الصباح، سمع عندي ليك جوج كلمات غتحل ودنيك مزيان و غتسمعني، الغد غيتعقد اجتماع غتقول فيه لكلشي راني شريت من عندك اسهم الشركة و غنولي انا المديرة عليها و انت مغتبقا رابطاك حتا صلة بيها، ماغاديش نضيعك فحقك فلوسك غتمشي للكونط ديالك فالبنك كاملة، و إذا مدرتيش هدشي غادي نديكلاري بيك و بدوك الاختلاسات دياولك را عندي ملف عامر غيديك للحبس تبقا فيه 15 عام هي القليلة، و إذا حاولتي تآديني ولا تدير ليا شي حاجة راني موكلة واحد الشخص متقدرش تعرفو هو اللي غيديكلاري بيك، غادي نفكك دابا سير لبس حوايجك و فكر مزيان باش غدا تكون واجد للاجتماع، فكيتو و بقا مدة تيحرك يديه حيت مدة و هو مربوط، هو : علاش درتي هدشي كامل؟ أنا : مدرت والو انت اللي بديتي، هو : ميمكنش نتخلا على الشركة، انا : اذا تخلا على جزء من عمرك اللي غدوزو فالحبس، هو : طلبي أي حاجة إلا نتخلا عليها بغيتيني نرجع لياسين حقو نرجعو، انا : قلت ليك شنو كاين قبلتي تبيع ليا النصف فالشركة و تكتب ليا النصف الاخر مزيان مبغيتيش راك عارف شنو غيوقع، اصلا مغتسماش ضايع، ياسين غيرجع ليه حقو و انا غنولي شريكتو و انت غتخرج هاد السوق المهم خصني نمشي دابا نتلاقاو غدا .