لو طللعو فاتن و فطومة دي بوقفو الشارع على فد رجل ......بس طبعا في حدودهم و ما عندهم قلة ادب مع زول ولا حصل عملو علاقات ولا حصل عملو حركات ابهاتهم صعبين بقتلو طوالي .......و بعدين زمنهم داك ما زي هسي ما كان في غير التلفون الثابت .......و التلفون الثابت زاتو نادر تلقى زول عندو إلا ابوها عشان ناس الشغل بتصلو بيهو .....
.طبعا فطومة حبت ولد خالتها اسمو جلال ........طبعا ما زي حب اليومين ديل لالا .......ما كلمتو ولا هو بقدر يفتح خشمو معاها بس ساي بتحكي لي فاتن عن اعجابها بيهو و بي رجولتو معاهم و بترسل ليهم اي مكان و نافعهم اكتر من اخوانها و كذا .......كانت بتسالها العاجبك منو و بتحبي منو .......قالت ليها ........ هووي انا لا بحب ولد ولا شي هو اللي يحبني انا ما عندي شغلة .......طبعا كانت فاتن بتحسد فاطمة صحبتها دي جدا بس ما بتظهر ليها .......بتحسدها مرات في اللبس البجي فيها حلو .......بتقول ليها سلفيني ليهو و مرات تقول ليها ارح السوق .......لو فاتن معاها قروش بتمشي علي الاقل اكتر من قروشها ما بتتعتع من حتتها ......
.و كانت كمان بتحسد فدوى أختها تحت تحت بالذات في دراستها و تفوقها بتغاتت عليها في شغل البيت بترميهو عليها عشان ما تقعد مدنقرة في الكتب الليل و النهار كدا .......طبعا لما وصلو تالتة ثانوي .......كان خلاص دي بداية الالفينات بالتحديد 2001 .......و كمان فاتن جابت 56 % .......و فطومة كمان جابت 58 % فاتتها بي اتنين و حسد تها فيهن و اتغبنت منها و قاطعتها عديل لانها كان اول مرة تفوتها .......لقت ليها كلية برضو بس ما بالحيل على القراية كانت ........
.جاتها فطومة رغم انقطاعها عنها......... قالت ليها والله يا فاتن انا اتخطبت و ما بتصدقي الخطبني منو .......طبعا اتخلعت قالت ليها ما تقولي لي جلال ........ياهو زاتو يا فاتن بصدقي سبحان الله .......عاينت لي فرحتها دي بي غيظ و حسدتها عليها قالت ليها اوع يكون كلمتيهو يا تافهة لانو حيستحقرك للابد ......بري والله اقسم بالله ولا بقدر اعاين في وشو خلي اكلمو .......قالت ليها مبروك كدا بي برود و هي تنططت ......قالت حس بي و الله ربنا استجاب لي ........و فاتن بتدعي بي جوة فرحتها ما تكمل مهما حصل ........كيف فاطمة تتزوج قبليني كيف احسن مني في شنو ؟ انا اجمل منها .......اتملكتها الغيرة و ما عارفة كانت بتفكر كيف .......قالت لي فاطمة مبروك ........و لازم تجي العقد يوم كدا و العرس كمان يوم كدا ........
طبعا ما اشتغلت بيها ولا باركت ليها العقد بس في العرس كان حتكون شينة لو ما مشت لي صحبتها ..... لبست و كمان معها امها و فدوى .......لبست حاجات حلوة كدا و مشو باركو و طبعا العريس ( جلال) ما عجب فاتن نهائيا اولا قصير و ضعييييف ........ جني ما جن الراجل الضعيف.......فدوى قالت ليها مالك ومالو عاجبها ...... بس كانت فاطمة عميقة ما سطحية زي فاتن .......كانت لما تحكي عنو ما بتجيب سيرة شكلو بس اخلاقو و الحاجات البعملها ......مشت دنقرت في فاطمة و قالت ليها راجلك القرد بس و ضحكت .........طبعا فاطمة ضحكت قربت تتدردق .......و فاتن قالت كلامها دا عايزة تمسخ عليها فرحتها و تمسخ عليها راجلها .......و الله ضحكت قربت تكسر الكرسي ........نادت فاتن دنقرت فيها قالت ليها عارفاك حتقولي كدا لكن عاااجبني و مالي عيني ........قالت ليها يا زولة خير تتهني ان شاء الله .......
.طبعا رجعت البيت و بقت تفكر معقول ؟ يعجبها في شنو دا بعاينو ليهو بي وين زاتو غايتو فاطمة دي جنت و بقت تضحك .......قالت مفروض ما احسدها عليهو ولا شئ ........نست موضوع فاطمة الحاسة بيها اتورطت و بقت في روحها حتمشي الجامعة كيف عايزة لبس جديد و حاجات للجامعة لانها مجتمع تاني ... و طبعا حتقعد في داخلية ......
نزلت الجامعة و طبعا مما نزلت كل الناس أبدت اعجابها و خاصة الشباب و المشاغلات بدت .......و البنات برضو علقو عليها ........كانت بتعاين لاولاد الجامعة ماف واحد عاجبها خالص خالص .......بس كان عجبها المحاضر البديهم المحاضرة كان شاب وجيه و خلاص فاتن ادردقت .........طبعا بعد فترة هو لاحظ لي فاتن اسمو دكتور مصطفى .......
بعد شهر تقريبا من الدراسة بقى يمسكها ورق و حاجات و فاتن عارفاهو معجب و ميت فيها بس طبعا هي عاملة فيها ماشايفاهو اساسا .......بس الغريبة خالص ما فاتحها في حاجة ولا حتى لمح ليها ......و في يوم قال ليها اجمعي لي اوراق العمل من القاعة و حصليني في المكتب .......بي همة طبعا جمعت كل الاوراق و مشت ليهو في مكتبو ......دخلت لقتو مافيش جاية طالعة لقتو قفل الباب كان ورا الباب مباشرة .......فاتن اتخلعت و فهمت الموضوع قالت ليهو .......لو سمحت افتح الباب ..
يتبع.....
