فاتن اتخلعت و قالت دي لكن اجيبها من وين أمجد هاجرني .......الشيخ عاين ليها و ابتسم قال ليها ممكن اساعدك لو عايزة .........فاتن اتخلعت منوو جرت بيتها .........لقت أمجد و تهاني قاعدين يتونسو .........كنتي وين يا مراة ........ك كنت اقصد مشيت لي جارتي البي جاي دي ........تاني ما تطلعي قبل ما تكلميني .......فاتن عاينت لي ضرتها قوووي و دخلت غرفتها لقت في ولد صغير عمرو زي 3 سنوات و ولدها بلعب معاهو......هووووي دا منو دا اطلع يا ولد برة .........الولد قعد يبكي و مشى لي امو .......امجد جاها داخل ......مالك عليهو الولد دا اسي؟ .........الولد ولا امو ما يدخلو غرفتي دي سامع ........كان بلعب مع عموري ولدك و مبسوطين خليهم يكونو زي الإخوان .......ما اخوان ولا حيكونو اخوان زاتو ........أمجد رفع مؤيد ولد تهاني و قعد يسكت فيهو ..........فاتن حست بالغبينة و متضايقة من تهاني وولدها .......بس صبركم على لو ما جرستكم .........
فاتن جرت عملت الخطوات تمام و جهزت اكل لي زوجها (كان الليلة ليلتها) .......ختتو ليهو و دخلت المطبخ مقلقة خايفة تقعد معاهو يجبرها تاكل ولا كمان يلاحظ لي توترها .......عملت فيها بتعمل في حاجة في المطبخ و بقت تكركب مسافة راجلها ياكل .......الحقي يا فاتن بسم الله دا مالو دا ........فاتن جات جارية لقت ولدها واقع في الواطة و مصروع .......رفعتو بسم الله بسم الله .......امجد وقف على حيلو قال ليها ختيتي لي سم في الاكل يا فاتن وصلت بيك للدرجة دي ........ماااا وقتك ارح الولد حيضيع مني .......امجد رفعو و جرى بيهو المستشفى و دخلوهو يفحصو ليهو بس مالقو عندو اي حاجة بس تشنجات و تعبان .......جاتو حمى بقو ينزلو ليهو في الحرارة و فاتن تبكي عايزة تموت ........بعدها المساء قالو ليهم سوقوهو ......فعلا ساقو البيت بس الولد بقى ما بياكل ولا بشرب. .......فاتن حست انو دا كلو منها و هي السممت ولدها .......بقت تكفت في روحها و تبكي .......نامت جنبو و بقت تحاول تاكلو بس ما بياكل خالص ولا بشرب ..........اشرحي لي الحصل للولد دا يا فاتن ؟ .........اشرح شنو اسي .........انا طبعا انشغلت و ما قدرت اكل طوالي بس عموري ولدك وقع بي وشو في الاكل و فجأة وقع دا معناها شنو ........والله ما عملت ليك اسي شئ ........خليهو يبقى كويس حسابي معاك بعدين ..........بقو بس بودوهو المستشفى يعملو ليهو دربات و محاليل .......فاتن رجعت للراجل الساحر و حكت ليهو الحصل كلو .......ولدك ما حيعيش كتير .......حسبي الله ونعم الوكيل حرام عليك عملت شنو انت .......ما عملت شئ بس الفي البخرة دا مفروض ما ياكلو زول صغير إلا راجل كبير .......طيب هو شنو عشان انا اقدر اعمل حاجة .......ممكن تعالجيهو بس تجيبي دهب ......خلاص بجيب ليك الدهب .......بس اولا تجيبي خروف تدفنيهو .......فاتن اتصدمت ......خروووف ؟ اعوذ بالله ما بقدر اعمل كدا تاني انا خايفة ربنا يعاقبني ولا ما يغفر لي .......ولدك ما حيعيش و ربك ما حيغفر ليك ابدا .......فاتن قامت جارية من الخوف وصلت البيت و هي بتبكي.......
