انا و أمي

الجزء 26

جاني الفلم حامض و انا نلبس حوايجي و مشيت لواحد البلاصة بعيدة بشي 3 كلم فيها الريزو و عيطت على سعيد : الو خويا سعيد لاباس عليك؟ هو : الحمد لله، و أخيرا قدرت نهضر معاك كل مرة تنصوني متيشدش، انا : رآ حيت الريزو قليل فهاد المناطق مرة يشد و عشرة لا، هو : بغيت نقوليك را ياسين مشا لوازان باش يقلب عليك معرفتش فينك دابا ولكن بغيت نقولها ليك، انا : حتا انا فوزان را شفتو قبيلة، هو : هضرتو؟ أنا : لا، هو : رآ عاود ليا كلشي عرفتي متصوريش شحال ندم على ديك الهضرة، وراه فسخ الخطوبة ديالو من لمياء واخا ماماه مبغاتش و لكن دار اللي فراسو و حلف ليها اذا مخداكش مياخد غيرك، نتمنى تسامحيه را أي واحد ممكن يخطأ و مادام هو اعترف بالخطأ ديالو و رجع عليه و حاول يصلحو عطيه فرصة را ربي و تيسامح شكون حنا اللي منسامحوش؟ أنا : عندك الصح المهم خليني نفكر و يكون خير، هو : اه و طرات واحد الحاجة، انا : شنو هي؟ هو : أرسلان مات، انا (بصدمة) : اشنووو باش و كيفاش؟ هو : كان مريض و مقدروش يعالجوه و انتشر المرض فجسمو كامل و مات، انا : مسكين الله يرحمو و يغفر ليه مكنتش باغا يطرا لو هدشي ولكن الموت علينا حق هذا مكتاب الله، هو : هادا مكان، انا : المهم هانا انخليك دابا شكرا على كل شيء، هو : لا شكر على واجب، قطعت و بقيت تنفكر، مسكين دابا أرسلان مات، الله يرحمو مكنتش باغا يوقع ليه هاكا ولكن هاذا مكتاب الله، ليوم الجمعة سالات الصلاة و الناس كلهم مشاو لديورهم ياكلو كسكسو، باينة غتكون خالتي مباركة قلبات عليا باش نمشي نتغدا معاهم و ملقاتنيش، اصلا مفيا اللي يجلس مع بنادم دابا، دزت للروضة نقلب على القبر ديال مي الله يرحمها، من نهار دفنوها مزرتها، أصلا من نهار ماتت مجيت لهنا، لقيت واحد الراجل تما تيقرا القرآن على الموتى سولتو و بقا تيقلب معايا حتا لقيناه، قرا عليها القرآن و رشيت عليها الما و جلست حداها و دازو بين عينيا كاع ذكرياتي معاها، بكيت شوية و داعيت معاها بالرحمة و رجعت فحالي، أصلا البكا متينفع فوالو مغينفعها غير الدعاء و شي صدقة و صافي، كنت كل مرة تندعي ليها فصلاتي و تنطلب ربي يرحمها و يوسع عليها....العشية كنت فالاوطيل تنشاطي مع شي بنات فواحد الجروب حتا تنسمع الدقان، حليت و كان زكرياء : سلام، انا : و عليكم السلام، هو : جيت عندك قبيلة بغيت نقوليك تجي تغداي معانا ساعا ملقيتكش، انا : كنت خارجة كان عندي شي شغل قضيتو و جيت، هو : اه مزيان، تبغي نخرجو انا و ياك ندربو شي دورة و نرجعو، انا : واخا تسناني 10 دقايق و نجي، هو : واخا، لبست كسوة بيضة فيها وريدات ملونين و قميجة و صندالة بلا فالبيض و شال فالغوز بارد و درت مكياج خفيف كلوز فالغوز و ايلاينر، من نهار تخاصمت مع ياسين مدرت الماكياج جيت زوينة و مع الألوان اللي لبست فاتحة و المورال ديالي طالع جيت فنة، هبطت لقيت زكرياء تيتسناني، انا : هانا جيت، هو : جيتي زوينة، انا على موالفة تنجي خايبة؟ هو : لا لا غير ليوما حالة خاصة، انا : شكرا.....ايوا فين غتديني؟ هو : تبغي نمشيو على رجلينا ولا فالطونوبيل؟ أنا : نمشيو غير على رجلينا الجو زوين نشوفو الطبيعة، هو : يالاهي، بقينا غاديين تنتمشاو و تنهضرو، تيسولني على حياتي و اهتماماتي و بقينا تنديو و نجيبو فالهضرة، محسيناش حتا لقينا راسنا فالحقول و الزرع ذهبي طويل و واحد المنظر رائع، مشيت تنجري بين الزرع و تنضحك و نغوت بأعلى صوت، شعور زوين بزاف، لقينا واحد الدراري صغار تيلعبو بالكورة مشيت تنلعب معاهم و هوما معجبين فيا كيفاش بنت عندها 25 عام تتلعب فحال بنوتة صغيرة، دوزت ديك العشية ولا أروع و رجعنا انا و زكرياء، قربنا نوصلو للاوطيل حتا بان ليا ياسين واقف تما، حبست و شديت فزكرياء و جريتو راجعين باش ميشوفنيش ولكن لسوء الحظ شافني و جا عندي تيجري حتا وقف عليا و زكرياء مافاهم والو من هدشي، ياسين : نسيمة وأخيرا لقيتك عافاكي اجي بغيت نهضر معاك، انا : مبقات بيناتنا هضرة قلت ليك شحال هادي را حنا سالينا، هو : دابا بلا عكس اجي معايا بالخاطر ولا غنديك بزز، زكرياء : مكتشوفش البنت ماباغاش تهضر معاك خلي فيك شوية النفس و سير فحالك، ياسين : انا تنهضر مع نسيمة شكون جبدك، انا : صافي قول شنو باغي تقول و هنينا، هو : بيني و بينك، انا : بففف....زكرياء سايني هنا انا جايا، هو : واخا، مشيت انا و ياسين لواحد القنت، انا : اش كاين شنو بغيتي؟ هو : بغيتك انت، انا : الا انت بغيتيني انا مباغاكش (الله يمسخني)، هو : سمعيني انا عارف راسي غلطت غلطة كبيرة فحقك و ندمت بزاف ولكن حتا انت فهميني را متصوريش كيف كنت تنحس فداك الوقت مكنتش باغي نتيق واخا شفت بعيني كنت مشوش بزاف، سمعيني انا تنبغيك و ندير أي حاجة باش تسامحيني أي حاجة، انا : صافي خليني نفكر، هو : فكري، فكري على خاطرك ولكن ديريني فبالك، متضيعينيش و تضيعي راسك معايا، انا غنمشي لكازا عندي شي شغل تما مغنفوتش أسبوع خليك تفكري فيه، انا : صافي .