"ကျွန်တော့်ကမ္ဘာရဲ့ညာဘက်ခြေကျင်းဝတ်မှာ... ကျွန်တော့်ရင်ခုန်သံတွေကို Tattoo လေးအဖြစ်မြင်တွေ့ရလိမ့်မယ်... အဲဒါ သူအမြတ်နိုးဆုံးသော ကျွန်တော်ကိုယ်တိုင်ဖန်တီးပေးထားတဲ့ အရေပြားပေါ်ကအနုပညာ..."
"ပင်းရေ..."
"ဗျာ..."
"နောက်ဖေးမှာထမင်းကြော်ထားခဲ့တယ် စားပြီးမှသွားနော်... အမေသွားတော့မယ်"
"ဟုတ်..."
နံနက်ခင်းတိုင်းမရိုးနိုင်တဲ့ထမင်းကြော်... ဆိုင်တွေကလိုတခမ်းတနားမဟုတ်ရင်တောင်ပဲပြုတ်လေးနဲ့ဆိုအတော်ပျော်မိမှာ...ကြက်သွန်နီလေးတစ်လုံးတောင်ထည့်မကြော်နိုင်တဲ့ထမင်းတွေဟာ...ဈေးပေါပေါနနွင်းတွေကြောင့်လိုတာထက်ပိုဝါနေမှာကထကြည့်စရာမလို... နာရီကိုကြည့်မိတော့ ၅ နာရီထိုးပြီးခါစ...7နာရီလောက်မှထရင်မီနိုင်တဲ့အလုပ်မို့ပြန်အိပ်ဖို့ကြိုးစားမိသည်...
"မင်္ဂလာပါခင်ဗျာ..."
"..."
ဘာပဲဖြစ်ဖြစ် Aircon တွေအချိန်ပြည့်လွှတ်ထားတဲ့စင်တာကြီးထဲကယောက်ျားလေးသီးသန့် Fashion Store မှာလုပ်နေရသူမို့... လမ်းဘေးမှာပင်ပင်ပန်းပန်းသွားလာနေရတဲ့သူတွေနဲ့စာရင်တော်သေးသည်... ကိုယ့်တစ်လစာတန်ဖိုးရှိတဲ့အင်္ကျီတွေကို သေသပ်အောင်ပြုပြင်ရင်းဝင်လာတဲ့ဈေးဝယ်သူကိုနှုတ်ဆက်စကားဆိုမိသည်...
"ကမ္ဘာ... ဒီမှာမင်းရှာနေတဲ့ဖိနပ်..."
မြင်ရုံနဲ့ခပ်မြင့်မြင့်အဆင့်အတန်းထဲကဆိုတာ သိသာစေမဲ့အသားအရေနဲ့ရုပ်ရည်မျိုးပိုင်ဆိုင်ထားတဲ့လူငယ်နှစ်ယောက်... ရွယ်တူလောက်လို့ထင်ရပေမဲ့ ဘဝတွေမတူနိုင်တာကတော့သေချာသည်...
"တခြားအရောင်မရှိဘူးလား..."
ဖိနပ်ကိုလှမ်းကိုင်ရင်းမေးလိုက်ပုံက သူ့နောက်မှာကိုယ်ရှိနေတယ်ဆိုတာကိုသေချာသိနေတဲ့ပုံစံမျိုး... Customer ဝင်လာရင်အနောက်ကနေမသိမသာလိုက်နေ... လိုတာရှိရင်ချက်ချင်းလုပ်ပေးနိုင်အောင်ဆိုတဲ့ Boss ရဲ့အမှာစကားကြောင့်လိုက်နေရပေမဲ့တချို့လူတွေကသူတို့နောက်ကိုမသင်္ကာလို့လိုက်တယ်အထင်နဲ့အထက်စီးဆန်ဆန်အကြည့်ခံရတိုင်းမျက်နှာကိုဘယ်နားသွားထားရမှန်းမသိတဲ့အဖြစ်မျိုး... ကြာတော့ရိုးလာပြီဆိုပေမဲ့စိတ်မထားတတ်သေးတဲ့ကိုယ့်အတွက်တော့ခံစားနေရဆဲ...