خايفة تدخل عليه في اي لحظة تلقاهو مات .......فاتن كلام الدجال بزن ليها في راسها و اعصابها باظت بقت تصرخ براها و تكورك انا السبب انا السممتو انا السممتو كتلت ولدي ........امها جاتها تسأل من الولد لقتها بتكورك فتحت لي امها الباب و هي بتكورك امها ادتها كف ........حتى فاتن استوعبت الحاصل ........احكي كيف انتي السبب انطقي ......حكت ليها فاتن بالحصل كلو .......لا حول ولا قوة إلا بالله الراجل طاير خلي يعرس اربعة كان عايز لكن تغضبي ربك و كمان عايزة تكتلي ولدك يا متخلفة ......الراجل تسوي بيهو شنو بعد ولدك يموت .......ما عايزاهو زاتو خليهو معاها بس ولدي يا امي ولدي استغفر الله العظيم يارب. ..........اي استغفري كان ربنا يرحمك و ينقذ ولدك ........امها مشت دخلت شالت الولد زي الدلقان ودتو لي بيتهم و فاتن لحقتها .......ابوهم قال ليها لازم نوديهو لي رقية شرعية .......فعلا ودوهو لي رقية في ليلهم داك ........الشيخ رقى ليهو و اداهو موية يشربها صباح و مساء .......الولد بقى كل ما يشرب الموية يستفرغ ......لحدي اخر يوم ما استفرغ و بقى ياكل كويس و يشرب كويس ........امجد جا لي الزين اداهو ورقة فاتن و قال ليهو المراة دي ما بتلزمني لانها حاولت تسسممني و انا ما بامنها لا على ولا على بيتي .......الزين كلم فاتن و هي ما فرقت معاها بس همها ولدها يبقى كويس .......فاتن بقت بس ما عايزة في الدنيا دي غير ولدها يبقى كويس و ما تتحرم منو .........و اعتذرت لي فدوى اختها و مشت عافت الناس عشان ربنا يغفر ليها ....و ما يعاقبها بي ولدها الوحيد.........حتى في زيارتها للبلد مشت لي فاطمة و جلال و قالت ليهم يعفو ليها بس لما مشت لي زحل و سامي لقتهم رحلو .......نتمنى يعفو ليها لانو دا كلو ماضي و هي ندمت عليهو ........فاتن اتغيرت تماما بعد الحصل بي سبب مرض الحسد الكان متمكن منها و عاشت مطلقة و ولدها حاليا عمر 15سنة .......
....... الـنـهـايـة .......
#ملحوظة
*اي انسان بتولد بالفطرة ( اي عندو شوية غيرة و حسد ) بس هو ممكن يقتلها او ممكن يطورها و يخليها تستفحل و تبقى مرض عضال صعب التخلص منو ( الحسود لا يسود ) لو لاحظتو فاتن ما كانت سعيدة في حياتها كانت بس همها كلو كيف تضر دا و كيف تخرب بيت دا .......
*ما تحكو اسرار بيتكم لي زول حتى لو شفتي الكلام عادي ما تقوليهو لانك ما عارفة القدامك دا قلبو فيهو شنو ، ولا بتقدر تعرف ، لا يعلم بالقلوب إلا الله ......فاحسن تحتفظي بي سرك لي نفسك و السر لما يمرق ما ببقى سر ......ما تقولي دي اختي ولا دي صحبتي ما بتعمل حاجة انتي تحكي ليه اساسا ؟ بتستفيدي شنو يعني ؟ كلو كلام لا بز يد ولا بنقص بس ممكن يبقى ضدك لو الزول القدامك دا يضمر ليك شر ......
*ما بتقدر تعرف الحاسد من الراصد إلا من خلال تصرفات معينة .......دايما بحاول يصغرك قدام الناس البحبوك ، بحاول يذكر مواقفك السيئة قدام الناس نظام بهظر معاك و بضحك .......دائما حقدو بظهر ليك لما يكون عندك حاجة سمحة مناسبة ، نجاح ، ناس اجتمعو عشانك .......ما تحاول ترد بالمثل لانو حيعاديك بي مرضو القاتل دا ، خليك عادي و اتعوذ من شرو ( و من شر حاسد اذا حسد ) .......
*الحسد مرض ولو عندك الحسد حاول اقتلو جواك بي قول ماشاء الله تبارك الله اللهم زد و بارك ( ممكن عادي تتمنى لي نفسك زي فلان ، بس لما تتمنى زوال نعمة فلان عشان ما يكون احسن منك دا الحسد بي عينو ) الحق قلبك عشان ما يلوثو المرض ......الحقد بحرق قلب صاحبو .......اللهم طهر قلوبنا كما تطهر الثوب الأبيض من الدنس .......
*ما تقول فلان انا عملت ليهو شنو عشان يعمل فيني كدا ( لالا هو ما عايز سبب عشان يؤذيك أو يضرك لانو مريض ) ممكن تكون قدمت ليهو كل شئ سمح في الدنيا و برضو يتمنى ليك الشين و بكل جرأة لو قدر يسلب منك حياتك و سعادتك بعملها حتى لو هو ما مستفيد ......
تحياتي 📝 رانية محمد أحمد /أكتوبر2017
دمتم في امان الله
