انا و أمي

الجزء 6

قاديت اموري و استقريت تما، بقا الانتقام من داك أرسلان هو اللي تيبانلي، حقدت عليه بزاااف.....كيفاش و هو السباب فاني فقدت أغلى ما عندي.....عائلتي....آه كانت ماما هي عائلتي و حياتي و كلشي و بسبابو مرضات و عانات ولكن غير بلاتي دابا تشوف، دوزت ديك العطلة بنفس الروتين خدمة فالنهار و فاليل تنقرا و تنوجد باش ناخد لا ليسونس ديالي، صحبتي هاجر اللي تتقرا معايا و اللي تنشاركها الغرفة فالسكن الجامعي قالت ليا را كاين واحد التكوين لمدة 15 يوم فامريكا إلا دوزتيه تيعطيوك واحد الشهادة معترف بها غتقدر تفتح ليك آفاق كبيرة فالمستقبل ولكن خاصني ندفع خمس آلاف درهم و عاد نصايب الوراق و دكشي و انا معنديش الفلوس اللي تكفيني لدكشي كامل واخا كنت متشوقة نمشي بزاف، هضرت مع لالة نعيمة و طلبتها تسبق ليا الخلاص و تقطع ليا من الأشهر الجاية و هي شجعاتني بزاف و فرحات حيت انقدر نوقف على راسي و نضمن مستقبلي و عطاتني الفلوس و رفضات تقطعها ليا من الخلصة و اكتفت باش قالت : انت بنت الناس خدمتي مع زيد و زكرياء من نيتك و من نهار جيتي و هوما ولاو مهدنين و تيسمعو تبدلو بزاف ربما تكون هادي وسيلة باش نشكرك على دكشي اللي درتي معاهم، صاوبات ليا الوراق و دفعت للتكوين و نهار السفر مشيت انا و هاجر شدينا بلايصنا فالطيارة و محسينا حتا لقينا راسنا فالولايات المتحدة الأمريكية، أول مرة نركب فالطيارة و أول مرة نسافر بوحدي و أول مرة نفوت ارض المغرب، إحساس زوين تعرف على ناس مختلفين و تبدل الجو و تكسر الروتين، الاوطيل و الماكلة و كلشي كان على حسابهم، النهار الأول قادينا حوايجنا و أمورنا و استرحنا و النهار التاني لبست و تفركست مبغيتش نبان قل من شي حد، طلقت شعري الطويل و درت نظارات للديكور عطاوني واحد الرسمية و درت شوية المكياج و هبطنا للتحت فين كاين مركز التكوين، كانو الأغلبية أجانب، القاعة كبيرة و مجهزة مزيان، و المقاعد ملتفة على طاولة كبيرة، جلست انا و هاجر و بدا كل واحد تيعرف على راسو و الهدف من حضورو و من بعد جا واحد المدرب فهمنا البرنامج اللي انخدمو عليه فهاد 15 يوم و كانو فقرات متعددة (الاعتماد على الذات-تطوير القدرات و استغلال المعارف-فنون الإلقاء-فنون الرد.....) و بزاف ديال الأشياء و كلشي كان باللغة الإنجليزية، اندمجت معاهم بسهولة و استفدت بزاف و دغيا داز الوقت و فآخر 3 أيام دوزنا واحد الإختبار و نجحت فيه و خديت الشهادة ديالي بتميز و رجعنا للمغرب و كان هاداك التكوين سبب فتغير حياتي بشكل جذري، رجعت للسكن الجامعي و كملت قرايتي و قررت نبدل نظام حياتي فمرة، وليت تنوفر فلوس الخدمة و تنحضر التكوينات و نجمع الشواهد فجميع المجالات و دكشي خلا شخصيتي تقوى أكثر و وليت واثقة فنفسي بزاف، خدمت فواحد المدرسة خصوصية كمدرسة للغة الإنجليزية و دخلت للاصال نتعلم الكاراتيه حيت انا بنت بوحدي معرضة للخطر كثر خصوصا أنني تنسالي الخدمة معطلة و تنرجع حتال الليل، فاليديت كلشي و شديت لا ليسونس ديالي و دفعت لبزاف ديال الأماكن من بينها معهد أمريكي تابع للمركز اللي تكونت فيه اول مرة و تقبلت حيت السيفي ديالي عامر، خدمت معاهم كمساعدة تنحضر معاهم للمحاضرات اللي تيقدمو و تنعاونهم خلف الكواليس، و منين شافوا الكفاءة ديالي ولاو تيهيأوني باش نولي نلقي معاهم المحاضرات، عام دغيا داز وليت محاضرة و تندير التكوين لبنادم، فعمري 23 عام، الملامح ديالي تبدلو و وليت زوينة بزاف كلشي تيقولها ليا، شعري ولا مغطي ظهري و بشرتي ولا لونها ابيض بحال الحليب و عيني كحلين تيلمعو و الجسم ديالي الرشيق المتناسق وليت تنلفت الأنظار فينما مشيت خصوصا وأن الملامح ديالي شرقية 100% و الزين ديالي سوسي، اييه يا ماما كون تشوفي بنتك كيف ولات قرات و كبرات و زيانت ولكن الدايم الله، عمري نساك و عمري نسا أصلي، انا نسيمة بنت الطيابة باقا تنقولها و تنفتخر بيها .
شريت شقة و وليت عايشة حياتي على شكل حلقة : الدار و الخدمة و التكوينات، نهار تنبغي نكسر الملل تنخرج مع البنات صحاباتي عندي صحابات بزاف ولا تنسافر شي أيام بوحدي، ولا تنمشي عند صحبتي مريم عقلتو عليها، حتا هي كبرات و تزوجات و دارت دارها و مقابلة بنيتها جنة واحد الفلوسة تتحمق، راجلها مبغاهاش تخدم قاليك تيغير ههههه.
واحد النهار جالسة حتا عيط ليا مسيو جاك علمني را تيوجدو لواحد الندوة فلندن على تسيير الوقت و غيحضروها رجال أعمال و مديري شركات و خصني نوجد ليها مزيان و دكشي اللي درت، دوزت شهر تنبحث و نقلب هنا و لهيه و تنوجد باش يدوز كلشي مزيان، حجزت طائرة و جمعت حوايج اللي يكفيوني طول مدة بقائي تما (20 يوم) و نهار الرحلة توجهت للمطار و ركبت، جلس حدايا واحد الشاب وسيم الشعر كحل و اللحية مطراسية و العينين تيلمعو و باينة واثق فنفسو، كان جالس جيهت النافذة و انا تتعجبني ديك البلاصة .