مشاعر

الزواج الثاني

الفصل الثاني:
و فزيت من صفنتي على صوت ابو طيب ...
حزن وينچ ؟؟؟ ها عيني جايتك ...
وين الچاي ؟؟؟ أريد أروح للمحل ...كله من وراج لو باقية السيارة چان هسة آني مرتاح و اشتغل بيه و أطلع و أرجع براحتي ...
الله يرزقك عيني بحسنات جهالك رزقه موجود وين متروح ..
شنو هذا الأيمان الي نازل عليچ صار فترة مو چنتي كله ( شلون حظ و لو مجايه للدنيا احسن )
شسوي عيوني الله هاديني مو زين هيج ؟
لا زين احسن بلكي الله يفتحها بوجهنه و نخلص من هالضيم... آني رايح
الله وياك أبو طيب الغالي
رجعت وراه نظفت البيت و رجع طيب من المدرسة جان دوامه ظهري فدوة العمره حبيبي اسم على مسمى رأسا حضني و باس إيدي و كلي ماما اكو غدة لو ابقى للعشة ..
يمه حبيبي موجود يا روحي بس غسل و بدل و يجيك
طيب حبيبي أول أبتدائي و فرحان كلش بداومه الي مضوجه بس يشتاقلي و ابد ممتعبني بالدراسة هو يرجع يكتب و اني ابقى كاعده يمه أكول أخاف يحتاج شى..
المهم صبيتله و صبيتلي جاي و رجعت الذكرياتي..
حسب محچتلي أختي همسة ..
أبوية ما أجه و يخابر امي مناك بالتلفون الارضي يكله عدي شغل ما اگدر اجي... و بقه هيچ الحال لمدة شهرين
لحد ما رجع ابوية للبيت و امي فرحت كلش و حسين و خواتي بس راجع ثكيل لا كلام و لا جايب شى بيده و حتى منام وي امي بنفس الغرفة ... و امي اجته بالليل بالهول
ابو حسين حبيبي الغالي
ها شتريدين يا مره متشوفيني تعبان و جاي من سفر؟؟
فدوة القلبك روحي انت ربي يرزقك و يحفظك للخمسة جهالك...
ابوية باوع عليها و فتح عينه يا خمسة ؟؟؟😮😮😮
لعد مو جايه دا اكلك يا غالي اني حامل اتكول همسة أبوية اندار و انطاها ظهره اي غير بنت مثل الفرحانه بيهن..
أمي ماتت قهر و باسته من راسه و كامت و ظلت تبجي
و هموسة اتسكت بيه و تمسد براسه لحد ما نامت من التعب..
و بعد كم يوم دك تلفون بيتنه .. و أمي شالته شوية و كامت تعيط و تصرخ ووكعت بالكاع و معرفنه شنو انسويله و صحنه جيرانه صحته و امي بس تبجي محد يفهم منها شى و اجه ابوية و كال..
هاي شبيه البومة تبجي
امي ردتله اني مو بومة الي متزوجها هي البومة لا والله حية مسمومة  هسة يلا عرفت ليش فتحت عينك من گتلگ خمسة اثاري الچلبه مالتگ حامل  و جان يجي ابوية و موتها الامي ضرب و اخوية و اخواتي يوخروه ماكو فايده و يكلها تسواج و تسوة عشيرتج و حتجيبلي أحسن ولد مو مثلج بس بنات
أمي تخبلت لمت غراضنه و غراضها و دا تطلع من البيت و صاح ابوية ..
سكينة اذا طلعتي من بيتي مترجعيله ابد
و طلعت امي ... و بده النحس الي جبته الاهلي و النفسي من اتحركت أبطن امي ..

و للقصة يُتم بوجود اب..