مشاعر

المراية صديقتي

الثامن و العشرين

و اجه وليد ...
شلونچ حزن ؟؟؟
هلو عيني شلونك وليد
تدرين صار سنة و نص من داومنه .. و اتمنى تحچين ويايه ..
صدك شعجب ؟
لان من اول مرة شفتچ و اغمه عليچ دخلتي قلبي من شلتلچ على ايدي حسيتچ قطعة مني
احچي وي نفسي ( يا ربي الصوت و الاسلوب و الكلام عبالك احمد .. فدوة الصوتك حبيبي )
صدگيني كل هاي الفترة اراقبچ .. و اشوف اخلاقچ و تصرفاتچ و مجاملتچ للكل سواسية عندچ و شطارتج و اهتمامچ بنفسچ و شكلچ و كلشي بيچ عجبني
اممممم اشكرك تسلم ..
هسة معرفت ليش دگيتي عليه و بس تصيحين احمد..
هااا اي صح اني خابرتك ردت تشرحلي موضوع..
زين و احمد منو ؟؟
هااا احمد واحد كرايبنه بس خطية ب ٢٠٠٦ خطفوه و لسه ماكو فصوتك يشبه..
زين هو چان بس اقاربكم لو غير شى ؟؟
لا اقاربنه غير ..
ها خوش الحمدلله...
و شرحلي الشى الي اني چنت فاهمته اصلاً هههههه ...
و بقينه هيچ و تدرون جنت ارتاح من احچي وياه بالتلفون مو من اشوفه ..
و اذا اشوفه لازم اغمض عيوني او اندار ما اباوع عليه ابقه بس اسمع صوته ..
و راح الرهان و نسيته .. و بيوم اجه عليه بعد المحاضرة الثانية يوم الخميس شهر الثالث و بده الجو ربيع سنة ٢٠١٠
شلونچ زوزاية ...
و للعلم چنت استقبله منه عادي ..
احنه صار النه اكثر من سنة سوة مو صحيح ؟؟
اي صح ...
زوزو اني احبچ كلش و اريد اتقدم الچ ..
شنو ؟؟ صدك تحچي ؟
اي و الله قابل اتشاقه ...
بس اني لازم اگلك شئ ..
اممم اعرف غير قصدچ علمود الرهن
شنوووو انت تعرف ؟ منو گلك ؟
هند گالتلي من شافتچ بديتي تتعلقين بيه ...و اني كان الشئ عادي عندي .. لان چنت اريد بس اتقربلچ و ابينلچ مشاعري ..
و فرحت كلش و رجعت للبيت حچيت ال ماما و كيفت كلش و فرحت ... و سالتني عنه
ماما اسمه وليد مواليد ١٩٨٨ اهله حالتهم زينه مواصفاته كذا و كذا .. بس هو اقسام داخليه ..
زين لعد اصله منين ؟؟
هو بيت اهله بالناصرية ...
شنووو كل عقلچ تاخذين واحد بيتهم بالناصرية ..يعني يجوز گرايب المرة الي هجمت بيتنه كل عقلچ ..
و گمت ابچي
ماما وليد شعليه هاي شبيچ ؟؟
ماكو عوفي الموضوع و لا تحچين بيه ابد ..
ظليت ابچي و وگفت گدام المراية ..
و رجعت و حچيت وي احمد ..
شلون تالي احمد لا انت العايفني و مريحني و لا انت الي دتخليني اقدر اعيش و اكون حياة بلياك ...اه ربي المي چبير
و گلت خلي ادك على وليد
الو هلو حبيبي شلونك ؟؟
هلو حبي
شبي صوتك اشو مختنگ انت خير
و انتي همين شبي صوتچ احچيلي ؟
گول انت بالاول ؟!؟!
حبيبتي اني فاتحة اهلي و سألوا عليكم .. و گالو خوش ناس ..
بس اني ابن شيخ و فتحت عينه و رفض اتزوج من بنت سافرة و مو من گرايبنه و لا حتى عشيرتنه ..
شنو صدك تحچي ..؟
اي و الله .. و داعت امي حاولت وياه كومة و يگلي باچر عكبة تصير شيخ و يگلون هذا الي چانت زوجته امفرعة و گاضيتها بناطير و لبس ..
الحمدلله و الشكرلله الظاهر الله ما كاتبنه قسمة ..
لان امي همين رفضت لان انتوا محافظات و لان مرة ابوية من محافظتكم ..
يعني هاهيه زوزاية حتعوفيني ..
اني ما اعوفك اني باقية بالكلية و ما عندي شئ .. و انت ابقه احچي وي اهلك و اذا رضوا و اني بعدني موجودة نتوكل على الله ..
و سديت التلفون و دك و لطم و شلعت شعري ..
اولي على حظچ حزن .. وچ يوم مو حرام عليچ سميتيني هيچ اسم .. وچ يم هذا اسم نحس ..
اويلي عليه يا ربي اه ربي .. ريحني ربي فدوة الاسمك و اسم حبيبك و كل الاامم و الاولياء و الصالحين ..
تعبت ربي تعبت ...
و رجعت حالتي تنتكس و صارت اسوء و اني على ابواب امتحانات و بس اريد اخلص السنة ..
و صارت بيه حالة كلما اروح للدوام و ارجع احچي بالمراية وي احمد ..
اليوم اكلت كذا قرينه كذا هيج حچه الاستاذ امي كالت هيچ ..
و راحت ضحكتي و حتى ابتسامتي و بالبيت ما احچي ابد .. ابد و بس مگابلة المراية.. و ظليت بس ادعي ربي بس خلي انجح ..
ربي لا تخليني اوگع بالكلية و اصير مضحكة ..
ربي عيني فدواتك اللهي ..
و اجتي بسمة عليه فدوة زوزو شجعي روحچ شلون لعد اني انجح و اني سادس ؟ غير استمد منچ القوة
طبعا بسمة همين بطلت من صارت ظروفي حتى تساعد امي و رجعت هالسنة من صرت ثالث تمتحن سادس خارجي..
و امتحنت و نجحت بالگوة على الحافة ..
و بسمة نجحت الحمدلله و جابت ٨٢% ...

و للقصة درب لاخ